صراع انثى

البارت الثالث

#صراع_أُنثى
الجزء الثالث ..
ودخلنه للبيت ..  وعساني لا طبيت صح جبير اربع غرف نوم بس تعبان حيل جنه خرابه .. هو يحجي ويايه اني بالي مو ويا مصدومه من الي شفته دخلت لغرفة النوم الاخشاب مكسره  حتى الجام متكشط مالها وموكفها ع طابوكات دوشك يخزي خفيف لو لنفسى ما اخلي ولله ولا افرشه ببيت اهلي رغم امكانيه معدنا .. وهو كايلي مسبقا البيت كامل ومكمل بس هي الشغلات الي رحنه اشتريناهه ..
بس انصدمت  شنو هاي الغرفه شنو هالغراض زين اذا جوي نسوان خوالي وهنه شماته شراح اسمع من حجي   واني دارسه ومثقفه  هاي غراضي!!!اني صافنه تقرب مني كال ع خير حبيبتي ديبوسني  انفجرت بوجهه .. !!!
كتله انت شنو شنو هالغراض ولله حرام عليك يعني ترضاها ع اختك ترضه هيج غراض يجهزوها انت مو كتلي كامل البيت و هاي مال مرتك
كام يحلف لامالتي ذنيج بعتهم
ظليت ابجي وصوتي عالي جان يعيط بيه
اسكتي لج  الرجال شيكول داغتصبج وتعيطين نصي صوتج فضحتينه
اني  اخذت موبايلي وطلعت
صعدت بسياره وكلت للسايق حرك وبقيت صافنه والدمعه بعيني  وصلت لأهلي طبيت كبل للغرفه بدون مااحجي ويا احد كعدت افكر بس مو هواي  وره ربع ساعه اخذت التليفون وخابرته بس جاوبني ظليت اعيط بوجهه كتله ماريد الغرفه هاي لو تموتني والبيت هم ماريده وكلشي مااريد زين
جان يكلي  اليوم جمعه كدامج باجر وعكبه الاحد ترحين نتطلك زعطوطه
كتله واي اتطلك ولا هالسحاله.  وسديته بوجهه
ضليت اكل بروحي اكل اني شون قبلت بي شجابرني وعليش مستعجله  ع الزواج ..
لحد ما اجه الاحد دكيت عليه مايرد عليه ظليت ادك مره مرتين وتلاثه ماكو رد اخر شي دزيت اله رساله كتله تعال للمحكمه انتظرك هو ماكو مارد على الرساله راح الاحد اجه الاثنين ثلاثاء ماراسلته ولا هو راسلني
يوم الاربعاء جنت بالبيت اجت امي كالت مؤيد يريدج  اجه يسال وين عنج يكول وين توته مشتاقله اني جنت اغلي منه طبيت عليه محزمه ههههه هو كام عود يسلم اني بدون مااسلم .. باوعت عليه وجهي اصفر وكعدت كباله وامي يمنه وكعدت احجي سوالفه لأمي ..
كتلها يمه ما اجذب وداني للبيت وكتله ماريد البيت هذا روحي اختنكت منه ماريده والمطبخ يخزي
كال شهر ونشيل
كتله مؤيد اكو غرف زايده احنا ثنين واكو ٤ غرف وحده منهم سويه مطبخ
كال اي اسوي
ظليت اعيط عليه كتله الغرفه مكسره مااريدهه مااريدهه انت مو حرام عليك تضحك ع بنات العالم وانت مو صغير ليش هيج ذهب جبتلي محبس وحلقه وتراجي وسكتت كتلي وره الزواج  ماريدك كلك مااريدك يلا
هو ضاج كال رايح اني وطلع
بس طلع امي ظلت تحجي ولج عيب عليج شسويتي شهالحجي اني مجاوبت ورحت للغرفه ..
بعدها اني جنت بالصيدليه وهو جاي للبيت يتوسل ويلح بأمي وامي اقتنعت وكالت متلكين مثله كل الي سويتي بي وبعده شاريج ميصير انت مو زغيره ..
وكال بس اكمل البناء اجيبلهه غرفه من كتلوك ظلت امي تلح بس اني قافله 
بعدها  اجه للصيدليه اهنته وكتله ماريدك عوفني ..
وظل يلح ورايح وراد واني شرايواني اريدها وشنو تريد اني حاضر وهم اطرده.. الى ان بيوم صفنت ع نفسي كلت ابقه هيج الولد رايدني ليش اطور المواضيع بعدين شنو اني مالي احد ولا سند عمامي بالمشيه تخلو عني  بلكي يكون سند الي تواصلت ويا وكتله قابله .. قبل العرس باسبوع عزمونه اهله ردنا نروح بدلت لبست عبايه خليجيه بيها ورد وردي شال وردي وحذاء وردي
وجبت ملابس لأخواتي وتحضرنه دنروح الهم هو اجانه جاب كيه حتى نروح لاهلهصعدو اهلي اني،بالاستقبال كتله تعال كال شكو كتله لبسني الحلقه لو حتى هسه هم ماكو لاحفله لا صخام
لبسني الحلقه باصبعي الوسط كتله خرب مو هنا جان يخليه بايدي بس مكلوب لان هي خاتم وحلقه سوا عطت بي كافي دلبسها عاد امي جتي لبسها الي  يريد بحضني طفرت هههه رحنا لأهله ديصبون غده اخواته مو هلكد بس خوش بنات حبابات كلش وامه هم حبابه حيل جان تجي اخته تصيحني تعالي الاخ يريدج بغرفته كتله لالا ماروح جبرتني تكلي يرزلني رحت وياهه بس مستحيه دخلت الغرفته
غرفته فارغه بس جديده بيتهم حلو  بس  غراض مابي يكولون لازم نحط سيراميك يله نجيب اثاث جديد المهم اباوع ع غرفته بس جنطه ملابس وحصير ومبرده لان صيف صار
  وتلفزيون كعدت يمه سولفنه شويه ارتاحيت لان جنت خايفه او مستحيه ظل  يباوع عليه هو ويسولف  فكعد مثل الراكع يباوع عليه كتله هاا شكو تصفن بوجهي .مثل المضيع شي . ؟؟
كلي تدرين احبج وتمنيت ودعيت الله يكتبج الي من يوم الشفتج بالصيدليه وروحي طارت احسج حلالي
الحمدلله الله كتبج الي بس منتراهم وج حيل كصيره جنج دبه مال غاز ...
فتحت عيوني على كبرهم بوجهه وطكيتهه ضحكه بوجهه ولله شكرهته بوكته..  هو كلش كلش طويل  يعني من كاعد كعدته هاي يوصل لحد صدري تقريبا واني واكفه .. جان يلزمني من خصري اني صح سمينه بس جسمي كلش مخصر مدري ليش ع كولته متقصده تكبرين بغداد وتصغرين خصرج حتى يباعون عبالهم عمليات

باسني من بطني يمه احس كلبي وراسي يدكن فد دكه  اول مره احس هيج .. احس من هاللحظه گلبي دك اله . من خجلي معرفت شحجي وشون اتصرف كتله معليه انت متستحي ولله ولا جن عندك خوات وماطب يمك لو تنكلب الامه زين عفته وطلعت اضحك ..
صار وقت الغده وتغدينه مسوين  كبه ودولمه وباميه  شالو الغده اجه اخو كال يالله مرتك هم مدعبله متكلي شراح تخلف .. ضليت اضحك والكل ضحك ..

شلت المواعين وياهم جابو فواكه وجاي  كعدنه اني مااشرب  جاي  ابد نطوني تفاح وموز دا اكل وجان يحط مخدته يمي واني كاعده كال تعاي وكليني
كتله شنو كوم كوم وادفع بي صاح يمه   شوفي شلون تكوم ابنج وهو جوعان شفتي اني حاولت اسكته لان فشلت .. واحنه وحدنه بالصاله ..
كتله هو موز متعرف تاكل كال اي وتفاح هم انطيني دانطي  حط راسه بحضني ايدي وره راسه جرها كال فركيلي راسي يوجعني مديت ايدي عاط اوف اوف بعد بعد خرب صرت اجوي احس حراره طلعت مني من الفشله كال صخنت البنيه كافي عمي ماريد نطيني تفاح خل اكوم وكام راح بغرفته واحنه طلعنه للحديقه شويه كعدنه بحديقتهم سوالف وجاي وضحك دقايق واجتي اخته كالت
مؤيد يريدج عيني ست
كتله ما اجي شيريد كامت تغمز
امي كالت شوفي شيريد حتى نروح
طبيت ملكيت احد بالغرفه دطلع ولزمني جان خاتل كمزت من الخوف كال مخبله انتي ليش متجين اصيح عليج ماتجين كتله اي بس من تبطل سفاله وفسوق اجي
اني فاسق موظل يبوس بيه وحاضني حييل  كمت اعيط عليه سمعت صوت اخو يكول احم احم
كتله رتاحيت مؤيد ولله فلا اطب لبيتكم متستحي ولله متستحي شحجي كدام اخوك هسه اكيد سمع صوتي
ولج شدنسوي قابل هو انت مرتي
كوه ملصت روحي منه وطلعت
كلت لامي خل نروح جان يكلي يلا صعدي بالصدر يمي كعدت جان تجي مره كالله شوفي هاي احلى لو ذيج يقصد على طليقته كالتله لا هاي طبعا
جان يكلي سمعتي تكلي هاي جكمه كتله جكمه ع روحي مو عليك ضحك وصعدنا بالسياره وصلنه الاهلي هالحجي الساعه ب8بالليل اول ماوصلنه جتي الشرطه اخذوا اخويه للسجن ..
يتبع