حوراء

7

#حوراء #7#
ليوثي المياحي
&&&
لك مالكيت غير بنت ابو امجد ابن الشيخ هادي لك ذوله 8 شر والعمى مالي عيونهم ، شو كوم خل نروح لبيت شيخنا ملا عماد خلي انشوف شيكول .
طلع قاسم وابو وهمه يتلفتون يمنه يسره راحو لبيت شيخهم حجوله ع السالفه كلهه ، كللهم جيبو البنيه يمي بحمايتي خلوهه يم مرتي تبقه لما نشوف حل لهل مشكله ،
طلعت من بيت قاسم واني الخوف كاتلني وج معزايه حوري شسويتي بنفسج شراح يخلصج دمي نشف من الخوف وكوه امشي رحنه البيت ملا عماد وكعدت يم مرته واني ساكته وصافنه ع اللي راح يصير بيه ، اهلي واعرفهم شرانيين ايدهم والذبح والكتل ، ياربي انته الستار ووالحافظ.
ملا عماد كاللهم خل نروح للشيخ محمد هو لواء بالشرطه وميكدرون يوصلوله وناخذ البنيه نخليهه يمه لما ناخذ عطوه منهم وعل اقل مايهجمون ع بيت ملا عماد.
اجوي واخذوني ودوني لبيت لواء محمد خلوني يم النسوان ، واني ولا قطرة دم بقت بجسمي من الخوف ،
مابيهه مجال بس يلكفوني يذبحوني ،اوووووف ربي هاي اني شسويت بحالي ، كمت بس اللوم بحالي ،
من طلعت من بيت اهلي تركت الباب مفتوح ورايه وانهزمت من الخوف .
اجه اسعد شاف الباب مفتوح ع حيله طب يركض للبيت وشاف باب غرفه الخطار هم مدروع وشاف سمير امدد بالكاع والدم ماخذه وتارس وجهه وصاح وج حوري وينج هاي شصاير شو محد يجاوب راح يركض على غرفه امه يمه حوراء وينهه امه كالتله ما ادري يمه جنت نايمه خير وليدي خما اكو شي كاللهه لا يمه نامي نامي ماكو شي ، طلع على سمير واخذ دولكه وخله بيهه مي وغسل السمير وصحاه ، سمير من صحه كام يحجي وينهه وينهه هاي العار اليوم الا اشرب من دمهه ولك عليمن تحجي سمير شبيك كمت تهربد اكلك اختك مدخله صاحبهه بالبيت وملبسته عبايه وتكلي صديقتي والله يعلم يجوز جانت يوميه ادخله بالبيت واحنه نايمين ع اذانه ،ولك منو يتجرأ ويدخل بيتنه سمير منو ، هاذ ابو الفلافل قاسم ابو المطعم ،شتحجي سمير هذا ابو الفلافل يضحك علينه وسفه والله وسفه ، كوم سمير ، تعال وياي راحو صاحو ابوهم واخوهم الجبير امجد ، الحجايه ما نضمت وكبرت السالفه وصلت لعمامهه ، وصارت ذيج الليله عزه ابيتنه ، والليل كله بقو يتناقشون شيسوون واحد يكول نذبحهم واحد يدور فصل واحد يكول نكتلهه ونخلص من عارهه والليل كله بقو يتناكرون ، امي خطيه درت بالسالفه رادت اتكوم مكدرت وكعت ولزمتهه نوبه الصرع جوي يتراكضون اخوتي وكوه سيطرو عليهه .
شيخ ملا عماد وشيخ محمد جابو وياهم عشره من الزلم المعروفين بالمنطقه دكو باب بيتنه طلعلهم امجد ودخلهم بالبيت ،قاسم وابوه ما جوي وياهم خافو يشوفوهم ويكتلونهم ،
لواء محمد كاللهم احنه جايين ناخذ عطوه منكم انطونه اسبوع ونجي نخطب بنتكم حورا ء منكم وهيه تره عندي بالبيت مكرمه
، امجد واخوته ضلو واحد يباوع بوجه اللاخ  ، وما عاجبهم الحجي ، امجد كاللهم والحقد يتطفر من عيونه الله كريم شيخ وليش ما اجه قاسم ابو الف.... يخاف ، رد عليه شيخ محمد عمي البنيه مابيهه شي وسترو عليهه ونزوجهم وشتردون احنه حاضرين ،فكرو وانطونه خبر وبعد اسبوع احنا نجيكم ، امجد كللهم يصير خير شيخ يصير خير؟؟
طلع شيخ ملا عماد وشيخ محمد من البيت ويروحلك اسعد وامجد وجم واحد من ولد عمهم وشمرو تلث رمانات ع بيت لواء محمد بس محد اتاذه .
يبوووو كلهم جوي ابويه وخواني وعمامي راح يذبحوني كمت الطم واندب بحضي ، عمي فدوه خلصني والله يذبحوني ليش مصدكون بيه ،
شيخ محمد كللهه بنتي مو اليوم رحتلهم وشوفي لاحترموني ولا ابد وهذا اللي سووه معناه رافضين روحتنه الهم طلع التلفون واتصل بشيخ ملا عماد وكاله هذولي ناس شرانيين  وما احترمو روحتنه يمهم هسه اني اكدر القي القبض عليهم كلهم بس هذي قضيه عشائريه والقانون ما يحمينا ولازم نبقى نتلفت يمنه ويسره من نمشي احنا وولدنه واني ما اكدر احميهه لحوراء تعالو اخذوهه عدكم واني مستعد اتعاون وياكم بس البنيه ما اكدر اخليهه يمي اخاف عليهه وياريت اتخلونهه بمكان محد يندله لان ذوله شرانيين وكلشي اتوقع يسوون،
بالليل اخذو حوراء بسياره الشرطه اودوهه يم اقاربهم ابستان ومحد يندله ، كلتله عمو عماد فدوه الله يخليك لا يكولولك اهلي جيبهه تره يذبحوني فدوه لا سلمني الهم والله كلشي ممسوين بس انسولف حتى اسال قاسم عليك العباس قاسم سوينه شي موزين احجي ليش ساكت ،محد يجاوب وكلههم ساكتين .
عائله قاسم عافو بيتهم وانهزمو خافو يهجمون عليهم ،
حتى بيت عم قاسم هم تطشرو وشالو كل واحد راح بديره .
اني خلوني يم النسوان بالبيت اللي بالمزرعه ولا اكل ولا شرب خايفه من اللي راح يصير بيه ،
اتمرضت ولزمتني الصخونه وكمت ما اكدر اكوم من الفراش وبس اهذي ،واسولف بكيفي ،عيني جدو بعدك خواني وعمامي شسوو بيه ، ويردون يموتوني  قاسم وين رحت ليش عفتني قاسم موكلت اموت عليج وينك .
اجتي وحده من النسوان ايكلولهه ام علي وشافتهه مصخنه كالت يمه هاي شصاير بيج بنيتي راحت تركض وجابت مي بارد وكمادات مالت قماش وضلت يمهه والصخونه ما فكتهه راحت ام علي تركض ع ابو علي وكالتله يرجال هاي البنيه الصخونه مدتفكهه اخاف راح تموت تالي شيخلصنه واني سمعت اهلهه شرانيين وما ينحطون بالعب ، غير يكلون انتو كتلتوهه .
بيت جدي اجتمعو ابوي وخواني وكل عمامي واولادهم ، عمي الجبير جليل كام يحجي وكال شوف ابو امجد انته ابوهه لازم اجيبهه من عدهم بالقوه بالمروه هاي مشكلتهم يقبلون مايقبلون غصبن عليهم واذا ما نطوهه يروح بيهه بالالف رجال ، افتهمت هاي بنتك نكست راسنه بالمنطقه وصارت فضيحتنه ع كل لسان ، وانتو امجد واسعد وحتى سمير لازم تصيرون زلم وتاخذون حقكم بايدكم ، ابويه حط ايده ع خده وصفن كاله جليل ها شو سكتت، ابويه كاللهم اني اكول اول مره نفحصهه ونشوف معتدي عليهه لا وبعدين انقرر ، صاح بيه جليل كوم .. كوم من يمي انته مو زلمه انته عار يفحصهه هاي وين لكيتهه جبان  باوع اذا مابيك تكتلهه بايدك احنه نكتلهه ونكتلك وياهه سمعت لان انته جبان وعار واحنا منريد بعشيرتنه  واحد عار
اتصل بعمي جليل شيخ محمد وكاله شوكت تردون نجيكم حتى نفض المشكله ، عمي جليل كاله يوم الجمعه واتفقو على انو يجيبون عشيره محايده حتى تشهد ع الصلح اذا صار بين العشيرتين ، عمامي واخواني اتفقو ان عمي الجبير جليل هو اللي يحجي باسمهم .صار يوم الجمعه والكل محضر نفسه ومحضر سلاحه وياه لتكول طاب بجبهه .
اجه لواء محمد وشيخ عماد ومجموعه من زلم العشيرة المعروفين بالمنطقه طبعا شدو خيمه جبيره بالمنطقه جدام بيتنه وكعدو بيهه وجت العشيره اللي راح تشهد ع المشكله ، كعدو عمامي وخواني ووزلم من عشيرتنه كبال شيخ محمد واللي وياه، عمي خليل كام يحجي وبده بالحديث عن اللي صار شوفو عمي ابنكم لكينا ابيتنه ومقشمر البنيه ومنطيهه حبوب مخدره تطحنهه وتنطيهه الامهه وخوانهه حتى ينامون وهيه اتدخل قاسم ، وكام يضيف كلام ما حصل اصلا راد يتبله على حوراء وقاسم ويكبر الموضوع حتى يزيد من مبلغ الفصل ،هذولي صفنو ع كلامه شنو هل كلام وكلهم يدرون كل الكلام اللي حجاه مابيه اي صحه بس ميكدرون يردوه خاف يتازم الوضع ويتخربط كل اللي سووه وبقو ساكتين ،
شيخ محمد كللهم عمي البنيه بعدهه عذراء ومحد جايسهه ، واحنه جايين خطابه نخطبهه الابنه قاسم واحنه حاضرين ندفع مهرهه شكد مطلبون، ودخله الولد للبيت كل العشاير تعرفهه غلط ومستعدين نفصلكم ،جليل راد يطلع باكبر مبلغ من الفصل وراد يقشمرهم ، كللهم ميخالف خوش حجي جيبو البنيه سلموهه النه وبعدين تجون تاخذوهه عروس من بيت ابوهه ،
شيخ محمد يعرف مراح يخلووهه بحالهه اذا سلمهه الهم كاللهم لا راح نوديهه لبيت جدتهه الي هيه ام امهه ومناك يزفوهه وصار الاتفاق وشدو رايه العباس ع هل اتفاق.
رجع الشيخ محمد واللي وياه فرحانين وما مصدكين واخيرا انحلت المشكله، راحو للمزرعه ديبشرون حوراء وكلولهه انحلت المشكله بويه وراح انوديج البيت جديتج ام امج ومناك نجي ناخذج ونزفج لقاسم ، حوريه فرحت وبين ممصدكه وبين مصدكه لبست عبايتهه وصعدت بالسيارة والطريق كله تدعي وتشكر الله انو حل المشكله وراح يجمعهه ويه جبيبهه قاسم ،وصلنه البيت جديتي رحت اركض وحضنتهه وكمت ابجي والله جده ممسويه شي الله يخليج جده احميني منهم ، جده عفيه جديتهه ما انكسر خاطرهه عليهه ولا حجت اي كلمه ، شيخ محمد كاللهه هاي امانه يمج علما نجي وناخذهه عروسه من يمج ، وخلو وركبو سيارتهم وراحو ديحضرون للخطبه والعرس، جديتي خلتني بغرفه وبدون ما ادري اتصلت بعمامي وكلتلهم جابووهه يمي ، ماكو اقل الساعه وطبو اخوتي وعمامي للبيت وبدون تفاهم لبسوني عبايتي وجروني من ايدي وصعدوني بسيارة واني الطريق كله اتوسل بيهم والله مامسويه شي  رجعوني لبيتنه وحبسوني بغرفه وما خلو احد يوصل اليه ، الصبح اخذتني جديتي وعمتي وخالتي وبسياره ودوني ع طبيبه نسائيه وفحصتني الطبيبه وكالت ماما هاي بعدهه بنيه طفله ونظيفه محد ماسهه، فرحت هواي وارتاحيت وعمتي وخالتي وجديتي هم ابتسمو وبين ع وجوههم الفرح رجعنه للبيت وحبسوني بالغرفه وسدو الباب عليه ومخلو واحد يوصلي ، بعد ما حلفو خالتي وعمتي وجديتي ع صحه التقرير مال الطبيبه وانو البنيه عذراء ومحد جايسهه،
اجه عمي جليل و عمي عصام وعمي حميد وكعدو ويه ابويه عمي جليل كال الابويه شوف ابو امجد هذي فرصتك اكتلهه لحوراء وكللهم فحصناهه وطلعت مو شريفه حتى ناخذ منهم فصل جبير  هاي فرصتك حتى تغير هاي عيشتك الفكر، ابويه ما اقتنع ،بس شيسوي ميكدر يكول العمامي لا ،
&&&
يتبع واحداث توجع في الجزء الاخير.....ليوثي المياحي