ام زوجي الظالمة (حماتي المستبدة)

البارت الثاني

#حماتي_المستبدة
البارت الثاني

#بقلمي
همسات الليل(ام ايه)

صباح يوم الخميس...

احمد.....
كعدت من نومي اريد اروح لدوامي ...
حسيت بشي غريب بالبيت اليوم..

جان هدوء البيت مو طبيعي ...
امي نايمه كيف و جره هي تكعد من الفجر تصلي وتبقى كاعده متنام ...
وتبقى تشتغل بالبيت ومشغله القرآن على اعلى درجه حتى تفيع الكل من 7....

بس اليوم ماكو شي من هذا القبيل...
فتت للمطبخ كلت يجوز الكاها تحظر الريوك ..بس ملكيتها...

صراحه خفت لان الامر مقلق ممتعودين نشوف بيت سعوده هادئ...
رحت لغرفتها دكيت الباب وفتت...

شفتها نايمه وشاده راسها وخدودها حمرة دم ....
دنكت عليها...
ماما... يوم كعدي.. شبيج حبيبتي ...

فتحت تك عين وكوة تحجي...

احمد.... يمه حاسه ايامي قليله ونهايتي قريبه...
اسم الله عليج حبيبه ليش هيج تكولين....

هاهي يمه البني ادم يعرف ويحس بنهايته من تقرب ...

كومي كومي حبيبه...
هسه اوديج للمستشفى...

لا وليدي روح لدوامك و لتشغل بالك بي.....

من كل عقلج تريديني اداوم وانتي مريضه ...
لا ما اروح هسه اخابر ربعي وأخذ أجازه.....

طلعت من غرفة امي ورحت اركض للممر اصيح على عمار وحسن لان غرفهم فوك ...
واني غرفتي جوه يم غرفه امي...

حسن وعمار اكعدوا وتعالوا نزلوا هنا بسرعه...

عمار ...
اني نايم بسابع نومه ما احس الا حسن يدغ بيه ويكعدني ....

اكعد عموري اكعد...

روح حسن منا لخاطر ربك متكولي شرايد ...
قبل ساعه ياله نمت...
ولك اكعد امي ما ادري شبيها....
يمكن دتموت..

عمار...فتحت عيوني من سمعت بطاري امي ...

ها شبيها امي ...
ما ادري بس وضعها مو تمام واحمد يريد ياخذها للمستشفى...

كمت و راسي صاير طبل شثكله من وره السهر ...

غسلت وطشيت مي على وجهي وشعري اريد اصحصح وفتت لغرفة امي....

شفت امي...
معقولة هذا الجبل الشامخ والبركان الثاير ليل ونهار هيج نايمه وروحها مفرفحة ولايبه....

امي حبيبتي شبيج كومي الله يخليج ..

مابيه شي عموري لتخاف بس تعب وارهاق شويه هسه يروح.....