دماء لا يغفرها العشق "كبير العيلة 2" ـ (سلسلة عشق الجنوبي)بقلمي منى لطفي

دماء لا يغفرها العشق "كبير العيلة 2" الحلقة 4 لـ منى لطفي

دماء لا يغفرها العشق

(كبير العيلة 2)

سلسلة عشق الجنوبي

(4)

بقلمي/ احكي ياشهرزاد(منى لطفي)

لا ابيح ولا احلل نسخ او نقل او مشاركة المحتوى بدون اذني، العمل حصري لجروباتي الجواز وسنينه وحكاوي شهرزاد(منى لطفي)

دلفت الى الداخل لتقف للحظات تطالعها في جلستها التي التزمتها طوال اليومين السابقين، لتزفر بتعب وهي تهز رأسها بعدم رضا على حال شقيقتها قبل ان تتقدم الى الداخل لتجاورها فوق الفراش وتمد يدها تربت على كفيّها المعقودين حول ركبتي الأخرى المرفوعتين أمامها، وهي تقول بحنان:

- سلمى يا حبيبتي.. مينفعش كدا، حزنك وقفلتك على نفسك هيعمل ايه؟.. ابنك وجوزك محتاجينك قوية..

سلمى بجمود ونظرات خاوية وهي تسلط عينيها على الفراغ أمامها:

- كنت بيتهيألي اني قوية.. قبل ما ألاقي نفسي مجبرة أني أخضع لقوة تانية.. قوة معندهاش ذرة رحمة ولا عدل... قوة اسمها العادات والتقاليد..

سلافة بصبر:

- سلمى يا حبيبتي أنا اللي هقولك يعني؟.. احنا عارفين انه المجتمع هنا مختلف عننا في كل حاجة، البيئة الي اتربينا فيها غير، هنا بيحكمهم العادات والاعراف، لكن احنا بابا وماما ربونا على العقل!! لازم نفكر ونتناقش ونقتنع، ما كانش ينفع تبلغي القسم، اذا كان ابوها نفسه رفض، هتقوليلهم ايه؟..

هبت سلمى واقفة وهي تهتف بغضب بارد:

- ومين قالك اني كنت هتهم اللي عملت العملة دي بس؟.. لا.. انا هتهم الام والاب.. أنا دكتورة يا سلافة والبنت – وتهدج صوتها قبل ان تعض على شفتها متابعة بصوت مهزوز حزين – لما جات لي مع مامتها انا حذرتها، قلت لها بنتك ضعيفة متستحملش، قلت لها خطر على حياتها ما اهتمتش!.. ام شافعي مش هي المتهمة الوحيدة يا سلافة... هي ما كانتش غير أداة، ولو ما كانتش هي هيبقى غيرها، لكن المجرم الحقيقي هو الاب والام..

سلافة بأسف:

- لا يا سلمى وانت الصادقة، الجاني الحقيقي في القضية دي عادات وتقاليد، وفِكر مجتمع وصلنا للالفية الثالثة والعالم كله أصبح قرية صغيرة وهو لسّه متمسك بعادات من جدود الجدود، عادات مش من الدين في شيء..

نهضت سلافة واقتربت من اختها تحيط كتفيها بذراعها وهي تقول بأناة:

- متزعليش من شهاب يا سلمى عشان صمم انك ما تقدميش البلاغ، دا من خوفه عليكِ، مش عاوزك تكسبي عداوة البلد هنا خصوصا وانه ام شافعي دي معروفة اوي هنا في البلد، واللي حصل دا طبيعي عندهم، فاتن الله يرحمها لا هي اول بنت اتختنت ولا آخر بنت هتتختن، وكمان مش اول بنت تموت من الختان، لكن انت عرفتي عشان الحالة جات لك، انا متاكدة انه فيه كتير بيحصل لبناتهم زي اللي حصل فاتن ومش بيتكلموا، تمام زي ما عمل ابوها، هو مش قالك أمر الله؟..