. ماما: منال نوضي تگعدي راه 7:30 هاذي راه مشى عليك الحال.. انا: امممم لمشى سيري تبعيه.. ماما(جرت عليا المانطة): وحااااي على الطفلة راه اليوم عندك اول نهار في الجامعة.. *نضت جمعت الوقفة بزربة.. انا: هاااويلييي أ حااااي وعلااش مفيقتينيش وفيين هي الفردة دصندالتي.. *بقيت كندووور كنقلب عليها وانا گاع دايخة..زفت عليا ماما بيها وجات ديريكت في وجهي..رجعتها ليها ياربي تسمح ليا خخخ.. انا: ماماااااا.. *مشيت دخلت الحمام حفيانة غسلت وجهي بزربة وخرجت لبست سروالي وقاميجتي وصباط وجمعت شعري كعكة وهودت مع الدروج.. ماما: منااااال أجي تفطري. انا: مبغيتش راني معطلة. فهد(خويا): منال فين غاديا؟ *ناااري غير صوتوا كيطيح مني النص.. انا: ها آه ءء غاديا الجامعة.. فهد: وهذا وقت؟؟ غير زيدي تجلسي راكي معطلة. انا: لا أ فهد مزال يالاه 7:45 غنلحق متخافش بسلامة. فهد: وااخة هاكي باش تشدي طاكسي وباش تغداي. *مد ليا الفلوس ومشيت خديتها منو وبستوا فحنكوا.. انا: شكراا أ خوياا العزيز. فهد: سمعيني مزيااان ديها غير فقرايتك فقط نشوف عليك شي حاجة ماشي حتى لهيه راكي عرفاني أش نقدر نديير. انا: كوون هاني يالاه بسلامة.. *هودت 4 الدرجات فدقة وحدة..وخرجت شديت طاكسي..وبما وصلت نعرفكم على راسي..احممم معاكم زليخة غير كنضحك معاكم منال..منال خانوم لا والله حتى كنيتي خانوم..مالكم كضحكوا راه بصح..انا راه واقلة تركيا وغلطوا فيا وجابوني لهاذ المغرب..المهم كنهدر معاكم بالمعقول سميتي منال خانوم ..منعرف منين جابوا جدووود جدودي هاذ الكنية..عمري 20 سنة اممم طوويلة وبيضة وشعري كحل وطويل وعينيا عسليين ورماشي كثيفين وحجباني غلاظ ومقادين من عند الله وفمي منفوخ واحد شوية وحميمرْ..عايشة مع امي (فاطمة) وأخي (فهد) عندوا 28 سنة..الاب ديالي متوفي هاذي عشر سنين..الحالة ديالنا ميسورة الحمدالله خويا هو لي كيصرف علينا خدام بوليسي..والعدو ديالي في هاذ الحياة هو نييت بغيتوا غير امتى يتزوج ويمشي فحالو من الدار..غير كيشوف عليا شي حاجة صغيورة كنمشي فيها خلا كيضربني ولد الحرام ومع انا صغيورة ومعندي صحيحة مكنقدرش نرجعها ليه ..
المهم راني وصلت وانا مزالة كنعاود ليكم..دخلت الجامعة كانت شوية خاوية كلشي دخل لقسمو..شفت شي بنات واقفين حليت فيهم فمي..ويلييي ويليي أش لابسين وخاويين عليهم سطل دالمكياج كيتي انا حالتي حالة..المهم مشيت كنجري طلعت واحد ستين درجة عاد وصلت ودخلت القسم كنهج بلاما ندق..كانوا كيهدروا وغير دخلت سكتوا وجلسوا كيشوفوا فيا (يااحليلي خافوا مني)..سديت الباب وتلفت جهة السبورة..يااااا لهويييييي 😱😰 ناااااري على استااذ كيف داااير شدتني الدوخة والله 😍..تكيت على الباب وجلست كنشوف فيه وكنتخيل راسي انا وياه تحت المطر وو..فيقني غير صوتوا الغليظ.. الاستاذ: هااا لالة واش يسحاب ليك داخلة لكوري دالبگر 😠 يالاه يالااه سيري خرجي فحالك.. انا: ءء تت لا لا أ أستاذ عفاااك سمح ليا راه مفيقتنيش ماما بكري داك شي علاش تعطلت. *خنزر فيا وتلفت جهة السبورة..يعني غير ندخل..مشيت بديت كنقلب على صحايبتي وفاء ولكن مبانتش ليا..ملقيت حتى شي بلاصة خاوية من غير وحدة وكاينة اللوور القسم فيه شي مية قمقوم ياربي السلامة..مشيت ليها ولقيت الكرسي لي حدايا فيه واحد خاينة باقي مسكين مگلوب بالنعاس.. الشاب: فيين أ ساطة؟؟ انا: الساطة؟؟؟ اشناهي هاذي ثاني؟ الشاب: شوفي انا الساط ديالك وانتي الساطة ديالي واخة! انا: صافي واخة أ ساط.. *بقيت واقفة كنقلب على صاحبتي حتى بانت ليا جالسة القدام..عيطت عليها بحالة جالسة فالحمام.. انا: وفااااااااااااء.. *وبديت كندير ليها بايديا باي باي..كلشي بدا كيشوف فيا..الاستاذ ضرب الطباشير فالبيروا عالجهد وتلفت ليا وهو مخنزر.. الاستاذ: هيييه ياكما يسحاب ليك راسك جالسة فالسوق !! أ شنوو سميتك بعدا؟؟
الاستاذ: شنو سميت المادة لي داخلة ليها انتي دابا؟؟ *انتاااا سييير بغيييت ليييك غباارة تغبرك انشاااءالله يخخخ..اش عرفني أنا !! اش غنقول ليه دابا؟؟..بقيت كندور فعينيا ومعرفت منقول..سمعت داك الساط لي جالس جنبي جالس كيقول ليا الماط.. انا: امم مادة الرياضيات أ استاذ (قلتها وانا هازة خنافري لسما بحالة منعرف اشدرت اما فالحقيقة راني زبلتها دبصح).. *كلشي بدا يضحك والاستاذ بان ليا تعصب.. الاستاذ: نتي اش كتخربقي؟؟؟ واش مشفتيش السبورة أش فيها!! انا: واا استاذ راه معرفاش راه قالها ليا الساط. الاستاذ: أش هاذ المستوى!!! لاش جايا تقرااي انتي گاع؟؟ انا: سمح ليا أ أستاذ ولكن راني عارفة غير رقم القاعة فقط معرفاش عندمن داخلة. الاستاذ: آخر مرة يهاذ شنيولة. انا: واخا أ بوبريص (قلتها بشوية ولكن داك الساط سمعها وبدا يفرنس)..تهجروا انتا سكتنا.. *رجعت جلست فبلاصتي ومكتبان ليا گاع السبورة..غير راس الاستاذ كيف التيمومة هو لي كنشوفوا..بقينا جالسين شحااال والاستاذ كيشرح وكيكتب فالسبورة وكلشي متبع وانا جالسة حاطة يدي على حنكي وكنلعب في X_O مع راسي داك الساط مبغاش يلعب معايا..بان ليا الاستاذ جاي جهتي وانا نجمع الورقة ولحتها وسط واحد جوج بنات قدامي..حااالي قفرتها مكتبت حتى شي حاجة فالدفتر دابا غيجري عليا مفيهاااش..بان ليا داك الساط كاتب شي كليمات وانا نهز من عندوا دفتاروا وعطيتوا دفتاري .. انا: آحمباااك انتا راك مغبر مغيشوفكش انا جيت هاذ الجهة معيقة. الساط: وااخة واااخة خديه.. *خديتوا وانا ندم..هذا واش كيكتب بالهندية ولا الشينوية..ويلييي على خط كيف داير ومزروط بالمعقووول..وقف عليا الاستاذ فوق راسي وانا نبدا نغطي بيدي ديك الشوهة.. الاستاذ: آحممم آحممم..
