خرجوا من المحاضره لقوها مخضوضه وشكلها مش طبيعي . بعد ما قفلت المكالمه مع لوجان قلقت اوي وكانت مش مطمنه وحاسه ان في حاجه كبيره اوي لانه كان مش طبيعي ابدا
اليكس : اشلي مالك في ايه ؟
اشلي : -------------- . اشلي مردتش
زاك : يابنتي ايه اللي حصل؟
جرانت حط ايده على كتفها وحاول يطبطب عليها ويقولها : مين اللي اتصل و قالك ايه خلاكي كده ؟ انتي كويسه ؟
اشلي مش مركزه خالص وبتفكر ايه اللي ممكن يكون حصل يخلي لوجان يتكلم كده .
اشلي : م م... مفيش حاجه
اليكس خدت اشلي على جمب ورفعت دقنها وقالتلها : لوجان اللي اتصل مش كده ؟؟؟
اشلي : عرفتي منين ؟
اليكس : مش محتاجه على فكره باين عليكي وبعدين هو انا عارفاكي امبارح , ايه اللي حصل اتخانقتوا تاني ولا ايه ؟
اشلي بصت في الارض مش عارفه تقولها ولا لا متردده لانها معندهاش ثقه في حد مع ان اليكس دي زي اختها بس هي مش بتعرف تمسك لسانها وبتقول في الاخر بصت لاليكس وقالت : مش عارفه قالي عايزك ضروري بعد الجامعه
اليكس : فين المشكله ؟
اشلي : المشكله انو مش لوجان اللي انا اعرفه كان متغير ومتضايق اوي ربنا يستر
جرانت : اليكس ... عايزك
راحت اليكس وهي عارفه انو هيسألها عن اشلي : نعم عايز ايه
جرانت : ايه اللي حصلها مالها
اليكس بصتله بسخريه و هي عارفه انو هيموت ويعرف مالها : ملكش دعوه وانت مالك
جرانت اتحرج وبص في الارض مش عارف يقولها ايه : انا بس عايز اطمن عليها
اليكس ضحكت اوي وبصت له كأنها بتقله انا فهماك بس ردها كان غير كدا : نعم بقى ايه دا ان شاء الله
جرانت اتحرج اكتر بس غطى على احراجه بهزار زي عادته : بطلي رخامه ... بصي مش عايز منك حاجه انا غلطان اني اصلا فكرت اكلم واحده زيك , وخبطها في كتفها وهو بيضحك
اشلي كل دا متضايقه ومش مركزه معاهم خااالص ومشغوله في لوجان والمولد اللي هي رايحاله بعد الجامعه حتى مخدتش بالها ان جرانت واليكس بيتكلموا كل دا بعيد لانها في العادي مش بتسيبهم في حالهم وبتفضل ترخم عليهم بس هي مش في المود عشان ترخم , فاقت اليكس على صوت زاك وايده وهي بتهز كتفها : اشلي انت لسه معانا ولا رحتي فين
اشلي : انا لازم امشي دلوقتي
زاك نادى اليكس وجرانت وهو بيبص لاليكس بصه رخمه او بمعنى اصح بصه فيها غيره : اشلي ماشيه دلوقتي
جرانت واليكس في نفس واحد : ليييييه ؟؟؟
ضحكوا كلهم واشلي ابتسمت ابتسامه شارده وردت : معلش لازم امشي دلوقتي
جرانت : مانا لازم اع...؟
اليكس قاطعته وهي بتدوس على رجل جرانت وقالت : طمنيني عليكي لما تروحي يا اشلي
اشلي مردتش شاورت بس براسها وهو مش معاهم خالص فاقت لما لقت حد ماسكها وبيقولها : هتعرفي تروحي كدا ؟
بصت اشلي وهي مخضوضه : جرانت خضتني انت حصلتني ازاي ؟
جرانت : انتي اصلا ماشيه براحه اوي كان سهل احصلك المهم ممكن اسأل ..... هو لوجان السبب في اللي انتي فيه دا
اشلي كانت مصدومه نوعا ما من سؤال جرانت بس حاولت مش تبين : ايه اللي خلاك تقول كدا ؟؟!!؟
جرانت : انتي رايحه تقابليه مش كده ؟ هوا اللي زعلك وخلاكي كده ؟؟؟
اشلي كانت مش مجمعه وفي نفس الوقت مستغربه من كلام جرانت مبقتش عارفه ترد تقول ايه فضلت ساكته وحاولت تسيبه وتمشي مسكها من ايدها وقالها : يبقى انا صح وانتي نازله تقابليه
اشلي رفعت صوتها وملامح وشها اتغيرت للغضب : انت اولا ملكش حق تتكلم معايا كده ثانيا انت بتتدخل في اللي ملكش فيه ثالثا انت بأي حق تدخل في حياتي الشخصيه لو سمحت سيب ايدي خليني امشي
جرانت ظهر على وشه ملامح الدهشه من اسلوب اشلي والاستغراب والاحراج ووشه جاب الوان مبقاش عارف يقول ايه , ساب ايدها وبصلها بصه فيها زعل واحراج شديد وقالها : انا اسف انا حبيت اطمن عليكي انتي زي اختي , وعموما مش هضايقك تاني .
بص جرانت في الارض ومشي , اشلي بقت مش عارفه هي كلمت جرانت كده ازاي اتضايقت اوي من نفسها ," بس هو مالوش حق انه يتدخل في اللي مالوش فيه , بس هو كان عايز يطمن عليا مش اكتر ,هو شايفني متضايقه كان لازم يجي يكلمني دلوقتي , وبعدين لوجان كفايه عليا اوي دلوقتي انا مش ناقصه , يا ترى هوا عايز مني ايه و كان بيتكلم كدا ليه " كل دي افكار في عقل اشلي عماله تفكر فيها وشغلاها مفقتش الا على صوت كلكسات كتير وفرمله جامده و فجأه لقت نفسها في الارض على الرصيف , مش مستوعبه ايه اللي حصل وسامعه صوت مش غريب علييها , حست انها عارفه الصوت دا بس مش مجمعه حاجه خالص وحواليها دوشه كتير اوي فتحت عنيها و بصت على مصدر الصوت اللي كان عمال يقولها : ردي عليايا اشلي انتي كويسه قتحي وبصيلي طمنيني عليكي , لقت لوجان جمبها وبيحاول يفوقها ويطمن عليها .
اشلي : ايه اللي حصل ؟ انا مش حاسه بحاجه انا كويسه
بصت للوجان وهي مش عارفه في ايه واتخضت لما شافت لوجان عنيه مدمعه جمبها وشكلو مخضوض عليها اوي وبيحاول يخليها تتكلم بس هي مش عارفه تتكلم حسه لسانها تقيل ومش قادره تتكلم ومبقتش عارفه تفتح ومحستش بحاجه تاني .
يا ترى ايه اللي حصل واشلي مالها وياترى لوجان ايه اللي جابه دلوقتي المفروض انه مستنيها تروحلو هنعرف كل دا البارت اللي جاي
---------------------------------------------------------------------------------------------------------------------------------------
اعذروني يا جماعه دي اول مره اكتب قصه عاميه او بمعنى اصح اول مره اكتب قصه اصلا ياريت فوت وشير لو عجبتكو ولو في اي تعليق ياريت كومنت وشكرا . :)
أنت تقرأ
الاندفاع نحو المجهول - Rush Into The Unknown
Teen Fictionغامرت بكل حاجه عشان خاطر نفسها وللاسف خسرت كل حاجه وخسرت نفسها, دي آشلي بنت عاشت في الوهم عشان ترضي غرورها وانانيتها ولكنها مرضتش لا دا ولا دا يا ترى عملت ايه وضحت بأيه؟ هنعرف كل دا في " الاندفاع نحو المجهول "
