گاوري في الدوار

الجزء6

🌟كاوري في الدوار🌟
انا: واميمتي كاين شي بانضي تاقدك ويلي ويلي ليومة نمشيو لحبس.(نزلت لرض على ركابيا هزيت ليه راسو ونضرب فحناكو باش يفيق) بيلي وا بيلي هانا كنعيط لك بسميت دلع ديالك هالعار لما نوض من ليوم نعيط لك بيلي وندير لي قلتي وكلامك نسمعو وشعري ندير زيف انا كاع...انا مزاوكة لما نوض راني منحمل ماكلت لحباسات..
لحاج: ناري على لمسخوطة قتلتي لكاوري...
انا: ماحشمتي تسبيها فيا ونتا باقي شاد لعصا...
لحاج: نتي لي ضربتيه(لاح لعصى) انا شاهد شفتك بعويناتي..
انا: ياك أبا لحاج هادي هي رجلة؟؟
لحاج: كاين شي رجلة فلحباسات؟؟ ونتي قلتي ماكلتهم خايبة وانا مضروب على كرشي لالا نتي مولاتها مسوقيش...
انا: راه كاينين بصمات ديالك فلعصا غادي غادي دخل لحبس..
لحاج: اشنوو هاد أشنو هاد صبمات كاعما نكسابهم انا..
انا: راه لبصمة ديالك بحال ملي دير صبعك فلمداد فلكوميسرية...
لحاج: واهيا ناري دير خير مايطرا باس...جيت نعتقك صدقت قاتل روح..نوضي نوضي نهربو..
انا: وا بيلي وا ويليام فيق واللهتا نولي نسمع كلامك غير ماتسيفطناش لحبس..
لحاج: مالو فرجلو؟؟
انا:قرصاتو عقرب..
لحاج: ياشتي كان ميت قبل من ضربو...
انا: واتا نعل شيطان راك حاج زعمة ... واش سيد كان واقف على رجليه وتقول ميت .... ويليااام هئ هئ هئ كنا غنتزوجو ونديرو لولاد..
ويليام: ماحشمتيش نتزوجو كاع؟!!
انا:(شفت فيه لقيتو كيشوفيا وكضحك) واع بسم الله رحمان رحيم رجعتي عوتاني من لموت
لحاج: أولدي خلعتينا علك..هاد لمسخوطة لي ضرباتك انا شاهد لاكنتي باغي تعيط لجوندارم..
ويليام: لحاج معندك صحة هداك هو ضرب؟؟ راني مكنتش مغيب غير بغيت نربي هاد لموصيبة..
لحاج: ههههه وراها تربات قالت لك تولي تسمع لهضرة ودير لي بغيتي انا شاهد..
انا: تقال لك الحاج .. انا مقلت والو (ياله غانهرب وهو يجرني من شعري شكون من غيرو..)
ويليام: غاتولي تقولي ليا بيلي وتسمعي هضراتي وديري زيف..
انا: ايه ندير لخمار لا؟؟
ويليام: لحاج اشنو هاد لخمار؟؟
لحاج: ديك تغنبيرة لي يديرو لعيالات..
ويليام: لحاج واش فهمت لخمار باش نفهم تبنغيرة ولا تغنبيرة ولا منعرف...
انا: شوفو نتوما راكم زدتو فيه انا ماكنسمع لحد من غير لراسي...
لحاج:( شاف فويليام) نعيط لجوندارم
انا:(خرجت عيني) لحاج بعتيني دغيت هادي هي رجلة؟؟
لحاج:(جا حدايا وكهمس) مالك ماكتقنعيش جاب لك الله كاوري وصحيح يرجع من لموت وقلدة وزين اش بغيتي راه دجاجة بكامونها..
ويليام: لحاج راني كنسمعك
انا: (كندوي مع لحاج بشوية)شتي ديك دجاجة لي بكامونها راه عندها غير مع لفرارج كون شتيه قبيلة كعنق فلفروج ديال ولد لحاج سعيد وبوس فيه..
لحاج: هالعار ياكما مريوح؟؟
ويليام: راني واقف هنا نتوما كدويو عليا راه كنسمع كلشي، ونتي غير بلاتي غانرد لك صرف ديال هادشي كلو ومنسيتش فك لحريكة..
انا: شوف الله يرحم باك صدعتي ليا مخي هاد ليام، شفت تالحاج ولا يجي منك مابقات عشرة معاكم هاواحد سلام عليكم انا نمشي فحالاتي..
ويليام: أجي نتي لهنا
انا: مجياش الله يعاونك(تميت غادة وانا نسمعهم كيهضرو)
ويليام: لحاج شحال ديال لحبس لمحاولت لقتل جوج مرات؟؟
لحاج: أودي على حساب لاكان مغربي مؤبد ولاكانو لكور واقلة إعدام، قالك أسيدي كاينين شي كراسا كيربطوك فيهم ويضربوك بضو تاتشعل لك بولة وتمشي عند سيدي ربي، وكاين شنق والله وعلم خالي تانسول لك لمقدم..
ويليام:ممم عندك نمرة ديال جوندارم..
انا:سي وليام عيطتي عليا..؟؟(كنسب تحت من نيفي)
ويليام:(حابس ضحكة) لحاج بغيت نسولك منين نقدر ناخد طوموبيل نعدي بيها؟؟
لحاج: حنا كنعديو بلحمير ولبغال.. ولكن نشوف لك لحديد..
انا:لا مجانش يركب على خوه خخخخ
ويليام:(خنزر فيا تاوحلات ليا) نتي غدا مع 9 نتلاقاو باغي نمشي لفيلاج نتقدى شي لعبات..
انا: لا منصيبش غدا لخميس خاصني نمشي لسوق..
ويليام: سيري بعد غدا
انا: ههه مسطي نتا نمشي لخميس بجمعة؟!!
ويليام: اه مالك سيري جمعة
انا: ههه وراه لامشيت جمعة غانلقاوهم ماكينينش
ويليام:سيري سبت!
انا: واش مكتفهمش نمشي لخميس بسبت فين جات هادي؟؟
ويليام: مفهمتكش اش كتخربقي..؟
لحاج:(باقي غير واقف كيتسنط ليهم) كيشتي دابة أسي ويل ليام كاين سوق خميس زمامرة بلخميش ولاربعة لغايس بلاربعة وتلات كحزلهيه نهار تلات وحد ولادفرج نهار لحد وجمعة كنمشيو نصليو ماكين سوق كيشتي لإمام ديال جامع..
انا: لحاج سيري شرب لفانيد ديالك راك بديتي تهترف..(لحاج جمع جلايل جلابة ديالو وهز ديك لعصا ومشا) ونتا أسي راني عندي شغالاتي ماشي غنبقا مقابلاك..
ويليام: هانية نمشيو لهاد لخميس انا اش تابعني راني فعطلة مهم غدا نتلاقاو
انا:(بان ليا ولد دوار أيمن) أيمن وااا أيمن أجي نقولك
أيمن: أش بغيتي؟؟
انا:هانتا دي لكاوري لدار مي تايكة..
أيمن: وانا أش ليا فهادشي
ويليام: علاش نتي أش تابعك؟؟
انا:ختي كتخدم وخاصني نمشي نصيب ليها سحور راه كتصوم تنين ولخميس..
#عند ويليام
ويليام: ياله سيري فحالك.. ونتا أيمن أجي نقولك
أيمن: أش بغيتي أزماكري
ويليام: وريني طريق لدار مي تايكة ونشري لك لي بغيتي..
أيمن(: تحلو ليه لعينين) بغيت شيباس
ويليام: ها؟؟
أيمن: واشيييبس شييبس
ويليام: اه chips واخة ياله (شريت ليه شيبس وغادي وكنسول فيه على دوار)
انا: إوى قولي فين واليدين رودينا
أيمن: فلرض
انا: كيفاش فلرض
أيمن:(كياكل) ماتو مدفونين فلرض
انا: كيفاش فلرض
أيمن:(كياكل) ماتو مدفونين فلرض
انا: الله يرحمهم باش ماتو
أيمن: تقتلو
انا: كيفاش؟؟؟(صدمني كيفاش هاد لبنت غير كضحك ودايز عليها هادشي)
أيمن: هاد شيبس مداقها سبحان الله بحال بطاطا
انا: ممم وراها بطاطا مقلية
أيمن: هههه كاوري وهبيل هههه مامسكولش واقلة
انا:(هادو واش كلهم مساطين فهاد دوار) مهم قوليا باش ماتو؟؟
أيمن: مانعرف كنت صغير
انا: ممم واش معندهمش عائلة
أيمن: كاين عباس شرير مكنحملوش
انا: شكون هادا
أيمن: خو بات رودينا..
انا: عمها زعمة؟!
أيمن: هههه مكلخ واش ماكيقاريوكمش تما؟؟؟ واراه باها وعباس عندهم نفس لبات ولأم خوت خوووت فهمتييي
انا:(بقيت كنشوف فيه هادا من نيتو) شحال عندك من عام؟؟
أيمن: سبعة
انا: سبع سنين! كتمشي لمدرسة(دار ليا براسو اه) فاش كتقرا؟ نجحتي ولا مزال؟؟
أيمن:اه عامين وانا فتحضيري نجحوني بقرار من الإدارة حيت وااااعر واااعر
انا: لا لاباين واعر
خربقني هاد بعلوك كتر مانا مخربق وصلت لدار تكيت نعس ولاكن تفكيري كلو مع لموت ديال أب وأم رودينا...اوووف تيليفون كيصوني غاتكون 7 لعشية عند سام خرج من خدمة وكيعيط ليا جاوبتو..
انا: أشنو؟!
سام: شكون ديك لبنت مولات شعر لكحل
انا: رودينا بنت الدوار
سام: غانجي لدوار من هنا لسيمانة عندهم تيتيز
انا: غاتجي غانفرع مك
سام: مالك؟؟ عجباتني ديك لبنت..
انا: بعد منها(بنبرة حادة)
سام: اوه كنشم ريحة إعجاب
انا:(بكل برود) مكتعجبنيش وعمرها تعجبني فينما كانت شي موصيبة كتجيبها ديك بنت..
سام: إوى ملي مكتعجبكش انا نجي نخطب..
انا: سام ديك لبنت لا.. راني عارفك أش كتسوى..
سام: مهم مدام عاجبك لحال تما أنا جاي عندك..
انا: جي ولا بقا انا شغلي
سام: شوف غدا ضروري تكونيكطا مع تمنية عدنا صفقة محتاجك حيت شركة لي غنعقدو معاها صفقة باغين يشوفوك وهضرو معاك..
انا: مامساليش..
سام: من نيتك أش عندك أهم؟؟
انا: غانمشي لسوق  لخميس
سام: سير بعد غدا راه اجتماع مهم عدنا
انا: ولا مجاتش تمشي لخميس بجمعة
سام: هانية سير سبت
انا: لا أصاحبي سوق لخميس راه نهار لخميس أي نهار أخر مايكون والو...أجي مالي وليت كندوي بحالهم؟؟
سام: ههههههههه ناري جانهار لي نشوف لجليد كيدوي هاكة ههههه أترات فك بنت الدوااار ههه...
انا: قلب عليا نت....ومتبقاش تقوليا لجليد
سام: باقي مفهمتش علاش ...
انا: سام ماباغيش ندوي فداك موضوع
سام: أوكي ولكن ملي غانجي خاصنا ندويو
انا: من نيتك غاتجي؟؟
سام: اه أصاحبي نجي نشوف ليا شي بنت دوار تربى على إيدي
انا: شوف راه ماكينش شراب هنا وحشيش وبنات ليل وماكينش ضو..
سام: كاين حمام؟؟
انا: اه بحال صونا ديال تركيين لي كنمشيو ليه تما
سام: اوووووه فيري نايس...
قطعت مع داك قمقوم ديال خويا مصيبة هادا ملي غايجي كير غير زبايل..ياله غنطفي شمعة ونعس وانا نسمع دقان ..
انا: دخل
عادل: ويليام صافا
انا: ايه صافا فيا نعاس
عادل: كنت بغيت نقول لك رد بالك من ديك رودينا
انا: علاش
عادل: حيت كضحك مع دراري بزاف راك عارفها سايبة معندهاش لي حكمها
انا: اوكي ونتا مالك
عادل: عادي غير قلت لك
انا: كتعجبك؟؟
عادل: اه راها زوينة بغيت نقول لا لا مالي مسطي
انا:(نضت وشنقت عليه) ملي هي كتعجبك علاش كتخسر ليها صمعتها؟؟
عادل:كح كح واللهما انا راه مي تايكة متحملهاش
انا: علاش مكتحملهاش دوي؟؟
عادل: مانعرف علاش حدي كنشوفها ديما بليل معنقة تصويرة بات رودينا وتبكي..
انا: ياله خرج عليا وأخر مرة تفكر فرودينا ولا دوي عليها ياله لباب..
نعست وهاد لبنت فبالي كيفاش ماتو ليها واليديها وهي كضحك هاكة وعايشة حياتها بوحدها.. محسيتش حتى غفيت ...
#نرجعو لرودينا
داخلة كنتسلت لدار تايكة باغة نفيق ويليام دخلت لبيتو لقينو ناعس بلا تيشورط لماسخ لاخر ناشر عليا زينو تف تف ستغفر الله لعضيم مايخيلو لواحد بعقلو..
انا: (غادي يجعر عليا ولكن واللهتا نفيقو ولي ليها ليها) ويلياااام وا بيلي بيلي بيلي بيلي بيليبييييي بيليييي وااااع
ويليام:(فاق قافز وقجني ديريكت قبل مايحل عينيه) انقتلك قبل ماتوصلني..
انا: كح كح واللهما نقتلك كح كح ماعزيش عليا حباسات كحكح راك جيفتييييينييي
ويليام: (طلقني ملي سمع صوتي وحل عينيه) ياربي أش جابني لهاد الدوار ...
انا: والله كون مشيتي لهونولولو ولا بيهاماس..لاش جاي هنا
ويليام: باهاااماس
انا: ايه ايه بحال بحال الله يرزق غير صحة وسلامة..
ويليام:(هز تيليفون لقاها ربعة صباح) واش باغة تصعريني؟؟ لاش جاياني مع صباح..
انا: اييه دارجة تسرحات عندك وياله ربع يااام اييه شوية نعلمك شلحة
ويليام: لاش   مفايقة   ديلمي؟؟
انا: ايه نوض نوض ياله تابعانا طريق
ويليام: فين راه ربعة صباح
انا:(تميت خارجة من لباب) انا كنتسناك حدى جنان لكرموص
ويليام: اجي مالنا في غادين
خرجت وخليتو حيت إلا قلت ليه واللهما ينوض ليا من مورة 10 دقايق كيبان ليا جاي وعاقدهم بتغي يضارب سلامة من هاد خاينة..
ويليام: تي تسناي ني زربانة... فين غادين؟
انا: سربي وسكت شوية غاتفيق الدوار...
وصلنا لواحد الدار من بعد ماتمشينا شي تلث ساعة ودقيت وحلو ليا لباب...
انا: مي عايشة فينها نهيلة
مي عايشة:سيري أبنتي لبيت لي فيه لخامية ..(شافت ويليام) هادا معاك..
انا: اه غير خليه يدخل وصيفطي معاه بانيو ديال لما سخون..
ويليام: رورو ماتقوليش ليا لي فبالي...
انا: اييه ديك لقطة لي كتشوف فالأفلام هي هااادي
ويليام:(تحت من نيفو وهو تابع مي عايشة) بربي تاغنقتلك...