قصه جديده .......
((((((عرض اول ))))))
#حكايه_رجل_ثلاثيني
للكاتبه :
#هدى_ابراهيم
#البارت_٧_
………………………………………………………
اهلا بالصدفه ...
واهلا بالقدر ...
چانت نفس الجامعه
ونفس الحارس ..!
بس صاحب الكافتيريا
متغير ..!!!
چنت امشي بكل مكان بيها ..
واطوف بالاماكن المقدسه ..
الي يقدسها عقلي وقلبي من چنت صغير
اني هنا .. ياجامعتي
ياكافتيريا ..!!!
رجعت ودخلت من جديد ..
وهالمره بدون خجل ..!
درست هنا ...
وكلشي چنت (اجمعه) بقيت اشتري بيه ملابس ..!!
صار مظهري مظهر شخص عادي ..!
لكن واقعي تحت خط الفقر بمراحل ..!!
طول الوقت چنت اتلوى من الم الجوع ..
لانهم بالكافتيريا يبيعون الاكل بسعر خيالي ..
چنت اطلع من الصبح
واحنا ملغيه من حياتنا فقره الريوگ من سنين..!
چنت ابقى اشرب ميّ
حتى اكدر اتحمل اكثر ..
اخواني چانو يبيعون النفط ويه الباعه المتجولين ..!!
جمعتلهم مبلغ يشترون (حصان)
لازم نستقل بعملنا وحدنا ..
وشرطت عليهم يكون يوم الخميس يومي اني بالعمل والارباح اليه ..
حتى اكدر اغطي احتياجات الجامعه ..!!
چنت اطلع لجامعتي من (٧) الصبح وابقى لحد العصر ..
حتى لا ارجع للسجن الكئيب الي هو (بيتي)
رجعت مره للبيت لگيت والدتي تبچي
سألتها شصاير ...
گالت ابوك بالمستشفى ..!!
رحتله بسرعه لگيته بحاله حرجه ..!
تعبان جدآ ..!
تقربت منه ..!!
اول مره اتقرب منه هذه المسافه ..!
چان يتمم كلمات مبهمه ..!!
ماچنت افهم شيگول ..!
چنت اباوع لملامح وجهه المجعد ..!!
والشيب .. بشعره ولحيته ..!!
واباوع ع ثوبه الاسود
الي مانزعه من وفاه عمي الوحيد ماجد ..!!
چنت ابقى يمه لحد المساء ..!
بعدها يجون اخويه او اختي الكبيره او امي
يبقون يمه ..!!
توفى بيوم .. الصبح ..!!
ماحسيت بأي مشاعر ..
حاولت حتى اعصر نفسي ..
وانزل دمعه حزن ..!!
ماگدرت ...!!
جمدت ..!!
وافلست كل احاسيسي تمامآ ..!!
للكاتبه هدى ابراهيم
تغيبت (٣) ايام عن الجامعه ..!
اجاني صديق وبلغني انو زملائنا راح يجون للعزاء .!!
بلغته يگول الهم انو مجلس العزاء حيكون بمحافظه (ميسان) ..
چنت اخجل من زملائي
انو يشوفون حاله بيتنا الصغير المقسوم ..!!
ويتعرفون ع وضعي المادي ..!!
چانت عزه نفسي تكره نظره التعاطف والشفقه ..!!
رجعت لدوامي صادف نهايه سنه وبدايه عام جديد ..!!
انتقلت للمرحله الثانيه ..!!
چنت ادرس بأجتهاد
ماعندي اي وقت اضيعه ..!!
واضبت على الدراستين
دراسه جامعتي
وايضا مقر الامم المتحده ..!!
حتى مااضيع الفرصتين ..!!
ماكو اي احتمال للفشل بحساباتي الخاصه ..!
لازم انجح بالجامعه
ولازم اتفوق واكون من العشره الاوائل بنهايه كل كورس من كورسات المقر ..!!
مع الدراستين استمريت بالعمل بالعطل الاسبوعيه ..!
زميله اليّ بدت تقترب مني تسألني عن محاضراتنا ..
واوقات المحاظره الجايه ..!!
(ميسره) شخصيه مجنونه .. انيقه
بشرتها بيضه ..!!
تملك مظهر الاغنياء ..!
هي مو اجمل بنيه بالكليه ..!!
لكن دمها محبوب ..
والدتها كانت تعمل مديره بدوائر الدوله
ووالدها ضابط كبير بالجيش ..!!
سياره توصلها للجامعه
كل الاصدقاء چانو يتقربون منها ..
لكني مجنت واحد منهم ..!!
ماچنت افكر .. واهتم بالعلاقات العاطفيه
همي كبير ومايخليني افكر ..!!
وايضآ چنت اعيش بفقر مطبق ..
چان املي (بالسفر) هو الي مخليني عايش واشيل فكره (الانتحار)
من راسي ..!!
بدت ميسره تلتقي بيه من خلال انو تسألني عن الدروس والمحاضرات ...
چنت اجاوبها بسرعه حتى تبتعد عني ..
عطرها يدوخني
چنت ارجف بداخلي كل ما تقترب ..
مااعرف چانت تنتبه لو لاء ..
لاني من النوع صعب يبين ع شكلي مشاعر واضحه .. ومحدده
چنت العب دور الشاب السعيد ..
صاحب الوجه البشوش
الساخر والذكي ..
بنفس الوقت بعيد تماما عن الغرور ..!
واي شخص يحتاج مساعده چنت اقدمها بسرعه ...!!
ماعدى المساعدات الماديه طبعآ ..!!
صارت ميسره تقترب مني اكثر ..
چنت اطلع من بيتنا الفجر ....
حتى اهرب من قوقعه البيت ..
چنت احس نفسي مثل السجين الي يگوله :
اطلع للنزهه ..!!!
قبل ماارجع للسجن من جديد .....
وهكذا ....!!
هذا چان احساسي وتصوري لوضعي ..!!
يوميآ اوصل لجامعتي بالسبعه الا ربع صباحا
وانتظر يفتحون الباب
حتى اكعد بحديقه الجامعه واراجع دروسي ...
لان بفتره المساء چنت ادرس بالمقر ..
وما يكون وقت اراجع محاضرات الاستاذ الجامعي ..!!
چنت اجيب ويايه خبزه
الفها داخل المحفظه
ويه كوب شاي ...
اراجع واستمتع بريوگي ..!!
مره سألتني ميسره ..
اي ساعه تجي للجامعه ..؟؟
كتلها بالسبعه مع انو المحاضرات تبدي ب(٨) ونص ....!!!
سألتني شعجب ..!!
كتلها انام من وكت ..
واكعد من وكت ..!!
جواب عادي ..!!
جان يشغلها شي تريد تتأكد منه ..!!
انو عندي (صديقه) واكون متلهف الها ..
لهذا اداوم مبكر ..!!
جان تفكيرها حسب اسلوب معيشتها ..!
جان طبعها متقلب
يوم تضحك .. يوم تعصب ..!!
متفائله .. واحيانآ لا
اني چنت شخص عادي
طولي (١٧٦) وزني (٦٦)
عيون سوده .. شعر اسود عادي ..!!
للكاتبه هدى ابراهيم
چنت اصطنع التأنق
رغم انو كان الزي موحد ..!!
چنت اختار افخر قطعتين من كلشي
وهذا جان كافي بذاك الوقت ..!!
اطلع من بيتي انفض همومي العائليه
وكلشي يشغل راسي
حتى اعيش سعاده مؤقته ..
لحد ماركب باص العوده للبيت ..!!
چنت اكعد بالكافتيريا
بعد مااخلص ريوگي البسيط ..!!
صاحب الكافتيريا جان يعرف اني فقير ..
حچيتله (بالسرّ) فد يوم بأعتباره قريب من شارعنا ....
وتعارفنا بوكتها بشكل كبير ..!!
تفاجأت بيوم لمه لمحت ميسره گاعده بمكاني .. !!
كملت جكارتي شربت ميّ ..
وتقدمت عليها
جيت من وراها وصبحت عليها ..!!
ردتّ وهي تلفت حتى تعرف منو..!!
ابتسمت وردت صباح الخير ..
سألتها جيتي من وكت
صرتي تنامين من وكت ..؟
ردت وهي تضحك بطريقه بشوشه : اي
كعدت وفتحت الكراس
وبقيت اراجع ..
وهي كاعده كدامي..
ارفع راسي كل شويه بأبتسامه الها ..!!
وهي كذلك ..☺️
گالتلي توقعتك متأخر اليوم ..
كلت الها مااعتقد رح اتأخر بيوم ..!!
بقت مبتسمه وتگلب بمحاضراتها ..وتدندن
واني اراقبها بمخيلتي
واسأل نفسي شتريد مني هذه البنيه المجنونه ..!!
گالتلي تدري شنو ..!!
كتلها شنو ..!!
كالت الي يجي متأخر مايحق له يكعد بهذا المقعد ..
انت موافق ..!!
ابتسمت وكلت الها :
بس هو محجوز اليه
كالتلي ماعندك اوراق ثبوت ملكيه بيه ..☺️
ابتسمت وكلت الها :
خمس مقاعد موجوده
ليش اختاريتي هذا ..!
جاوبتني مكانه حلو ..
جوه شجره السيسبان
احلى مكان ..!!
وافقتها واني مبتسم ..
بقى يشغلني شي اخر
واني اشوفها تحرك رجلها ..
وتكولي انو هي جوعانه
موضوع خطير بالنسبه اليه ..!!
لو اشتريلها ( لفه ) بس بدون عصير ..
معناها اغيب اسبوع عن الجامعه ..!!
ماانطيتها اي انتباه ..
وبقيت اردد الي اراجعه
كالتلي : اكلت ..؟؟
كتلها : اي .. شكرآ ..!!
ضحكت بصوت عالي ..
وضمتّ ضحكتها وهي خجلانه .. وتتلفت ..!
كتلها : ضحكه من كل گلبج ..!!
كالت : ضحكت لاني ماعزمتك .. وانت تگول شكرا ..!!
كتلها اني كلت شكرا لسؤالج عني اذا جنت ماكل ..!!
يوم عن يوم يزداد كلامها عن نفسها ..
وعن اهلها ..
عن احلامها ..
ومستقبلها ..
وطموحاتها ..
چنت مجرد مستمع الها ..!!
مستمع بفضول ..!!
جانت تكولي انو هي تحب تكون استاذه جامعيه ..
تأثرت بدكتوره بوكتها
جانت تحب اسلوبها ..
ما چانت تفكر بالزواج .. او فتى الاحلام
او .. على الاقل ماذكرتلي شي عنهم
للكاتبه هدى ابراهيم
تحب السفر ..!!
تتمنى تكعد بال (١٠) الصبح ..☺️
تحب الاكلات الطيبه ..
كل الاكلات اعتقد ..
ماسمعتها بيوم كالت تكره صنف معين ..!!
تشكيلي من اخوتها يتعبوها بمتطلباتهم ..!!
تشكيلي من زميلاتها يحجون عليها ..!!
وتسألني بنهايه كلامها ..!!
انت .. ليش ماتحجيلي عن نفسك ..!!
چنت اكول الها اني مااهتم ولا راح اهتم بمستقبلي ..!!
سألتني لعد ليش تدرس بأجتهاد ..!!
حچيتلها عن موضوع مقر الامم المتحده ..!!
وانو اني اشوف مستقبلي خارج البلد ..
لان بلدنا بزمن النظام السابق ..
كانو الشباب بلا امل ..
وبلا طموح ..!!
حلمي انو اطلع واكمل دراستي هناك ..
گالتلي حلم جميل ..!!
باوعت لساعتها وگالت ندخل للمحاظره ..
جنت دائما اخليها تمشي گدامي
لمه نوصل لممر القاعات ..!!
چنت اخجل من نظرات زملائنا لمه يسألون دائمآ ...!!
صارحتها .. تحبها .. تحبك ..!!
چنت اجاوبهم بضحكه واكول الهم لا والله ..!!
ماكو اي شي بيننا ..!!
جانو يحتارون من اجابتي هذه ..!!
لانهم دائما يراقبونا من نسولف ونبتسم ..!!
للكاتبه هدى ابراهيم
مرت الاسابيع ...
واني محتار ومشغول
افكر بالمقر ..!!
وافكر اي منطقه اختارها ابيع النفط بيها حتى اگدر اربح اكثر ..!!
جنت افكر بأهلي وافكر بفقرنا ..!!
وصارت ميسره ايضا تشغل حيز من تفكيري
وباليوم الي تغيب بيه عن عيني ..!!
جان الامل ينفقد بداخلي ..!!
اني ماگدر حتى اتزوج فتاه عاديه ..
كيف الحال بهذا الملاك الجميل الراقي
چنت اعرف تماما وين راح توصل الامور بالنهايه ..!!
رغم كل انجذابي الها ..
ودائمآ اسأل نفسي شبيها ..!!!
"عدها عيون" وتكدر بكل بساطه تشخص الشباب الي يطاردوها
وهم بمستواها الاجتماعي ..!!
فليفل .....!!!
للكاتبه هدى ابراهيم
بعد وكت لاتترك القصه عمو ...!!
عندي التزامات ..
ولازم ادخل اشوف البيت قبل ماقضيها ..!!
فاتت والده فليفل صدفه ..
وهي تلومه ..!!
ليش مطلع سيارتك بره
لايكسروها الجهال ..!!
سلمت عليه ..!!
ودعني فليفل بنظره مستعجله ..!!
راح كدامها يركض بسيارته ..
كتلها ديري بالج عليه
لا تظلميه ..!!
هذا حيكون مصدر سعادتكم بيوم ...!!
ابتسمت والدته بأستهزاء ...
يتبع ....
يتبع .............
اعتذر عن تأخير البارت بسبب
التزامات عائليه ..
سؤالنا لحضراتكم
كلمه توجهوها
او تصفون بيها بطل قصتنا ( زين ) لحد آلان ..!!
تحيات الكاتبه / هدى ابراهيم
متابعه طيبه للجميع
