#صرخه يتيمه
#بقلمي شمعة امل
#الجزء التاسع
هوايه يسألون عن رقيه والي صار بيهه
شويه خلي نرجع بالذاكره
بعد ما شردت سهام واخذت بنتهه زينب
جبار اصلا ماكان واعي تمام على الي يسويه
بسبب المشروب وحبوب الكبسله
رقيه رادت تشرد وره امهه ...بس فوزيه الظالمه ماخلتهه
بسرعه حبستهه بالغرفه وبعدت جبار عنهه
ثاني يوم من صحه جبار
اتذكر هو شسوه البارحه
حس بالخوف ....هاي لاتروح اتسويله مشكله
ف خليت فوزيه تروح لاهلهه وتأخذ رقيه وياها
لان حتى اخته البارحه طلعت هيه وزوجهه كلش ظايجين من عنده ومن تصرفاته
بعد ماصار الليل كلش من رجع جبار للبيت
عرف انه الشرطه جايين عليهم
فصار يطلع الصبح من وكت وميرجع إلا بالليل
ووصى فوزيه أن متفتح الباب ابد
ولا تخلي أحد ينتبه انه همه موجودين بالبيت
بعد فتره ....
ولأن كانت القضيه سهله وواضحه
والادله موجوده ..وتقرير الطبيب الشرعي
حكم آلقاضي بالطلاق
وتكون حظانة الأطفال لسهام ....
المهم شك حاولوا يرجعون رقيه لسهام
ماكدروا شكم مره دزوا الشرطه للبيت
يرحون وميلكون أحد ...
أو بالاحرى محد يطلعلهم ....
شكد اتصلت سهام على سميه وعلاء حتى يرجعون رقيه
وهم فشلت كل المحاولات
لا جبار بعد ماعرف انه سهام تطلقت من عنده
حب ينتقم منهه برقيه
صار كل ميشرب ويكبسل بالليل
يكعدهه يمه ومن يتذكر سالفه اتضوجه
يكوم يضربهه
أما فوزيه كيفت عليهه كالت خليهه خدامه عدهه بمكان امهه
فمن كانوا يتصلون عليه اخوه واخته
يكلهم بنتي واريدهه اني اربيهه واخاف عليهه من زوج امهه
وضلت رقيه على هاي الحاله فتره طويله كلش
بالليل ابوهه يضربهه من يشرب
والنهار خدامه لزوجة ابوهه
شكم مره تجي سهام للبيت وتريد تحصل بتهه
هم ماكدرت
لحد ماصارت رقيه بالمدرسه
رقيه ...من سجلني ابويه بالمدرسه
كلت همزين فرصه اخلص من عدهم
كانت المعلمات الي بالمدرسه يحبوني
كنت شاطره واحب اتعلم بسرعه
ومن ارجع للبيت مرة ابويه تضل اتشغلني
لو اتعوفني وتروح لبيت اهلهه
حتى صاروا يتفننون بتعذيبي
والنهار كله بس ابجي
ليش اني من دون الجهال الي بعمري مامرتاحه
ويه اهلي
يعني امي عافتني وشردت باختي الزغيره
وابويه وياريته مو ابويه كل ميشوفني يضربني
