صراع انثى

البارت الثاني

#صراع_أنثى
بارت 2
كتله وعليكم السلام واني مصدومه
زوج عمتي كال هذا مؤيد يريد يتقدم الج
خجلت كلش ونزلت راسي اول مره انحط بهيج موقف الخجل سيطر عليه بس بقيت استرق النظرات
مؤيد مبين عليه جبير بالعمر طويل وضعيف عيونه ملونات بيهن خضار ابيض البشره
بقيت ساكته
كال شنو طلباتج
سكتت شويه بعدها كتله ادرس ماستر واذا ماادرس اتعين لان 16سنه درست وتاليهه اكعد
كال كل طلباتج مجابه وبعد شنو
كتله اريد بيت وحدي احسن اني اعرف بشغل البيت حتى لاتصير مشاكل هم
هذا الحجي كدامه للولد
من انتبهت انه يباوع ع دشداشتي عطبت كتله عمو اترخص عمي كال انتي فكري وبراحتج
كتله الله كريم ونزلت ..زين مانجبحت من الدرج هالكد ماانحرجت.
مرت فتره التفكير اخذ جزء من بالي والي توصلت اله  كلت احسن من شباب هالوكت فارق السن١٧ سنه وبلكي هالشي من صالحي هو كال شروطها مستجابه وتدلل بس ابني بيتي اكعدها ببيت مو اجار اني فرحت كلش كلت الحظ ابتسم لي الحمدلله
فد يوم اني بالصيدليه طب عليه انصدمت من شفته وبنفس الوقت خجلت كلش سلم ودخل
كال امي راح تجيج تشوفج للصيدليه بس تره شي روتيني جيتها اني كلشي بمزاجي وامي كالت براحتك واني اختاريتج الي هوايه واني اراقبج وشفت بيج الزوجه المناسبه الي . بقيت اباوع اله كلش متمكن بالحجي وعنده اسلوب يقنع اكبر واحد تعلقت بي حييل من اباوع بعيونه ماعرف شيصير بيه .
كدام كل كلامه احتاريت شنو اجاوبه ..اكتفيت بهزة راسي وكلت اله ماشي .. بس جنت كلش انحرج من جياته الي واتعامل ويا بثگُل ..
بعدها وبعيد الحب المصادف 14/2 جان موعد عمليتي احتفلت بالمستشفى عملية رفع البلاعيم
ضروف المستشفى وطبله وعمليه ودوخه طلعت من العمليه روحي لايبه مااكدر احجي  ووجع بحلگي  وامي يمي كوة سويته جنت كلش خايفه منها
  محد جان ويايه بالمستشفى فقط امي ابويه ملتهي بمشاكله . وره ربع ساعه من العمليه  كتلهم مابقه كالو الطبيب ميرضة الا يجي طبيب الخفر يشوفج
    كتلهم لامابقه ااشر بيدي كالوا انتي لان مو طفله عمليه البلاعيم صعبه نخاف من النزف منسيطر عليه وهسه خاف يصير نزف والدكتور مالج طلع الا يجي الخفر يشوفج زين نامي ارتاحي بينما يجي الدكتور  اقتنعت شويه وانجبرت اكل  موطا واجتي ممرضه ضربتني ابره وراحت اني روحي طلعت اختننكت عبالك مو نص ساعه طالعه من العمليه عبالك صار سنه بالمستشفى شفت الطبيب راح يبصم ويطلع رحت لامي كتله هسه نطلع كالت ميصير كتلها هسه معليه وامشي ودايخه الابره سطرتني
عاد طلعت للبيت هم ارد انام مطفيه بس وجع عبالك چوي مچويه اصعد بالسطح انزل بالطرمه افتر متت روحي طلعت
بالكوة نمت ساعه كعدت بليل امي تنطيني اكل ما اكل ولا اشرب كلشي نص الليل كعدت اختي طكتلي الابره وضربت نفسي بالكانيوله
وره اسبوع رحت للدكتور جان يكول اني موكتلج تعالي باجر ليش متاخره اسبوع ليش هيج ليش طالعه من المستشفى قبل ميشوفج الطبيب كتله ماتحملت وطلعت ...
وين رايحه ؟؟
كتله راجعه لشغلي بالصيدليه
فحص  بلاعيمي كال زينه شو تعالي اشوف ضغطج قاس الضغط٧/٤ تخببل
كال احس بيج راح توكعين هسه ترجعين لبيتكم
واخذي مغذي كتله اي وطفرت للشغل مارحت للبيت وماكلت لاحد مريضه والطبيب رزلني.
رحت للشغل وكلامي قليل لان تعبانه ولازم شهر واحد يجي واني٦ ايام بدوامي
جتي مره كالت شبيج كتله شلت بلاعيمي كوة احجي جان تكلي يا شوكت سويتيها كتله قبل ٦ ايام
هنيالج ولله ست ايام وتشتغلين واني جنتي شهر مافتحت حلكها
كتله خاله العيشه تريد!!
عفته وطلعت للبيت كوة اكل يجون خطار يكولون بعد عمليه لخ تصيرين رشيقه وج كلش ضعفانه هههه
مر اسبوع بعد بيوم الجمعه نكعد وكت نضفت البيت اني واخواتي ولفينه دولمه كملنه كلشي على وقت ودخلت  اسبح كملت وطلعت  مشطت شعري سويت ضفيره حطيت مكياج .. وكعدت
صارت ساعه ٩ ونص.. اندكت الباب فتحته شفت
زوج عمتي وعمتي وويا نسوان اثنين ومره عجوز
سلمت عليهم ودخلتهم للبيت وراحت امي الهم
صار حجي كالوا احنه جايين على بتكم وابنه رايدهه ومقتنع بيهه صار فتره ردنا نجي سمعنه سوت عمليه وما كدرنا نجي الا تصير زينه
كلتلهم امي ان شاءالله نرد الكم خبر ..
لزمناهم على الغده مقبلوا كالوا اريد اروح بس جايين نشوفها .. وطلعوا ..
وراها هم  اجه للصيدليه كال شلونج وعيونه تتفحصني  اني اخجل حتى من الكلام ويا وسلامي ثكيل  كتله هلا بيك
كال حلوةضفيره شعرج كتله هاا ؟؟ كال من اجو اهلي وابتسم اني عرفت قصده معناهه كايليله ضحكت ودنكت كتله شكرا راد يحجي بس شافني خجلانه طلع ..
مرت الايام واجه دنتفق على الحفله هو مارضى اسوي حفله ولله خابرته كال بس اكطع مهر اسبوع نتزوج ماتاخر وراها دكيت عليه كتله يعني البشر المرتاح ربك يجيب ناس تريحه والمتاذي يسلط عليه ناس تاذي بزياده اريد حفله بسيطه عماتي وعمامي وبناتهم خما اني وحد كال هسه اجيبلج فلوس واجي وما جاب كال ليش مصاريف بقيت محتاره شراح اللبس ردت اخابره بعد امي مقبلت كالت مو ضروري هالشغلات ميخالف وهو خوش ادمي وهي كلها مصاريف زايده .. بقيت محتاره باللبس اني صح اشتغل بس فلوسي
  اساعد بيها أهلي بي لأن ابويه على كد الحال وهم ميكفي .. جنت اعوز على نفسي واصرف على اهلي
لذلك مجنت ابذر واشتري ملابس هواي . . عندي خواتي طالبات وانطيهن لان ابويه مينطيهن واخويه مريض بالمرض الخبيث واكثر ادويته اني ادبرها ..
المهم جنت بالصيدليه وافكر وبالي موشوش . بين كل هالتفكير دخلت عليه عمتي سلمت ودخلتها جوه
بيدهه علاكه وكالت هي الج من مؤيد هو دزاهه ..
وراحت .. اخذتها للبيت فتحتها  لكيت جايب مثل الروب مثقب كلش طويل للكاع لونه بصلي و بنطرون بيجي و قميص يصير عريض وردانه يصير ضيق ابيض وشال بيجي وبصلي كلش فرحت بس جنت احس اكو غصه بصدري كاتمه على نفسي متخلي سعادتي كامله بلحظتها .. لبست وكعدت اباوع النفسي بالمرايه واني ممصدگه وهو كل شويه يخابر يحجيلي شديسوون كال توته دنجيب طليان وراح نذبحها اليوم وراح اجيب اهلي واقاربي من الحله والكوت اريد الكل يعرف اني اليوم خطوبتي .. اني اضحك على سوالفه شكد فرحان .. كتله ماشي وضحكت
وكعدت افكر يمكن ممصدك ناطينه مره شبي هذا ..
شويه وسمعت اصوات سيارات وعالم وحتى رمي دخلت عليه اختي كالت ولج شدسوين ماخلصتي اجوي النسوان .. اني كمت راسا خليت مكياج ولبست عدسات ولفيت الشال وداللبس بالحذاء طلع كلش ضيك طبت امي عليه بالغرفه لج يلا وينج السيد اجه ويريدج دتعقدون كتلهه ماما الحذاء كلش ضيك كالت
لبسي طكاكي هههه كتلهه ماشي لبسته شون مجان
وكفت يم الباب و السيد يحجي كال تقبلين بهيج مهر وكذا كتله اي بس عبالك مصدوفه صرت مي من الخجل وحذاء يجيسني هههه.. المهم تمت المراسيم ووزعنا الكيك ولبسني الحلقه ..
طبعا عمامي بالمشيه وولا واحد جاي كلهم اتخلوا عنه بعد كلشي خلص وراح الكل لبيوتهم دخلت للغرفه طكيت بجي كلش مقموت قلبي احس يريد يصير شي بين كل هذا البجي اتصل بيه مؤيد .. مسحت دموعي وجاوبته .. كال بالخير علينه حبيبتي اني سكتت اول مره يكولي حبيبتي كال اريد اجي يمج بالغرفه اريد ابوسج اريد احس انت صدك صرتي اله كتله لا مو هسه وختمته ويا بسرعه ..
مرت اول الايام عاديه جان يجي يمي للبيت وبحضور اهلي نسولف ومره طلعني للالعاب والمول وعقدنه محكمه .. قرب موعد العرس خابرني كال امشي نطلع نسوك رحنا اني وياه نشتري بردات و فرشه ماال غرفه وحصير ومرايا جبنه الغراض من يمنه ولله هنه مو هلكدوكلش بسيطات بس تمشي وكت مؤيد قنعني انه بس يكمل بناء يجيب كلشي جديد  واحنه رح نكعد  بالايجار واذا نتنتقل تتكسر الغراض فأني اقتنعت بكلامه وهو عنده قدره على اقناعي مدري اني جنت مغمضه .خلصنا مشتريات . وصلنا   للبيت مالنه اول ماوكف التكسي يم المكان الي بي البيت  يالله نصدمت البيت  ببستان عبالك غابه ويخزي كلش يخزي كالي تعالي وياي استحيت شلون اطب كتله لا ابقه هنا كال تعاي وظل يجرجر بيه كدام ابو التكسي اخر شي تدخل الرجال كال عمي هذا رجلج عادي حطي الغراض انتضركم بالباب اني
ودخلت ويا ..
يتبع