كذبتا على امي😿 لكن كنتا مجبوره اعمل كده قلتا ليها اني ح اسجل في معهد لغه فرنسيه في ايام الاسبوع الفرديه عشان الايام الزوجيه عندي الزومبا ، عشان اتهرب من زهراء برضو ومن تحقيقها معاي كل مره انتي بتمشي وين وبتجي من وين ! ايام الاسبوع الفرديه بقيت بمشي لي بيت ناس عبد الله بنقعد في المكتبه ديك و بنذاكر هاجر بتعمل لينا الشاي باللبن و بتجي تختو لينا مع البسكويت بنشرب اول حتى نبدا نذاكر ، عبد الله كان بمشي الجامعه وبحضر المحاضرات و بدا يصلي و يلتزم حتى ونحنا قاعدين لما يجي المغرب ويشوفني قمتا اصلي بقوم على صلاتو ، مره بعد خلصنا مذاكره قعدنا في السلم بتاعهم العلى باب الشارع الجو كان بااارد ، شلنا الشاي وقعدنا في السلم بنشرب قال لي انتي عارفه انك اول صحبه لي قلتا ليهو وانت كمان ماتستغرب بس انت اول صاحب لي قال لي ليه؟ قلتا ليهو في الجامعه ما كانوا الاولاد بقربوا مني شايفيني متوحشه ومحمد ولد بس ما كان في زول بقرب مني الا وقت الامتحانات الكانوا عايزين شرح بجوني ، كنت عارفه انهم بتاعين مصالح بس بشرح ليهم ، قال لي وهو مبتسم انتي جبتي حب الناس ده من وين! قلتا ليهو من امي ابتسم تاني قال لي الأم دي حاجه عظيمه ياخ ، ابتسمنا سوا وسكتنا شويه عاينتا ليهو انت فاقدها؟ قال لي شديد ، مديت رجولي للسلمه القدامي انا في السلمه البي فوق ليهو ، قلتا ليهو عبد الله انت مرتاح كده ؟ قال لي كيف يعني قلتا ليهو حياتك الإنت عايشها دي عاجباك قال لي ماشايفه انها اتحسنت ؟ قلت ليهو لا ما قصدي الصلاه والجامعه قصدي حياتك التانيه عالم المخدرات العايش فيهو ده قال لي انتي قايله انو الزول المدمن مدمن لانو بحبها؟ مافي زول بحب المخدرات بس الإدمان بخلي الزول ما يقدر يفارقها قلت ليهو واذا انت كان عندك اسباب كتيره ، قال لي ما عندي اسباب قلت ليهو عندك حبوبتك القاعده مقلقه عليك الوقت كلو خايفه يحصل ليك شي انت قايل الناس ديل ما عارفنك بتشرب؟ عارفنك على فكره بس خايفين يصارحوك بحاجه وتطفش من البيت ، عبد الله انت معيش اهلك ديل في رعب الوقت كلو ، انت عارف خالتك لما قالت لي ساعديهو كانت عيونها بتقول لي انقذيهو قبل ما يموت ، انت سبب حزن الناس ديل ياعبد الله هم ماضايقين طعم للسعاده ، البشوف بيتكم بي بره بحسدكم على العز العايشين فيهو ده و البدخلوا بشوف انو البيت ده مضلم واسود و ماليهو الوجع من كل زاويه ، عبد الله امك لما ماتت خلت جواك طفل لسه بس الطفل ده مالقى الزول البلموا عليهو ويحتويهو ، انت ما لقيت يد المساعده انا متأكدهه لو انك لقيتها ما كان ضعتا ، كان عايز برضو يختصر الموضوع ويجرحني بكلمه كلمتين زي ما بعمل بس ثبتوا وقلت ليهو انت عارف انك طيب وانت من جواك كده وعايز تتغير بس انت ماعارف تبدا من وين ، في عبد الله صغيروني جواك عايز يطلع من الضلام العايش فيهو عبد الله الكبير بس مربط وماقادر لأنو الكبير رافض التغيير ، قال لي انتي محاميه ولا دكتوره نفسيه! قلت ليهو ماتتريق علي انا جاده هسي ، عارف ليه انا حاسه بيك لأني عشتا الوحده وجربتها جربت لما كل الناس يشوفوك ما منك فايدهه وهم ما حاسين قدر شنو الكلمه دي بتوجع ، جربتا لما الناس ينتظروا منك حاجه وانت تخذلهم لانو الحاجه مافي يدك ، انت ماضعيف انت قوي شديييد عارف ليه .. لأنك ما انتحرتا زي اخوك ولا ضعفتا قدام الموت واستسلمتا ، زي ماقدرتا تغلب ضعفك لما امك اتوفت وللآن انت عايش ، انت ممكن تعيش بطريقه احسن من كده عشان لما تلاقيها بعدين في الجنه تفرح بيك ، انا ما بقول الكلام ده لشافع انت عارف انو مصيرك تلاقي امك عايز تلاقيها وانت بالهيئه دي؟ هسي لو انت متا في حادث بطريقتك دي ! تقابل ربنا وانت مسطول؟ ، سرح بفكر في كلامي وانا استمريت اديهو في الكلام ، قلتا ليهو انت عارف انا لو مكانك كنت ح اعمل شنو ؟ قال لي ح تعملي شنو ! نزلتا من السلم ووقفتا قدامو قلتا ليهو ح ابقى رجل الاعمال عبد الله 💜 عليت نفسي عشان ابقى طويله رفعتا رجولي لي فوق وبحاكي فيهو بصوت خشن 😂😂 ،، السلام عليكم اها الورق جاهز ! رفعتا يدي وختيتها محل التلفون وبقيت بتكلم يا شباب اشتريتو العقار القلتا ليكم اشتروهو ! تمام طيب ابدوا بنيان ، هو بضحك فيني وانا بحاكي فيهو ، قلتا ليهو اول حاجه كنت حابدا بيها اعمامك الكلاب😒 الشالوا قروش ابوك و صيدلياتو و عيادتو وكل العائدات دي بقت بترجع ليهم ليه؟ وانت الولد والوارث الوحيد هسي لأنك غبي ضيعتا حقك وخليتو بالسااهل كده ليهم ! قال لي ماداير شي منهم ، مشيت ركبتا السلم وقعدتا عاينتا ليهو قلتا ليهو قبل علي عاين لي قال لي ما داير نقاش في الموضوع ده ، قلتا ليهو انت غبي والله ، في زول بسيب العز ده كلو لي اعمام هم ما سألوا من حالتك النفسيه كانت كيف ! اهملوك عشان تموت وحتى البيت بتاع ابوك يورثوهو ويطلعوا حبوبتك وخالتك وهاجر ، عبد الله انتو عندكم عربيه مركونه ورا ما بتسوقها لي! قال لي حقت ابوي قلتا ليهو طيب ابوك ده مش عذبك انت وامك وايا كان العملوا ما بتقدرتنكر انو ابوك ، عبد الله بعد التعب التعبتو امك ووقفت معاهو لحدي ما بقى عندو قروش وعز ، ده ماتعب ابوك براهو على فكره ده تعب امك وانت بغبائك ده ضيعتا حقوق امك ليهم ، وسكتا عارفاهو ح يفكر في الموضوع و حيحرقوا قال لي ح يلقوا طريقه و يقولوا اني مدمن وبتعاطى ، قلتا ليهو وليه ما تخلي الادمان قال لي مابقدر قلتا ليهو مافي حاجه اسمها ما بتقدر ،، الشغله تعويدة بس مثلا انا كنت ما بعمل ميك اب لي وشي ابدا ولما لقيتو حلو معاي واتعلمتوا بقيت بحبو جدا جدا ، كل القصه الحاجه العايز تصل ليها بتصل ليها لو اصريت ، انت ما نفسك تكون صاحب قرش و عز و شركات و كلو يكون عزك براك ! اعمامك ياخدوا نصيبهم الشرعي بس وحقك يرجع ليك مافي حاجه اسمها ده قرش ابوي ومادايرو ، قال لي سندس ما تزني لي في راسي قلت ليهو براحتك بس في النهايه دي قروشك وانت حر ، كملنا شاي المغرب بتاعنا ده وانا متأكده انو ما حينوم الا ويفكر في كلامي كنت عارفه انو القروش لما تكون ليك وياخدها غيرك ح تحرقك شدييد ، دخلتا ليهو بمفهوم القروش عشان يخلي الادمان .. اتلاقينا بعدها يومين عشان برضو نراجع الشيتات واحنا بنذاكر في نص الشرح كده كان خاتي القلم في خشمو وبياكل في نهايتو ، قلت ليهو عبد الله مالك ما مركز الليله! من قبيل انا بشرح وانت سرحان مالك ؟ قال لي انا قريت امبارح في النت عن حاجه اسمها السيجاره الالكترونيه، طوالي الفرحه ظهرت في وشي عرفتو انو فكر يخلي المخدرات مما فكر في السيجاره الالكترونيه ،، قلتا ليهو عبد الله😍 ماقادره اصدق انت قريت عن المخدرات ؟ قال لي طعم السيجاره الالكترونيه بكون كيف! ضحكتا وقلتا ليهو والله ماجربتا 😂😂 ضحكنا سوا 😂😂😂 بعد خلصنا من القرايه طلعنا نتمشى و في الشارع قال لي انتي عارفه انا عارف مكانها وين ! قلت ليهو دايرها؟ قال لي ماعارف قلتا ليهو ارح نجيبها ، ركبنا ركشه مشينا اشترينها كميه سيجاره بتنور وبتطلع دخان يعني بتوهم الزول انو بتدخن بس ، عبد الله ماسكها تلاته ايام بس ما حاسي بشي لأنو جسمو مليان سموم ، لما بتكلم معاهو بالتلفون قال لي ما حاسي بي اي تغيير ،، كان في دكتور اسمو اسامه اتعرفت عليهو مره في مكتبنا لما جا يغير اوراق عربيتو وينقل الملكيه بتاعت العربيه ، شلتا تلفوني وضربتا ليهو كان هو الحل الوحيد زي ساعه ونص حكيت ليهو عن عبد الله وعن حالتو و دلاني على دكتور شااطر جدا هو الكان سبب في مساعدة عبد الله ما كان عندي حل غيرو ،، يوم مشيت عشان اراجع مع عبد الله الشيتات كنت متوتره وخايفه من ردت فعلوا وماعارفه افاتحو كيف في الموضوع بس اتشجعتا ووريتو انو ما عندنا الا حل واااحد ..
