نوفيلا الآن أريدك .. شوشو الصافي

٦ الأخيرة

٦ الأخيرة

بعد يومين في منزل شريف

شريف صباح الخير

الأم : صباح النور يا حبيبي

حبيبة : صباح الخير

اقترب شريف وقبل جبين أمه ويدها ثم اقترب من حبيبة وقبل جبينها

وجلس على مائدة الطعام ليتناولوا فطورهم معا وبعد أن أنهت حبيبة فطورها همت بالوقوف للذهاب لغرفتها إلا أن شريف استوقفها

شريف : حبيبة لحظة عايزك

جلست ثانية تنتظر ما سيقوله لها

شريف : أنا عايز آخد رأيك يا ماما وانتي كمان ياحبيبة

الام : خير يا ابني

شريف : أنا عاوز أخطب منى سكرتيرتي

تهللت أسارير السيدات فرحا وانفجرت أساريرهم ليعلو صوت حبيبة

حبيبة : احكلنا امتى وقعت على رقبتك

شريف بضحك : الملافظ سعد يا حبيبتي وقعت ايه ، مفيش كل الحكاية أنها بقالها فترة كبيرة بتشتغل معايا أخلاقها عالية جدا وبنت ناس وعجبتني وقلت آخد رأيكم

الأم : كلمتها

شريف : لا أبدا مستني أعرف رأيك الأول

الأم بفخر وفرح شديد : وأنا موافقة ياحبيبي كل اللي يهمني سعادتك وراحتك

حبيبة : ألف مبروك يا حبيبي

شريف : الله يبارك فيك يا حبيبتي ويحفظك وأشوفك اجمل عروسة ، ربنا يخليكي ليا يا أمي يا أحن ام في الدنيا ، أنا حكلم والدها وآخد ميعاد نروح نخطبها

الأم : على بركة الله ربنا يقدم اللي فيه الخير

في المكتب

كانت تعطيه الملفات ككل يوم إلا أنها توقفت عند سماع طلبه

شريف : عايز رقم الوالد

منى : والد مين

شريف بإبتسامة : انتي ، عايز نمرة موبايله

منى : ليه

ابتسم مجددا : علشان أخطبك

وقف الهواء برئتيها عند سماعها للكلمة الأخيرة .. ارتبكت .. احمرت خدودها .. توترت .. لم تعي شيء .. كيف يقولها بهذه البساطة .. فعلا إنهم مخلوقات بسيطة .. طأطأت رأسها بخجل

ابتسم ووقف ثم اتجه بخطواته حول المكتب نحوها ووقف على ركبته أمامها .. تفاجأت من تصرفه .. واتسعت عينيها حينما وجدته يمسك يدها ويضعها بين كفيه برفق وحنان

شريف : أنا عايز اتجوزك على سنة الله ورسوله .. وجاي للبيت من بابه .. أنا مهما دورت مش حلاقي حد يكملني واحبه أكتر منك .. أنا من أول يوم جيتي لمقابلة الوظيفة .. وانا حاسس أنك نصي التاني .. توأم روحي اللي محتاجه علشان تكون رجولتي كاملة .. ويكون لأنفاسي ودقاتي معنى .. أنا يوميها كتبت على ملفك موافق .. مارجعتش لحد .. حسب الاتفاق كان لازم آخد رأي رامز .. بس انا حسيت انك انتي مراتي .. وطول الفترة اللي فاتت وانا بدور على فرصة مناسبة علشان اعترف لك بحبي .. أيو يا منى انا بحبك .. واوعدك أكون الراجل اللي تتمنيه .. وحسعدك وادعمك طول عمري .. ها موافقة