قصص واقعية قصيرة

منزل سيلينيا

مرحبا...

اني اسمي احمد عايش بامريكا

روتيني كل يوم نفس الشي اكعد الصبح البس ملابسي و اروح للدوام من ساعة 9 الصبح الى الـ6 مساءا..

روتيني اليومي مثل اي شخص ممل و ما بي شي جديد لاكن كل يوم لازم نجتمع اني و اصدقائي بمحل كوفي و نسولف شلون جان يومنه..

اغلب اصدقائي امريكيين لان انا عايش بامريكا من 10 سنوات

يوم من الايام تاخرت شوي بالدوام و رجعت الساعة 7:15 مساءا و كان لازم اخذ الطريق السريع لان الدنيا ظلمت و انا تعبان من الشغل

كنت اكمل الطريق عادي بس شفت بنت بعمر الـ12 سنة واكفة و تاشرلي؟
استغربت منو يضل بالشارع بهيج وكت!!

المهم وكفت و سالتني اذا اكدر اوصلها لبيتها والي هي مو بعيدة كلش عن المكان الاحنة بي...

كالتلي ان الدنيا ليل و اخاف اروح وحدي طبعا و كاي شخص مستحيل اتركها و ركبتها وياي بس كان الجو كلش بارد فانطيتها الجاكيت مالي..

وصلنا البيتها و نزلتها و شكرتني و دخلت البيت...

تذكرت ان الجاكيت وياهه و المبايل وياهه هم !

بس كلت ما ازعجهم و اجي اليوم الثاني اخذ الجاكيت و منها اسلم عليهم و امشي..

اليوم الثاني كالعادة رحت للدوام و رجعت و اخذت الطريق السريع و وكفت السيارة يم بيت البنت كلت راح اخذ الجاكيت و امشي...

دكيت الباب طلعتلي مره جبيرة بالعمر تقريبا 91 او اكثر سالتها عن البنت الي وصلتها امس و ان جاكيتي بقى عندها..

كالتلي اي بنت؟!!
ترى ما عندي بنت بالبيت اعيش وحدي!!

استغربت و باوعت للغرفة شفت صورة البنت الي وصلتها..
كلت هاي البنت الي وصلتها والي انطيتها الجاكيت و بيه مبايلي و محفضتي و كلشي؟!!!

كالتي شتكول انت؟!!
هاي بنتي اسمها سيلينيا و توفت من 10 سنوات بحادث سير!
مستحيل تكون شايفها اعتقد انت مخربط بالبيت او انك تاخذ مخدرات و انك ماتدري شتكول؟

كانت صدمه كبيرره الي طيب شلون اخذت الجاكيت و انا متاكد اني شفتها و ركبتها بالسيارة؟!!!

ركبت السيارة و توجهت بسرعة لعند اصدقائي بالكوفي حتى اكللهم القصة كامله و اذا كانو يعرفون قصة البنت او لا؟

بينما و انا كاعد احجيلهم القصة شفت احد من اصدقائي كام يضحك كلت اكو شي يضحك؟!!

و سمعت الرد الي خلاني صدك اخاف...

كالي ماكو بيت اصلا بالطريق السريع و كال نكدر نروح و نتاكد!

بدون تفكير ركبنه السيارة و رحنا للمكان الجان بيه البيت و المفاجئة انه ماكو بيت اصلا؟!!!

ماكدرت اصدك كلت بنفسي شلون اختفو و انا شفتهم بعيني؟!!
هل يمكن يكونون من الشياطين او حتى الجن!!!

ولحد هذه اللحظة ما كدرت اصدك الي شفتة...