بارت 26
غادر المعازيم بعد هالفضيحه لابو راكان وابو الوليد !
الصمت يخيم على المكان واسئله كثيره تدور بعقل الموجودين !
اخذ نفس ابو الوليد وبداخله رفض زواج ابو فهد من ساره ...طالع ولده سعود البرود فقط يغلفه
سلط نظره على ابو فهد وتكلم بهدوء ما هو قادر يسكت : يا ابو فهد ما ادري احس السالفه فيها شوي غموض !
يعني ساره محمد طلقها من زوجها المجنون !
ما هو منك !
ابو فهد بنظره استنكار : اي مجنون ؟!
تراها على ذمتي وش سالفه هالمجنون ؟!!
ابو الوليد بحيره : حسب كلامها انها متزوجه واحد مجنون
وكانت تزوره كل يوم قبل الطلاق !
وبتوجس سأل : هي كانت تزورك ؟!
رد بنبره غضب مكبوته : وش تقصد اني مجنون ؟!
وش هالكلام ؟!!
عزام حس بالاختناق اذا هذا زوجها وما يدري عنها !
مين كانت تزور ؟!
وكيف استغفلتهم وكذبت عليهم بسالفه المجنون ؟!
وبسرعه تكلم حتى يغطي على السالفه بدون فضايح : الحين انت تبغى تأخذها معك ؟!
سلمان باندفاع كالعاده : وين يأخذها ؟!
تاركها طول هالفتره والحين ترجعها ؟!
ماجد بتأييد : تظن بنات الناس لعبه عندكم ؟!
اذا تظن انها ما لها اهل وسند تراك غلطان إلي
قاطعه ابو فهد وهو يناظره بتقييم وبعدها وجه كلامه لابو راكان : انا كلامي معك ومع اخوها محمد !
والحين ابغى
دخل محمد بهدوء وعيونه وزعها بين ابو فهد وابو ليث : ابغاك على انفراد
وقف ابو فهد بهدوء واستأذن من الموجودين بلباقه وتبعه ابو الليث بهدوء !
محمد ما يدري وش يتكلم حاول يستجمع الكلام : ءءء بالنسبة لساره !
انا كلمتها عن وجودك !
بس حاليا اممم تقدر تخلي وقت رجوعها مو الحين
لانها مو مجهزه نفسها و
قاطعه ببرود : قول انها رفضت الرجوع معي !
ابو الليث يحس نفسه بدوامه مو فاهم شيء لازم يجلس معه ويفهم السالفه بالضبط : انا اقول اتركها الحين وباكر يصير خير !
ابو فهد بإحترام لكلمته : خلاص باكر اكلمك ويصير خير !
محمد تنهد بارتياح هم وانزاح عنه حاليا: خلاص ان شاء الله باكر موعدنا واذا بغيت تشوف بناتك من حقك !
رفع حواجبه بعدم استيعاب : بناتي!
ابو ليث حس بالموضوع لبس تكلم عنه بعجله : خلاص ان شاء الله باكر نرجع !
والحين اسمح لنا تأخر الوقت !!
**
**
**
**
ابو راكان بغضب يطالعها : ابغى اعرف وين كنت تنقلعي الفتره الماضيه ؟!
تتحججين بالمجنون !
ابو الوليد بإتهام : وينه زوجك المجنون ؟!
كذبت على الكل لكن عمر الكذب ما يدوم !
ساره تكتفت بملل وهي تناظر ابو الوليد : نفسي افهم مين حاطك علي وصي ؟!!
دخل محمد بملامح باهته وتكلم بهدوء بعد ما سمع اطراف الحديث : خالي خلاص قفل على الموضوع
قاطعه ابو الوليد بغضب : يا برود دمك ؟!
اختك بعد سواد وجهها
رفع محمد اصبعه وهو يحاول يضبط اعصابه : خالي ما اسمح ولا كلمه تطعن فيها بساره !
ترى وجهها ابيض وما هي إلي تسود الوجه !
ابو راكان وللحين يشعر بالخزي من الموقف واكيد الحين صاروا علكه بحلوق الناس : اخخخ يالقهر
فشلتونا قدام الخلق !
طول عمركم تفشلونا بكل مكان يا عيال اخوي !
وطالعهم بقهر وطلع وتبعه ابو الوليد !
زفر بضيق محمد بعد خروجهم وبصوت منهك : وين عمار ؟!
ساره ردت بضيق : ما ادري !
محمد مسح وجهه بكفيه : باكر رح ييجي ابو فهد ونتكلم معه ونفهم السالفه لاني احس نفسي بدوامه
وما ادري اذا كان هو نفسه المجنون او لا !
ساره بقهر : محمد لا تقهرني ما ابغى اشوفه ولا أشوف رقعة وجهه !
محمد وبدأ الصداع يضرب راسه : ساره لا تزيدي علي !
ترى إلي فيني كافيني !
ما تبغينه ارمي البنات عليه اذا كانوا بناته وتعالي معي
وانتهينا !
طالعته بصدمه : نعم ؟!
طالعها وهو عافس ملامحه من وجع رأسه: اذا ما تبغين هالحل
تنطقين هنا وتنتظرين باكر نتفاهم معه !
وانتهينا !
تركها وتوجه للغرفه يريح اليوم كان ثقيل عليه حيل !
ما في مشكله الا سببها خلف !!!
جلست على الكنبه وهي تهز رجلها بتوتر ....
ما تدري من وين طلع لها ابو فهد هذا ؟!
كيف اخو زوج اميره يكون زوجها ؟!
معقول بعد موت المجنون زوجها لواحد ثاني وما خبرها ؟!
تحس عقلها بدوامه ....اخخخ من خلف تتمنى يكون قدامها وتطلع كل حرتها فيه !
رفعت راسها على دخول عمار بخطوات بطيئه .....
تابعت خطواته حتى استقر مقابل لها..تأملت وجهه الباهت والضيق باين بملامحه ..... إلتزمت الصمت وما تكلمت ....
زفر بضيق وتكلم : هذي اخر إلي يمشي خلف البزران .....وش استفدنا من حركاتك البايخه هذي الا سواد الوجه !
رفعت حاجب بحده : وش قصدك ؟!
عمار نفخ بقهر : بعد خروج هالفارس الكل يسأل عن المجنون إلي كنت تزورينه؟!!
وش استفدتي من التكتم على دراستك ؟!
كلام الناس ما يرحم !!
وبنبره رجاء : ساره لا تقولين ابو فهد رقم 5
ترى ذبحني الاحراج من حولي !
ردت ساره بتهكم : ما ذبحكم الا كلام الناس !
انا ما يهمني احد .... وابو فهد هذا المتعني وجاي بكل بساطه يقول اني زوجته ...لو يموت ما قابلته ولا جلست معه !
انا ما اعرف الا المجنون ومات وغير كذا ما عندي !
عمار بقرف وقلب ميت من هالسالفه : ورقة العقد معه وكل شيء موثق !
وعقد الزواج موجود
وليه رح يتبلى ويقول كلام ما هو صحيح ؟!
وش مصلحته ؟!
تراه واصل واخر همه يطالع خشتك!
شوفيه ما سأل عنك وما يدري عن هوى دارك !
ومنشغل بحياته وسفراته وتلاقينه سمع بالصدفه عن الخطوبه
قاطعته بغبن وقهر اوجعها كلامه : انكتم !
عمار اخذ نفس عميق : لا تزعلين من الواقع !
للحين ما ادري كيف خطبك !!
قطع كلامه لما حس بالخداديه بوجهه : خطبك القرد قول امين !
وجكر فيك ما رح ارجع وما رح اقابل هالزفته !
وتركته وتوجهت لغرفتها ...
ضحك عمار بغبن : ارجوك ارجعي له الحين ينتحر !
اسند راسه على الكنبه بتعب رح يبذل كل جهده ويطلقها من ابو فهد !
مستحيل تلقى السعاده عندهم .... المظاهر اهم شيء عندهم !
وساره يعرفها ضعيفه حتى لو تظاهرت بالقوة
قلبها طيب وتلين بسرعه........
