السلام عليكم حبايب😚😚😚 .
تسمحولي طبعا اقدملكم قصتي الجديدة
للنصيب حكاية اخرى ...
اتمنى اعرف رأيكم بيها مو بس تم ومتابعة ...
ارأئكم تهمني حتى لو انتقاد حتى اعرف الخلل وين واتمنى تعجبكم ....
#للنصيب_حكاية_اخرى
بقلمي وئام البياتي
الجزء١
سيف.. صباح الخير حبيبة.
ام سيف .. صباح الخير والعافية امي وابوية انت تعال يمة اتريك قبل لتطلع.
سيف.. جاي يمة جاي بس دقيقة .
بدلت ونزلت امي كاعدة يمكن غيث طالع وضيف نايم كالعادة يتأخر بنومته. ها يمة جاي حليب بداعة سيف .
ام سيف.. ههه ولك دتعال اشرب مو داصيحك الا تحلفني .
سيف ..ضيف نايم .
ام سيف.. هسة اكعدة ..
سيف.. هم يلة هذا شينتظر ..
ام سيف.. بس يبدل يوم ميتاخر دتعال انت هسة اكعده وراك .
ضيف خامس ادبي وغيث ثالث هندسة كهرباء واني سيف الجبير عمري ٣٣ سنة مكمل قانون ومتعين الحمدلله بدائرة والعصر مكتب محاماة .امي الله يحفظها ويديمها النا ابوية متوفي صار اكثر من ٦ سنوات احنة ٣ ولد اني وغيث وضيف .. تريكت وسلمت ع الوالدة وطلعت بسيارتي بلطريق شفت ابراهيم صاحبي من الابتدائية جنة كاعدين بمنطقة شعبية ايام الابتدائية ومتفاركنا ابد شلنا من منطقتنا كعدنا هنا وشاءت الصدف ابراهيم ورة زواجة اشترة قريب ع بيتنا وكعد ..دكيتله هورن ها برهم صباح الخيرات .
ابراهيم ..هلة حبيبي صباح النور شلونك .
سيف ..الحمدلله اصعد.
ابراهيم.. لا والله ميحتاج قريب بس اودي الجهال للمدرسة واطلع لدوامي اشوفك بليل هاااا.
سيف..اي ان شاءالله يلة في امان الله.
ابراهيم ..مع السلامة.
سيف..وصلت للمحكمة وبدة يومي مثل يومية الحمدلله علاقتي كلش زينة بلكل والكل يحترمني ويحسبلي الف حساب واني جدا رسمي ماحب اتجاوز حدودي وية احد لهذا جنت محط انظار المسؤولين اي مدير يجي يركز وياية ويعتمد عليه بكلشي ولان ملتهي بشغلي وبس ماعندي اهتمامات ثانية... الا زينة خبلتني حبها الي من طرف واحد البنية كللش حلوة الله يستر عليها وحتى مو جبيرة اصغر مني بهواية بس شسوي لكلبي لهواها وماهوة غيرها..حبيبتي الي تاهت مني وكلي امل الكاها واكمل حياتي وياها..
زينة هواية حاولت وكامت تدز عليه موظفات ويانة اني اعرف هي الي دازتهم بس موبيدي وماريدها ترخص نفسها لان متستاهل تحط نفسها بهيج موقف بلعكس تستاهل انسان احسن مني يحبها بس اني لايمكن يدك كلبي لغيرها وماعتقد راح اكدر اسعد نفسي واسعد غيري الا هي وراحت من ايدي وكلعادة جايبة وياها لفة .
سيف..تسلمين زينة متريك بلبيت .
زينة .. عفية سيف شبيك وياية .
سيف.. مابية شي والله ليش شبية.
زينة.. ليش تضوج مني.
سيف..رفعت راسي شنو وليش اضوج منج انتي اخت عزيزة .
زينة.. لا عفية سيف اني مو اختك ولا يمكن اكون اختك انت ليش هيج تعاملني دمرتني سيف حبك دمرني فدوة حس بيه وارحمني ترة بعد مداكدر اتحمل .
سيف..اهدي زينة وكافي بجي انتي اختي الصغيرة لازم تفهمين هذا الشي اني مافيدج صدكيني تستاهلين قسمة احسن وانسان يحبج للاسف اني ماعندي هذا الحب.
زينة.. لا سيف اني ماريد غيرك اني ماعرف حتى شلون حجيت وياك هسة اني مو هيج والله بس حبك تعبني ومداكدر اعيش بلياك .
دنجت ماعرف شاجأوبها زينة موظفة وياية بلدائرة عمرها تقريبا 24 سنة ومتعينة ويانة صارلها سنتين ماعدها شي البنية مثقفة ومن عائلة وتعبانة ع نفسها من يوم الي اجتي وتعينت يمنا انتهبت على نظراتها بس مكدرت ابادلها مشاعرها وصديتها وفهمتها بصورة غير مباشرة بس زادت منقصت وكل ماتجي وحدة من الي ويانة وتفاتحني بموضوعها اصدهن واكطع وياهن كل امل حتى لتبقى تلح واني هم لا عشمتها لا بكلمة ولا بنظرة ابد متجاوزت حدود الزمالة وياها حتى لتفهم اي شي غلط حتى شقة بيناتنا ماكو هي وياية بنفس الغرفة وكلما نصير وحدنا احاول اطلع من الغرفة بس حتى لتتجرأ بنظراتها .
رفعت راسي عليها زينة انتي احسن واحد يتمناج بس اني كلبي متعلك مو اليوم والبارحة كلبي ملجوع من يومي كلبي وية عمري الي راحت وماعرفلها طريق حبي الها مو حب عادي حب عمري كله والى هسة مداكدر انساها والكل يعرف قصتي فحتى تشوفيني الى هسة ممتزوج لان ماريد اظلم احد وياية عندي امل اشوفها حتى لو بنظرة عايش على هذا الامل فيابنت الناس اتركيني وشوفي حالج وعيشي عمرج ليضيع وتحمليني ذنب مو ذنبي .انتي تستاهلين كل خير زينة بس مو وياية صدكيني راح اضلمج لان ماعندي اي مشاعر ممكن بيوم انطيجياها .مع الاسف اني انسان خالي من اي مشاعر الا الها وماريدج تتعلقين بأمل جذاب يضلمج ويأذيج بعدين .عفتها تبجي وطلعت جان لازم اقسى عليها حتى لتتأمل بيه بعد وتكطع نهائي لان اني مراح اكدر انطيها اي شي سيف مرهون كله الها هي وبس ....
رجعت للبيت واني الضوجة مفولة عندي بلة شسويلها هاي صارلها كومة ادري لو تجيها قسمة ولة ماريد اتورط واورطها .
سيف.. هاحجية .
ام سيف .. هلا وليدي الله يساعدك شلونك يمة .
سيف.. الحمدلله.
ام سيف.. تعال تغدة يوم وناملك شوية .
سيف .. اي يوم جاي .رحت ذبيت همي وحملي سبحت وبدلت ونزلت يادوب انام ساعة واطلع للمكتب تغديت بلاسم امي انتبهت عليه سولفتلها .
سيف.. اي يمة بلكي خوش بنية وتخليك تحبها ابني عمرك راح يطخ ال40 يعني هم يلة تخلفلك فد وليد وبنية .
سيف .. ها يمة بدينا لو ادري كلشي محاجي .
ام سيف.. ياامي لازم تتقبل وضعيتك البنية يمكن تزوجت وراحت وانت المن منتظر ترة ماكو واحد يسوي سوايتك ماكو هيجي سالفة يعني دتنتظر وهم متعرفلها طريق سنة سنتين تلاثة عمرك راح وانت تنتظر جم دوب .
سيف.. يمة فدوة سدي الموضوع ماريد اتناقش بي ادري كلكم صح واني غلط بس موبيدي ماكدر افهميني ..
صار 13 سنة محد فك مني يومية محاضرة من احد خبلوني 13 سنة من فقدتلها اي اثر شالوا من المنطقة وشكد حاولت ودورت عليها معرفتلها طريق تخبلت رجعت من السفر وانكفخت بخبر دمر حياتي كلها جنت اول كلية جانت عطلة نهاية السنة وابوية جان عنده قلب وعن طريق الجمعيات الخيرية كدرنا نحصله مقعد ويتعالج بلهند بعد سنتين مراجعات هو وامي الحمدلله وطلع اسمه عنده صمامين بلقلب مسدودة وجان لازم عملية والحمدلله جانت عطلة ولازم اني اروح وياه وطولت سفرتنا شهر كامل اتصالي جان بأمي واخوتي وعمي الجبير احمد وولد عمي اثنين اسامة وعلي وابراهيم اكثر من اخ مو بس صديقي .رحت وفاركتها لاول مرة وماشوفها شهر كامل كلش كلش جنت يومين تلاثة اسبوع واموت اكوم الوب علما تطلع من البيت واشوفها واشوف كلبي الاخذته من يومها رحنا والحمدلله ابوية عمليتة نجحت وميصير نرجع علما تستقر حالته ويتأكدون بعد ماكو اي خطر عليه بلسفر ومابين فحوصات وتحاليل وعلاجات وبلضبط 28 يوم ورجعنا للعراق وصلنا جان دنيا مغرب مكدرت اطلع من العالم الي استقبلتنا بيتنا جان هوسة من عمامي وولدهم وبناتهم علمود ابوية وسلامته .من طلعوا جان الوكت كلش متأخر مو مال اطلع هسة .وهي شيطلعها تالي الليل هي بلنهار كوة تطلع عاد دنيا ظلمة .ثاني يوم من الصبح طلعت وماعرف شلون نمت اصلا الليل كله احلم اشوفها طلعت جانت 7 ونص الصبح اكيد مراح تطلع بس ميخالف احس بنفسها موجود قريب احس بروحها قريبة من كلبي طلعت تمشيت لان جان بيتهم نفس منطقتنا تقريبا فرعين بيناتنا رحت وياريت مرجعت اصلا ولا رحت لمنطقتها اصلا واعرف اتعس خبر بحياتي اباوع بيتهم وية الكاع وعمال ديبنون بي ياربي شنو هاي معقولة همة ديعمرون بيتهم رحت اركض للعمال خطية واحد منهم عبالة بيه شي اجاني يركض بيده بطل مي بلكوة كدر يفتهم مني واني هم دقايق يلة كدرت استوعب الحالة الي اني بيها الزم نفسك سيف وكوم وان شاءالله ماكو شي .
سيف.. هاخوية اني اسف بس البيت وين اهله الي جانو كاعدين بي ..
العامل..والله ياخيي ماعرف هسة يجي الخلفة واسأله بس ابقى كاعد ارتاح شوية .
ربع ساعة واجة الخلفة رجال جبير العامل مالته فهمه واجة يمي .
الخلفة..هايابة كول المن رايد .
سيف.. الله يساعدك عمي ..
الخلفة.. ويساعدك يابة كول شمحتاج.
سيف..عمي اصحاب البيت هذا وينهم وين راحوا .
الخلفة..والله ياابني ماعرف الي اعرفه البيت اشتراه ابو ايمن مقاول هنا بلمنطقة هسة ادليك بيته اشتراه وهده واني لزمته .
سيف.. وين صاير بيته للمقاول ولو راح اتعبك حجي .
الخلفة.. لا يابة عليش هلتعب تعال وياية نروحله .
سيف .. رحت وياه واني عقل مضل براسي ياربي منين طلعتلي هلمصيبة ليش هيج صار بيه وليش راحت من ايدي بقينا نمشي علما وصلنا لبيت الرجال خطية خبصته وياية دك الباب طلع ولد تقريبا اكبر مني بجم سنة .
الخلفة.. هابوية ايمن الله يساعدك ..
ايمن.. هلا ابو اسماعيل(الخلفة) شلونك عمي تفضل ..
ابو اسماعيل.. لا يابة مستعجلين وين الحجي محتاجي بشغلة مستعجلة والله ..
ايمن.. والله عمي رايح للنجف يومين ويرجع.
ابو اسماعيل .. موداكول ممر صار يومين .
سيف.. ياربي شنو من حظ .
ايمن..عكب باجر يرجع ان شاءالله ..
ابو اسماعيل..يرجع بسلامة وليدي تسلم وليدي في امان الله .
ايمن.. تسلم عمي ماشربتوا شي .
ابو اسماعيل.. لا يابة واصل ان شاءالله.
ايمن..الله وياكم.
ابو اسماعيل.. ها وليدي كدامك تعال عكب باجر بلجن جاي وهم نروحله اني وياك لو تريد تروح وحدك براحتك..
سيف.. ان شاءالله عمي ماقصرت واسف لان تعبتك وياية .
ابو اسماعيل.. لا ابني شنو السالفة قابل شمسويلك .
سيف.. تسلم عمي في امان الله .رجعت واني ممستوعب الي اني بي يعني بيوم وليلة ماعرفلها طريق واني الي صار اكثر من ١٠ سنوات عيني عليها وداير بالي عليها ياربي ليش ماحاجيتها ليش ماكلتلها قابل احنة صغار واستحي لو اخاف ضليت دايخ بلي صار ممعقولة محد يندل وين شالوا رجعت للبيت ابوية بعده شوية صحته مو شي وكمت اراجع بي الطبيب مالته هنا ابغداد .امي حست بيه شي سولفتلها كلشي سولفتلها على بت كلبي الي ربيتها وربيت نفسي وياها غلوة واسمها عليها شفتها ولفتت نظري من اول ابتدائي داومنا واحنة باول ايام اطفال وصف اول والكل فرحان بهدومه وبجنطته وديوزعولنا الكتب وقبل جانو ينطونا قرطاسية هاي جان سنة ١٩٨٧ وكلمن بصفه وهوسة بعدنا لان صغار وشي جديد علينا طبتلنا المرشدة مالتنااسمها ست ميسون وكعدتنا كل رحلة ولد وبنية حتى لحد يسولف غلوة جانت كصيرة كعدت ثاني رحله وية ولد اسمه مهدي واني كعدت الرحلة القبل الاخيرة لان جنت شوية طويل بلبداية مجنت منتبه عليها مرت اياام مابين هوسة وجدول وترتيب الصفوف لحد مااستقرينا بصفنة صف اول ب وبدت المعلمة تذيع اسماؤنا لحد ما كالت اسم غلوة كلنا انتبهنا عليها اسم غريب بس اكو ٣ جانو مشاغبين الصف ومن ضمنهم مهدي الي جان كاعد يمها كامو يضحكون عليها هي كومي وابجي ماتت من البجي المعلمة صاحتها متقبل تحجي عاد اكو بنية وراها كاعدة جانت مروة صديقتها .
مروة.. ست بجت لان هذولة ضحكوا على اسمها.
كامت المعلمة رزلتهم وكومت مهدي من يمها وصاحتني تعال سيف انت شطور اكعد يم غلوة . اني عادي مجان عندي مشكلة شلت جنطتي وكعدت يمها اشوفها هادئة كلش ومن اقل حجاية تبجي .اجتي ست ميسون باستها وسكتتها اصلا يغارون منج لان اسمج حلو وغريب . كعدت يمها وورانا مروة وابراهيم الي الى هسة وياية ومعافني لحظة ..جانت شاطرة وهادئة بشكل وتستحي تحجي بلاول من تكومها المعلمة بس تبجي .لحد ما امها اجتي وجحتلها للمعلمة عنها هي غير اخوتها كلش هادئة وتستحي من كلشي واقل حجاية تبجي بس كلش شاطرة والله ست والنهار كله تقرة .فات جم يوم بلصف كاعدة يمي وبلفرصة وية مروة متتركها ابد ومتحجي وية احد بس وياها ومرة لكيتهم ديبوكون لفتها من ايدها ياربي هذولة بيمن يتحارشون هي بيها داء البجية وذولة مديعوفوها بحالها جروا اللفة من ايدها وهي ام بطن كضتها بجي رحنا ركض اني وابراهيم ضربناهم ورجعتلها لفتها وظليت بس اباوع عليهم خاف يأذوها صارت سولتي بيها ومن هي كاعدة يمي بنفس الرحلة اباوع عليها حبيت هدوئها ماعدها هوسة الجهال كلما احجي وياها متجاوبني بس تبتسملي وكلش خوافة تخاف من هذولة الي لحوا وياها ومرة بطلعة هم جروا جنطتها بلشارع وشمروها بلكاع ياربي شكد جبانة هلبنية مرت ايام واني صرت قدوة الصف هي هم جانت شاطرة بس خجلها مأذيها .عيني عليها ابد متركتها مرت سنة والثانية والثالثة على نفس الحطة وزاد تعلقي بيها جنت حارسها الشخصي كام محد يتقرب يمها لان يعرفون اني بظهرها جنت امشي وراها لحد ماتوصل بيتهم وبلرابع سنة ٩٠ على ٩١ صارت الحرب وكعدنا وماكو مدارس بعد اغلب المناطق فرغت من اهلها كلها الي عنده اهل بلمحافظات طلعوا بقت الشوارع فارغة وباهتة احنة مطلعنة والوكت مينكضي جنت اروح يم ابراهيم بيت ابراهيم كبال بيت غلوة مباشرة جنة نكعد ع الرصيف وكمت انتبه تطلع هي وصديقاتها واختها يلعبن بلباب كلمن لعابته بيده احنة جنة نلعب طوبة واباوع عليها هي هم تشوفني وتضحك خلصت الحرب والحمدلله بدت العالم ترجع لبيوتها واحنة هم امتحنونا نهاية سنة جنا رابع ابتدائي وفاتت سنة ورة الخ وصرنا صف سادس ابتدائي وخلصنا يعني لازم نروح لغير مدرسة هي مال بنات واني مال ولد وبالي يمها جانت تحجي بس وياية وية مروة وابراهيم والاء احنة الخمسة جنا مجموعة وحدة وتقريبا نفس المنطقة كلش تاذينا من خلصنا هلمرحلة وصرنا متوسطة جنت من صدك خايف عليها من الجاي مرحلة مراهقة واني عيني عليها احس اهتمامي بيها كبرني احس اني اكبر منها بهواية رحنا داومنا اول متوسط وضليت ادور وعرفت بيامدرسة راحت مدرستها كلش بعيدة عن مدرستي بس ماكدر اخليها تروح وحدها ولو هي مو وحدها جنت الصبح اوكف قريب على بيتهم همزيت بيت ابراهيم كبالهم جنت انتظرة نروح سوة ومن تطلع اشوفها وية اختها وصديقاتها مروة والاء جنة نمشي وراهم لحد مانوصل فرع ونتفارك لو ما اتأخر ع مدرستي جان وصلتها بس الظهر جنت اتعنى على مدرستها واسحل ابراهيم وياية نوكف بعدهم مطالعين وهم نرجع نمشي وراهم هي منتبهة عليه واحسها مكيفة بس دومها مدنجة وتستحي تباوع مروة اجرا منها مرة دنمشي وراهم جنة صف ثالث متوسط مروة بطئت وحجت ويانا وهي ابد عبالك شادة جروخ وصلت اصلا وعافتنا ليورة واني عيني عليها ماعرف شنو هذا اهتمامي بيها ليش هلكد احتوتني واحتوت حياتي وشغلت تفكيري بلبداية جنت احس هي محتاجتني لان متكدر تدافع عن نفسها بس هسة حسيت اني الي محتاجها محتاج نظرة عينها الدافية من تباوعلي وراسن تندج اني الي اريد اشوفهة .احنة بقينا نفس مدرستنا لان ثانوية بس هي حولت اعدادية الحمدلله مدرستها ع طريق مدرستي ولاتخليني اطر هلطريق كله بس ابراهيم باعوا بيتهم وشالو قريب الثانوية مالتنا .كامت تطب مدرستها واني اكمل وراها كامت تطلع من وكت حتى يبقالي وكت على مدرستي يعني عرفت كامت تحس بيه وباهتمامي بيها كمت ماكدر اروح يم بيتهم قبل جانت حجتي ابراهيم وهسة احنة كبرنا يعني الي يدخل منطقة اكيد على صاحبته واني ماكدر اروح لان عيني تفضحني .جان الفرع الي بيتهم بي طويل ونهاية فرعهم متنزه وتصير وكفة مال ولد وخصوصا بلعطل الشباب ماعدها شغل بس وكفة وكل فترة اشوفها هي وامها واختها يفوتون واني اغدي نار لو بيدي مااخليها تطلع وهذولة عيونهم تلزلز منا ومنا مراهقين الي ماعتبر نفسي منهم لان حبها واكدر اكول حب كبرني ١٠ سنين حسيت بروحي نضجت حتى مجنت اباوع مثل الولد الي بعمري على اي وحدة لان مخلي ابالي اذا اباوع على وحدة اكيد راح يباوعون عليها او يصجموها حسيتها ملكي مالتي ولا يمكن احد يكدر يمسها او يتعرضلها واني موجود جانت دومها بحمايتي عدينا وصرنا سادس والتهيت عنها دخلت ادبي امنيتي قانون والحمدلله طلعلي قانون واركض ورة الي يعرفلي هي شطلعت وبقيت الوب وابراهيم وياية وياية ويعرف بكل الي اني بي وكل هلاهتمام وفعلا تحول لحب صدك اني حبيتها لغلوة غلوة صارت عمري غلوة مالتي اني وحدي وبس ابراهيم طلعلة ادارة واقتصاد ادارة اعمال والاء هم وياه ومروة محاسبة وغلوتي وحدها وفعلا طلعت جامعة بغداد اداب عام بس ماعرف ياقسم .هذا الحجي سنة ٢٠٠٠ رحت مرتين لجامعة بغداد ادور عليها واني مادري ياقسم بالاداب حتى لو بس المحها ومشفتها ورحت دورت باسماء الاقسام كلها والكى اسمها قسم عربي بس هي مدداوم وكام يأثر على محاضراتي وصيت ابراهيم يسأل مروة ومرة اني رحت لمروة حتى اعرف منها هي وين وليش مدداوم حتى داامر من يم بيتهم محد ديطلع .مروة سطرتني بخبر رغم تاذيت بس اطمئنيت عليها ماكو شي طلعلها اداب عربي بس اجلت هلسنة ليش مادري وحتى مروة متعرف تكول صار كومة مرايحتلها لان اخر سنتين بيت مروة هم شالوا بغير منطقة.يلة ميهم السنة الجاية تكمل زادت روحاتي لمنطقتهم حتى اشوفها واملي عيني منها ورة شهر شفتها مرة وحدة وية امها رايحات للسوك واني كل هلسنين محاجي وياها كلمتين على بعض احسها تخاف حتى من الولد تركيبة شخصيتها تربيتها تختلف هواية عن البنات الي بعمرها احسها فريدة مشايف هيج بنية احسها طفلتي واني همين مخدشت حياءها وبراءتها بأي كلمة ولا حبيت اخليها تفتح عينها على سوالف البنات بهلفترة والي اشوفه كدامي من جنت امشي وراها صديقاتها يلوفن بالافرع كل وحدة وية صاحبها الاهي ومروة والاء ومن تصير وحدها تندج وتركض لبيتهم ..اجلت اول سنة اني داومت وجنت الح على مروة والاء فد يوم يعزموها هنا وتجي للكلية .
مروة.. اتوسل بيها امها متقبل تخاف عليها لان تعرفها كلش فقيرة .
الاء.. فقيرة لو فاهية وطرهات دختروح شدعوة بس هي بنية مو احنا وياها شهلفهاوة ..
سيف.. كلش غثتني ليش متسميها ادب واخلاق وتربية ثم انتي شدعوة مغثوثة .
الاء.. لا النهار كله ماعدنا غير غلوة الخلقها مخلق غيرها ...
سيف .. ممكن من ينذكر اسمها تحجين عنها بادب الاء اخر مرة تحجين على غلوة بهلطريقة ممكن..عفتهم وكمت وابراهيم وياية وهم مسكتولها هو ومروة طلعت واحس نفسي تايه مداشوف عيونها احسها تصيحلي تباوعلي يعني تدري بيه احبها تعرفني محتاجها ياربي شسوي اطب لبيتهم واخذها منهم ليش هشكل حارميني من شوفة عيونها ميدرون هي النفس اليصعد وينزل وبلياها سيف ميت من غير شوفتها يومي عدم واحسبه شوكت يخلص بلكي اشوفها باجر كملت السنة الاولى واني مشايفها ٣ مرات على بعضها وخطف بس الحمدلله المهم اطمئنيت عليها التجاءت لرب العالمين حتى بدعواتي ان تصير نصيبي وتحفظها الي لان بهاي السنة حسيت هي حلم صعب وصوله قبل مجنت اوعى لعلاقتي بيها لان جنة اطفال ومجرد ادافع عنها لان محتاجتني بس هسة مشاعري اتجاها تغير حبي الها اني الي محتاجه .امتحنا والحمدلله نجحت وكلي امل اشوفها السنة الجاية بهلسنة ابوية كلش ترادت حالته جان عنده مشاكل بلقلب وجان لازم اروح اني وياه لان اني الجبير وعطلة طلعنا وتمنيت اودع عيونها حتى ارجع على امل شوفتها .رحنا وابوية سوة عمليتين وبقينا ٢٨ يوم بلضبط والحمدلله اتأكدوا من استجابته للعلاج وجان لازم نرجع بعد رجعنا وبقة شهر ع الدوام وادوام ثاني قانون حلمي وحققته بقت غلوة واحلى حلم عشته بس لازم اكون جدير بي وصلنا وجان الكل باستقبالنا وحتى ابراهيم خطية لكيته بلمطار رجعنا بيومها مكدرت اطلع لان بيتنا جان هوسة كلت باجر اروح واطير لبيتهم وياريت مراجع ياربي شنو اليصار معقولة عمري كله يروح بشوية رملات وحصو كدام بيتهم وسهري ومداراتي الها وين راحت وين اخذت كلبي وراحت ولا حتى استاذنت مني هيجي اتيهني بليا عمري ياربي منين اجيبها شلون راح اعيش وشلون اكمل بلياها زين ماريد شي منها بس اشوفها حتى لو من بعيد مو هيج تعوفني وتروح ..عود اني الي قررت اصارحها هلسنة واخليها تعرف بحبي الها لو بس ملمحلها ليش هيج ضيعت الاول والتالي وين راح الكاها ......
