لا أريد زوجا من العروبية

الحلقة 8

حل الباب فوجهي: آش خاصك؟
مالقيت مانقول، بديت كنتفتف وكنخلط فالهدرة هاديك الكلمة مابغاتش تخرج.
هو بقا كيشوف وكيتسنا، شداتو الضحكة، قال ليا هو: صافي آجي دخلي،
أنا قلت ليه: لا لا..كيفاش ندخل ماجاياش عندك.
هز حاجب وطلع حاجب : بصح؟
بلاتي راه واحد باسم الله الرحمان الرحيم كان مريح معايا واقيلا جيتي عندو ولكن خصارة يالاه لقيتيه مشا، وبدا كيضحك.
شداتني البكية حدرت راسي وقلت ليه سمح ليا، وبغيت نمشي، جرني من ايدي بالجهد قالي
هو :آجي شفتك ماشي على راحتك قلت نضحك معاك، ياكما تقلقتي؟
بقيت حادرة راسي ومكنجاوبش. بقى ساكت شحال قالي
هو: وعلى الاقل نجلسو وديك الساعة قولي آش خاصك ياكمة حشمانة؟
وانا ديما ساكتة وحادرة راسي، ماعجبنيش كيفاش هدر وداك الضحك ماحملتوش بحالا كيضحك عليا ماشي كيضحك معايا.
ولكن آنا اللي درتها لراسي آش داني لعندو وانا مالي تعكد ليا اللسان. 

دار ايديه على حنكو: هانتي ألالة هاحنا كنتشمشو حداك حتى تهدري على خاطرك.
جا حدايا قرب لوجهي قلت ليه
انا : اويلي آش كدير؟
رجع لبلاصتو وتكى: أنتي عقلك باش عامر معمراه بالعجينة واقيلا ههه.
ناري شحال باسل، قلت ليه: وأنا ضحكك ماكنحملوش،
قلب وجهو: واش مالقيتي معامن جيتي كتجبديني، لكن انا مغنديهاش فيك.

فالصراحة جابها لاصقة، انا نيت مالقيت معامن سمح ليا جات فيك الدقة، صافي جمعت راسي وقلت نهدر معاه ونسولو آه غنسولو علاش كيعاملني بحالا ماكيناش وعلاش مكيديهاش فيا، قلت ليه
انا: علاش ديما منخلني؟
وهو يجاوبني قال ليا : نسيتي آش قلتي ليا ليلة العرس؟
هاد الهدرة كاينة والحل الوحيد هو انني نكر، درت راسي مسكينة : ناري، انا قلت هاد الهدرة؟ هادشي ماكاينش راه ماشي هاكداك.
دار عندي وشاف فيا يعني الموضوع غيكبر، ولكن انا ديما غنبقا فنفس الموقف نْكُرْ كلشي.
قاليا: وديك الهدرة لي كنتي كتقولي لماماك، ديال "غيديرني خدامة، وهو عروبي شوفي حالتو وجالسة كتبكي مالكي مزوجة بزحاف؟
وجهو حمار وعلامات الغضب بانو ومن الأحسن نوض بحالي، انا كنت باغا نجمع ونهدر شوية آش داني لهاد الصداع وانا مقفراها ولكن آجي..
انا: اجي نتا كونتي كاتسنط علينا؟
بقا كيشوف فيا زعما باش نحشم ولكن بقيت كنحنزز. 
قالي: والله ماكتحشمي هاداك النهار كنتي كتغوتي وكتهدري بالجهد، وفضحتيني كوراه كاع الناس عرفو شوهتي معاك!