ام زوجي الظالمة (حماتي المستبدة)

البارت الخامس

#حماتي_المستبدة
البارت الخامس

#بقلمي
#همسات_الليل(ام آيه)

عمار....
مرت ربع ساعة على  جية تارة وبيت صلاح ...
وامي لحد الان مجتي تسلم عليهم...

دزيت علياء تصيحها...
تالي علياء ...
اجتي ماده البوز متر ...الله يعلم شحجت وياها...

عمار.....طبت امي...
كالت السلام عليكم...

جنت مدنك بتلفوني د اكتب مسج لتاره  ...
من سمعت صوتها ...رفعت راسي وانصدمت.....
و بقيت فاتح حلكي !!!!!!

فشلت من المنظر وطبيت بنص هدومي ...
اتمنيت الكاع تنشك وتبلعني  ...

سعاد....
السلام عليكم...

رؤى ..
تفاجأة بمنظرها لام عمار جنها مجديه.....
كمت راسا تمشيت عليها وبوستها ....
هي تعرفني لان احنه ملتقين من قبل...

شلونج خاله وشلون صحتج الحمد لله على سلامة عمار ....
الله يسلمج بنيتي ربي يخليج ويحفظلج راعي بيتج وبناتج......

شلونك وليدي ابو ملاك ان شاءالله بخير...
هله بالحجيه بخير...
كرة عينج بسلامة عموري...
الله يسلمك وليدي...

سعاد....
شفت تاره دتتقدم عليه...
اني رجعت نفسي ليوره وحطيت ايدي بجيوبي...
وهي فشلت بقت بمكانها...

تاره...
الحمد لله على سلامة عمار خاله...

هلا ...الله يسلمج...

تاره....
كلش جافه ويايا غير هالكلمتين محجت...
وراها لبستني وحولت بالكلام ويا بيت رؤى...

رجعت كعدت وبقيت مدنكه ...
راسي ثكل حسيته...

تارة...تفاجئت بسلامها الجاف ...
و بشكلها المبهذل...
..
لابسه دشداشه عتيكه عبالك وصلة مسح...
وذيالها كلها مي ....
ولابسه نعال رجالي تك اصبع وتك جفت...
كل واحد شكل ولون ...
ومعصبة راسها..

كملت حجي ويا رؤى ...
ورجعت اندارت عليه....

هاي انتي تاره المدوخه هالمكرود ابني و عاميته...
تارة....
استحيت من كلامها حرجتني مكدرت ارفع راسي  واجاوبها.....
عبرة بداخلي خنكتني....

سعاد....
يابة عذروني شكلي مبهذل ...
بس شسوي هذا باب رزقي و الناس تريد خبزها على الموعد.....

تارة....
هاي شنو ...ام عمار تخبز للناس ...اول مره اسمع...
الي اعرفهم ناس ممحتاجين ومرتاحين...

بقت رؤى تباوع عليه...
حسيت عمار يباوع عليه بس مكدرت احط عيني بعيونه....

سعاد......
تعالوا يمي بالمطبخ دكمل شغيلاتي...
متفيدكم كعدة الزلم وسوالفهم ...