Spoken Word Poetry ( Tagalog )

Ang Laro ng Buhay

...

I.
Hindi madali ang maging matanda, minsan maiisip mo sana'y nanatili ka nalang bata 

sa pagiging bata kung saan ang paglalaro ang inaatupag maghapon

walang kaso kahit ikaw ay madapa, sapagkat sa ganitong uri ng sakit ay masasabi kong

walang wala kumpara sa hapding dinadanas mo sa kirot na dulot niya,

ngunit Okay lang na kahit sobrang sakit, ay nakukuha mo paring ngumiti

upang matakpan ang pighati na sabihin na nating kayang ikubli ng iyong mga labi 

ngunit hindi ng mga mata, na siyang nagpapakita ng malinaw na teorya kung sino ka

kung bakit sa larong tagu-taguan ay mas pinili mong maging taya.

II.

tama ka ikaw ang taya, sitwasyong mahirap pakisamahan lalo na kung pakiramdam mo ikaw ay naghahanap sa wala 

naghahanap ng mga posibleng mataya, pero sa takbo ng buhay hindi ito basta basta taguan 

bagkus ito ay isang serye na dapat mong pakitunguhan 

mga taong susubok sa iyong tibay at katatagan 

maaring ikaw yung tipong mabilis mapanghinaan at uupo na lamang sa isang tabi

at sasabihing "ayoko na" "suko na ako" "lumabas na kayo"

at sila ay tatawa at sasabihing ikaw ay talunan, kahit ang totoo ay hindi mo na nais pang mahirapan 

Oo, tama ka hindi ikaw yung tipo ng taong pinaglalaruan.

III.
pero kaibigan hindi ka isang musmos upang mapanghinaan 

ikaw ay isang taong may pagkamaygulang, kung kaya't marapat na iyong maintindihan

na ang sitwasyon ng iyong buhay ay parang tagu-taguan, marahil ikaw ang taya at pinagkakaisahan

na sa bilang ng isa hanggang sampu ay ang sandaling ikaw ay nakapikit 

walang kaalaman sa nangyayari sa iyong gilid, tila isang bulag na salat sa detalye ng paligid

pero huwag mag-alala dahil darating din ang punto na ika'y didilat na 

at sa pagdilat na ito ay posibleng malaman mo kung nasaan sila

kung kaya't talasaan ang mata dahil ang Mundo ay punong puno ng mga taong mapagsamantala.

IV.

hanggang dumating sa punto na kayo ay nagkasawaan

nagkayayaan ng ibang larong mapaglilibangan, larong mas nakakapagod kumpara sa taguan 

na kung hindi ka mabilis paniguradong ika'y mapagiiwanan,  tumpak ito nga ang habulan

tulad ng ikaw sa kasalukuyan na naghahabol sa mga taong ika'y tinatakbuhan

pinipilit maabot ang atensiyong kahit kailan ay hindi ikaw ang naging tuon