حوراء

2

بعد فتره ابويه رجع للبيت بعد ما عاف زوجته  اللي ابغداد ولكاله كوستر واشتغل بيهه سايق هنا يمنه بالبصره وجان الشغل كلش قليل يعني يادوب مطلع مصرفنه واذا عطلت السياره يصلحهه بالدين ‘ ‘اخواني صح يشتغلون بس يادوب مطلعين مصروف وعلاج امي جنه هواي انحبهه لامي اني واخوتي ومن جانت تعصب وتنقهر تلزمهه نوبه الصرع ونتراكض عليهه وتقهرنه هواي وخصوصا من تكوم اتدمع عيونهه ‘ جانت امي كلش فقيره ما فديوم علت صوتهه وجانت تشتغل وكايمه بكل امور البيت بس تعبت بالفتره الاخيره واني اخذت الشغل كله منهه وكتلهه يمه ارتاحي انتي بعد اني اشتغل مكانج‘
صحيح جنه فقره وماعدنه فلوس وجانت تمر ايام صعبه علينه بس جان عدنه بيت ملك النه ‘ نستلم الحصه التموينيه والطحين  ودتمشينه ايام ومدبرينهه للعيشه ‘ صحيح الماده تخلي الانسان ضعيف وخصوصا اذا جان شخص متحمل مسؤليه بيت كامل وهوه ما عنده لا راتب ولا وضيفه ومتعبه التفكير وشلون راح يدبر باجر.
**********
ع الشارع العام فتحو مطعم زغير يبيعون بيه لفات مال فلافل وبتيته وبيتنجان يعني هذني الاكلات الشعبيه‘
جانو شباب المنطقه كلهم يجمعون يمه اللي ياكل لفه واللي يشوف صديقه ومن هل سوالف ‘ جنه انروح البيت جدي ونمر من يمه وفد يوم مرينه اني واختي سماهر اني جنت استحي اباوع ومدنگه راسي وامشي وسماهر اختي جانت كلش جريئه اتباوع وعادي عدهه اتكول اني مزوجه منو يباوع عليه ، ههههه لج باعي حوري هذا الولد شكد حلو ، يمعوده سماهر اسكتي تردين يذبحونه امشي خلنه نروح احسن ما واحد من خوانج لو ولد عمامج يشوفنه ويودي جلدنه للدباغ ، مشينه وگلت خل اباوع من جوه ليجوه ع المحل والشباب اللي يجمعون يمه والهوسه ‘ رفعت راسي دا اباوع وكعت عيني بعين ولد يشتغل بالمطعم جان صافن بوجهي ‘ دنجت ومهتميتله ومشيت كلت ويه نفسي خل اباوع معقوله هذا ديباوع عليه ‘ رفعت راسي مرة الخ وباوعت لكيته ع نفس صفنته وعايف شغله وبس يباوع عليه عفته ومشيت ‘ حسيت دكات كلبي كامت تمشي اسرع مني ‘ وامشي وابتسم ويه روحي ‘ واذكر عمامي وتلزمني الرجفه ولج حوري هاي شبيج كل عقلج لج ياحب هوه اللي مثلج يفكر بالحب غير هذوله عمامج يذبحوج ويكطعوج ويشمروج للجلاب ‘
&&&
رحت البيت جدي وصورته ما فاركت عيني وضليت بس افكر بيه الوكت كوه مشه ابيت جدي
رجعت للبيت اني ومرت عمي جليل وعيني ع المطعم بلكي اشوفه جان يطلع ويباوع عليه وهوه مبتسم كمت ما اعرف امشي وتخربطت وعثرت وردت اوكع بالكاع لما لزمتني مرت عمي  وكالت شبيج يلثوله امشي عدل وصلت البيت واني بس افكر بيه وبابتسامته الحلوه كام ميروح من تفكيري عبالك اعرفه من سنين ‘
صبيت عشه وصحت ع خواني وابويه غسل اديه وكعدنه امجد كال اني ما اريد  لان اكلت لفتين فلافل يم قاسم ‘ اني روحي طارت ورفرفت الله طلع اسمه قاسم ‘ اوف يا ربي هاي شصار بيه اخذني التفكير وروحي راحت يم قاسم وسرحت بعيد وياه ‘وجان اكب ع صوت ابويه شبيج وين رحتي صبيلي مي كتله ايي يابه اي صبيتله مي ونطيته كالي ما تاكلين لو ميعجبج‘ كتله لا بويه بس شبعانه ايي والله جوعانه هسه كود لفه فلافل من قاسم ترد روحي. شلت العشه واني بالي مو يمي تعرفون وين‘ وجان اعثر بعتبه باب المطبخ وتطشرن المواعين ابويه صاح وعمه يلثوله شبيج عتبه شكبرهه ما شفتيهه وامي كالت اسم الله يمه كومي بنيتي ‘ كمت ولملمت المواعين ورحت للمطبخ وكمت اجلف بالمواعين وادندن ويه روحي ونوبات اضحك واكول عزه ولج حوري هاي شبيج ‘ دبطلي يمعوده وينج وين الحب ‘ واضحك ويه روحي واكول بس حلووو.
رحت نمت بفراشي وكلت لازم الكالي حجه حتى اروح باجر لبيت جدي واشوفه القاسم كعدت من الصبح ونظفت ورتبت وسويت ريوك وضليت افكر شلون راح اكدر الكه حجه حتى اطلع وروح البيت جدي واشوف قاسم ‘ امي صاحت عليه كتلهه ها يمه كالتلي يمه حوري روحي ع مرت عمج عصام تريد تروح للسوك وماكو احد يروح وياهه ‘ طرت من الفرحه اي يمه صار هسه البس عباتي واروح ‘ رحت غسلت وجهي ورتبت نفسي وضليت اكرص بخدودي حتى اتصير حمره ولبست عباتي وطلعت‘
خطيه مرت عمي عصام  ما عدهه خلفه فكلما تريد تروح للسوك ادز عليه اروح وياهه وتشتري وتسوك للبيت ‘ كمت اتونس من ادز عليه بعد ماجان اكره الطلعه وياهه لان اتحملني المسواك وكوه اوصله لبيت جدي . عمي عصام ازغر من عمي جليل جان يحب الاطفال هواي ومن يشوف طفل يشيله ويلاعبه  يضحك وياه ويشمرهه بالهوه وينزل ع ايده اتحسه هواي رقيق ويه الاطفال بس مشاكله كلهه يحلهه بالقتل وما عنده بيهه كتله البشر عنده مثل شربه المي هيج شخصيته ازدواجيه مثل ميكلون ‘ اذكر مره تعارك ويه جوارين بيت جدي جان يشيل اسلاح ويكتل الرجال ضربه طلقتين براسه ‘وموبس هاي المره اكثر من مره يكتل من وره مشاكل متسوه ويحلونهه بدفع فصل ويتنازلون اهل المكتول ويطلع منهه. عمي عصام عاطل وماعنده شغله نوبات يطلع عماله يشتغل ‘ومرته معلمه بس ما متعينه بس كامت اتعلم بجهال المنطقه واطلع مصرف بيتهه ‘
قاسم ضلت عينه ع الطريق بلكي تفوت حوري واشوفهه ‘
مشيت واني مستحيه ومدنكه راسي واباوع من جوه ليجوه رفعت راسي جت عيني بعينه وجان يبتسم ‘اني دنجت راسي وابتسمت ومشيت ‘قاسم كال لصاحبه اكلك حسين منين هاي السمره الحلوه بنتمن ‘ باوع حسين كاله قصدك ذيج ام العبايه اللي دتمشي ‘كاله قاسم اي ولك هذيج الغزال لك تخبل راح اموت عليهه احسهه دتمشي ع كلبي ‘كالي حسين والك انته مستغني عروحك لك تدري هاي بنتمن لك هاي بنت سالم ابن الشيخ هادي اذا يعرفون بيك يحركوك بمكانك سد الموظوع عمي وانسه ودير بالك تحجي ولا جيب طاري
لك معقوله  هاي الحلوه بنت سالم ابو راس المصلبخ لك عليمن طالعه هيج حلوه اشو عمامهه وخوانهه كلهم مو حلوين  سبحان الله.
عمي اسكت يمعود وجفينه شرهم ترى يلحكوك وين متروح لان ذوله شرانيين وعوف البنيه ولا تفكر بيهه احسنلك‘ واخذهه نصيحه من اخوك ‘
لك حسين شدتحجي انته لك هاي دخلت بكلبي وعشعشت بيه شلون اعوفهه ‘ اوووف ياربي انته تحلهه ‘
انوب كل متمر حوري من يمي تاخذ روحي وياهه وانسه كلشي واضل بس اباوعلهه ‘
&&&
ياربي لوما عمامي واخواني اله اجي يمك يقاسم واسولف وياك وانهزم وياك ونروح لغير دنيه مابيهه حقد وكتل وكراهيه اوووف ربي شلون بيه ‘لك قاسم متكلي منين اجيت واجابك عليه وهيج خربطت احوالي ‘آآآه شلون بيه.
شلون راح يتلاكون وحوراء شراح يكون موقفهه اذا حجه وياهه قاسم ...تابعو احداث الجزء الثالث....

#ليوثي المياحي