حوراء

3

&&&
بالليل جدي الشيخ هادي دز على ولده وبناته وجناينه وعزمهم على العشه ‘ كعدنه وتعشينه وسوالف وضحك همه يضحكون واني بالي فلا يمي نوبات يباوعون علي واسوي نفسي اضحك وياهم بالجذب ‘ وجنت اكول اوف شوكت تخلص هل كعده‘ اريد اروح انام حتى احلم بحبيبي قاسم وكضي الليل وياه ‘ صار تالي الليل وراحو نامو ‘ بس الشيخ هادي راح نام بغرفه الخطار وهوه دائما ينام بغرفته بس ما ادري ليش هل مره نام بغرفه الخطار.
الصبح مرته كعدته وكالتله ها حجي لازم طابتلك النومه هنا خل اروح اجيبلك البريج والطشت حتى تغسل واجيبلك الريوك ‘ باوع عليهه وكللهه ولج وينج البارحه ليش ما جيتي نمتي يمي بالليل وخليتيني وحدي وملك الموت بس يفتر عليه ‘ هههه ضحكت مرته وكالتله اسم الله عليك حجي شجاب سيره الموت هسه دكول يا الله ‘ولج والله صدكيني.
يمعود حجي ما بيك شي تشتكي منه حتى يجيك ملك الموت.
كاللهه اهجس صدري شويه ثكيل ويوجعني روحي كعديلي الولد خل ياخذوني للمستشفى ‘ راحت كعدتهم من النوم وكالتلهم ابوكم ماله خلك ويريدكم اتودوه للمستشفى ‘ اجه جليل وعصام  يتراكضون ها يابه خما بيك شي شنو اليوجعك‘ كاللهم مابيه شي صدري شويه ثكيل عليه ‘ صاح على مرته وكاللهه حضري ملابسي كالتله اي حجي صار ،بدل ورتب نفسه وطلع من الغرفه وصبح ع الجناين وكبل ميطلع من البيت التفت وباوع ع داير البيت وباوع علينه وعلى مرته ورفع ايده وسلم وراح ركب السياره ‘ حسيته ديودعنه وما يرجع بعد ‘ رجعنه اني والجناين كل وحده توجهت ع شغلهه  ‘ اجانه تلفون من عصام يكول الحكونه ابويه اتوفه صارت عنده ذبحه صدريه والدكاتره ما لحكو عليه‘ صارت هوسه بالبيت وناس تصرخ وناس تعيط مرت جدي كامت تلطم وتخمش بخدودهه وشكت زيج دشداشتهه ‘ امي خطيه هم كانت تعيط وجان تلزمهه نوبت الصرع وكوه لزمناهه وهديناهه ‘التمينه كلنه وكمنه نعيط ونلطم التمت الناس اللي بالمنطقه ع العياط والبيت انترس ناس  ‘ جابو جثه جدي للبيت مخليهه بتابوت ‘ونزلوهه من السياره وحطو التابوت بوسط الحوش عمامي او ولد عمامي التمو ع التابوت وحضنوه وكامو يبجون ويصيحون يايابه يابويه وين رحت وعفتنه ومرت جدي خدودهه كامت تجري دم وصدرهه صار احمر من الدك واللطم ‘ اجوي كباريت المنطقه وكالو استهدو بالرحمن وشالو الجثه وخلوهه ع قريوله مالت حديد وسوو سياج مال بطانيات  داير مداير القريوله و صاحو ع المغسلجي حتى يغسل جثه جدي‘ كملو غسلو الجثه ولبسوهه الجفن الابيض وخلوهه بالتابوت وصاحو ع الولد حتى يشيلونهه ويشيعوهه وبعدين يودوهه للمكبره ‘ شالو الجثه ع اجتافهم والنسوان تعيط وباب البيت نزلو التابوت من ع اجتافهم وهزو تلث مرات ما ادري ليش وطلعو من البيت ‘ وراحو يشيعوه للمكبره اني دموعي خلصن من البجي باوعت وشفت قاسم ويه الناس اللي تشيع وردته بس يباوع عليه بس جان ملتهي ويه الناس ويصيح وياهم الله اكبر ولا اله الا الله.
بدت تحضيرات الفاتحه والناس والشيوخ كامت تجي من غير محافظات لان جدي جان شيخ عشيره جبيره ومعروف وهواي ناس جانت تجي عليه تاخذه يحل مشاكل الفصول ‘ اني بقيت بين بيتنه ومدادات امي لان مابيهه تروح لبيت جدي لان مريضه ومريدهه تنقهر ومابين بيت جدي حتى اساعدهم بالطبخ وغسل المواعين والتنظيف والشغلات الاخره جانت المسافه كلش قريبه بين بيتنه وبين بيت جدي‘ اخواني وعمامي كلهم مشغولين يستقبلون الناس والشيوخ ويودعوهم ‘ بقينه ع هل حال تلث تيام ‘الناس ما انكطعت اضطرينه انمدد الفاتحه وسويناهه سبع تيام ‘ وكمنه كل خميس من الاسبوع نطبخ ونجيب قارئ قرآن يقره ثواب ع روح جدي ‘
اني من توفه جدي اشوف قاسم نوبات بالفاتحه ونوبات من امر من يمه بس اني بيا حال لان جنت مقهوره ع موتت جدي صحيح جان قاسي هواي بس جانت بكلبه حنيه علينه  وجان يحبني هواي وجان يصيحني حوري ومشت بعدهه عليه ‘ واكيد عمامي بعد جدي راح يتفرقون وكل واحد يروح بديره لان جدي جانت شخصيته قويه ومحد يكدر يكسر كلامه.
وفد مره رجعت من بيت جدي للبيت مالتنه مريت من يم المطعم قاسم انخبص ويعلي صوته ويه واحد من المشتريه ويريد يسمعني كول عمري شخليلك ع اللفه ‘ اني رغم حزني بداخلي ضحكت كلت عزه شنو اني عنبه لو صاص حتى يخليني ع اللفه ‘ صحيح اني اتعلقت بيه ‘ بس جنت حزينه ع جدي ومالي خلك اجحي ويه اي واحد او اخلي فكره الحب ابالي ‘
&&&
اليوم خميس رحنه البيت حتى انسوي ثواب مثل كل اسبوع  اخذت عشه الامي واني بالطريق من بيت جدي لبيتنه  قاسم شافني وكالك هاي فرصه لان خوانهه وعمامهه مشغولين ابيت جدهه ‘ واني دا امشي حسيت اكو واحد يمشي وراي كلبي كام يدك عالسريع ‘ هاي منو ديمشي وراي ‘ حتى خفت التفت ‘ وصلت يم باب بيتنه سمعت صوت ناصي حوراء... حوراء.
بيني وبين روحي كلت يا عزه هذا منو اللي يعرف اسمي ويصيحني بيه جانت الدنيه ستوهه مضلمه‘ درت وجهي عليه كتلهه انته منو‘ كال اني قاسم شبيج..  البقيه بحياتج ‘‘ اني بقيت ارجف وكتله حياتك الباقيه ‘ كتله انته شتريد مني واني اتلعثم لان اول مره احجي ويه ولد ما اعرفه ‘ روح لا يجون اخوتي على بختك روح تره اخوتي ما يرحمون ولوشافوك تره يثرموك ثرم ‘ كالي ميهمني خل يثرموني وما اروح كبل ما اكلج عندي حجايه باقيه بكلبي ‘ كتله اذا انته ما تخاف اني اخاف شنو انته ما سالت اني منو ومنو اخوتي وعمامي ‘ روح احسن ما ينهونك روح انته شنو مستغني عن حياتك ‘
لا اني احب حياتي بس انتي اخذتي كلبي وروحي وحياتي ‘ لج اني احبج يبنت الناس وليلي ما نامه من كثر ما افكر بيج لج انتي ملكتي عقلي وسكنتي بنص كلبي ‘لا تخافين اخوتج وعمامج مشغولين ‘ كتله واذا مشغولين روح منا وبعد دير بالك تعيد هل حجي ‘ راح اسكت وكاني ماسمعت شي ‘ طبيت للبيت وسديت الباب وراي وانتجيت عليه وابتسمت ‘ جان اسمع صوت من ورا الباب .....
&&&
شنو الحجي الي حجاه قاسم من وره الباب وشنو موقف حوراء من قاسم .... راح اتعرفوه بالجزء الرابع .....تابعووووو......ليوثي المياحي