فاعل خير

البارت الثالث الجزء الثاني

#فاعل_خير_الجزء_الثاني
#طيبة الربيعي
البارت الثالث

(للكاتبة طيبة الربيعي)
شطت للستار
سامر: شعندك هنا
نبأ: خير سامر شكو
سامر: انمار شعندك هنا
انمار: جيت اسأل علة نبأ
باوعتلهة مامصدك عيوني
العتب مو عليه العتب عليهة شلون اطببة بيتهة
شلون وهنة بس نسوان بالبيت والناس الهة الظاهر
سامر: يلة خلصت فلوسك تفضل راوينة عرض اجتافك
نبأ: سامر! ماعتقد الك حق تدخل بضيوفي
باوعتلهة والله مامصدك
سامر: شعندة هنا
نبأ: ميخصك
دققت بيهة لمدة عشر ثواني
حسبتهن وية نسبة صبري النفذت بلحظتهة
نبأ ...متت بكاعي بس ما الة حق يدخل
بصفتة منو؟ هسه يلة درة بحالي
باوعلي نظرتة موتتني(للكاتبة طيبة الربيعي)
كأنه يريد يتأكد هذا الكلام طالع من كلبي
كأنه يكلي اصحي وكليلي هذا الحجي جذب لو شقة
باوعلي ثواني ودار وجهة ومشة
متحملت الصار ولا ردتة يفهم وجود انمار غلط
ماعرف ليش ردت ابررلة
طلعت ورا توة وصل لباب الشقة
نبأ: لحظة سامر
دار علية
نبأ: لتفهم غلط انمار اجة يسأل عني لا اكثر
سامر: وبصفتة منو يسأل عنج، لحظة لحظة راح تكليلي وبصفتك منو تسأل، بصفتي ابو بنتج والحيوان اليحبج ويخاف عليج عالأقل احترمي سمعتنة احترمي جنت بيوم من الايام زوجج ومازلت ابو بنتج(للكاتبة طيبة الربيعي)
نبأ: مسويت شي يسيء الية لو الك اشفتني بحضنة مثلاً
دفعني بجتفي: انلصمي، نبأ اذا استقبلتي مرة ثانية تصير مو خوش
نبأ: ما الك حق تدخل سامر ما الك حق
سامر: تحجين صدك؟ هذا الكلام طالع من كلبج؟
جذبت عليه: اي
سامر: ماشي براحتج
وراح، اني الفرحة محذوفة من قاموس حياتي
مشخوط عليهة ممكتوبلي افرح لو ارتاح
رجعت دخلت لكيتهم يحجون وانمار لونة مخطوف
نبأ: اعتذر انمار
قاطعني: ماكو داعي للأعتذار اني اصلا جيتي غلط بس حبيت اطمن عليكم وياريت نبقة علة تواصل
نبأ: الله كريم يصير خير(للكاتبة طيبة الربيعي)
راح انمار نوال استلمتني
نوال: ما الة حق يدخل عفية عليج مكبرتي راسة زيادة
مالي خلك احد، هزيت براسي اي ودخلت للغرفة
تمددت افكر بي
شلون جان يتوسلي بنظراتة بس آخر نظرة
يعاتبني بيهة
"ليش ضيعت المحنة
وليش حاسبني غريب
واني أعدك من اهلنة"
فات الأوان سامر صعب اسامحك
كلبي ملجوم منك
اسبوع كامل حرمني من كَمر بس محجيت شي
كلت خلي يفرغ غضبة وهو يجيبهة
اعرف اذا حجيت يزيد واني تعبانة مالي خلك
ورة اسبوع بالضبط اندكت الباب
ام سامر وياهة كَمر، رحبت بيهة وبوست بنيتي
يا يوم شكد مشتاقتلهة
كعدنة ام سامر كالت(للكاتبة طيبة الربيعي)
ام سامر: عمة عندي حجاية وياج
نبأ: كولي عمة
ام سامر: اخوج ذاك اليوم مخابر سامر يريد يحاجيج
ضحكت بستهزاء: شعجب معقولة يذكرني
ام سامر: والله ميت علة شوفتج ويريد يجيج بس سامر مقبل كال احاجيهة يلة وماعرف ليش الهسه مكلج مع انو صارلة بالسبوع يريد يحاجيج
عرفت جيتة جانت علة شنو
اوف ياربي
ام سامر: شتكولين ينطي العنوان؟
نبأ: وليش مطلبة من عمي
ام سامر: ميتحاجون وية عمج وهو هم ميحاجيهم الهسه(للكاتبة طيبة الربيعي)
نبأ: عمة خلي يكوللهم ماريدهم ولا يفكرون يجوني لان مراح استقبلهم
ام سامر: ضروري تشوفيهم عمة يردوج صاير شي
انقبض كلبي خفت لا واحد بيهم صاير عليه شي
نبأ: ليش شكو
ام سامر: ماعرف اني بس سامر كلي شغلة حيل مهمة
برغم ميتة علة شوفتهم بس ماريدهم
ماريد افتح باب سديتة بشلعان الكلب
نبأ: لا ماريدهم
حاولت تقنعني بس استغربت من نفسي هلكد قافلة
لا علويش استغرب السوو بحالي مو قليل
وهمة اخوتي من لحمي ودمي
كٌمر: ماما بابا وداني للكنيسة شعلنة شموع
تحجي وفرحانة
نبأ: صدووك(للكاتبة طيبة الربيعي)
كَمر: اي وحتة شعلنة وحدة الج
اوف بعد قهر لو يكفي، شعندة بالكنسية
بس اليطلب مراد يروحلهة
شنو مرادك يا ترى
سامر ...ماضل بية صبر هاي فلتانة
ماحجيت شحجي وهية قافلة
شحجي شسوي!!!!! هسه لو انمار الغلطان
اروح اخربط تضاريس وجهة
بس هية الثولة الاستقبلتة
هية الهانت رجولتي كدامة
تردين الصاع صاعين مو
بسيطة عبالج تخلصين مني
لا والحمزة ابو حزامين
لا وداحي باب خيبر ماخليج علة حل شعرج
ماعرف ليش طلعت وماصكطتهم ثنينهم
لو ماعرفهة مؤدبة وبنت ناس اطيح حظهة
بس هذا الواكف بعيني، بقيت كَمر يمي اسبوع
حتة من بجت عليهة ماوديتهة اريد اتوبهة لنبأ
التفكير شل دماغي شعندة يمهة هذا الطرن
يريد يستغل الفرصة مايدري مجلب بيهة(للكاتبة طيبة الربيعي)
مثل الاسد من يجلب بفريستة
بس الفرق نبأ حبيبتي وام بنتي مو فريستي
اووف ياريتهة الكلمة ماطلعت مني بيومهة
ياريت ماتسرعت بكلامي بس هية هم غلطانة
شلون اتضم علية شلون تستقبلهة ابيتي بعد كل السوتة
بية وبيهة، شلون اريد افتهم
كلبهة طيب افتهمناهة بس مو لهل درجة
انسانة مثل نور ماتستاهل الطيبة
انسانة مكارة مثل الثعلب
حاجيت امي وكتلهة تروح تكل لنبأ كيت وكيت
كالت ليش مو رحت تحاجيهة كتلهة لا مارحت
مجان عندي وكت، ماردتهة تاخذ كَمر بس مارضت
ام سامر: البنية البيهة مكفيهة لتصير طماع
البيهة مكفيهة جا واني شنو؟
الله كريم بسيطة اني وياج والزمن طويل
من امي ودت كَمر ورجعت كلتلي(للكاتبة طيبة الربيعي)
ام سامر: والله يا يوم متريدهم حاولت اغير رأيهة متقبل قافلة فد نوب، بس حجيهة غير ولهفتهة عليهم غير
سامر: شلون بالله، اخوهة توفة لازم تعرف
ام سامر: زين انطي العنوان لاخوهة وخل هو يروح يحاجيهة ليش مدوخ نفسك
سامر: هو راح انطي بس ردتهة تعرف حتة لاتكب علية بعدين وتكلي ماكلتلي هية تريدهة من الله
ام سامر: دروح ماما شوف شغلك ومن ترحع الله كريم
سامر: انشاءلله
رحت للشغل وبالطريق دزيت العنوان لسعيد
تشكر مني كلي حاجيتهة كتلة اي بس ماكتلهة
علة وفاة المرحوم انتة حاجيهة
كال خوش زين سويت، ضل بالي يمهة
طول اليوم، كلي اليوم يروحلهة
بس ماعرف شوكت، شنو ردة فعلهة من تسمع الخبر
تمنيت اني يمهة تمنيت اخفف عنهة ولو شوية
لليل عزلت ومريتلهم(للكاتبة طيبة الربيعي)
طفيت السيارة وضليت كاعد
ترددت انزل ادكة لو لا
ماريد تجيهة حجاية من وراية
باجر اجي الصبح احسن
بليل واكفة والناس ماترحم
رجعت للبيت بس ماكدرت انام
اتصلت بيهة يدك ومجاوب
سديتة ونمت
ثاني يوم بدون ريوك كبل بوجهي البيتهم
صعدت للشقة دكيت الباب
مرة مرتين، فتحلي عمهة
خطية عيونة حمر وشكلة مبهذل
اخذت من خاطرة استقبلني بعد ما اخذلي طريق
طبيت بس مرة عمهة كاعدة
الظاهر هية والبنات جوة
سامر: شلونهة نبأ
عم نبأ: والله يا عمي حال الضيم حالهة، من غبشنة اجينة وقافلة علة روحهة فتحتة سلمت وتوسلت بية اعوفهة ماحاجيهة(للكاتبة طيبة الربيعي)
كلبي وجعني عليهة، اوف اعرف كلبهة رهيف
وضعيف بسرعة تبجي وتنقهر علة اقل شغلة
شحال لو اخوهة متوفي، جتني كَمر تبجي
شلتهة كعدتهة بحضني وبوستهة
سامر: شبيج بابا شبيج ليش تبجين
كَمر: ماما ماتفتح الباب
سامر: نايمة ماما عوفيهة اني موجود ماترديني
ضلت تبجي تريدهة، باوعت لعمهة
سامر: عمي تاخذونهة يمكم لو شلون
عم نبأ: هو جيت اخذهة يا عمي ماترضة شسوي، تضل هنا واحنة يمهة الظهر اروح اخذ من خاطرهم
سامر: عمي اجي وياك اذا ماكو زحمة
عم نبأ: تعال عمي علواه
رجعت للبيت حاجيت امي كتلهة تروح تاخذ
من خاطرهم وتحاول وياهة
لان ماتحمل اشوفهة هيج هسه لو تخليني اشوفهة
الظهر رحنة اني وعمهة لبيت سعيد
اعوذ بالله من غضب الأم
الاخوة مجمعين ابيتة(للكاتبة طيبة الربيعي)
وحالهم ميسر لا صديق ولا عدو
اخذنة من خاطرهم خطية كابلو عمهم يبجون
وهو يبجي وياهم
اخوهة الوسطاني مؤيد حجة
مؤيد: هذا غضب امي ودعوة نبأ
عم نبأ: عمي هسه يلة دريتو، غضب الأم من غضب الله سبحانه
مؤيد: نبأ ماترضة تسامحنة وامي يم ربهة حتة ماكدر اطلب منهة السماح
وكام يبجي، الصراحة كسرو خاطري
دمعت عيني، معقولة نبأ ماتسامحهم
مستحيل، ليش هلكد متغيرة هاي شبيهة
نبأ ...من راحت ام سامر دخلت للغرفة ابجي
اوف شكد مشتاقتلهم وكلبي ناطف عليهم
اريد احضنهم اشمهم ابوسهم، نسيت كل السوو
ماكدر احقد اكثر ماكدر يبقون اخوتي من لحمي ودمي(للكاتبة طيبة الربيعي)
عالأقل باقيلي من ريحة ماما الله يرحمهة
العصريات اندكت الباب
بس اني وكَمر بالبيت نوال بالدوام
خفت لا انمار لو غيرة
صحت: منو
سعيد: نباوي اني سعيد فتحي
رجلية انشلن، داريد اصدك هذا صوت سعيد اخوية
فتحت الباب وشفتة فدوة الطولة
بس شكلة يخوف عبالك جاي من الحرب
مردت اضعف اريدهم يحسون عالسوو بية
وبأمي، اريدهم يتندمون مو بس حجي لسان
شبكني بوسني وبجة
بس مبادلتة لكن كلبي بادلة
كلبي يضمة ويشمة
كلبي يبجي ويا وينزف دم(للكاتبة طيبة الربيعي)
دخلنة بالصالة خلة كَمر بحضنة ويبوس بيهة
ويبجي، معقولة اذكرني بعد كل هل مدة
معقولة حن كلبة لو جايني علة مصلحة
اكيد محتاج فلوس ماكو غيرهة
سعيد: شلونج خيتي احوالج
نبأ: الحمدلله، خير سعيد شذكرك بية بعد كل هل مدة
جر حسرة مخنوك احس الكلام كوة يطلع من حلكة
سعيد: والله خجلان منج بكد رحمة الله، نبأ متندم عالسويتة بيج، كلنة متندمين لو تدرين شصار بينة ماتصدك اذانج
بس حوبتج انتي وامي
ورجع يبجي مكدر يكمل(للكاتبة طيبة الربيعي)
حسيت دموعي تريد تنزل
بس لزمت نفسي، مستغربة شلون داتحمل هل منظر
شلون ماكوم واشبكة واكلة خوية مسامحتكم كلكم
نبأ: هسه يلة اتذكرت عندك اخت، كل هل مدة تسألون الغريب عني ومكلفتو نفسكم تخابروني تجوني تشوفون حالي شلونة، شمحتاجة ممحتاجة، مكلفت نفسك تخابر يابة خيتي شلونج شخبارج محتاجة شي خيتي وين صفة بيج الدهر اكلتي شربتي مرتاحة بحياتج عندج مصرف عندج زقنوبت بيت احد يدير بالة عليج، هسه جاي يا سعيد هسه؟
سعيد: سامحيني نباوي ولج والله الدنيا دارت بينة وحوبتج ورانة ورانة(للكاتبة طيبة الربيعي)
نبأ: برأيك كلبي يكدر يسامحكم؟ برأيك اذا سامحتكم جرحي الجرحتونيا يتخيط؟
سعيد: عالأقل سامحي عمار، عمار هسه يم ربج يتحاسب عالصغيرة والجبيرة، سامحي بروح الوالدة وسامحينة قبل لا الله ياخذ امانتة
بخوف، قلق، عدم الاستيعاب: شنو
سعيد: عمار راح هو وعائلتة
نبأ: سعيد شدتحجي، وين راح فهمني
سعيد: احترك بيتهم وكلهم راحو بالحريق، راح عمار خيتي راح
رجع يبجي(للكاتبة طيبة الربيعي)
ردت استوعب السمعتة، مردت اصدك
عبالك انفصلت عن الواقع وكل واير مربوط بالحياة
انقطع...
ما ..
گلتلي ..
إلدنيا  تنمل  لو  عفتني  ..
وكل ..
وطن ..
ألگا ..
ذبيحك ..
يالخذت  آخر  تعال  وحيرتني  ..
إبيش ..
أصيحك ..
نبأ: سعيد لتخبلني صحيح لو جيت تقهرني
كمت ارجف وصرت اعصاب وهو يكلي ماجذب عليج
تعاي وياي حتة تصدكين(للكاتبة طيبة الربيعي)
كمت ابجي واعيط: روووح اطللللع ماريدككمم
ماعرف شصار بية تمنيت الموت بلحظتهة
تهسترت صوتي راح من العياط
وسعيد يبجي ويحاول يهديني
بس كل ما يهديني اشيش بالزايد
نسيت كَمر الي كامت تبجي ونسيت حالي
كمت الطم واصيح
هيج المواجيع الحبستهة بداخلي
حبستهة بوجع كلبي
اختنكت هلكد مابجيت وحسيت بعيوني تريد تطلع
وغصبة ابلعومي وجع موتني
مادري بروحي نوال تهدي بية وسعيد طالع
مادري شصار قفلت علة روحي
وللصبح اني بس ابجي روحي محروكة
يا ناس شوكت ارتاح واشوف حالي
شوكت الله يرحمني
تعبت اني مليت
شسويت وكل هل ضيم بية
شسويت وكلهة دارت علية حتة اهلي
سامحتهم من كل كلبي
وبقيت ادعي ربي يرحم عمار ويسامحة
مثل ما اني سامحتة(للكاتبة طيبة الربيعي)
متأكدة امي مسامحتة كلب ام مستحيل تشيل عليه
خاصة امي متدعي ولا تغضب عليهم ابد
ياربي الطف بعبدك الضعيف من صدك تعبت
ماتحمل بعد اخذني يمك
يم امي وابوية
يم عمار الي ملحكت اشوفة قبل ليروح
ملحكت استنشق عطرة ذكرى تبقة بداخلي
اسمعهم بس كأني غايبة عن الوعي
وعيي يم بابا ماما عمار
يم جهال عمار الملحكت اشبع اسمع منهم كلمة عمة
عمار اصغر واحد
وجهالة اربعة اكبرهم 7 سنين
ياريتني متت قبلهم(للكاتبة طيبة الربيعي)
ياريتني ميتة ابطن امي ولا جاية للدنيا
ياريتني شربت مي الراس ورحت يم ربي قبل لا انولد
ياريتني متت ياريت
ماعرف شكد مر علة وجودي هنا
سمعت كَمر تبجي وتصيح بسمي
كلسع تجي ادك الباب وتكلي ماما فتحي
فتحت الباب اخذتهة لحضني
جوي مرة عمي والبنات
ماستوعب حجيهم كل البالي اروح ازور كبرة
بعدة رطب جديد اريد اصدك عمار راح
اجة عمي بوسني ويحاجيني واني غايبة عنة
مو يمة ابد(للكاتبة طيبة الربيعي)
نبأ: عمو اخذني للنجف اريد ازور
عم نبأ: من عيني عمو باجر آخذج
دخلت للغرفة خليت كَمر بحضني
وشبكتهة: مستحيل اخليج تعيشين العشتة

يتبع...🌺🌺🌺