#عندماتزهرالاشواك
#الكاتبةورودالخالدي
البارت1
مهيمن25سنة..خلصت كليه ومنتظر تعيين لو شغل..لان كدامي مشروع زواج من بنية صار3سنوات اني وياها بعلاقة حب..اسمها سوزان..من اول يوم تعرفت عليها..شغلت بالي..لان جانت مميزة بكولشي صح سافرة واهلي ميتقبلون فكرة اتزوج وحدة سافرة..بس ثكيلة ومؤدبة...ومثل مكلت مميزة بكولشي..اهلها ساكنين باربيل ابوها حيل غني ومتمكن ويملك فندق سياحي ضخم باربيل..بس مهتميت لان اهلها زناكيل لان اهلي هم حالتهم ممتازة وعدهم خير من الله..مثلا والدي عنده كراج..مأجرة وعندة اربع محلات بالسوك هم مأجرهن..وعندة شركة اخشاب يشتغل بيها..يعني مرتاحين ماديا والحمد لله.. وعائلتنا مو كولش جبيرة عندي اخوات اثنين وحدة عمرها18سنه واللخ عمرها13سنه والاصغر اخويه حمودي عمرة6سنوات..جنت محتار شلون..افتح الموضوع ويه ابويه اخاف اكوله اريد اتزوج يروح يكولي هو احنا اشفنا من خيرك..توك خلصت كلية فكلت احسن فكره اخلي امي تتعرف ع البنيه لان سوزان اثناء الدوام تجي لبغداد يم بيت خالتها..وبالعطلة تروح يم..اهلها لاربيل..فاتصلت بيها وكتلها امي تريد تتعرف عليج..حتى نجي نخطب..هي فرحت..وكالت اجي ليش لاواتفقنا نلتقي بمطعم اني وهي وامي..طبعا بالكوة قنعت امي تروح ويايه واخذت امي وكعدنا..بالمطعم منتظرين سوزان بس سوزان غبية غلطت غلطة جبيرة لما جتي وحدها للمطعم..لا وجمالة لابسة بنطرون ضيك..وبدي ربع ردن امي..شافتها..ضلت تعصر باديها ..هي البنية طبيعتها سبورتية وصوتها عالي تضحك وتجامل بس ماعدها شي..بس امي بكلبها النار شفت وجهها ينطي الوان..وحلكها يبس مجرد كعدنا ربع ساعة كالت اريد ارجع للبيت..ترخصنا من سوزان اخذت امي بسيارةابوية بس حركت كتلها:
شبيج.يمه؟ليش كمتي بسرعة اي غير تسولفين ويه البنية غيرتتعرفين عليها؟
ولك شتعرف بيها..هي هاي الي تريدها تصير جنتي..ياكاع انشكي وبلعيني!!!
شبيها يمه..خوش بنيه واحبها وتحبني!
حبتك..الكرادة اي والله..شبيه تخبلت ماعندي عقل..ازوج ابني وحدة مشلتحه لابستلي صلوخ..وجاية وحدها للمطعم..ولك لو عدها اهل بيهم خير مجان خلوها تطلع وحدها..وتلتقي بيك..ولك شحبيت منها معصعصة وعلج لحم مابيها..وفجها هالطولاته خاف صابغتلك شعرها اصفر ومقشمرتك..
يمه شنو مقشمرتني قابل اني زعطوط..اني اعرفها حق المعرفة بنيه بت اصل وفصل مو شفتيها سافرة ترة والله قمة بالشرف والاخلاق..والدنيا تغيرت يمه
لا يمه اني ما احجي ع السافرات هواية بنات سافرات حبابات وبنات اوادم بس اني ما ارتاحيتلها..لسانها شطوله جنها دلالة وتتمضحك..لايمه..هاي السالفة خلي تولي
يمه عود اني جبتج حتى تقنعين ابويه على بختج..صدوك يمه تكسرين كلبي؟؟
يمه لا اكسر كلبك ولا شي..اني ما ادخل.
