اذا اجيت احسب احسابي شوكت انه ممكن اتردد
راح اكتشف انو انه اتردد دائماً يم كل قرار صعب اتردد امام القرارات المصيريه او انو اكمل بهذا المستقبل لو اغير مخططات عقلي وهذا شي طبيعي وكلنه نتردد اكيد وهذا التردد ع امور تسوه
زين الي يتردد من الاساس انو هو يحجي لو مايحجي هذا شيسوي !؟
كلت قبل شوي انو التردد ع امور تستاهل بس بحالتي شخصياً يتردد كلبي ولساني بأن يكول اصلاً او مايكول اي شي يفكر بي واي شي يمر بي اي شي هو يحس بي والسبب ؟! انتو ، بأستثناءء ــــ
اليوم الناس صارت تدعي او تمثل انو همه سمعوك بس بالواقع ماتسمع يعني اليوم ترددت اكثر من مره احجي عن الامور الي مضوجتني اكول اسكت اكول اسكت اوك ترددت بما فيه الكفايه خلص خلي احجي ؛
احح ياريتني ماحجيت هو صح اكو ناس سمعتني بس مافهموني سمعوني اداء واجب بس مو بالگلب سمعوني لان يحسون هذا الشي مجبورين بي وملزومين بس بحكم اهل ، المهم سمعوني
زين سمعو صرخت الاستغاثه الي بداخلي وانه اضيعها بصوتي العالي ؟
زين سمعو الشعور المدفون وانه اضيعه بشكاوي تافهه ؟
تره مو بكل مره نكول بيها احنه بخير يعني بخير
مرات نحتاج فرصه حقيقيه حتى نعبر بيها عن الي بداخلنه بتركيز
الي يخليني اتردد واكول كلشي مرات الشخص الي تشكيله وتعبرله وتفضفض تحسه كاعد يسوي وياك نوع من انواع المنافسه يعني ( مادام انتي ضايجه انه هم ضايج مادام انتي تعبانه انه هم تعبان مثل ما انتي بيج انه بعد بيه مثل ما انتي كاعده تمرين بظروف انه بعد امر بظروف ) لااء والله العظيم مو هيج يعني حتى بالهم والغم نافستوني حتى بالوقت الي جيت اشكي وافضفض بي نافستوني وبعدين يجوني ويلوموني هاا ليش ماتحجين ها ليش ماتشكين وتكولين ! مو هذا الصعب بالموضوع تخلون الواحد يتردد مليون مره قبل لا يخطي بخطوه
تعبت وانه احب ناس تحب بس ماتسمع ، تحب بس ماتوكف ، تحب بس ماتنطي فرصه بالتعبير ، تحب بس همه اولاً وانه ثانياً
راح ابقه متردده هواي لان الناس الي افضفضلهم سااهين لاهين وهمهم نفسهم ويمكن اكبر مشاكلي يلكولي الها حل سخيف عكسي تماماً اكبر مشاكلهم اخليها من ضمن مشاكلي ومن اجي افضفض يحسسوني فضفضتي ما الها داعي وانه لو ضوجهم شي ولو صغير وبسيط اسويها قضية العالم الكبرى ، اختلاف كبير ما اله نهايه
محتاجين فرصه جد نعبر بيها عن الي بداخلنه بدون تردد يا ترى موجوده هالفرصه بگلوبكم ؟؟
