قصه جديده .......
((((((عرض اول ))))))
#حكايه_رجل_ثلاثيني
للكاتبه :
#هدى_ابراهيم
#البارت_١٠_
وآلاخير
………………………………………………………
رجعت لعقلي وبديت ابحث عن تعيين ..
مالگيت ..!
دورت هوايه ..
ماحصلت اي نتيجه ..
وبصيف عام (٢٠٠٦)
حدثت انفجارات سامراء ..
وجاء قرار التطوع لحمايه المرقد واعماره ..!!
رحنا جموع ..
البعض من عدنا انقتل بالطريق ..!
والبعض تصوب ..!
بقيت شهرين مع سلاحي ..
اتمنى تنتهي حياتي بخاتمه جميله ..!
لكن ما متت ..!!
مجرد اصابات طفيفه
وغيري يستشهد ..!
جانا ضابط وگال :
الامريكان حيعتقلوكم
نحتاج عدد ..!
لازم تتطوعون بالمغاوير ..!!
بعض الجنود رفضو ..!
اني من الي وافقو ..!
يمكن اموت معاهم ويكون لعائلتي
راتب شهيد ..!
حتى يرتاحون شويه ويتطورن ..!
نسيت سوء معاملتهم اليه ..
نسيت كل ظلمهم
صرت افكر مثل عجوز ع فراش الموت يتمنى يترك وراه صدقه جاريه على روحه .. !
انتهت (٣) اشهر
استلمت راتب شهرين
مبلغ كبير جدآ ..!!
رجعت للبيت اشتريت
(ثلاجه وطباخ وتلفزيون) ..!!
وغيرت ارضيه البيت
وانطيت مبلغ لامي ..
ولاخواني ..!!
رجعت فكرت بأعاده بناء بيتنا ..
هدمه وبناءه من جديد
اشتركت بسلفه ويه اصدقاء .. !
واستلمت الاول ..
اجرت بيت لاهلي وهدمت بيتنا وبلشت بناءه من جديد ..!
واني اسأل نفسي :
ليش داسوي كل هذا ؟
ماجنت اعرف ليش ..!
الموت جان مثل باص واحنا گاعدين بمحطه انتظار ...!!
منو راح يركب ..
ودور منو آلان ..!!
فقدت هوايه من اصدقائي ..!!
واني بعدني عايش ..!
رجعت بناء بيتنا بهيئه اجمل ..!
بعد سنتين انسحبنا لجبهه اخرى ..
ومدينه اخرى ..!
تحديدآ ب(٢٠٠٩)
مازلت على اتصال بزملاء وزميلات الجامعه لكن بشكل متقطع ..!
اتصل عليه رقم غريب
فتحته جان صوت مريه ..!!
كالتلي انت (زين) ..!!
كتلها نعم اختي تفضلي
كالت الحمد لله انك بخير ..!!
ابتسمت بسخريه :
منو انتي ..!!
كالت اني ( ميسره )
زميلتك ..!!
سألتها شلون حصلتي رقمي ..؟؟
كالت من صديقتي من خلال احد اصدقائك ..!
تكدر تجيني للمنطقه الي راح اكولك عليها
بيها مستوصف ..!
اكدر اشوفك قبل ال(١١) ..!!
كتلها طبعا لكن بعد (٣) ايام يصادف اجازتي ..!!
كالت راح انتظرك ..!
يوم سعيد بحياتي ..!
دعيت انو ما اموت بهذا الاسبوع ..!!
وانو رب العالمين يمهلني ..!!
رحت عالموعد ..!
وتأنقت ..!
اتصلت بيه كالت المكان مجمع طبي حكومي ..!!
قطعت باص ودخلت كعدت بصاله الانتظار
صعدت فوگ ..!
ماجانت موجوده ..!
لمحت (سواد) يصعد الدرج ..!!
ولازمه طفل صغير يمشي وياها ..!
كالتلي انت مثل ماانت
ماتغيرت ..!!
باوعت عليها ..!!
منو انتي ..؟؟
ميسره ..؟!!
كالت ايه ..!!
سبحان الله : وين الخدود وين البشاشه
وين الجسم الرشيق ..!
كأنو امرأه ثانيه ..!
كعدنا سوى ..!
جانت بس تريد تشوفني
مااهتمت هوايه بمظهرها ..!!
وابنها كاعد على رجلها
وصارت مترهله تقريبآ
بدت تحجيلي وتشكيلي
كأنو رجعنا للمقعد الخشب ..!!
تحجي هوايه بدون انقطاع ..!!
تشكيلي من زوجها وتصرفاته ..!!
وطبعه المتقلب والصعب ..!!
ولمه تبجي تكعد ابنها ابصفها ..!
وتاخذ كلينس من جنطتها ..!!
جانت تشوف بيه شبابها الضايع ..!!
مااعرف قصتها الكامله
مع زوجها ..!
لكن الي عرفته انو هي مو سعيده ابدآ ..!!
بالنسبه اليه مازلت عسكري حتى هذه اللحظه ..!!
الوحيد بفوجي الي مااستقال ..!
او هرب ..!
او مات ..!
اكثر من عشر سنوات
من معركه لمعركه ..!!
وبعدنيّ حيّ ارزق ..!
ليش رب العالمين راد يمد بعمري ..!!
مااعرف ..!!
الموت كلما اقترب منه
اشوفه يبعد اكثر عني ..!
بعد مده اشتريت قطعه ارض اليه ..!
وردت اتحفز لبناءها
بقيت ابحث عن (بنيه)
تكون سند اليه ..
تمنيت الگه بنيه قويه
قلبها قويّ ..!
حتى نكدر نواجه مأسي الحياه سوى ..!
لكيت بنيه ب(٢٠١٢)
كانت طالبه بالسادس الاعدادي وتاركه الدراسه ..!!
مجتمعنا مغلق تماما
مايحقلي اتكلم وياها
او اعرف شي عنها قبل مااتقدم الها ..!!
يبعدون عنا اربع شوارع ..!
سألت عن اخلاقها هوايه ..
الناس يگولولي : نِعم مااخترت ..!
هي اخت شيخ يدرس القرآن بالمسجد ..!!
اصغر مني بسنتين
اخر العنقود بعائلتها ..
بلغت بعض اصدقائي المقربين من الشيخ
بموضوع الخطبه
سألني الشيخ عن سبب اختياري لبنتهم ..!!
كتله :
(حشمتها واصلها)
كالي هي ماتريد الزواج
لانها معتكفه بالدين ..!
وكلما يتقدم الها شاب
جانو يطولون فتره الخطبه ..!!
حتى تكتمل صورته ويقتنعون بشخصيته واخلاقه ودينه ..!!
مهما كانت درجه فقره
حجيتله عن مشروعي ببناء البيت ..
ولمه اكمله اتزوج ..!
كان اسمها( بنين ) ..
انعجب بيه جدا
وبلغني بأعجابها بيه
لان النساء يحجولها عني ..
وشباب المسجد يحجون لاخوها عني ..!
اقتنعو لدرجه رادو الاستعجال بعقد القران ..!!
لكني دائمآ كنت اتردد
لحد ماانتهي من بناء بيتي الي كان بمرحله الاساس ..!!
هنا امي كالتلي : ليش تتزوج واخوك الاكبر منك عادل مامتزوج بعده وهو خاطب من اقربائنا صارله سنه ..!
وماكو مكان بالبيت ..!
جانت تبجي وتكولي :
انت (ابوهم) لاتصير اناني ..!!
جنت مجمع مبلغ (٥) ملايين للبناء ..!!
كل يوم والدتي تعيد نفس الكلام ..!
: ابنيّ غرفه لاخوك وجهزها لاتخلي ينقهر
ودموعها تجري ..!
كلما انزل بأجازتي ..!
الييت رغم التعديلات الي عملتها ماكان يمكن ابني فوگاهاه طابق ثاني ..
انجبرت بعد شهر اترك بناء بيتي الخاص ..
وهدم جزء من بيتنا واعاده بناءه ..
وفكرت ببناء غرفتين احتياط لعقيل الاصغر مني ..
في حال تزوجت وطلعت من البيت ..!
اقترضت من المصرف (٥) ملايين اخرى
حتى اكدر اكمل البناء ..
اربع اشهر وكمل بناء البيت ..
بعدها كالي عادل انو هو يحتاج مبلغ حتى يشتري اثاث ..!!
اقترضت من اصدقائي
وتم الزفاف وحجزت له غرفه سويت بفندق كبير ..!!
وحجزت لاخويه الصغير رعد بنفس الفندق بزواجه وساعدته ..!!
جان الموضوع صدمه بالنسبه للشيخ لمه عرف من الاصدقاء انو هملت بناء مستقبلي وبيتي الخاص ..!
لكن ماكدر يلومني وقتها ..!
لاني قدمت مصلحه اهلي على نفسي ..!
جان كلام امي يرن عليه
انو اني ابوهم رغم انو عادل اكبر مني ..!
كلت لعادل انو لازم يفكر ببيت مستقل ويهيئ نفسه للبناء
راح اشتريلك قطعه ارض ولازم تبنيها ..
عجبته الفكره وصار يحس بالمسؤليه ويشتغل اكثر ..!!
دگ بابنا الشيخ كأنه ملّ من الخطبه الي طالت اشهر ..!
گالي تعال ويايه رحنا لبيتي ..!!
وسألني وين راح تتزوج
ممكن تفكر بنفسك لحظه ..!!
كتله شيخنا انتظرني اسدد الديون ..
واكمل بناء البيت ..
باوعلي بأستهزاء :
البنيه راح يصير عمرها
(٢٩) وانت تراوح وراح تبقى هيجي ..
هذا مو ايثار منك لاخوانك ..!!
هذا استهتار بنفسك وبمستقبلك ..!!
راح تكبر وانت تراوح مكانك ..!!
راح يخلفون اخوانك وانت اعزب ..!!
ابتسمت وكتله :
اذا تقدم الها شخص ترضى انت بيها ..
زوجها ولاتفكر بيه
خطبتنا غير رسميه ..!
انرزق عادل بولد وكبر ابنه واني بعدني ابني بالبيت بالي يزود من راتبي ..!
تزوجت (بنين) بنهايه (٢٠١٣) رجل مطلق اكبر منها بعشر سنوات لكنه متدين وخلوق ..
باركت للشيخ وقتها جان يباوعلي بحزن واني اخفي تشنجات وجهي وحسرتي ..
من ذاك الوقت تركت بناء بيتي والزواج لحد ال (٢٠١٧) ..
سددت كل ديوني ..
بعدما زوجت عادل
واشتريت له قطعه ارض ..
انطيت للثاني فلوس يشتري سياره ويشتغل بيها ..!!
الثالث ايضا انطيته مبلغ وسافر ..
عقيل يحب السفر ومايفكر بالزواج ..
سافر وكال مارجع بعد
الرابع قرر يكمل دراسته ..
والخامس كذلك ..!
اخي طارق من والدي يشتغل عامل بناء اساعده بمصاريف اولاده الدراسيه ..!
اله نصيب نص بيتنا حسب وصيت والدي ..
بالنسبه اليه لكيتلي (عروسه) وراح اتزوجها ب (٢٠١٨) ..!
اني ( زين ) طفل الشؤم النشاز ..!
الاسود .. القذر ..!!
الحالم .. الحبيب
الجماد .. بلا مشاعر
واخيرا راح اكون الزوج
اتمنى تكون سيرتي بيها (( عبره )) ..
لغيري ..
ويصبر الناس ع البلاء
ومايحكمون على المظاهر ..
وتحاول الام تساوي بين اطفالها ..
والاب يبوس ابنه ..!
ونساعد الناس بكلشي نكدر عليه ..
ونزرع الخير بكل مكان
حتى يبارك رب العالمين بأعمارنا ..!!
للكاتبه هدى ابراهيم
وانت يافليفل ..
ياصديقي الصغير ..
عندي قناعه بداخلي تكول انك رح تكون مصدر سعاده اهلك ..
لاتستغرب ..!!
((فاقد الشي يعطيه))
اوعدني فليفل ..؟؟
الكاتبه هدى ابراهيم
ليش صافن ..
ليش متردد ..
تغير شكل فليفل ..
وبدء الغضب يبين ع ملامحه ..!!
عمو زين ....!!!
هذا الولد هو الي (حرگ) بزونتي ..!
هذا الي ديمشي ..!
شوفه ..!!
فليفل لاتنسى كلشي كتلك ياه ..!!
بس هذا اكثر واحد عذبها ..!!
حس الولد انو فليفل
متحلفله ..
ركض بسرعه يحاول ينهزم منه ..!!
بركضته وكع على وجهه ..!
راحله فليفل يركض ..!!
ماراح اتدخل ..!!
لمه نزرع الخير حتما ماراح نحصد غير كل خير ..!!
اكتفيت بالمراقبه ..!!
مدّ اله ايده فليفل ..
ساعده ..!!
مشوّ ثنينهم سوى وكملو الطريق ..!!
للكاتبه هدى ابراهيم
طول الطريق واني اسوق
تراودني الذكريات ..!
كل موقف ..!
كل كلمه ..
مثل لقطه من صوره ..
تجيني وتختفي ..!
الي خلاني اتذكر
كل ذيج الايام من عمري ..
جيراني ابيتي الجديد
عائله كبيره ..!
يسكنون ابيت صغير ..
ست اطفال ..!
وطفل صغير اشوفه دائما يكعد وحده ..!
اخوانه يسموه : فليفل
يكولون بيه داء ( التوحد ) ..!
هي مجرد اراء ..!
اني اشوفه يذكرني بنفسي هوايه ..!
دائما اروحله ..!
اكعده بالحديقه ..
اجيبله ابناء اخواني يلعبون وياه ..!
لمه اشوفه يضحك
اضحك ..!!
يسموه فليفل ..
واني اسميه بأسمي ..
هزّ كياني كله ..!
كلت لامه هذا حيكون مصدر سعادتكم ..!
لاتظلميه ..!!
هو مصدر الهامي ..
هو ايضا ( فطره ) الخير الموجوده بكل انسان ..!
هو ( الضمير ) الحيّ
ولازم يبقى حيّ بداخلنا ..!!
هو ( انتو ) ايضآ ..!!
تقبلو تحياتي ومودتي
الكم جميعا ...
الكاتبه / هدى ابراهيم
على امل نلتقي بقصص اخرى ..
كونو بالقرب ..
