#وجع_ناي (الناي_الحزين)
#علي_البدر
#البارت_الاول.....
ستكان جاي بيه ربع وبصفه مسجل ابو الحجرات قديم يمهن عكال وجماغ ومهفه كلهن عله فراش ممدود بالطارمه...
بويه جابر ماتشوف ابو المولد ليش مامشغل...
رحتله بويه يكول ماشغل الا تدفعون صارلكم ١٥ يوم جزه موعدكم...
استغفر الله يعني الناس مايرحم واحد الثاني شجاها العالم هذا الحر والغضب كله ويكول فلوس مادافعين يعني الرحمه ماتت،،،خل يطفي طفت عينه ان شاء الله،،،،
وراها هم راح جابر لبو المولد وكاله،،،
يمعود والله ابوي راح يموت من الحر وانت هالتشوف الوضع لا شغل لاعمل اي يعني شنسوي فدوة بس شغل هسه وباجر اذا ماجتك الفلوس اكطعها ،،،
المهم وافق ابو المولده يشغل وكاله هاي المره شغلت باجر ماشغل لو الدنية جهنم ...
جابر متخرج بس ممتعين ووين مايحطها تجي عوجه وهو متزوج وعنده بنيه وساكن وي امه وابوه بنفس البيت وعنده اخته متزوجه من ابن عمها رحمن ...
الوضع العايش بيه جابر جدا سيء ومايكدر يوفر لكمة الخبز لعايلته وابوه رجال جبير ومحد يعينه وامه مره جبيرة وزوجة جابر اللي اسمها دلال وتصير بت خاله هي الشايله البيت....
بوية انت ماتشوف الوضع ليش ماتخليني اروح اشتغل غير مكان يعني هاي منطقتنه ميته لاشغل لاعمل وهالتشوف بوية التعيينات كلها موكفينها....
...
رد عليه ابوه....
بويه وين تروح ومنو النه انه وامك تدري محد النه بس الله وانت وهاي مريتك ياهو الها...
....
..
العصريات جان يكعد جابر وي زوج اخته رحمن اللي جان مخلصها يعزف بناي كصب وهذا حاله مثل حال جابر لاشغل ولاعمل....
يمعود رحمن دعوف هالخشبه هاي وسولفلي شلون تاليها نظل هيج ...
رد عليه ...
جابر كلي شنسوي شبدينه يعني هالتشوف سوده ومظلمه بدينه...
انه لو ابوي يرضه جان رحت اشتغلت وين ماجان ولا هالعيشه الذله هاي ...
اكلك جابر نسجل بالجيش شتكول ومساع قريت يردون تطوع بالجيش...
وشيقنع ابوي يارحمن انه ماعندي مانع اذا ابوي رضه نسجل ونروح.....
....
....
جابر ورحمن دخلو على ابو جابر وقنعوه بموضوع التسجيل بالجيش بس زوجة جابر رفضت وكالت ...
ياجيش ومنو النه احنه
..رد عليها جابر..الكم الله
يعني لشوكت اظل هيج انه هم افكر ابني مستقبلي واوفر لبوي وامي حياة احسن من هاي لو شنو منتظره تعيين من هالحكومه......
....
...
ام قاسم تصير جيران اهل جابر وابنها قاسم سايق سيارة حمل واغلب الكراوي اليطلع بيهن هنه للشمال او يوصل للموصل او تكريت وصار شغله عالهذا الحال سنوات..
اكلج سليمه رجلج قاسم ماخابرج اليوم اشو صارله يومين مامخابر مو من عوايده...
لاعمه خابرني وكالي راح يبقه هناك يومين لان اكو كروة متانيهه...ياااا عمه نسيت اكلج والله...
جا شعجب ماخليتيني احاجيه والله كلبي يابس عله صوته صار يومين من حجينه وياه...
عمه والله ماكو دقيقه وراح وكال بلكت بليل يخابرنه...
الله كريم بنيتي ...كومي هذا ابنج حسوني يبجي هزي كاروكه ورضعيه وانه راح اناملي شوية ......
...
...
انت خلاص قررت تروح يارحمن ..
ياعمري الجيش هسه احسن من زمان والوضع بيه يختلف راتب زين واكل احسن اكل يعني اكيد وضعيتنه تتغيير....
اي يارحمن مو اثنينكم يعني انت واخوي جابر اقلها خل واحد منكم يسجل ويشوف شنو اليصير...
....
رد عليها زوجها...
حبي ماراح يصير غير الخير وهوه الجيش عشرين يوم هناك واسبوع هنا ...فدوة لاتعرضين....
...
...
دجاجة عرب مشوية ومحطوطه بجدر بيه تمن محشي وياها خبز وخضره وعلاكة كليجه وزهدي(نوع من انواع التمور العراقيه)...وياهن جيس صغير بيه تربه وملفوفه بعلك اخضر ....
شافهن جابر وضحك هههههههههه....صدك جذب يمه وين رايح للحرب انه هنه يومين اروح اسجل وارجع الكم...
ردت عليه امه بحنيه....
ااااااخ يجابر انت راح تروح يومين بس تاخذ الكلب والروح وياك...
الله يحفظج يايمه .... راجعلكم ماراح اطول.....
....
...
.... جانت كل خطوة يخطيها جابر ورحمن من بيوتهم وهمه رايحين يسجلون بالجيش جان وياها دمعه والف حسره من ام جابر ...وجانت كلش خايفه عله ابنها...
وجانت اول ليله صعبه عليها وناداها ابو جابر...
يمره ...وينج تعالي اليوم لاتعشيتي لا اكلتي تعاي ....
ردت ام جابر...
اااكل شلون اكل ويطب لذيذ الزاد ببطني وماسامعه صوت جابر...
كولي يالله يمره الله موجود وهوه اعلم بحال ابنج ...
يابو جابر لاتلومني كلب والده مو بيدي وروحي كلها ترد من اسمع صوت وليدي ......
...
...
يتبع
