بكى لأجلها الجبال

البارت الثانى

البارت الثانى

سلمى الصغيرة / وهتلاعبينى وتجيبيلى حاجات حلوة
سلمى / اه طبعا هجيبلك كل اللى انتى عايزاه وبصت سلمى لوالدة محمود وقالتلها ممكن يا طنط تسيبيها تبات معايا اهه تسلينى بدل ما انا لوحدى
والدة محمود/ ماشى يا حبيبتى وقالت لسلمى الصغيرة اوعى تعملى دوشة عشان جدو تعبان جوة
سلمى الصغيرة/ حاضر يا تيتة انا هسمع الكلام
ضحكوا كلهم ونزلت والدة محمود وهى بتقول فى نفسها يا رب تحبيها يا سلمى عشان انا عارفة ان ابوكى محمود لسة بيحبها وعارفة كمان انه مش هيكمل مع امك فحبيت انى تقربى من سلمى الكبيرة ويا عالم بكره فيه اية
سلمى الكبيرة اخدت سلمى الصغيرة وهى عمالة تتامل شكلها لانها نسخة من ابوها محمود واكلتها وقعدت تلعب معاها وسلمى الصغيرة ضيعت الوقت الممل على سلمى وحبوا بعض جدا ومر اسبوع على نفس الحال تنزل سلمى الصغيرة لجدتها بالنهار وتطلع بالليل لسلمى وتبات معاها
مرت الايام تقيلة على سلمى وهى حاسة بالوحدة بسبب مرض ابوها وقلقها انه يسيبها لوحدها فى الدنيا دى لكن تعبه بيزيد
وفى صباح ذات يوم اتصلت سلمى باختها دينا
سلمى / ازيك يا دودى عاملة اية
دينا الحمد لله يا حبيبتى وبابا عامل ايه النهاردة
سلمى / لسة تعبان وانا خايفة اوى يسيبنى لوحدى يا دينا
دينا / متقوليش كدة يا سلمى يا حبيبنى  بابا ان شاء الله هيخف  وبعدين كلنا حواليكى يا حبيبتى وكلنا تحت رجليكى ورهن اشارتك
سلمى / معلش يا دينا عايزاكى تيجى تقعدى مع بابا شوية عشان عايزة اروح الشغل لان فى حاجات اتراكمت علية الفترة اللى فاتت وهحاول اجدد الاجازة
دينا / حاضر يا حبيبتى وبعدين مش عايزاكى تجددى الاجازة انا كلمت صلاح جوزى وهاجى اقعد معاكى لحد ما بابا يقوم بالسلامة
سلمى / ربنا يخليكى ليا يا دنيتى  طيب انا هقوم البس وهمشى وانتى ما تتاخريش عشان بابا ما يقعدش كتير لوحده
دينا / مسافة السكة يا حبيبتى
سلمى فى شغلها منهمكة جدا من كم الحسابات والفواتير اللى اتراكمت عليها وهى فى الاجازة لكنها كانت فرحانة ان كم الشغل ده لهاها عن التفكير فى ماضيها مع محمود وعن مستقبلها لو والدها جراله حاجة وبقت كل شوية تتصل بدينا عشان تطمئن على والدها
سلمى بعد يوم طويل روحت البيت وهى هلكانة واول ما دخلت البيت جريت على باباها عشان تطمئن عليه
سلمى/ الحمد لله يا حاج انت النهاردة احسن كتير
الحاج عبد الرحمن / الحمد لله يا بنتى المهم عملتى ايه فى شغلك
سلمى / الحمد لله يا حاجوج المهم انت اخدت الدوا فى مواعيده
الحاج عبد الرحمن / الحمد لله يا بنتى دينا قامت بالواجب بس طبعا مش زى سلمى حبيبتى
دينا / كدة يا حاج انا زعلانة منك وبعدين انا عارفة طبعا ان سلمى هى قرة العين بتاعتك
سلمى / ايوة تمام انا قرة العين عندك مانع يا ستى ...وضحكوا كلهم
دينا / طيب يا ستى غيرى هدومك عشان احضرلك الغدا ادينى بدلعك اهه
سلمى / والله انا خايفة لحسن اتعود عالراحة ههههه
مر ثلاث ايام اخرى بدون اى جديد الا انه فى اليوم الرابع اشتد المرض على الحاج عبد الرحمن واتوفى
اصيبت سلمى بصدمة كبيرة فى وفاة والدها وحزنت حزن شديد وكأن الايام مصممة على انها تفضل وحيدة وبعد اسبوع من وفاة والدها وكانت دينا وسماح مقيمين مع سلمى لاستقبال المعزين
سلمى/ سماح من فضلك روحى انتى ودينا النهاردة خلاص العزا خلص وانتوا سايبين بيوتكوا بقالكوا فترة وازواجكوا اكيد تعبوا من عدم وجودكوا فى البيت وبالاخص بنتك يا سماح اللى فى ثانوية امة عايزة منك اهتمام وانتى كمان يا دينا روحى عشان اولادك التوام دول عايزين رعاية هما لسة صغيرين
سماح / انا هفضل معاكى شوية كمان وبعدين هنتناوب عليكى انا ودينا كل واحدة هتبات معاكى اسبوع
سلمى / ملوش داعى الكلام دة واولادكوا ملهمش ذنب عشان يتبهدلوا بسبب بعدكوا عنهم واصلا انا هشغل نفسى فى الشغل فمتحملوش همى خالص
وفعلا بعد محايلات وامام تصميم سلمى مشيوا اخواتها واول ما لقت نفسها لوحدها رمت نفسها على السرير وحضنت كل احزانها وبكيت كثير جدا لانها كانت تود ان تبقى اختيها معها لانها تخاف من الوحدة وعايزة تعيش فى جو الدفء الاسرى وفضلت على حالها كدة بكاء دايم حتى استسلمت للنوم
وتمر الايام على سلمى كانها سنين وفى ذات يوم شروق فاجات سلمى بزيارتها وانها هتبات معها يومين
سلمى / اخيرا يا شروق هلاقى حد يونسنى فى وحدتى
شروق / ههه عشان تعرفى بس انى انا رجل المهام الصعبة دايما تلاقينى فى وقت العوزة
سلمى / انتى حبيبتى يا شوشو
شروق / يا سلام انا لوحدى برده
سلمى / تقصدى ايه
شروق / اممم محمود يا ستى اللى لسة مربع فى القلب
سلمى / افتكرت كلام والدها لما قالها ان والدته بتقول انه مش سعيد مع هالة وانه لسة بيحب سلمى
سلمى / تصورى يا شروق بعد ما بابا حكالى عن محمود وانه لسة بيحبنى وان والدته متاكدة من دة استغربت جدا
شروق / استغربتى ليه هو انتى كنتى عملتى معاه حاجة وحشة ولا انتى اللى سيبتيه هو اللى اتسرع وباع نفسه عشان طموحه
سلمى / تصورى انه مسمى بنته سلمى على اسمى
شروق /غريبة يعنى وهالة هانم اتكرمت ووافقت انه يسميها على اسمك وهى عارفة اللى كان بينكوا
سلمى / انا كمان استغربت
شروق / لا ماتستغربيش لان هى دايما كانت بتغير من اى حد فينا يكون معاه حاجة وهى مش معاها نفس الحاجة وكانت دايما بتستخدم فلوسها لتحقيق كل اللى هى عايزاه وطبعا انتى كنتى فاكرة محمود كان بيحبك اد اية وبيعاملك كانك بنته اللى بيخاف عليها من الهوا الطاير وهى طبعا كانت غيرانه من علاقتكوا دى وعشان كدة هى غرته بفلوسها لحد ما اخدته اما اللى بعد كدة مايهمهاش يعنى يسمى بنته على اسمك او حتى انه يكون لسة بيحبك كل دة مش فارق معاها المهم انها اخدته منك وخلاص
سلمى / بس هى ما قدرتش تغريه بفلوسها الا لما بابا رفضه وساعتها هو حس بكسرة وعوض كسرته دى بيها
شروق / يا بنتى انتى لسة بتدافعى عنه مصيبة ليكون لسة معشش فى قلبك بجد
سلمى / تعالى بس نقعد فى البلكونة لحسن انا مخنوقة اوى هنا
شروق / الله البلكونة بتاعتك روعة يا لولو انتى مهتمية بيها جدا والاجمل انها واسعة وفيها كل ماتشتهيها العين من مناظر خضرة ولا العصافير وااااو
سلمى بتنهيدة / محمود هو اللى كان جايبهوملى وهو اللى علمنى اعتنى بيهم ازاى
شروق /بصت لسلمى ووضعت ايدها على كتفى سلمى وسالتها .... لولو انتى لسة بجد بتحبيه ...؟
سلمى / ابدا خالص بس انا حزينة عالحب فى حد ذاته فهمانى الحب اللى انا كنت صايناه ومستعدة انى احارب عشانه ولقيته هو اتخلى عنه بكل سهولة عشان عايز يوصل بسرعة لطموحه
شروق / انا فعلا مستغربة انه مع اول رفض لباباكى ماحاولش تانى واستسلم لاغراءات هالة بسرعة
سلمى / بصى اللى انا عارفاه ومتاكدة منه انه كان بيحبنى جدا ولا زال انما مش الحب اللى يسيطرعلى كيان الشخص ... تعرفى ان مامته حكيت لبابا انه مش سعيد مع هالة وانهم مش مهتميين ببنتهم وبقت تيجى تقعد مع جدتها عشان هى اللى تراعيها وعلى فكرة هى بتيجى تقعد معايا هنا وفى ساعات بتبات بتسلينى وحقيقى انا حبيتها بجد
شروق / بس اوعى تكون البنت هى الطعم للوصول ليكى
سلمى / يعنى اية مش فاهمة
شروق / يعنى يخلوكى تتشعلقى بالبنت وبعدين  يحاول هو انه يرجعلك
سلمى / لا خالص لسببين ان مامة محمود بتحبنى جدا وما تتمناش لية اى ضرروممكن تقف معايا ضد ابنها كمان وبعدين اصلا انا اللى طلبت منها ان سلمى تطلع تقعد معايا لانى بزهق من القعدة لوحدى
شروق / طيب انتى كنتى بتقولى ان زميلك فى الشغل اتقدم لباباكى الله يرحمه قبل الوفاه يا ترى انتى وافقتى عليه ولا ايه
سلمى / لا طبعا موافقتش عليه انا لازم اللى هتجوزه احبه مش عايزة جواز صالونات
شروق/ طيب ما انتى حبيتى اهه كان اية اللى نابك منه غير جرح القلب وخلاص
سلمى / دة ما كانش حب دة كان حب من طرف واحد
شروق / ازاى مش انتى بتقولى انه كان بيحبك ولا زال
سلمى / ايوة بس مش الحب القوى اللى انا حبيتهوله

الحب ان اجدك دون ان اضطر للنداء                              الحب ان تاتى  قبل ان الوح لك
الحب ان يسبق سؤالك دمعى ويسبق صوتك حاجتى           الحب ان تعطى لانك تريد ولا لانى اريد

شروق / برده ازاى يعنى ماكانش بيحبك حب قوى يا بنتى دة انتوا الاتنين ما كانش ليكوا مثال فى حبكوا
سلمى / بصى يا شروق الحب اللى انا نفسى فيه هو الحب اللى يوصل بالاتنين لاعلى قمة من قمم الحب بمعنى ان كل واحد فيهم يشوف الدنيا من خلال عين نصه التانى فاهمة يعنى ايه نصه التانى بمعناها الحرفى يعنى كل واحد فيهم ما يعرفش يعيش لوحده ولو جه فى يوم اتفرقوا عمر ما واحد فيهم هيعرف يعيش لوحده وهتكون هى دي نهايتهم اما جوازالصالونات فممكن كتير جدا بيجى معاه الحب وبيكون حب صادق خالى من اى رومانسية  وبمعنى اصح بيبقى حب عشرة انما ممكن فى يوم من الايام واحد فيهم يمر بتجربة حب رومانسية مع حد تانى وساعتها هيتقلب كيانه لانه عايز الرومانسية اللى حس بيها وعايز الانسان اللى حس معاه بده لكنه فى نفس الوقت صعبان عليه العشرة اللى عاشها مع الطرف الاول وممكن يكون فيه اطفال فيحس انه مضطر انه يبعد عن حبه اللى اتمناه عشان خاطر عياله وعشرة العمر مع مراته
شروق / طيب ما حب العشرة فى الاخر هو اللى انتصر اهه يعنى دة معناه انه هو الاقوى
سلمى / ابدا مش اقوى اصلا كون ان جت فرصة انه يحب حب رومانسية معنى كدة ان حب العشرة ماامتلكهوش ولا سيطر عليه وكونه انه يسيب حبه عشان ما يهدمش بيت فممكن كمان انه يضحى بالبيت دة ويروح لحبه اما بقى حب الرومانسية فهو اشمل يعنى بيشمل معاه حب العشرة ومن المستحيل ان واحد فيهم يقدر يحس بحب تانى فمهمتى ولا لسة
شروق / يعنى
سلمى / طيب انتى تعرفى الشاعر الكبير جبران خليل جبران حب الشاعرة والكاتبة مى زيادة حب رومانسية على الرغم ان هما الاتنين عمرهم ما شافوا بعض انما كتابتهم ومراسلتهم وضحت صفات كل واحد فيهم وسيطر عليهم هما الاتنين الحب وعشان كدة ما اتجوزوش لانهم عرفوا ان لوكل واحد فيهم عاش مع حد تانى هتكون نهايته وعلى فكرة مش لازم ان الرومانسية تكون بكلام الحب اللى ما بينتهيش انما بيكون بالاحساس والتصرفات يعنى ممكن تقابلى واحد ويحبك جدا لكن مش بيعرف يعبر عاللى جواه بالكلام لكن بيتعرف بالتصرفات لما تلاقى  نفسك مش بتحسى بالامان الا معاه وبتحسى ان حمايته ليكى شملاكى فى كل مكان حتى لو ما كانش معاكى وعشان كده بر ضه بتلاقى فيه ناس كتير ليل مع نهار عمالة تقول كلام حب ومع ذلك بتبقى متاكدة انهم كدابين وعندك مثلا عمار الشريعى حب واتجوز من اذاعية وهو عمره ما شافها انما انعكس حبه على تصرفاته وممكن تستغربى ازاى الاذاعية دى قبلت انها تتجوزه وهى عارفة انه عمره ماهيشوفها وطبعا كل واحدة بتتمنى ان حبيبها يشوفها دايما فى احسن صورة انما هى كانت دايما بتقول ان عمار بيبقى فاهمها باحساسه ان كانت فرحانة ولا زعلانة بتبتسم ولا بتبكى
ومن الاخر انا معنديش اى سبب ان اتجوز واحد وانا عارفة انه فى احتمال انه ممكن يحب حد تانى غيرى
شروق / ياااااه يا سلمى دة انتى رومانسية اوى
سلمى / ابدا خالص بس كل اللى انا عايزة انى اتجوز اللى بحبه وبس
شروق / يبقى عمرك ما هتلاقيه عشان انتى اصلا مش مدية نفسك فرصة انك تعرفى حد
سلمى / يا بنتى دة نصيب ومكتوب يعنى ممكن اقابل الشخص دة فى المواصلات او حتى فى خناقة او فى اى مكان غير متوقع