Dormisteryo

7

Hindi ko masabi kung anong magiging reaksiyon ko sa nangyari sa public shower area. Ang marinig lang ang mga katagang impyerno raw ang Dormisteryo at ang mga sikretong itinatago ng bawat isa sa mga dormers dito ay hindi ko talaga kinaya.

Nung una, naaawa pa ako kay Azi dahil para siyang yung tipo ng kabataang nangangailangan talaga ng atensiyon. Pero ang makita ko mismo yung ikinikilos niya? Hindi ako natuwa. Lalo na noong sumilip siya sa itaas ng cubicle kung saan ako naliligo.

I'm not against a public bathroom where everyone could see each other naked. But what Azi did to me was too much to just let it slip by. Napagtanto ko na nakababastos yung ginawa niya. It was weirdly disrespectful.

Lumabas tuloy ako ng public bathroom na tila may gusto akong pagtaguan. I don't want to see his face for another minute again. Kahit parang gusto niya akong bigyan ng babala? Wala akong pakialam dahil mas mukhang kailangan kong umiwas sa kaniya.

"Ayos ka lang?" Pambungad na tanong sa akin ni Martin nang makabalik na ako sa unit namin. Sumilip pa ako sa labas ng pinto at tumingin sa pintuan ng unit 12, nagbabakasakali kung nandiyan si Azi.

Umiling-iling ako. "Sa totoo lang, hindi. Kilala mo ba yung Azi na tiga unit 12?"

Tumango si Martin. "Oo, bakit?"

"Ang weird niya. Ang dami niyang sinabi tungkol sa Dormisteryo na impyerno raw to tapos marami raw bahong itinatago ang mga dormers dito. Hindi ko siya maintindihan, kinabahan ako nung nagkausap kami sa public bathroom kanina." Naramdaman ko ang paninindig ng mga balahibo ko.

Nakita ko sa aking isipan ang nakangiting mukha ni Azi habang nakadungaw mula sa itaas. He's really giving me goosebumps. Nakakakaba pala talaga ang magkaroon ka ng close encounter sa isang taong gano'n ang pag-uugali.

Mukhang hindi makapaniwala si Martin sa mga nasabi ko. "Talaga? Tahimik lang kasi yung taong yun e. Hindi ko pa siya nakikitang may kausap na dormer dito sa Dormisteryo. Ikaw pa lang ang una," inaayos na ngayon ni Martin ang mga bond papers niya. "Ba't naman kayo nagkausap?"

"Ganito kasi, maliligo na sana ako no'n tapos may narinig akong dumating. Walang tao sa loob ng public bathroom no'n kaya nakiramdam ako. Tapos may narinig akong nag-uusap sa cellphone, si Azi at yung nanay niya. May pinagtatalunan sila na ayaw daw ni Azi na mag-stay sa Dormisteryo dahil parusa raw to sa kaniya ng tatay niya, tapos ang sagot naman ng mama niya e wala naman siyang magagawa dahil tatay ni Azi ang nagdesisyon na dito siya patirahin," sabi ko.

"Tapos?"

"Dito na naging weird ang lahat. Matapos niyang makipag-usap sa mama niya, akala ko e umalis na siya. Pero maya-maya lang bigla na lang may dumungaw sa ulunan ko, si Azi-"

"At nakita ka niyang nakahubad?"

"May magagawa ba ako? E sa maliligo na sana ako no'n," sabi ko pa.

Biglang tumawa si Martin. "Okay, okay, that's really weird for him to do it to you. Hindi ka naman ba niya inabuso?" He slightly tilted his head.

Umiling-iling ako. "Hindi naman. Pero doon na siya nagsalita ng masasamang bagay tungkol sa Dormisteryo. Parang ayaw niya talaga dito sa hindi ko malamang dahilan. I mean, hindi ba siya nakuntento sa mga facility rito sa Dormisteryo?"

"Hayaan mo na siya, layuan mo na lang. Ikaw lang din ang mamomroblema sa kaniya 'pag nagkataon," sambit ni Martin. "O, handa ka na ba? Lumabas lang si Clyde para bumili ng coke. Pagbalik no'n, papasok na kami."

"Si-sige, ayusin ko lang mga gamit ko." Nagtungo ako sa cabinet ko. "Ngapala Martin."

"O?"

"Sa atin na lang yung napag-usapan natin a," sabi ko sa kaniya.