گاوري في الدوار

الجزء1

🌟كاوري في الدوار🌟
🌛للكاتبة اريا سقراط وفاطمة البقالي
دوار المساخيط ساعة تشير إلى 22:00
انا: هانتا غاندخلو لداك لعرس ولي سولك من جيهت من نت؟ قول أهل لعريس... صافي؟
ويليام: كيفاش أهل لعريس؟
انا: وانتا نتا من أهل لعريس...
ويليام:ولكن انا مكنعرفهمش؟!
انا:وااااع.... هانتا ركز حنا غير غانكدبو باش ندخلو لعرس واش فهمتي؟
ويليام:مفهمتش علاش غاندخلو أصلا تما؟؟
انا: إحرق حباب لوعد لي جمعني معاك....ياربي صبر... ياك قلتي ليا بغيتيني نوريك دوار وتقاليد هانا غانوريك أهم حاجة هيا لعرس
ويليام: بفف مكنحملش صداع وزحام
جريتو دخلتو لعرس ولا غايبقا داوي تايفوتنا لعشا.. كنقلب بعيني لقيت بلاصة فواحد طابلة بركتو وصيتو مايتحركش ومشيت نبقشش... دخلت لخيمة صغيرة ديال نقافات بانت ليا لحنة ديال لعروس عاينيا خرجو أخيرا جاب الله همزا... مشيت نتسلت وخونت لحنة لكارمة لي كرطوها من يد لعروسة خشيتها فسوتيامات ودرت رجعت لحفلة لعرس وهو يبان ليا داك ويليام واقف مع عم لعريس ومع هاز فروج كيبان ليا لكاوري غير كبعد عليه هههه خايف.....ناري واااا مي نمشي نعتق قبل مايقفرها عليا وجريو علينا قبل مايحطو لعشا....
ويليام: انا من عائلة لعريس
عم لعريس: ايييه من صباح ونتا تقولها... وا قوليا اشنو كاتجيهم؟
ويليام:(شاف رودينا جايا) قولي ليه انا اش كنجي لعريس
عم لعريس:(تلفت شافها) بنت لمختار اش كديري هنا؟
انا: احم احم جيت مع علي لعرس بنت ولد بات عمت خت بنت لبهلول راها عمتو...
عم لعريس:(بقا مبقلل عينيه كترات عليه) هادا هو علي؟؟ ومالو من صباح وهو يقول راه من عائلة لعريس؟
انا:(جيت قربت ليه) راه مسطي شوية...هربان ليه لفريخ..
عم لعريس: (بتشكيك) انا بان ليا بعقلو وشوفي لبسو حسن من لعريس...
انا:(هاحنا غنتفرشو ويلي مي ليومة تبيتني فلكوري) لا كيشتي مسكين كيشوف دجاج ولفرارج كيصحابهم خوتو وكيبدا يعنق فيهم...
ويليام:(مخرج فيها عينيه وهي كتنعت ليه فالفروج ومخرجة فيه عينيه وهو يفهمها) ختي هئ هئ توحشتك (وجا قرب لفروج وكخنزر في رودينة ومشمئز منو ولكن واخة هكاك باش ميتفرشوش عنق لفروج) ختي شحال وانا نقلب علك... نتا لاش هاز ختي حطها لرض (دغيا دخل فالدور تامن لفروج ماعرف راسو باش تبلا)...
انا:(غنتسطا بضحكة وحابساها) شتي هاوا جاتو لحالة..
عم لعريس: مسكين على مزيناتو دري خسارة أما كون عطيتوو بنتي لالاهم سعدية
انا:سعدية لعمشة بنتك؟
عم لعريس: ايييه الله يزوجها تغبر عليا باغي نتزوج (وغمز رودينة)
ويليام:(شاف لبلان وعصبو حيت سيد شارف وهو يعنق الراجل) تزوجني أنا را كنعرف نطيب أعمي..
عم لعريس: تف تف تف ألعيادو بالله أطلق مني أتاطلق
انا:(ناري سطاني بضحك كرم عليه مطلقوش) سير ألحاج راه مسطي دابة يلصقك....(هرب لحاج) هههههه ماعندي مايتسالك راك تربية إيدي دغيا كتعلم تبارك الله علك هههه
ويليام:(رجع برك فطبلة ديالهم وخنزر) فين كنتي؟
انا: غير هنا... شوف أنعلمك حاجة خرا ترد ليها لبال فلعراس...هانتا شتي هاد قلع
ويليام:(قاطعها) أش غادي نقلع؟
انا: واااع هادا هادا لاناب ديال طبلة(وشداتو بين يديها كتوريه لقلع) دابة ملي تجي لعرس ديما حسب شحال من قلع كاين فطابلة باش تعرف واش جوج ماكل ولا غير وحدة أو واش كاين ديسير ولا لا... حيت تقدر تصيد تاكل بزاف وجي لحم وتصاب شبعتي يبقى فك لحال...
ويليام: (كيشوف فيها وهو يشد لقلع حسبهم لقاهم تلاتة) دابة تلاتة هي تلاتة أكلات؟
انا: لا لا جوج وديسير
ويليام: أشنو هاد ديسير
انا: desert زعمة
ويليام: كتعرفي الإنجليزية؟؟
انا:نعرف كلشي راه غير ماكينش معامن
ويليام: دابة كل أكلة كيبدلو فيها لاناب
انا: واراه حسن مايمسحو طابلة كيهزو لقلع بكلشي ليه وحطو طبسيل لاخر...
ويليام:ممممم....مهم انا نخرج شوية
انا:سير الله يعفو علك(دار خنزر فيا خلعني)
#عند ويليام
هاد لبنت هبيلة عرفتها دابة تلت يام ودخلت عليا بمصايب أخر يامي نعنق فروج فينك أسام تضحك على صاحبك... اوووف نكمي يعدا نبرد علي راسي ...خاصني نشارجي هاد تيلي باش نعيط لسام نشوف اش واقع تما...بان ليا واحد جينيراتور ومبرونشي فيه بريز واحد وانا نحيدو ودرت شارجور... شوية مابقيتش كنسمع لعرس غير سقيل كنسمع بنادم بدا يغوت... شفت فتيليفون وفجينيراتور وضورت وجهي يمين وشمال عرفت راسي قودتها...هاد بريز هو ديال خيمة العرس... حيدت بزربة شارجوري ورجعت بريزهم رجعات لموسيقى وضو ولاكن عاود مشا مافهمت والو ياك رجعت بريز... ناري واقلة وقع شي مس..حسيت بشي إيد شداتني من كتفي لي ضارني ونانضور إيدي لوخرى غادي نبوط هاد زمر لي شدني...
رودينة:وااااع مضربش مضربش غير انا ألمسخوط...
انا: (وقفت راسي حتى لآخر لحضة) ديري لحس أبنادم تفو كنت غنضربك..
رودينة: إنا حس ندير راه خاصنا نهربو راه لحاج قاليهم مايكون غير لمسطي لي طفا عليهم ضو وراهم كقلبو علك..
انا: ومن بعد؟ يجي نخلي ضاربوه نبرد فيه عصب لي دايرة فيا...
رودينة:(ببرائة وكتسبل فعينيها) انا؟؟ علاش اش درت لك وانا غير كنعلمك قوالب وصافي..
انا:(خنزرت فيها واحدرات عينيها ومع كاين غير دو لقمرة بانت بريئة سهيت فيها) مخلياني نعنق فروج واش نتي مريضة...وزايداني مسطي انا يقولو عليا مسطي؟؟ واش عارفة شكون انا؟؟
رودينا:اييه وليام
انا:(غاتعصب ديلمي هادي) إنعل بو نهار لي تلاقيتك فيه
رودينا:مالك انا لي عيطت لك تصايب ليا بارابول؟؟
انا:لا موك لي عيطات..
رودينا:دابة ماما لاش مدخلها(عينيها غرغرو)...
احم احم نرجعو بيكم لأول نهار تلاقاو فيه هاد زوج...
🌟كاوري فيالدوار🌟
للكاتبة اريا ستارك وفاطمة البقالي
تلات أيام قبل لعرس فدار مي إزا مت رودينة...
رودينا:ياختي ياختي كان غادي يعدموه كون ما خوه عتقو
فطيطيم: مانعرف اش يعجبك فهاد لمسلسل فيه غير لقتيلة ولمسخ
رودينا: ايييه زين داكشي لي عجبني نيت
فطيطيم: إوى الله يمسخك
رودينا: شتي هادي لملكة طايحة مع خوها
فطيطيم: أويلي حرام
رودينا: دابة كيشتي..(باقة مكملاتش هضرتها وهي تمشي لإداعة ومابقا يبان والو)بنت لكلب قوصتي بغيت لك موصيبة
فطيطيم: تجيك ان شاء الله..
رودينا: نودي سيري لخربتكم ولانود لك ..
فطيطيم: هايا غادة وشوفي شكون يطلع لك فوق دار باش تصيبي هاد لمشقوف...
رودينا: سيري عطك غبارة... انا لي غانصيبو...
رودينا بنت فالعشرين من عمرها زوينة شعر كحل طبيعي حجبانها مطراسين واخة عمرها قاستهم، شفارها كتار ومزينين ليها عينيها لي كيبانو كبار طويلة وعندها طرماحة ولكن صدر يجيب الله وهاديك هي عقدتها...قرات حتى خدات لباك فلمدينة ورجعت لدوار حيت باها توفى وبقات غير هي وختها لي مخطوبة وقريب تزوج...
فطيطيم صاحبة رودينا روح بروح من صغر ولكن ديما مخاصمين ومناتفين عادي، فطيطيم عندها 20 حتى هيا طويلة ورقيقة وبيضة حروفها مزيونين، خرجات من كاطريام وبركات تعاون مها عندها زوج خوتها كبار واحد فيهم هو لي غايتزوج سمية خت رودينا..
خرجت نشوف كيندير نطلع واخة كنخاف من لعلو بغيت نكمل لحلقة ديال صراع العروش game of thrones ، منعرف فين داك سلوم ...هاهوا ياله بغيت نطلع سمعت حس ديال رجلين وانا ندور لقيت واحد زين غير هو كيبان بحال لوحش بديك تخنزيرة ولكن زييين زيين ياختي لحية مطراسية وشعر راجع لور كيبان بحال دوك تركيين وطويل وقلدة ويلي حليت فمي فيه ...
انا:اييه واهيا تعالة نقولك
دري شاف يمين وشمال ورجع شاف فيا ونعت بصبعو واش كنهضر معاه.. هبيل هادا كاين شي حد من غيرو.
انا: اييه اييه معاك داوية تعالة نقولك
الشخص:is she crazy؟!! واش مسطية هادي
انا: تا اش ساير تقول راني ماسمعتكش..  واجي رامنعضكش غير قرب
الشخص: (قرب ليها وقال بدارجة زوينة بحال دراري صغار) شكووون تي؟
انا: انا رودينا..ونتا اش سماك الله
الشخص: روو... أشنو؟؟
انا: رودينااااا
الشخص: ok ok انا ٩ويليام
انا: هههههه شكون سماك وااااع خخخخخ ويل ليام ههههه علاش اصكع مالك على هاد سمية ههههه ويل ليام زوينة هادي خخخخ سخفتيني بضحك
ويليام:(غير كبقلل فعينيه) say what؟؟ أشنو قلتي؟؟
انا: تا اش هاد لهضرة كدوي من إنا دوار نتا؟؟
ويليام: اه؟ انا فدوار لمساخيط
انا: واتا منين جاي راني عمرني شتك
ويليام:(بقا كيشوف فيها عاد فهمها) اه انا من أمريكا
انا: وانا من طايوان خخخخخخ
ويليام: is she really crasy؟؟
هادي واش مسطية نيت؟؟
انا: ايييه فهمتك فهمتك كادوي بلونكلي ايييه راني قارياها غير معكلة ليا شوية ففمي(ويلي طلع عدنا كاوري فدوار وكعرف لدارجة هاي هاي )
ويليام: اووه ناايس
انا: اييه نايس نايس ... إجي نقولك...
من بعد نص ساعة
انا: واهيتا وا اش سماك الله عليمن عليمن ...اييه اييه تما... لا لا رجع..
الحاج تهامي: روداااينا واا روداااينا
انا: واتا لا هربتيييه ...نعام أبا لحاج كنقولك شميتي رودينا روودينا
الحاج تهامي:اييه اييه سميتك كتكعلل ليا لساني... أديك صكعة لكاوري اش كيدير فوق صطحكم؟؟
انا: بالحاج راه شافني باغة نطلع نصيب بارابول وهو يقولي يابنت إزا واللهما تحطي يدك أنا لي نصيبو...
الحاج: أديك سليعفانة لكاوري يعرف شي بنت إزا يالكديديبة
انا: واااا سمحمد ألا هربتي كاع الإداعات...دوز دوز عليمن ..ايه ايه تما.. هزو شوية..(مقابلة تلفازة من شرجم وكتنعت ليه)
الحاج: والله وتوقع ليه شي حاجة..
باقي مكملهاش دري طاح من دار لرض على كتفو..جاب الله جا فوق كومة ديال تبن.. واخة هكاك كيبان ليا شد كتفو...
انا: واهيا مي واهيا سيدي مسعود بلحسين سير ألحاج انا شبغيت لك قوصتي على لولد..
ويليام: shit shit shit
انا: أجي ندير لك تلج توعتي؟؟
ويليام:(شاف فيا وخنزر ودار لي بيدو وقفي حدك تم وانا نفراني) ماوقع والو غير لعضم خرج من بلاصتو...
أويلي مي على لعضم خرج من بلاصتو باقة مخرجة عايني مخلوعة معنديش تافلوس نديه لسبيطار دوار.. اش كيدير هادا؟؟ بان ليا حيد تيشورط ديالو ولواه خشاه ففمو وعض عليه وضرب كتفو لي موعت مع لحيط تاتسمعت واحد طرق خفيفة...
الحاج:(باقي واقف حدايا) واي واي واي صحييح انعام أسي ترررر على لبادر
انا:(باقة مصدومة فلبادر بغيت نقول فكتفو لي دارو) الحاج سير جيب تلج
الحاج: ولا لكبير يتسخر على صغير؟؟
انا: صافي انا غادة نجيب تلج
مشيت دخلت نجري هزيت سوبيرة عمرتها تلج وخرجت لقيت دوار كلو مجموع وديك جلاخة ديال مي تايكة فينما تكون شي موصيبة تلقاها كاينة تامن فطيطيم جاية تشفا...
انا: لحاج حطمتي روكورد هاد لمرة..دقيقة جمعتي فيها الدوار
الحاج: والله يابنتي يارودينا حجي حرام عليا تا كنت واقف عاتا تجمعو علينا..
مي تايكة: هاديك اه اش درتي لولد ختي باقي تا ماسخن بلاصتو
الحاج: مادارت والو مسكينة لاتحاماوش عليها
عادل:(ولد مي تايكة ماكحملنيش) هاديك راه واحد شيطانة
انا: إوى شتكم بديتو تعليو صواتكم مانخافوش ؟؟؟ واش سيد بقيت فيه وبغا يصيب ليا بارابول... وانا نقوليه تابلاش وهو يحلف عليا بمي الله يرحمها ... نرجعها فوجهو؟؟