??هجير الشتاء??

الجزء العشرون

هجير الشتاء
الجزء العشرون

مانتبهت لنفسي من كلت اسم كرار...
بس الفززني عيطة سيوان باذني...
لج ك....كرار موووو؟؟؟؟الظاهر جنتي تحاجي وصرفتيني..
بقى يحجي بعصبية وصوت عالي...
امبين جاي تشكيله شلون اذا كشفتج ...باجر موووو؟؟؟
ولج تضحكين عليه؟؟؟اني السلطان تضحك علي وحدة شبرين مثلج..
دشوفي باجر شيصير بيج ..
انهي حياتج بيدي لو لاااا...
ماكدرت انطق بحرف من الخوف جسمي كله يرجف...
سد الخط بوجهي بعد الرزالة والفشار...
وكع الفون مني واني ارجف وابجي...
تجمعن علي ميقات وسماء جانو يمي والبقية طلعو استحو يبقون واني اخابر...
يسالون بيه وخايفات عبالهم صار شي...
حضنتني سماء حيل ..اهدي اهدي يمه اختي شبيج ولج ...
بقت تقرا علي وتمسح ع راسي..

هديت شوي ولزمت ايدها...
مابيه شي بس تعاركت وي سيوان...
ولج اني ثووولة؟؟تريد تقنعيني عركة هيج تسوي بيج؟؟؟
احجي وارجف..اي اي تعرفين بسرعة اخااف...
اشرتلها بعيوني وسكتت ..
لان ماردت ميقات تعرف...
ميقات بقت تسولف وياي وتحاول تلطف الجو ..
بس اني احس بلش العد التنازلي بعمري...
ورا شوي ميقات طلعت وبقت بس سماء...
حجيتلها لطمت ع صدرها...
عزاا العزاج ولج..يعني ماجفصتي الا بهاليوم ...
الله يستر منه ولو حقه..
وين اكو رجال يتقبل مرته تجفص باسم واحد يتعبره حبيبها...
ومفكر صاير بينكم صخام ولطام...
ماعرف شحجي بس الله كريم...
لتخافين وفهمي عن ميقات جانت تسولف وانت كلتيها بلا قصد...
واذا راد ياخذج لتمنعي..فاهمة؟؟؟
بس تمنعي يفكر بيج شي...
ولج خايفة اذا صدك يطلع بيه شي...
لتخافين اذا صدك راح يكون حساب كرار غير...
ولج بعد منين يخاف اذا هو اصلا حيطلك وبنته ماتت...
يعني ماعنده شي يتهدد بي ...
عوفي التفكير السلبي وتوكلي...
المهم لتسكتين وبرريله...

بقت سماء تنصح بيه بس احس بنبرتها خايفة وعينها بطرفها دمع...
استسلمت شما يكون مصيري يكون...
حاولو البنات يطلعوني من حزني...
وكالو كل عرسان يتعاركون قبل الزواج اصلا احلى تصير...
حقهم ميدرون بالضيم البية...
طول الليل اريد جفني يغمض ماكو...
نمت بالستة الصبح وبالسبعة ونص كعدوني...
تحضرت ورحت لجيهان هي خطية كالت اتمنى هاليوم اني واعتبريني بمكان امج...
رحتلها وماخذت عروسة وياي بس اني اعتنت بيه هواي ...
وفعلا شغلها بيرفكت وحيل حطت بالها بي...
بدلتي جانت مستورة..
ردان كامله كيبور وع الصدر هم كيبور ومسرح من جوا ...
طويلة بشكل يدوخ يعني ماكو مكان يوكف بي سيوان...
خلصت وبقو يهلهلون هي وخالتي وسماء جانو وياي...
والبنات كملو مكياج وكملنا...

اجه سيوان وخابر ع سماء...
خفت كلت اكيد ميخابرني ...
طلعت واخذني وصعدني ويا والبنات راحو وي خالتي بسيارتها..
كلت لسماء تصعد وياي ماقبلت ..
كالت حنطلع للقاعة قبلكم...
سلمت وراحت واني افرك بيدي وارجف رجفة سعفة بعاصفة...
حجه بلا ميدور علي...
خاتون ليش متجاوبين ع الفون؟
حجيت واني امتمت...مما اتصلتت ...
بعدين تذكرت اصلا فوني ماجبته وياي..
قلد صوتي يستهزاأ ...للا اتتصلت ...
شبيج اشو تمتمتين؟؟بس لا خايفة؟؟؟
لتخافين جكة الابرة ...وضحك بصوت عالي...ها ها نسيت انت مجربتها ماله داعي الخوف...
ماعرف اجمع الحروف وانطق صدك جنت خايفة...
وخايفه لا اكون فعلا مو بنية...
ساعتها اثبتله شكه بمحله وحقه شما يسوي بيه...
وصلنا للتصوير مالت ابن خاله...
نزعت البرنص كدامه اندهش..وبين الاعجاب بعيونه...
لان مشافني من طلعت جنت منزله الكبوس ع وجهي...
بقى يكص بنظراته...
اخذنا الصور ولقطات هواي وجوهنا قريبه من بعض...
بس ابد ماحط عيني بعينه...
كملنا تصوير ورحنا للقاعة...