فردوس الشياطين ..للكاتبه مريم غريب

مقاومة

الفصل ( 27 )

~¤ مقاومة ! ¤~

دقت الساعة الحادية عشر مساءً ...

عندما وضعت "ميرڤت" فنجان قهوتها علي الطاولة و نظرت نحو إبنتها و زوجها قائلة :

-يـاااه . أوام 11 ! ده يدوب أمشي بقي . ده معاد نومي عدا أصلا .. و ضحكت

سفيان و هو يطفئ سيجاره بمنفضة قريبة :

-تمشي إيه يا ميرڤت هانم ؟ إنتي بايتة معانا إنهاردة إستحالة أسيبك تمشي

ميرڤت : يا خبر أبيض بيات مرة واحدة ؟ لأ يا باشا أعذرني مش هقدر . أنا مش برتاح غير في بيتي بصراحة

سفيان بعتاب : يعني هو ده مش بيتك بردو ؟!

ميرڤت بلطف : بيتي طبعا بس آ ..

-مابسش ! .. قاطعها بصرامة ، و أردف بجدية :

-هتباتي الليلة دي هنا . في جناح مخصوص للضيوف و هتبقي علي راحتك خالص كأنك في شقتك بالظبط
و الصبح بعد الفطار لو حبيتي تمشي هخلي السواق يوصلك مافيش مشاكل

نظرت "ميرڤت" بإتجاه إبنتها ، لتكتفي "يارا" برفع كتفاها و النظر للجهة الأخري تاركة لأمها حرية القرار ..

تنهدت الأم و قالت بإستسلام :

-خلاص يا سفيان باشا . إللي تشوفه !

و ظهرت "ميرا" في هذه اللحظة ...

-ميرا ! تعالي يا حبيبتي .. صاح "سفيان" و هو يشير لإبنته بالقدوم إليه

أقبلت "ميرا" علي والدها مبتسمة ، مد يداه و إجتذبها لتجلس فوق قدمه ، أخذ يمسح علي شعرها الطويل بحنان ثم قال :

-يوسف روح و لا لسا ؟

ميرا بصوتها الرقيق :

-أه روح دادي . السواق بتاعه جه و أخده .. و أكملت بعبوس :

-بس إنت لازم تعاقب سامح

-ميـرا ! .. تمتم "سفيان" و هو يزجرها بتحذير ، و أردف :

-نتكلم بعدين يا حبيبتي . المهم دلوقتي عايزك تاخدي ميرڤت هانم علي الجناح إللي كان فيه يوسف . لو في أي كركبه خلي الخدم يشوفوه فورا أنا هعتمد عليكي في المهمة دي

ميرا بإبتسامة : أوك . Don't worry .. و حنت رأسها لتطبع قبلة علي خده

كانت "يارا" تجلس و تشاهد كل هذا بتعجب شديد ، علاقة الأب بإبنته تبدو طبيعية و مستتبة جدا .. و الفتاة كالملاك ، بنظراتها البريئة و حركاتها العفوية و وجهها البيضوي الطفولي

حقا ياللعجب ، شيطان ينجب ملاكا !!

-أنطي ميرڤت Please Follow me .. قالتها "ميرا" و هي تقف علي قدميها و تسير عدة خطوات للأمام

قامت "ميرڤت" من مكانها ، لتقوم "يارا" أيضا .. مضت صوب أمها و لمست كتفها قائلة :

-تصبحي علي خير يا ماما ! .. كانت تجاهد لرسم تلك الإبتسامة البسيطة علي ثغرها