قريت شي عجبني احجي عنه لان ينطبق عليه
.
.
قريت : ( اعاني من دقت الملاحظه اراقب الالتفاته واعطيها الف معنى انتبه لحركة اليدين لشرود العينين لارتجاف الصوت والصمت وهذهِ مصيبتي )
التركيز بكلشي والملاحظه سيئه جداً والانسان الي يصير دقيق وملاحظته دقيقه لشغلات يمكن ماتجي ابال احد هذا بحد ذاته تعب ايي انه هيج مرات يوصلني لمرحله لو اكعد اتذكر شكد دققت ولاحظت وانتبهت وحسيت ماراح اسكت يمكن اوصل لمرحله بكد ما انه تعبانه اتعب الناس الي يمي
دقيق الملاحظه اكثر حرص واكثر خوف واكثر تعب ع كلشي يفتهمه ويحاول يلكاله الف تفسير وتفسير حتى مايدخل بدوامة التفكير مرات احس نفسي عندي زياده احساس هواي عليه ما الي طاقه بيها لان ابقى اتابع كلشي بحساسي حتى نبرة الصوت تصير تختلف عندي واكعد افسرها بأكثر من تفسير
مرات احاول اجمع قوتي من الناس الي يمي القريبين الي
شكم واحد بيكم دقيق ملاحظه ؟؟
وشتلاحظ ؟؟
هم تلاحظ وجود الطرف الثاني يمك جسداً ولكن عقلاً وروحاً مو يمك ؟
هم تلاحظ بنص حديثك ويا تحس بنفسك مامرغوب بيك ودمك ثگل او وجودك ما اله داعي ؟
هم تلاحظ اتفه الاشخاص ممكن يجذبونه بسرعه وتكعد تتحسر وتتندم وتحس مامالي عينه ؟
زين ليش مانكول هو يمك بس عنده ظروف او تعبان او صاير ويا شي وباله متشتت ؟!
وليش مانكول انو من حسيت بنفسك مامرغوب يجوز جان عنده شي يريد يبعدك عنه ومايأذيك بي ومايحسسك ويضوجك فبتعد وبعدك هم ؟!
وليش ما نكول انو انت مالي عينه لدرجه لو كعد وسولف وي اكبر واعلى ناس ماراح يأثرون بي بگد ما انت مأثر ؟!
مشكلة دقيق الملاحظه مايعرف حسن النيه دائماً تفسيراته خطأ ودائماً يدخل نفسه بدوامة الشك والغيره والريبه لحد مايتعب ويتعب الطرف الثاني ويا
اليوم وبما انو انه عندي دقة ملاحظه اتعب بالتفسير ساعات اكون متأكده 100٪ اذا اشرح الطرف الثاني ماراح يفهمني لان حتى ولو فسرت بأدق تفسير انه اصير تافهه وهي مو تفاهه والله هو مجرد احساس معقد تبسطه بكلمة احبك وتبسطه بأهتمام وتبسطه بتفهمك اكثر واكدر ابسطه بهدوئي گدام نوبات دقة الملاحظه الغريبه وتبسطه بـ انت تتحملني ،
عندي القدرة الكامله انو انطي لكل احساس حقه بس المشكله اضــيـــع ! و ع كد ما اركز ماعرف شلون اوصفه ويــضــيــع كلشي
بس تصدگ ! بـ كل مره تهديني بيها حب اكول ( الحمدلله )
وبكل مره تهديني بيها گلب ارجع واكول ( الحمدلله )
وبكل مره تتحملني وتساعدني وتوكف وياي اكول ( الحمدلله )
ومن تشوفني سرحانه او ضايجه وتتخيل سلب بالي وتفكيري غيرك ؟!
ايييي سلب بالي وتفكيري غيرك ! والله العظيم شغلو بالي عنك وفكرت بيهم اكثر مما فكرت بيك !
بس مو حباً لاااء ابد حمداً لرب العالمين انو انه وياك مو وياهم تذكرتهم وتذكرت شكد انه محظوظه بيك ؛
دقيقة ملاحظة لدرجه (احبك) اكدر اكولها الك بـ 5 اشكال
1- بنبرة الصوت
2- بـالتنهيده
3- بالنفس المتقطع
4- بعيوني
5- بأبتسامتي
وانت حر بأختيارك .
