#عديل_الروح
همس القوارير
(بيج قصص همس القوارير)
البارت ١٠
شويه ويه علاء بقينا نسولف وخليته يضحك وينسى همه الي اني سببته اله وبعدها رحت للبيت مالي خلگ كلش فتحت الكتب واني عقلي مو وياي وضميري دمرني من ورى علاء والجرح الي سببته اله شلون اگدر احجي وشگول اگوله اخذت حبيبتك وبعد متريدك اخلي نفسيته تدمر ويحس بالخيانه حسيت مختنگ بدت تدگ مسار وما اشتهي ارد عليها بقت تلح وتدز رسايل عفت الموبايل صامت وگعدت ادرس اريد انسى اريد شي يخليني ابطل احبها وارجع اگول ما أگدر اخلي علاء يتقرب منها او غيره اموت بمكاني احبها واحب كلشي بيها ياريتك يا علاء لا حبيتها ولا عرفتها يا ريتني اني لاشفتها ولا تعلقت بيها بين افكاري والكتب دخلت عليه زهراء اختي
زهراء
عزوز شلونك حبيبي
معتز
هلا زهوره تعاي يمي خلي اشوف شعندج
زهراء
عزوز ابو رقيه يسأل عنك اليوم
معتز
اهااا ذكرتيني بأبو رقيه شفته وحجيت وياه
زهراء
شنو راد منك
معتز
راد اسأل عن ولد جيرانا جاي على خاطب بنته مروان هنا
زهراء
اي ديتعشى عزوز عفيه طلعنا للمول والله ضايجين
معتز
ان شاءالله حبيبتي الخميس نطلع
زهراء
صدگ عزوز والله ما تخذلنا
معتز
لا ما اخذلكم گولي ان شاءالله
زهراء
ان شاءالله مشكور يا احلى اخو بالدنيا خلي اروح افرح حوراء
نزلت يم مروان وسألته عالولد گال خوش ولد وحباب واخلاقه حلوه وفقير بس ما عنده حظ بالشغل يوميه مغيرله شغله وهمين طلعت وسألت عليه ونفس الحجي سمعته بقت مسار تدگ وتراسل واني ما اجاوبها بقيت تقريبا يومين او تلاثه تدگ وما ارد عليها ورسايل
شبيك معتز بس جاوبني راح اموت
معتز شغيرك بنات الكليه عجبنك
معتز اذا مترد اروح لعلاء واحجيله كولشي
معتز ما اگدر اتحمل الله يخليك رد
ورسائل كولش هوايه ردت انساها صحيح گلت بالبدايه صعبه وهي همين تنساني بس بعدين تهون
كل الاشياء تنولد صغيره وتكبر اله الحزن ينولد كبير ويصغر بقيت خمس ايام تقريبا ما اجاوبها علاء اكل روحي كل لحضه اتذكره واشوفه شلون مقهور شسويت بصديقي واخو دنياي لو كنت اني بمكانه شراح يكون حالي يمكن اشرب من دمه شلون راح اتصرف ما ادري تقريبا خمس ايام ااني ما أرد على مسار لحد الخميس كنت متفق ويه البنات اطلعهم توسلنا بأمي ومروان يجون ويانا بس مقبلوا اخذت من ابويه فلوس وگالي لا تخلي شي بنفسهن خطيه خلي يتونسن لان مطالعات صارلهن هوايه من ورى الدراسه طلعنا اني والبنات نفتر بالمول گعدنا تعشينا واكلنا ايس كريم وذره مكسيكيه
واشترن البنات جنط واحذيه وساعات واكسسوارات كملن مسواگ وگتلهم يلا دنطلع بطلعتنا شفت مسار اي والله هي مسار اوووف شگد كنت مشتاقلها لو بيدي اخليج بعيوني واقفل عليج ضلت عينها بعيني دتتقرب وشافت البنات وتراجعت بس بقت تباوع واني همين اباوع وبعدين التفت عالبنات
حوراء
شوف معتز هالبنيه الصاكه راح تاكلك بعيونها
معتز
عيب ولج شنو هالحجي
زهراء
وينها ولج خلي اشوفها
حوراء
هياتها شفتيها مشالت عيونها من معتز
زهراء
صودك صاكه يمه فديت اخوي عنده معجبات
بقن يسولفن ويضحكن واني عيوني بعيونها وتسولف سوالف عشگ وشوگ وعتاب اي اني جبان ما اگدر ادافع عنج وعن حبي اي حب علاء اكبر مني ومنج اسف حبيبتي مو بيدي
كملنا فرتنا ورجعنا للبيت والبنات حيل تونسوا وطايرات بلشغلات الي اشترنهن واني رايح بدوامه الها اول ما ألها اخر توني تمددت اريد ارتاح ودزتلي مسار مسج
لحكايتي بقيه 💕💕
