#للنصيب_حكاية_اخرى
بقلمي وئام البياتي
الجزء٧
عمار.. شنو قصدج .
غلوة ..يعني ماعرف انت كول ..
عمار .. شنو الي اكوله ..
غلوة.. انت مجنت رايدني مووو وانغصبت عليه ماعرف احساسي يكول انت اصلا متحبني ومو بعيدة تحب او خاطب او حتى متزوج ماعرف ..سكت والدخان ترس الغرفة ..
عمار.. غلوة..
غلوة.. نعم ...
عمار.. اني فعلا عندي علاقة بوحدة ورايدها بس امي مقابلة ووسن هم وفعلا غصبوني عليج وقبلت بس حتى اسكتهن ..
غلوة..هو عينه عليه ابتسمت ودنجت واني بداخلي اضحك على روحي وهاي بدينا قصة جديدة من قصصج غلوة .رفعت عيني عليه والحل ..
عمار.. ماعرف..
غلوة .. لعد منو يعرف ..
عمار.. اني كلت فترة بس بين ماقنع امي واتزوجها ..
غلوة.. هههه ابتسمت ابتسماء استهزاء بروحي وبحياتي الي راحت من اولها لأخرها من ورة ظافر .زين واني ..
عمار .. انتي بكيفج تريدين تبقين معززة مكرمة تريدين فترة واطلكج بس مو هسة لان حجي العالم تعرفين مصار شهرين ..
غلوة..صفنت بروحي اني ليش هيج سلبية بحياتي ليش ماعرف ادافع عن نفسي عن حياتي عن عمري الي راح يروح من ايدي واني اكول عيب وميصير واخاف على مشاعر فلان وعلان ..
عمار.. هاغلوة شكلتي .
غلوة.. كلت ابقى على ذمتك بس مالك دخل بيه يعني نبقى مثل مااحنة هسة واكمل كليتي ومن اتخرج تطلكني وارجع لاهلي بس لذاك الوكت اني وياك اخوة وبس..
عمار.. اني اسف غلوة بس والله موبيدي ..
غلوة.. لا عادي مصار شي هو اخوية دمرني بقت على الغريب واسفة على كلمة غريب لان فعلا انت مو قريب ابد عافني وطلع يمكن راح للسطح لان سمعت صوت باب السطح انفتحت ..نزلت بلحديقة كعدت هو بدل وطلع وامه بغرفتها محست عليه تعبت من الكعدة والتفكير ودماغي الي مبقة بي ذرة مجال اتخبط بي .. افكاري تروح وترجع شنو هلحياة شنو هلنحس الي انتي بي غلوة ..وين راح يوديج زمانج بعد بغداد وكركوك ورديتي رجعتي لبغدادج وجنج راح ترجعين لكركوك يولي بس هلمرة بكسر اكبر وانتي مطلقة وظافر راح يلعب بيج شاطي باطي وهم يلكالي واحد من المخرفين اليعرفهم ويذبني براسه ..خلصت ايامي بتعب مرت ٥ شهور وبدت العطلة وخلصت ومرتين رحت لاهلي لكيت امي كلش تعبانة وابوية هم ريام وساهر يدارون بيها ووسن من فوك الفوك ولا دايرتلهم بال رجعت وبدة الدوام داومت هلسنة رابع واتخرج وبدة الحجي على الاطفال الي ماعرف منين اجيبهم وعمار يرد بيهم
ويسكت بيهم ومن يطلع يكومن يمذرعن عليه وخصوصا خواته .امه مرة كاعدين وصاحتني تعاي يمة انتي شنو فلمج اشو داشوفه طاب طالع ونوبات حتى يبات برة وانتي ولايمج ...
غلوة.. مو عندي قراية خالة وخطية يكلي اوفرلج جو لقرايتج ..
ام عمار.. لايمة اشو اشوفكم ممرتاحين بحياتكم اكو مشاكل بينكم ..
غلوة.. لا والله خالة هو اكو مثل عمار بطيبته وبحنينته وبخلكه الطويل ..
ام عمار.. اي والله خوش عمار ديري بالج عليه يوم ترة حماة ندى كاتلة نفسها عليه وهو خوش ولد يقشمرنه وياخذنة وهنة وكحات حياية ياكلنج ويشربنج وانتي كاعدة ..
غلوة.. ضليت صافنة لعد هي ماكو غيرها ولا مرة شفتها واكول ليش ندى تكرهني وميعجبها اصلا تباوع بوجهي على اساس اني مكيفة ومجلبة بيكم ..
ام عمار .. هايمة كومي شوفي شنو وراج ومو تنسين حتى تروحين دكتورة تشوف شبيج ..
غلوة.. كمت رحت لغرفتي جان هو كاعد كعدت اقرة وصفنت بلة اذا جبرتني اروح لدكتورة وهو مموجود شأكول وشحجي ... احمم عمار ..
عمار.. نعم ..
غلوة .. صافن على الفلم ويكرز حب اريد اكلك فد شي ..
عمار .. اي كولي اسمعج محتاجة شي تروحين لاهلج تشوفيهم ..
غلوة .. لا لا بس خالة اليوم تكلي هلشهر اذا محبلتي تروحين دكتورة خلي تجي ندى وياية مدام تدري بيك تحب حماتها اكيد راح تساعدني ومنروح لطبيبة بس كوللها قبلها . رأسن اختنك وكام يكحكح شنو هلحجي منين جبتي ..
غلوة.. ياحجي عمار خالة كالت انت تحب حماة ندى وهي تريدك فليش دتضم ماكو داعي كلشي يبين بعدين هسة عوفنا وخلينا بموضوعنا اذا رحت للطبيبة كلشي راح يبين فرتبها انت من هسة احسن بقة صافن مجاوبني اخذت كتابي ورحت للحديقة كعدت اقرة بلمرجوحة شوية واجتي نور يمي نومت بتها واجتي كعدنا نسولف ..بقيت اصفن بروحي معقولة اني صدك معقدة ليش هلكد سلبية
نور.. اي غلوة شبيج حبيبتي احسج مهمومة ..
غلوة .. لا ماكو بس ملتهية قراية ودايخة بيها وامي مريضة هي وابوية ..
نور.. الله يشفيهم الج يارب ..
غلوة.. علاقتي بنور هلفترة كلش قوت واحسها اختي خصوصا اني مالي احد هسة خلصت نص السنةوبلعطلة وداني لاهلي بقيت ١٠ ورجعت احسة ارتاح مني وهلفترة كلش لحت خالة على الخلفة عاد هو كام يحجي وية امه حتى تفك ياخة مني .فكت مني بس كامت تكلب وجهه عليه ولا ادري شنو كللها ابنها حتى تسكت ولا الي واهس اعرف او اناقش بقيت اصفن بروحي اني ليش هلكد ضعيفة ومعقدة ومالي واهس بلحياة الي داعيشها لو لان كلشي انسلب مني غصب عني اني صحيح جنت منطوية على نفسي بس كلت اكيد بلكلية وحياة الكلية افك شوية واندمج وية البنات بس الي صار وطلعتنة من بغداد بتالي الليل ورجعت ظافر ومرته بكل قوته ولا عبالك اهله وحبستي بلبيت ليل ونهار من وراهم خلاني زدت منكصت بس من دخلت الكلية وطبعا بلكوة امي وابوية وكفوله لظافر حتى يقبل شوية حسيت نفسي تغيرت وتحسنت تعرفت على بنات بس مو مثل مروة وسيف وابراهيم الاء تكاد لاتذكر لان جنت احس بيها تضوج مني . مرت ايام اتعس مايكون لان ام عمار كامت تضوج مني .على نهاية السنة صارت حرب ٢٠٠٣وكعدونا جان باقي شهر على التخرج ونمتحن ونخلص بس قدر الله وماشاء فعل وانكطعت الطرق وحتى الارضي انكطع جنت اطمئن على اهلي بي .بس الي مطمني ريام هناك يمهم والناس الي طلع من بيته والي بقة احنة بقينا مطلعناامهم مقبلت خافت من الطرق خاف يصير شي وصار السلب والنهب ناظم وجاسم كاموا ينكلون ويعبون بلبيت امهم وعمار وياسر ميقبلون ولاجانوا يمدون ايدهم على شي حتى صار كطع وعزلنا عنهم حتى اكلنا صار وحد احنة وبيت ياسر.. وبيت عيال ندى اختهم هم نكلوا كووومة وعمار صاير نار ميتحجة لان الي يحبها بتهم وبغداد صارت اسوء مايكون بزود اهلها باكوها وتدمرت ..المهم فات يوم ورة يوم شوية هدأت الاوضاع والناس بدت ترجع ورجع الدوام وعمار ميقبل اروح وحدي يوديني ويجيبني وسوالي خط ويوم الماكو خط هو يبتلش بيه جان عنده محل كهربائيات وممخليني محتاجة شي واني ابد مااطلب علاقتي بي سطحية ولاحاولت وياه ولاهو ابد جان فاصل .مجان باقي على الامتحان غير اسبوعين وبيوم رجعت من الدوام وكلعادة هو وصلني ونزل وياية وصدفة ولاول مرة نطب سوية وجنة دنضحك طبينا من باب المطبخ ونشوف ندى وامها ووحدة معرفتها ولا شايفتها ..عاد هي حاجته يمكن هي نفسها حماة ندى ..ها سبعي كاعد وتفرفر وية الخاتون واني الي صار سنتين ونص صابرة واكول هسة يطلكها اليوم يطلكها وهي مجلبة بيك ..
غلوة .. عرفت هي هاي الي يريدها ويحبها بس استغربت عبالي حلوة كصيرة كلش ومجعمرة ظلت تصيح وتعيط يريد يسكتها متسكت اني ولا جاوبتها لحد ماندى حجت وتباوع عليه ..
ندى..كافي وجه الفكر طلعي من حياتنا جابتج وسن افندي رادت تخلص منج ذبتج بركبتنا وشمرتج براس رجال متزوج وعنده ولد اثنين .
غلوة..اني رأسن انداريت عليه دنج وراح جر اخته..
عمار..ندى اخذيها واطلعي احسنلج ..
ندى.. وانت منين خايف لازم الكل يعرف الى متى جهالك كبروا ويريدوك شمنتظر ها ...
امه كامت تعيط وتصيح يبووو لافت عليك فتحية الحية هي وبتها عزة العزاج ندى شمرتي اخوج بنص العكارب ولج هذا الفقير الجمبدة تقشمري وياخذ هاي الخنفسانة الحرامات واحد يباوع بوجهها ولج زينة الشباب ماخذلة بومة ليش واني الي مراضية على هاي الطفلة وجبتها حتى بلة عرس وساكته وكاعدة النوب يطلع متزوج عليها .ولك ليش يمة ليش مبقن بس ذني تاخذ منهن ولك دباوع هاي الوردة الجبتلكياها شلونها وانت عايفها ومكابل هاي القردة ليش يمه..
غلوة...خلص الاستعراض مالتهن.. خالة كعدت على حيلها تبجي وتعدد هو اخذهن وطلع امه بقت تباوع عليه .امه اجتي خطبتني لان تعرفني فقيرة وامي واختي بعيدات فعلى كد اديهن بس حموات ندى لا غير شكل وكيحات ومينكدرلهن وفعلا سوت افلام وطلعت بلكوة طلعها مجلبة تريده يطلكني اليوم ..
ام عمار .. شوفي بنيتي اني ادري بيج فقيرة ومتسوين مشاكل بس صبريله والله عمار خوش ولد وشاغول وصاحب غيرة واخو خيته واكيد هذني قشمرنه ولفن دماغه ختولي هسة يطلكها ناقصة عكارب اني تجي هاي حتى تكمل اني اريدج انتي تكملين وياه يمة .
غلوة .. يصير خير خالة .. صافنة بيها وبلموقف كله همزين محبيته ولة جان شصار بيه همزين يعاملني ببرود كأنما ماعرفه حتى فراكه ميأذيني . كعدت يمها هي تبجي واني اسكت بيها ..
ام عمار .. اشو انتي مدايرة بال ..
غلوة.. شنو الي اسويه خالة متزوج وعنده جهال يعني قابل اكله اشمر لحمك بلشارع وطلك مرتك ماكدر مو بيدي واكيد مراح يختارني ويعوفهم ..
ام عمار.. لج شكد فاهية لخاطر الله لا راح الولد من ايدنا واخذنه هذني شفتي شكلها بلة هي هاي يتباوع بوجهها شلون اخذها مادري خلتوكفلي نديوة اذا ملعبت بيها طوبة ولج حتى اكبر منه بسنة وفوكاها عوبة واخذته طول بعرض ..
نص ساعة واجة بيت عيال ندى قريب فرعين تقريبا طب لكانا نفس الكعدة ..
ام عمار.. هلة هلة بلعريس ابو الجهال هيج ولك ثاريني ماعرفك وهيج كسرت قسمة البنية لما انت متزوج ليش خليتني اخطبلك هلمكرودة جان عفتها تكمل دراستها يم امها وابوها جبناها وتكسرها بمرة ليش يويل النوبة شلون مرة حرامات محسوبة على النسوان .
عمار.. كافي يوم لخاطر الله ..
ام عمار ..ولك شلون اسكت شلون وانت كفختني لا وصاير عندك اثنين ولد ماكلت امي ليش هيج اسوي بيها مرتي بت العالم الي ماشفنه منها اي شي مو زين اكسرها واجيبلها ضرة ..
عمار..يمة اني متزوج فاتن صار اكثر من سنتين يعني قبل لا اتزوج غلوة واني كلتلكم بس انتي لحيتي واصريتي اتزوج واني مجنت اكدر اعوفها لان اصلا جانت حامل قبل الزواج وجان لازم اتزوجها حتى ندى هم متطلك ..
ام عمار.. ولك منين حامل عزة العزاج فضيلة غلطت وياها لو جابت ابن حرام ذبته براسك ..
عمار .. لايمة ولدي ولد اثنين توم اني الي غلطت وياها وجان لازم اكطعلها مهر ..
ام عمار .. عفية بلسبع واني اكول مخلفت غير عمار طلعت هاي سوالفك نزلت راسنا بلطين ..
عمار.. يمة ولدي اثنينهم مرضى وانتي شوفي بيش ملتهية ..
غلوة.. تسمحيلي خالة ..
ام عمار.. روحي بنيتي روحي الله يعينج ..
هو ظل يباوع عليه عفتهم ورحت لغرفتي يلة اجتي من يمه حتى يعوفني ارجع لاهلي بس خلي اتخرج ..ساعة وصعد ..
عمار.. هاا غلوة شلونج..
غلوة .. الحمدلله جنت كاعدة اقرة ..
عمار.. منزلتي تغديتي ..
غلوة.. اكلت بلكلية..اجاوبه وعيني بلكتاب ولا باوعت عليه
عمار.. غلوة..
غلوة.. نعم ..
عمار.. اني اسف على الي صار ..
غلوة.. لا عادي مو من حقي احاسبك لان انت صارحتني وكلتلي مااريدج واني مااطالبك بشي بس اتمنى نبقى على اتفاقنا بس اتخرج ننفصل..
عمار.. يعني انتي مصرة ..
غلوة .. باوعت عليه بعد كل اليصار .طبعا مصرة ..
عمار.. براحتج ..
عافني وطلع ..لا بلة شيريد مثلا اجلب بي واكله لا عفية لتعوفني يمة اني بس اريد ارجع لاهلي امي ابوية ريام ساهر .ظافر ولا اريد اشوفه حتى جهاله من وراه وورة مرته ماارغبلهم ..مرت ايام وايام اوضاع البلد من سئ الى اسوء وصار الدوام طربكة شلون مجان وهو معافني ابد يوديني ويجبني الحمدلله كملت امتحانات ونجحت واني ممصدكة تخرجت وخلصت وفات على التخرج ٣ شهور ومرته بعد ولا شفتها علاقتي بلبيت كله رسمية .واريد يفتح موضوع انفصالنا ورجعتي لكركوك وهو ساكت قررت اني احجي وياه اريد ارجع اني شعندي هنا يمة وهو ملتهي بمرته وجهاله اضل هيج علاقتي جانت بس بإمه ونور مرت ياسر جانت نعمة الاخت هلفترة نزلت موبايلات اشترالي واحد وجانت الطرق تخوف فمجنت اكدر اروح لاهلي وكاعدة وساكتة عطلة ومجان عندي شي الجناين جانت ميبطلن مشاكل حطيتلهن حد وهو مساندني وضبهن لان مينجرعن اذا واحد يسكتلهن ..جنة نكضيها اني ونور جوة قليل فوك لان هو النهار كلة برة ومن يجي بليل يلف راسة وينام ...
