عشقت قاتله
البارت الثامن
بس الي صار دمرني طلع عم المقتول متابعني ويعرف مكاني ولمن وصلتها لبيت اهلها شايفيني ومن طلعت رايحين عليهم والي عرفته ثاني يوم من ابوها انو عم الي قتلته يريد يزوجه استغربت كتله صدك تحجي كلي اي والله وكلي لو ازوجه او اسجنها ويلعب طوبه بيه وتعرف انت بنيه مثل اذا دخلت للسجن شيصير بيها كلي فوافق احسن واني ضطريت اوافق كلتله وينها وين اخذها كال ساعه باالاربعه باليل جاب واحد لابس مال شيوخ وعقدلها واخذها وراح تخبلت عقلي مديستوعب شي فوك الخيال الي صار طبعا مكدرت اعرف عنه شي وهيا هالمرة ازوجت بعد ماكو بيدي شي بس اني حبيتها وكلبي مثل النار عليها بس حاولت اتناسه مابيدي شي
المهم مرت تلث سنوات على زواج صفيه وكلشي ماعرفت عنه ولكن سمعت انو الي زوجها اغتالو حطوله عبوة لاصقه بسيارته ونقتل صراحه هو هوايه اذى ناس وطغه سبحان رب العالمين دائما الي يظلم ويطغي الله يكتبله نهايه سودة
المهم طبعا اني ترفعت وخلال كم يوم شفت وحدة دخلت لمكتبي لابسه ملابس مرتبه كلش بس محجبه اول مركزت بيه جفلت طلعت صفيه كلتلي شلونك ضابط امجد كتلها صفيه كلتلي اي صفيه كتله شلونج وين جنتي شخبارج ضحكت كالت على كيفك سؤال سؤال
كتلها اسف بس صارت عندي صدمه من شفتج متوقعت اشوفج بعد كالت اني هم متوقعت اشوفك مرة ثانيه كالتلي شلونك انت كتله الحمدلله كتله صدك البقيه بحياتج
كالت ها وضحكت كالت اكيد تريد تعرف شلون ازوجته كتلها اي
كالت طلع ابويه متفق وياة وبيوم الي جبتني يم امي ابويه خابرة واجه وجاب الشيخ وياة لان هو هدد ابويه يقتله ويقتل امي ويقتل حتى اختي حسب ماكلي ابويه لهذا السبب ابويه سايرك لحد مجبتني يمهم امي المسكينه مجانت تعرف لمن اخذوني من عندك لمن جنت بالتوقيف يمك اجه شافني ظل يباوع عليه كللهم ضربوها بس دربالكم احد يتقرب عليها قصدة يتعرضلي جنسين
لاتواخذتي بالكلمه فظاهر عجبته ورادني وجان يعرف بيك انت دتحميني بس مراد يصادم وياك لهذا السبب خوف ابويه وبيوم الي ازوجته اخذني لبيته جنت اتقزز منه نفسي تلعب من يتقرب عليه رجال جبير ومريض نفسين جان هوايه يضربني وجان ميخليني اطلع من البيت جنت اتمنى لو مسجونه معدومه ولا هالعيشه الي عشته وياة كرهت نفسي بس مجان طالع بيدي شي
كلهم تخلو عني بس انت وكفت ويايه واليوم اجيت اشكرك لان صدك جنت نعمه الاخ وساعدتني هوايه
طبعا من كلتلي اخ دكولون مي حار وذبو عليه صار تلث اسنين انتظرها ودكلي اخويه كل الي سويته والمحاربات الي كامو يحاربونيه علمودها وكل الي عانيته ومشاعري
هيجي راحت لان هيا معتبرتني اخ
طبعا هيا سلمت عليه وطلعت صندوك كالت هذا شي حبيت اقدملكيه قبل ماااسافر لان لحد الان اخاف الناس يشوفوني فكلت اسافر ابتعد بلكي اكدر اعيش حياة جديدة اتمنى اشوفك بخير واشكرك على كل الي سويته ويايه يمكن لو ابقه عمري كله اشكرك موكافي طبعا ماكدرت كلشي احجي بس كتله لا ماكو داعي تشكريني
هذا واجبي كالت انت سويت اكثر من واجبك طبعا من تحجي اباوع بعيونها احس كلبي ينعصر حبيتها برغم كلشي وبلحظه وحدة من شفتها صار عندي امل ولكن بكلمه منها ضيعت كل املي كتله اني اتمنالج الموفقيه وحياة سعيدة كالت اني هم اتمنالك السعادة ان شاء الله تلكي وحدة تحبك لان انت تستاهل كل خير وسلمت عليه وطلعت حسيت الدمعه بطرف عيني حسيت كلامه شعل كلبي ماعرفت ظليت الوب واشرب بهل الجكاير يمكن شربت باكيتين وبعدين شفت الصندوك مال الهدايه رحت فتحته شفت بي شي صدمني
جايبتلي ساعه وجان بي كارت مكتوب على الكارت كلمات حيرتني لان متناقضه مابين كلامه والكلام الي موجود بي
(ـ شاء قدري ان يكون نصيبي في الدنيا قليل وشاء قلبي ان يحب من كان لابد ان يكون جلادي اعترف بحب قلبي
لنفسي فقط لااني اعتقد بااني لااملك حق الاعتراف
اتمنى لك كل ماتمنيته لنفسي كنت اتمنى ان يتغير الزمان ولكن كل شيئ مضى وكان واصبحت انا لعبه في يد الزمان )ـ صفيه
العبارات هزتني جانت تفكر بيه كجلاد واني كنت اموت عليه كانت تحلم بيه وجانت تبتعد عني اعتقدت مو من حقها انو تعيش مو حقه انو تحب اني رح اموت من الخنكه من اول كلمه من العبارات الي كاتبته نزلت دمعتي واني رجال عمري ماهرني شي حبيتها شنو ذنبي وشنو ذنبه
القدر شاء انو يخليني ابتعد عنه ومجان عندي الجراءة الي تخليني الحكها واكلها اني احبج
تركته وتمنيت هالمرة تعيش حياة سعيدة لان اكيد سعادتها مو ويايه
يتبع.........
أنت تقرأ
عشقت قاتله 🔪☺
Horrorتتابع قصه حقيقيه مساء المحبه اليوم قصتنه حقيقيه ولكن احداث القصه تتكلم عن قضيه رأى عام ممكن نعتبرها وتتكلم عن ضحيه مجتمع وتتكلم عن علاقه حب ممكن البعض يعتبروها من وجهة نظرهم غلط طبعا احداث القضيه كانت بعد السقوط بحوالي ثلاث سنوات عنوان القصه ـ عشق...
