#تائهة_بين_ارقة_الماضي
#بقلم_الكاتبة_nuha-d-h
مساء الخير والسلام على اهل السلام مساءاً محملاً بالدعاء لأهلنا واحبابنا في كل انحاء العراق
🌹🌹🌹🌹🌹🌹🌹😊😊😊😊😊😊😊😊😊😊😊
ضاري
كاعد بالمكتب والشغل واصل لراسي اتصلت على رفاه واعتذرت منها وكلتلها اتعشي
لتنتضريني راح اتأخر اليوم
جنت اكتب بالقوائم وعندي معميل جاي اتحاسب وياه شغلة حوالة
وصلتني رسالة عالواتساب تركتها وكملت شغلي وطلع الولد وبقيت لوحدي اكمل حسابات
وبعدها صار كل ساعة توصل رسالة
تركت الحاسبة والسجل
وسحبت النقال اشوف منو
فتحته شفت رقم غريب داز صور
فتحت الصور شفت صورة بنية شابة وحاضنة
مرية جبيرة بالعمر هيج تجي بعمر امي
جانت البنية لابسة فستان حفلاة بس الله يستر عليها شايلة جمال يجذب العين
لكيتها كاتبة رسالة
حمودي شوف اختك وامك شلون طالعين بالحفلة حلوات وعودك ما اوصيك هم عيب علية وكول اختي مو حلوة
همست .. هذا الا اخوها اعمى ويكللها موحلوة
بس خطية هاي عبالها دازة الصورة لأخوها
وحسيت على روحي وبعدت نظري عنها
بس ظلت مطبوعة بعقلي
بس لازم احذرها لان هذا عرض ناس
دكيت عالرقم وردت علية صوت بنية يمكن هي صاحبة الصورة بس غير صوت يدوخ
بنت الاوادم
غمضت عيوني هسة انا شجاني شبية اتخبلت
.. الو احم
.. الو نعم منو حضرتك
.. العفو اختي انتي دازة صورتج على رقمي بالواتس اب
.. مستحيل ما راسلة الك صورة
انت متوهم
.. والله راسلة واذا متصدكين هسة ارسلها الج
ادري بيج غلطانة عبالج اخوج محمود
سمعتها شهكت وضربت خدها
. يايمة عزة بعني يعني شلون وصلتلك اني راسلتها لأخوية
.. ما اعرف يمكن صار خلل عندج بالواتس
او الرقم شمر بس المهم انتبهي لا بعدين تروح صورج عند واحد ابن حرام
.. عفية اخوية اروحلك فدوة تمسحهم
والله اموت شكد فشلة ونوب اني مفرعة
سودة بوجهي
.. لا اختي لتخافين انا هم عندي خوات
واخاف عليهم راح امسح الصورة واعتبري نفسج ما دازتهم
.. اشكرك كلك ذوق تسلملي
.. يالله اخذي راحتج
.. مع السلامة واشكرك مرة ثانية
.. لا مسويت شي الله وياج
سديت النقال وظل الموقف معلك ببالي
كسرت خاطري شكد جانت خايفة وهي تحجي عبالها راح تنفضح الله يستر على بناتنا
ويبعد عنهم اولاد الحرام
دخلت عالواتساب ومسحت صورتها شفتها متصل غلقت النقال
ورجعت اكمل شغلي ونسيت الموضوع
واتذكرت رفاه خطية هسة منتظرتني
باوعت للساعة جانت ب١١بالليل
غلقت السجل وطفيت الحاسبة وحاسبت العامل العندي واتصلت على حمزة يجي ياخذ الفلوس لان مبلغ جبير
احنا من يوم حادث ضرغام خلينا حماية عالمكتب والبيت
دك نقالي والتصل الحجي
.. الو ها يابة
.. انا هسة راح اعزل واجي للبيت
.. لا بوية ما يحتاج يوصلني حمزة خلي بس يجي ياخذ الفلوس احسن
هسة شنو قابل انا جاهل وحمزة يوصلني
للبيت
.. يالله هذا هو امري لله راح اخلي يوصلني
بس انت لتضوج
.. يالله مع السلامة
سديت النقال
ابوي هواي متشدد صارت بي خوفة من عهد سالفة ضرغام ما يقبل نرجع متأخرين للبيت الا ويانة واحد من الحماية
ولو هو الله الحافظ بس شنسوي
اخذ الاحتياط واجب
اجة حمزة وعزلنا المكتب واخذت المفاتيح
ركبت بالسيارة مالتي وحمزة جان جاي بسيارة الحجي
جنت اسوق واخذت النقال اريد اتصل على رفاه اشوفها شمحتاجة
بس فجاءة دك رقم ثاني ركزت بي هذا نفسه
الرقم مالة البنية الي قبل شوية رسلة صورتها بالغلط
جاوبتها واتفاجئت بصوتها تبجي
