#للنصيب_حكاية_اخرى
بقلمي وئام البياتي
الجزء١٢
شتريد مني سيف عفية التهي بحياتك اني مافيدك ترة اني وحدة مطلقة وشبعت عقد من حياتي واهلي بركبتي ماريد اشيلك همي .اكيد هسة متزوج وعندك اطفال عوفني سيف لازم تنساني وخلي تكون غلوة ذكرى حلوة بحياتك احسن متكوم تكرهني ..
سيف.. اول شي انتي حياتي الراحت والجاية كلها .ومتفيديني اني الي اقرر وحتى لو مطلقة شنو يعني اكيد اكو اسباب لكل شي واني مثل الاعمى وياج ثقتي بيج فوك الوصف لان تربيتي والعقد اني اعرف شلون احلهن بأسلوبي يمكن متعرفين اني شلون تغيرت واهلج همة اهلي وعشيرتي كلها ..شلون تريدني اتزوج وانتي ماخذة الكلب والعقل والروح وكلشي بيه الج ولج لو اكدر انساج مجان هذا حالي بلياج انتي الراح والجاي كله ومستحيل تكونين ذكرى بحياة سيف اوووف بوجهمن مصبح اليوم اكيد بوجه امي لان دومها تدعيلي بلسعادة واليوم شفتها من ١٣ سنة ولة شلون مصباح من اشوفج كبالي كافي دموع غلوة كافي ولج وليش هلكد محلوة ع الفراك هاااا..
غلوة.. اني لو انت دشوف روحك من يومك..
سيف.. اي من يومي شنو دحجي عاد مو فتيتيني ..
غلوة.. لا بس من يومك حلوو واحلى مني بهواية جانت الاء دائما تكلي شيباوع عليج دشوفي شلون يضوي وصدك من يومك صاك ..
سيف ... هااا ها كمت تتحارشين بيه .. سيف بلياج كلشي ميسوة انتي الكمر وانتي العشك مالتي انتي روحي وهذا يكفي تحجين بزود وكلج ثقة اني بظهرج حبيبة سيف انتي وهذا يكفي يابعد بيتي تدرين بيتي ينتظرج ومظلم بلياج شوكت تجين تنوري وتنوين حياتي كلها يويل لو تعرفين شضاملج بكلبي اوووف غلوة لو ما عيب من العالم متعرفين شسويت بيج هسة ..ولج كلها صارت عدها بيوت وجهال صدك متريدين تعرفين اخبار مروة وابراهيم ..
غلوة.. لا الله عليك تشوفهم ..
سيف .. لعد شهون بعدج غيرهم ..مروة متزوجة وعدها ٣ بنات ورجلها صديقنا وابراهيم عنده حسن وياسين ومريم ..بس اني وياج يويل صدك ماعندج اطفال ...
غلوة.. جججج ..صدك ليش متزوجت سيف ..
سيف..هااا لابلة مو هسة اجاوبج بس ذكريني عود هههه وغمزلي..
غلوة..دكافي الله عليك كل شوية غامزلي ..
سيف .. غلوة مو مني تستحين ..
غلوة ..عفية دباع الموظفين طابين طالعين وعينهم علينة وانت ماعندك شغل صار ساعة ونص واكفين ترة.
سيف.. قابل بايكين محد اله عندي شي والشغل لاحك عليه يلة حبيبي تعالي وياية بغرفتي لحد مايجي اخوج وانزلي عودحتى نتفق وين اشوفج ..
غلوة.. لا متسوة بعد هسة يجي وعفية علمود التعيين شلون..
سيف.. انسي ماكو...
غلوة ..لا الله عليك سيف والله محتاجة التعيين مو شلون مجان..
سيف.. غلوة انسي حبيبي تعيين هنا ماكو..
غلوة.. ليش فدوة ..
سيف.. المدير العام هنا ياهو التجي تصير مالته تريديني اجيبج يمه انسي حبيبي انسسسي وام مريم عبالها تخليج يمها وهذا ناقص اني اعرفه عوفج منا..
غلوة .. لعد شلون فدوة ..
سيف.. تكملين دراستج وتدللين على سيفج اجيبلج تعيين من جوة الكاع لتدوخين واني يمج حبيبي لتشيلين هم كلشي مدام اني وياج وبسدج ..صدك شحسيتي من شفتيني ..
غلوة.. اسكت راح اموت من الفرحة والله سيف ولا مصدكة عيني بعينك هسة ..
سيف.. اي اي دحجي يمعودة هههه يلة كافي عاد امشي يمي ..
غلوة .. لا عفية راح ابقة هنا لحد ميجي ساهر خابرته فعلا ربع ساعة خابرني كال اطلعي ..يلة سيف اروح لان ساهر وصل ..
سيف.. غلوة شوكت اشوفج العصر تكدرين تطلعين ..
غلوة.. لا عفية امي وابوية وحدهم ماكدر اعوفهم ..بس باجر الصبح اني بلكلية تعال اذا تكدر..
سيف.. طبعا اكدر ليش ماكدر انطيني موبايلج... اخذه حفظ رقمه ودك على تليفونه .. باجر اخابرج واجي ..
غلوة.. اوكي يلة باااي ..
سيف.. بألف سلامة ياعمر سيف انتي ديري بالج على سيف هاااا.
غلوة .. ههه ان شاءالله سلم على خالة ام مريم خليها لتحجي شي هسة ..
سيف.. صار يا روحي .. راحت واني عيني عليها من فوك ليجوة تخببل صايرة .محفوظة من كل شر ياعمري راحت واني صعدت فوك والدنيا مسايعتني من الفرحة ..رحت على ام مريم وطلبت منها تساعدني متحجي شي حاليا علما ارتب اموري وتوكف وياية...
ام مريم ..ياعيني ومرتك ..
سيف.. اني احلها ام مريم لازم احلها لان ممعقولة بعد كل الي صار بية ومن الكاها اعوفها..
ام مريم .. الله يسهلك ابني بس امانة تدير بالك عليها غلوة وردة ..
سيف .. ابتسمتلها تدللين ام مريم..
غلوة.. طلعت على ساهر واني فاشكة حلكي ..
ساهر .. هاحبي لازم تعينتي ..
غلوة.. لا والله وين بس فرحانة كلش ..
ساهر.. دومج فرحانة يااحن غلوة بلدنيا ..
غلوة.. فدوة لعمرك سهوري ..رجعنا للبيت لكيت ريام خطية منظفة ومسوية غدة كبل صعدت فوك سبحت وماشتهي حتى اكل اريد بس انام مددت ربع ساعة وطبت ريام ..
ريام ..ها ولج ليش نايمة كومي تغدي راح يجي حسام يتغدة ويانة..
غلوة.. ماشتهي ريام عفية بس اريد انام..
ريام .. ليش عيني شكو لج اشو شكلج يخوف ..
غلوة.. هاااا ليش شبي شكلي ..
ريام ..ماكو شي شبيج فزيتي بس شكلج ما وحدة دتحب ..
غلوة.. اي اي ريام ..
ريام .. عزة بعينج منو هذا ..
غلوة..لالا يولي ووووووسولفتلها كلشي..
ريام .. اوي عيني كل هذا وضامته ..
غلوة.. لا والله بس من يومها انكطعت اخباره واليوم شفته صدفة ..
ريام ..اي بلة بعد شكال .
غلوة.. هايهية يكلي ماضيعج من ايدي مثل قبل انسي..
ريام ..اي فدوة للحب جلبي بي لعد ولج الى هسة ممتزوج ومنتظرج لعد شكد يحبج ..
غلوة ..اي والله ريام ..
ريام .. دكومي عيني عشوكة خلي نتغدة ونسولف لامي لازم تعرف..
غلوة.. اي اي طبعا..نزلنا جان حسام جاي تغدينا وسوينا جاي حسم رجع لشغله كللها لريام بليل اجيج ابقي وساهر هم راح فتح محله ..كعدنا سولفنا لامي خطية كيفت ..
امي.. اي يمة بلكي ينعدل بختج بلخير عليج يمة اذا ابن حلال وشاريج ان شاءالله يصير من نصيبج ..
غلوة.. باجر راح يجيني للكلية ..
امي ..احجي بثكل ولتنطين مجال عيب بنيتي ليكول عليج خفيفة لان منفصلة...
غلوة.. اي يمة والله ادري..فات اليوم بلكوة اريد يصبح الصبح واروح للكلية واشوف العشك اووي ياسيف هم راح اعيش حبي وياك .صبح الصبح وكمت لبست احلى لبس عندي لبست تنورة ماروني كصيرة وبدي رصاصي وبوت ربع فلات اريد اصير اكصر منه هههه وميكاج طوخ ماروني اني عادة ماحط بس اليوم خبلت روحي وكعدت من الصبح اشسور بشعري بحيث من نزلت ساهر ظل يصوفرلي وامي تبتسم . وللك تصوفر لاختك ..
ساهر ..شسوي عيني اذا اختي اليوم طالعة صاكة لازم عندج موعد ..
غلوة ..ضحكت من كل كلبي كوم ولك توصلني لو اكوم اخذ تكسي ..
ساهر .. اي حتى هسة يوكفون سراوات عيب علهشوارب يولي بس الله عليج جم واحد يرقمج تكوليلي ههههه..
غلوة ..كوم لك ابو الغيرة..تريكنا وطلعنا وامي تصلي على النبي حبيبتي .سويت فلك بروحي لان حبيب كلبي من صدك حلوو شكله يخبل لونه خمري والطول خرب عرضة شبخة هههه والهيبة الهوة بيها كلش يبين عليه الثكل وميباوع على احد من يمشي يخليني افقد الثقة بروحي لان لو ع الجمال هو فعلا احلى مني ..وصلني ساهر وراح ..
ساهر..ديري بالج من الزواحف ..
غلوة.. ادري حبيبي لتوصيني..نزلت امشي ومدنجة وما احس الا واحد صار كبالي رفعت راسي واشوف العمر كدامي يالله هاي من الصبح جاي اني كلت هسة فد ب١٠ لو ١١ يجي..
سيف.. لا بلة واضيع ساعتين تلاثة من شوفة عيونج ولج اني الليل ماعرف شلون كضة حتى يهل الصبح واشوفج ..
غلوة.. شلونك..
سيف.. شلوني بلياج غلوتي صباح الخير ..
غلوة.. صباح الخير على عيونك ..
سيف.. هاي شطالعة لو تريدين تخبليني ولج ..
غلوة ..احممم تعال نكعد بهاي الكافتريا لان احنة قريب الاستعلامات واكفيين .
سيف.. صار بس انزعيلي المناظر لان اريد اشوفهن ...
غلوة.. ههه صار رحنا كعدنا بوحدة من الحدايق اكو كافتريا طلبنا ريوك وكعدنا ناكل سوة وهو مينزل عينة واني كل شوية مختنكة سيف بالله كافي دير وجهك عني دمرتني خلي اكل براحة..
سيف.. ولج تستحين مني ..
غلوة ..لعد منين ياعيني من ابوية..
سيف.. ولج صايرة لسان ..
غلوة.. شسوي غير انت عفتني جان لازم اصير هيج لان الدنيا لطشت بيه لما كالت بس ..
سيف.. واني ويني عنج ليش بعدتي كل هلسنين هنت عليج يويل ولاليلة نمت براحة بلياج مادري انتي وين ..
غلوة.. والله سيف مو بيدي الظروف طيحت حظي حشاك ظافر دمرنا كلنا بس هسة الحمدلله يلة ارتاحينا ولة يرادلنا كعدة طويلة احجيلك المصايب الي صارت بيه .
سيف.. وليش منطيتني خبر..
غلوة..سيف تدري بيه شكد جنت طينة وماعرف احجي كلمتين يعني المن احجي مروة تدري بعيدين علينة وقليل جانت تجي واحنة سالفتنا صارت بسرعة كلش جانت بس الاء وطلعت ظهرية والله اول مرة اسويها ونطيتها رقم بيت خالي ونطيتها رسالة لمروة حتى تطمنك وتخابروني وكلتلها ضروري مروة تخابرني وكوليلهم اني بكركوك وانتظرت وانتظرت سنين ومحد خابرني وانكطع عنكم كل خبر...
