بعد إسبوعين
#ALY
دخلت البيت مش شايف قدامي من كُتر المرضى اللي جُم انهردا،تقولوش ده يوم الحوادث العالمي؟🙄
_ايه ده انتَ ایه اللي جابك هِنا
"فريدة؟ انتي اللي بتعملي ايه هِنا؟"
_انت مالك انت ده بيت بابا و ماما الله يرحمها و آجي براحتي
اتنهدت و قولت"طيب نورتي ، عن إذنك انا داخل انام"
قالت بزعيق:هو ايه اللي داخل تنام هو انا مش قولت مش عايزه اشوفك تاني؟
جِه بابا و احمد جوزها
قال احمد بقلق:فيه ايه يا حبيبتي مالك بتزعقي ليه ، فيه ايه يا علي؟
"لا ولا حاجة انا داخل انام عن اذنكو"
فريدة بعصبية:وانا قولت انت مش هتقعد في مكان انا فيها
رد بابا بقلق:خلاص يا فريدة براحة علشان اللي في بطنك يا حبيبتي ، وانتَ يا علي معلش روح نام عند اي حد من صحابك انهاردة
"يا بابا حرام عليكو بقا ما قولت انا ماليش ذنب في حاجة."
فريدة بزعيق:انت كذاب ، روح ربنا ياخدك و يخلصنا منك يارب
احمد بزعيق:فريدة اخرسي بقا !!
فريدة:مش هسكُت إلا لما يمشي
"بدعيها من قلبي والله" و بصيت لبابا يمكن يدافع عني بس هو سكت فضحكت ..
"مش عارف اقولكو ايه بصراحة بس والله حرام الكَسره اللي انا فيها ، انا ماشي"
طلعت بره الشقة وقولت بصوت عالي"مبروك يا فريدة ، يتربى في عزك" و نزلت على السلم جري حتى الإسانسير مستنتهوش يطلع
ركبت عربيتي و عيني دمعت بس مسحتها بسرعة ، انا مغلطتش علشان أعيط
هما ليه دايماً بیلموني على حاجة انا ماليش ذنب فيها!؟
#MAHMOUD
الجرس رن ف قومت افتح الباب
"ايوه مين حضرتك"
_انا ساعي البريد يافندم
"ايوه قصدي عايز ايه؟"
_قضية مرفوعة على حضرتك
بصتلُه بقرف و قولت"يلا يا بابا روح العب بعيد ... ايه ده انتَ انور اللي كان معانا في المستشفى"
_مع مين يا فندم؟
"اوففف اللي كان مع نادية ..
قاطعني و قال بضحك:هو انت الدكتور الغِتت اللي كان معانا؟
"علييكك نووور ادخل فهمني عايز ايه"
_حاضر ...يارب يا ساتر
