??هجير الشتاء??

٣١

هجير الشتاء
الجزء الحادي والثلاثون

وصلنا للقاعة..بس نزلنا شفت الولد برا..
تقدملي بسام وهو مبتسم ..
سلم على سيوان وتعارفو..واني كال فوتي من هذا الباب لان جانت هوسة ولد برا...
فتت للقاعة ولاكيت مرت خالي بالباب..
سلمت عليها وحضنتها ..
والبنات اجو كلهم واخر شي اجت سماء لان جانت تعدل نفسها بالحمام...
استغربو من شافوني لابسة رسمي وحجاب ..
وهم كل وحدة طالعة عروسة ...
بس ميهمني مدام زوجي راضي عني واني مقتنعة باليريده...
اخذنا ركن اني وسماء وكعدنا نحش..
وكل شوي وحدة تجي تجرنا تركصنا لو تسولف...
وقت العشا صار هدوء والديجي مطفي..
ودوية النسوان مثل دوي النحل...
بس الكلام مسموع يعني نكدر نحجي مو نصرخ مثل الديجي ...
سمعت صوت ورانا مرت السلام عليكم بنياتي...
اندارينا اني وسماء...
شفت مرة جبيرة سلمت علينا..
احنا سلمنا بس منعرفها منو ..
بس هي تعرفنا...
تالي كالت اني ام كرار خالة حسام...
احنا وجهنا فلت بس رحبنا بيها وكعدت يمنا تسولف..
كالت البنات التهو بالعشى كلت اجي يمكم..
بقت يمنا شوية كاعدة وتسولف ..
تالي بقت تباوع للبنات كالت اريد اخطب لابني كرار ..
بس هو رافض يكلي ماريد وميبس راسه..
وبقت تحجي عنه شلون مخلص وقته بالشغل وميقبل يتزوج...
اني تذكرت كلمة سيوان...
حتى من تجي سيرته كدامج سدي اذنج...
وفعلا تجاهلت الكلام اغلبه..

بقينا لحد ماصارت الزفة ساعة عشرة وربع..
خابرني سيوان كال طلعي قبل ليدخلون الولد حتى يزفوه..
صدك طلعت بسرعة ولكيته برة باركتله وطلعنا...
بس جان سكوت اني ويا...
هو مو طبعه يسكت..
بقيت افكر اكلني القلق..
معقولة صار شي لو تحاجه وي كرار..
بس سيوان اعرفه ذكي...ممعقولة يسويها...
رجعت راسي ع الكشن وغمضت لان صدعت من الدي جي...
والشقيقة هاجت علي...
لحد ماوصلنا ..
وبدلنا واجينا للفراش..اني ساكته وهو هم...
غمضت عيوني لان الم راسي موتني...
مد ايده ع راسي..
شبيج ليش هيج عاقده حواجبج...
ها حبيبي مصدعة والشقيقة هاجت...
هسه افركلج حتى ترتاحين ويروح الالم بس استرخي...
تقرب مني كعد وحط راسي بحضنه..
بقى يفركه باصابعة وبراحة ايده...
الى ان فعلا شوي بلشت اهدا ..هي صح المها ميهدا بسهولة..
بس يمكن لان احبه احس ارتاحيت...
قطع الصمت البينا وكال..
تونستي اليوم حبيبتي؟...
ايي غيرت جو وشفت اهلي نفسيتي الحمدلله...
اني هم تونست وتعرفت ع خوالج وولدهم ولو نصهم اعرفهم بالسوك...
جنت خايفة باي لحظة يجيب سيرة كرار..
بس الحمدلله ماجابها...
بعدها استرخيت شوية ونمت...

يوم ثاني جاي اراسل سماء وحجتلي عن البنات من شايفات سيوان...
تكول صار الزحف عليه عالمي ودزتلي سكرينات مالت الكروب..
يومه احس شعللت وخفت عليه...
هذا حلو ولسانه حلو اخاف عليه..
لازم مااحسسه بالاهمال ابد...
خابرته ماجاوب..
ورا شوية دك ..
حجيت وياه شوية كال جان يمي زباين...
خفت اكله بنات وماعرف شنو وافتح عيونه...
انطيته دفعة رومانسية وغزل وسديته منه...
وشكد ماجنت اهتمله زدت باهتمامي اله...
ومرت الايام وهو يعالج ونفس وضعه...
نصحه الدكتور يترك هالفترة حتى يرجع يعالج وجسمه نظيف...
عدذراء خالتي شادة وياها حيل..
ورغم حامل بس متخاف عليها مثلي من صرت حامل...
واحس يامن ينقهر من هالشي...
لان مرته حامل وممراعيتها...
الطبخ عليها رغم هي عدها دوام خطية..
تخليها تطبخ لو بالليل لو الفجر...
وع اقل شي تبسمرها..
شنو ماتلبس تعيب عليها..
رغم ذوقها كلش نازك وشكلها حلو جنها لبنانية...
بس ام خالتي متكعد راحة...

مرت فترة ورجع سيوان للعلاج..
بس هالمرة يائس...
اني بهالفترة بقيت اصلي صلاة الليل..
ويكولون مجربة ودعائها مستجاب...
هو من يشوفني اصلي يتوضى ويجي وياي..
ومن نخلص يتقربلي يكول مدام طاهرين من الذنوب..
ويبقيني بحضنه ويبوس بيدي ..يكول...
شكد غيرتيني متوقعت نفسي يوم اترك الشرب لو اترك طريق الحرام...
اكتشفت نفسي قبل شكد جنت تافه...
ماعتقد اكو شي حلو مثل التقرب من الله...
جانو يكلولي نفس صفات جدك سيوان ..
لان اجدادي يسولفون عنه الهم...
اني اكول شلون جدي سيوان غير عقيدته ودينه لخاطر مرة...
بس من شفتج وشفت حبج عذرته..
اليحب شخص يقتنع من ينصحه..
والدين الاسلامي يحبب الانسان يعتنقه..دين سماح ومسامحة...
وكل يوم اكتشف شي حلو بي ..
جدي سيوان دخلنا للاسلام واني حدخل اولادنا لاعماق الدين انشالله..
احنا صح اسلام بس دينه نص ردن..
اهلي مو كلش عدهم التزام ولا معرفة...
بس اني ربي عوضني بيج وخلاج تقربيني لربي اكثر..
وجاي اشوف يامن مثلي هم عذراء الها تاثير قوي بحياته...
الحمدلله حبيب عمري انت هم الك فضل عليه خليتني التزم...
قبل جان لبسي وتصرفاتي هواي غلط...
بس شنو جدكم المسلم اسمه سيوان؟
ههه اي متشوفين سموني اسم صابئي واني مسلم يتبركون بي..
حلو لعد ربي يرحمه..
**************************************

فزيت من صفنتي واني اتذكر هالايام ..
الحمدلله ربي استجاب دعائنا...
اباوع لسيوان نايم بصفي ووجهه مرتاح ..
ملامحه هادئة..
الايام الفاتت ينام وحاجبه معقود ويكعد ضايج...
سماء من عرفت بقت تبجي وفرحت فرحة متنوصف...
وبقت كل يوم تجيلي..
واهله خوفهم بشكل مو طبيعي..
وهو خوفه بحثاً اخر..
صار يحرص على كلشي حركته تصرفه ..
ورغم الدكتور مامنعنا من التقارب بس هو يخاف..
فد مرة كاعد يمي واني بيدي الخاشوكة واكل مربى فراولة..
توحمت عليها وكلش حبيتها...
اخذ واخلي بحلكي واكول اممم فديت ...
هو يمي بالمطبخ...
ماحسيت الا جر الخاشوكة وخله شفته ع شفتي...
ومثل الملهوف يبوس ويحضن ...
اريد امنعه بس ماكدر لان تونست بهالشي...
سمعنا صوت يامن يحجي وكمزنا ثنينا..
اني شردت بسرعة للغرفة...
ورا شوية دخل وراي..
لج مشمش اني مااصبر واخلي الصقر عطشان..
حاجيته بدلع وكلبت بعيوني..
حياتي محد حرمك انت حريص زيادة...
تقرب وهو عاض شفته...
ولج لتكلبين بعيونج اني اتعب من هالحركة اتعبب..
يحجيها ويهمس وهمساته مبحوحة بس تضيعني...
وهويحجي بست شفته وهو ماصدك...
سقى عطشي وعطشه وعيشني بعالم خرافي.....

بس بقى بتعامله وياي حذر...
ويتفنن ويبدع باساليبه الي حببتني بي اكثر...
ومرت الايام وعذراء ولدت ولد سموه رسول...
وراحت فترة يم اهلها وتالي رجعت..
وهالسنة هي سادس ووزاري واحتارت بابنها..
لهذا قرر يامن يروح يكعد بالبستان حتى امها تعتني بالطفل وهي تدام...
وفعلا راح للبستان ويجون يمنا الجمعة..
واني هالسنة مرحلة ثالثة وسماء مرحلة رابعة..
الحمدلله حملي زين ووضع الطفل زين..
بس ثكل كلش وتعب والطريق طويل...
مرت الايام وكملت السنة الحمدلله..
وخلصت امتحانات..واخذت النتيجة ناجحة وتقديري جيد جداً..
طبعا سنتين اني تقديري جيد جداً والسنة هم الحمدلله...
بيوم جنا طالعين اني وسيوان كاعدين بمطعم..
واني بيومها من الصبح عندي الام بس قليل..
جنا كاعدين وحسيت برفسة قوية ..
وراها الام هاجت عندي كلش..
اريد اوكف مااكدر..
شافني سيوان انخبص..
حضني واخذني للسيارة..
كعدت واني ابجي ومرعوبة من الالم...
وهو يهدي بيه ويقر..
ورا شوي حسيت رجليه تبللت اباوع ماي ودم...

للحكاية غدٌ اخير