#وجع_ناي(الناي الحزين)
#علي_البدر
#البارت_الرابع
..
وره دخول داعش لمناطق تكريت وسيطرتهم عليها وحادثة سبايكر اللي صارت وتذبحت بيها الشباب اللي مالهم اي ذنب ...بقه قاسم يفتر بالمنطقه بسيارته ومنين مايحاول يشرد تلاكيه سيطرة ماخذينها الدواعش وهوماعنده اي واحد يعرفه هناك بتكريت وبقه محتار وسيارته ضلت ماتعينه وخلص البنزين فقرر يتخله عن سيارته ويطلب الحمية من اي شخص يشوفه...وماحصل اي واحد لان اغلب الناس شردت وعافت بيوتها..
بقه محتمي بسيارته لمن صار الليل كال ماكو غيرها اشوف اي واحد من اهل الرحم يعيني...حته لو داعشي بلكت بكلبه رحمه...
مر من يم بيت وكال خل ادك الباب لان بس هذا البيت
مشتغله ضوياته..
دك الباب...
لحظات طلعله رجال جبير ومن غير مايحجي وياه قاسم كاله طب طب للبيت اكيد انته شارد من هذولة المجرمين ...
طب قاسم وحس بالامان شوية ومن دخل شاف جنود هم داخلين كبله يم الحجي....
ساله الحجي انت منين شنو جابك ..
رد قاسم اني من الجنوب واشتغل بسيارتي الحمل من سنين واليوم تضايقت وضاكت بيه الوسيعه وحته سيارتي تركتها واهلي ماعدي منهم اي خبر...
رد عليه الحجي كاله انت بأمان يم شيخ راشد وهاك تلفوني بيه رصيد وطمن اهلك وكلهم انه بخير.....
....
....
دللول يالولد يبني دللول...يعالي وجف عدوك يحلم يطول...
يمه انه زرعتك وانه اسكي بماي العيون ....ويوم بيوم اتاني اترجه محصول....يايمه يجابر عيوني نعمت وماترد الا بشوفتك يايمه ...
هاي مرتك صارت عود وذبلت ييمه عليك ....وابوك طريح بالفراش ومسبلينه للموت...
...
...
ابو جابر انه رايده ابني ماكدر بدون جابر ارحمني فدوة خابر للدولة للجمهورية خابر اتصل اريد ابني ترة ماظل عندي عكل ...ربي اخذ عمري وموتني ...
يامرة ارحميني والله حجيج يكطع كلبي وانتي تدرين ودعت جابر بيد الله وبيد اهل البيت وبجاهم يرجعنه...
انه ام انه كلبي يم ابني يربي اخذ عمري يربي شلون بيه شسوي ...
من شدة الشوك والحنيه لجابر صارت ام جابر ماتكدر تتحكم بعقلها وتفز بليل وتصيح باسم ابنها وجانت بالنهار تكعد بالباب ومن تشوف جنازة تجي مال شهيد من سبايكر تركض الها...وتسولف ويه بس بنعي...
وتلزم التابوت وتكلهم طلعولي جثته خل اشم بيه ريحة ابني بلكت شايل الريحه بلكت هناك متلاكين بلكت مسلم عله ابني ...انه ام واشم ريحة ابني بين الف واحد...
اااخ يمه انا اسال عنك اليرحون ويجون
يمه يريحة دنيتي ياتعب السنين...
...
...
بده ابو جابر يخاف عله صحة مرته لان تصرفاتها تحولت للجنون ومايكدر يخسر ابنه ومرته بهالسهولة وبدة يهديها ويجيبلها اخبار جذب عن جابر وهوه شايفينه جماعه ومن هالحجي اليهدي النفسية...
...
...
...
يمه قاسم انت بخير سولفلي وين انته...
يمه بخير وهاي ثاني مره اخابرج من بيت الشيخ راشد وهو زلمه وابن اصول واحنه هواي ببيته انه وجنود هم وياي واقرب فرصه تصير اطلع واجيج يايمه وسد الخط....
وج سليمه هذا قاسم خابرني وبخير وروحي اذبحيلج دجاجات ووزعيهن انه ناذرتهن لوجه الله ولم البنين...
...
..
اسمع ابني جابر انت راح تنام هنا بليل بهذي الغرفه وانه اعتذر بس لازم تنام بهيج مكان....كان المكان عبارة عن غرفه داخل سرداب تحت الارض...
لان تعرف يا ابني ذولة يومية يسوون جولات ويفتشون واذا لكوك ماراح يرحمونك ولايرحمونه...
...
...
...
رد عليه جابر ...عمي انه اسف والله خليتكم باحراج وخايف توكعون بمشكلة بسببي...
لاتكول هيج جابر كتلك انت صرت منه وبينه واحنه اهلك اوك ابني ...
اطمن جابر لكلام ابو عذراء وارتاحله بس كاله عمي عندي طلب...
تفضل ابني ..
اني صار يومين ما مصلي وماعرف بمذهبكم يجوزلي اصلي هنا اوميصير...
رد عليه ابو عذراء...
وليش ميصير...
والله عمي اني رجال من الريف علمني ابوي احب الكل واحترم كل الناس بس ماعرف تقاليد وعادات الاديان الغير ديني ...بس ابوي كال احترم الشخص اليستحق الاحترام وكال ابتعد عن الخلافات...
...
رد عليه ابو عذراء....بارك الله بيك وليدي وعاشت ايد اللي رباك بس احب اكلك ابني احنه مسيحين ومسامحين وطيبين مثل كلب والدك وانته هنا صلي واتعبد وبراحتك وارجع واذكرك انته منه وبينه.....
....
....
....
حس قاسم بالخطر وتوتر لان سمع الشيخ راشد يساوم بيهم للدواعش وجان يخابر باللحظه اللي يضن ان الكل نايم ...التفت قاسم ماشاف بس نفر واحد نايم يمه والباقين ماكو وصدمه من سمع الشيخ راشد يكلهم بالتلفون اليوم دزيتلكم مجموعه وبقوا عندي اثنين وراح اوديهم عكب باجر......ظل قاسم كاعد مانايم للصبح ...وسال الشيخ راشد عن الشباب ورد عليه وكاله دزيتهم لبيت اخوي البارحه لان هذا بيتي صغير....
له تابع لطفا.....
