صراع انثى

البارت الاول

هلاو قصة #صراع_أنثى قصه حقيقيه صارلها اشهر يمي صاحبة القصه صديقتي وعشت وياهه كل تفاصيله وماراح اتلاعب بأحداثهه راح انزلها مثل ماهي حتى تلتمسون العبره منها بيها موضوع خطير 🔞مااعرف شون راح اوصله الكم بس راح احاول وكتابته مو للاثاره لا ابد بس للتوضيح عن دنائة النفس البشريه لوين وصلت ؟!! المهم تاخرت هواي عليها خطيه كلما انزل قصه تكولي هي قصتي؟؟ اكولها لا غير مره قصتج  وانتم تفاعلو وشجعوها تكملي باقي الاحداث حتى لااتاخر بيها عليكم وهذا اول بارت

#صراع_أُنثى
بقلم نورا ناصر
القصه حقيقيه بكل احداثها

فد يوم جيت للصيدليه نظفته اني احب الديتول كلش فكلت خل انظف .. نضفتها وكملت الجو بارد طلعت كهوة وحليب خبطتهن وداشرب ماحس الا واحد طب عليه  لابس تراك يباوع بجهرتي ويعيط

اسمعي لج سمعت اهلج مبلغين بمحكمة الكراده
كتله مادري اني جنت كلشش هادئه مدري ليش يمكن خايفه ومابين خوفي
  كال شوفي اذا ماتنازلتي  اكلب الدنيا ع راسج وراس ابوج!!يحجي ويباوع بعيوني واني حالتي متنوصف خوف على برود ماادري تعودت !!!
طلع جريت نفس كلت يمكن بعد ميرجع .. اشو رجع هد عليه كال انت مو دازتلي صورتج انت و اخوج عندي ياحلوة ادز جماعتي يوكفوله بالدرب يكتلوا
وابوج اكسر المحل ماله ع راسه
كتله كملت لولا صوتك عالي راح تلم الناس علينه
كلي اي الساقطة تخاف لو شريفه ابوج ميسوي هيج ويكول مشتكين عليك وطلع بالشارع وهو يصيح
اله  اترس الشارع بدم اهلج اذا ماتنازلتي
هو طلع التمو العالم وظلوا يسألوني هذا شيريد منج ومنو هذا ؟؟؟؟

أني تيسير مواليد 1993 متوسطة الطول حنطاويه مربربه عيوني بني اثنين رصعات على خدودي عندي اثنين اخوات طالبات واخو واحد اني كبيرتهم ..
اني تخرجت من كلية الهندسه وتعيين ماكو اشتغلت وي عمي بالصيدليه وتعلمت واني بطبعي بسرعه اتعلم فتعلمت على الشغل بين رفوف الادويه وصارت هي مهنتي ..

بيوم جنت متاخره ع صيدليه ظليت امشي بخطوات واسعه وممنتبهه لأي شي حسيت بخطوات ورايه بس مهتميت اني اروح للصيدليه مشي لأن قريبه علينه فتوني داريد افتح اجاني واحد رجال جبير شويه
   فكالي بله زحمه اريد كبسول مال التهابات  كملت فتح الصيدليه ونطيته اموكسيل وحاسبته عليه ضل واكف شويه اجه الولد اليشتغل وياي فطلع هو وكملت شغلي .
******
  بعدهه  بكم يوم دخل نفسه الرجال للصيد ليه وكال اريد حب مال معده كرط
نطيته جان يكلي انتي شنو شهادتج اني كلش غثني شنو يدخل بحياتي
  بس ماعرف شنو الي ربط لساني ومارزلته .
كتله اني مهندسه بس دشتغل هنا كال شلون دبرتيها كل وحده شكل كتله هاي الدنيا كال شلون تعلمتي كتله بنتر اريده ميسألني لان ضجت منه ..عمي علمني وتعلمت .. هو حس بالاحراج عافني وطلع ومشت ايامي عادي
  وبيوم من الايام يوم جمعه بشهر١٢ جانت لسه اتذكر يوم٢٥/١٢ اجوا النه عمتي اخت ابويه وزوجها دزوا عليه ورحت سلمت عليهم قبل الضهر يمكن ١١ وعشره اني جنت اطبخ لان متعلمين طبخنا يصير ع وكت اجه زوج عمتي صاحني كال يمنه خطار ممكن تجين تطبخين النه عمتي رجلها مبتوره وتتعب و بناته باردات ميسون شي واني متعلمين ع طبخي
    طباخه كلش ماهره والكل يشهد بنفسي بالاكل
كتلهم ماشي اطبخ وارجع مااكدر ابقى لأن دوامي ب2ونص بالصيدليه والرجال دز عليه فمااكدر اتأخر
كالو ماشي بيومها جانت حالتي حاله دشداشتي ريحتهه طبخ وشحالهه ومن العجله لبست شحاطة امي وطلعت . وصلت البيت عمتي وكبل للمطبخ جتي يمي عمتي بيدهه مكياجات وانطتني كحله كالت هاج عمه حطي من هي الكحله اخذتهه منهه وضحكت  وخليت بس بلا فهم شويه وناوشتني حمره خلي حمره من هي .. اني كلبي لعب وحسيت اكو شي .
كلت الها عمه شنو شصاير اليوم
كالت عمه جايج عريس يريد يشوفج
  كتلها الله وايدج عمه وينه ههههه بشقه عود
كالت فوك يشتغل ببيتنه هسه عممج يصيحج
   اني كلبي وكف ماعبالي صدك للحظه حسيتهه تشاقه .
كتلهه لا عمه عذريني اني عبالي تشاقين مااريد ازوج

لا شنو ماتتزوجين هي وين لاكيتهه وبعدين شوفي ابوج حالته تره محد يفيدج الرجال سند الج وهذا خوش زلمه ماعنده زايده وناقصه وشاغول وانت حكمي بشروط حتى ترتاحين بس تره هو مطلك مرته تريد تكمل كليه وهو باب عرب ماعنده هي السوالف مايريدهه تدرس ورفعت عليه قضية خلع وتطلكت منه ابوها ظل يعبي براسها عليه هم متفقين تخلص سادس اعدادي وبس اشو هي من خلصت تفرعنت عليه وهو فقير ماكدر عليها  
ماريد انطيج الواحد ابو مشاكل ويتعارك وياج هذا ادمي يعرف الله ويصلي يصوم
طول ماعمتي تسولف اني صافنه عليها
كلت بكلبي مدام هيج ادمي احسن من غيره
    وهو جبيير بالعمر راح يدللني واني الاريده يصير وخاصه هو معنده اطفال وهي حجت لي ان مستقتل ع طفل كلت فرصتي هاي بلكي تتعدل حياتي بهالاثناء ودفكر اجه زوج عمتي كال يلا تعاي يشوفج اني تذكرت ملابسي شحالهه يالله وشحاطه امي
شلون اروح وشلون شسوي كتلها عمه نطيني دشداشه من ملاتج كالت بالغساله ولله جمعه وتدرين اجمعهن واغسلهن
المهم صعدت اني وحالتي المرعبله .. وقلبي يدك ومتشوقه اشوف العريس .. هو جان فوك بالغرفه ديصبغ صعدني زوج عمتي دخلنه ووكف يمي ..
جان العريس لابس لثام على وجهه لان صبغ خاف يأثر عليه او يستنشقه .. من دخلت اني هو فتح اللثام وكال السلام عليكم .. اني انصدمت لان طلع هو نفسه الي اجه قبل كم يوم للصيدليه وجان يباوعلي ويسأل بيه ...
يتبع ..