((((تماره ))))) للكاتبه Entethar

،،،،،،،البارت الاول ،،،،،،،،للكاتبه Entethar

                      ،،،،،،تماره  ،،،،،،،

اني تماره عمري حالياً ٢٩ سنه

راح احجيلكم قصتي من البدايه

اول شي احجيلكم عن شكلي

مواصفاتي .

سمره وطويله بس مو كولش ومو سمينه

يعني جسمي رشيق .

عيوني كبار ولونهن صفر وشعري طويل واسود

ملامح وجهي حلوه يعني شكلي حلو ومرتب .

ساكنه بيت كولش كبير ويه ابويه وامي واخواني

وجدي ابو لابويه .

اخواني..الكبير جواد مسافر بره البلد

والزغير ياسر اكبر مني بسنه رابع اعدادي

واني ثالث متوسط واختي واختي الزغيره

رند عمرها ١٠ سنوات .

حالتنه الماديه جدا زينه .

ابويه ضابط بالجيش العراقي

اسمه كاظم وامي مديره مدرسه .كلتلكم اوضاعنه تمام .
بعد ماامريكا احتلت العراق وسقطت بغداد وكثير من مدن ومحافظات العراق .
راحونه هواي شهداء .وصار بلدنه بارد واظلم وعمت الفوضى .
وتعرفون الاحداث كولها مااحب احجي عن الحرب كلوبنه حيل توجعنه.
المهم .
بالليل واندكت الباب دكه كولش قويه فزعتنه كولنه

طفر جدو من مكانه وكال .
.......الله اليستر من هاي الدكه اني راح افتح الباب مو واحد يطلع .
طبعا بهذاك الوقت الاوضاع كولش مو زينه لدرجه

واحد يخاف حته من دكة الباب  .

جدو ..منو بالباب ؟

الطارق ....حجي ابو حسين افتح الباب اني صديق

كاظم بالدوام

فتح الباب جدي وعرفه رأستاً لان شايفه ويه بابا من قبل .
ويعرف صوته

......هله بيك وليدي محمد شجابك بهاليل وشلون

وصلت لهنا وكاظم وين ؟

تعال ادخل ارتاح واشربلك كلاص مي مبين عليك تعبان
......لا حجي مااكدر

.....سولفلي شصاير

......حجي عندي حجايتين احجيهن وياك واروح لاهلي .
لان نازحين بالديوانيه اروح بلكي وجه الصبح اوصل يمهم .
ابو حسين ..بويه احجي والله شلعت كلبي كاظم بي شي
محمد ...حجي هجمو علينه الامريكان وصارت هوسه

الي انهزم والي انقتل  وابنك متصوب بيدهم

شوفلك راس كبير بلكي يكدر يجيبه الك 

هسه اني رايح وانتو هم لتضلون هنا الاوضاع ابد مو زينه .
حاولو ترحون لمكان آمن
يله حجي الله وياك

....الله وياك
ابو حسين ...اخ كلبي ولكم وليدي راح مني اوديمن

يجيبه ولكم بعد متتعارف الصديق من العدو

ولكم جدي ابوكم راح

جدي جان يفضل ابويه على كول عمامي لان ابويه

ابن بار لابوهومداري كولش

اجتي امي تركض وتصرخ

ام تماره ..ياصخام الصخم وجهي شبي كاضم مات .

تماره ...يمه اهدي ليش مولفه والله مامات بس

متصوب وبيد الامريكان

.....وشتفرق بيد الامريكان لوميت كولهن واحد تجذبون عليه والله العظيم مات وماتردون تكلولي

اخويه ياسر جان نايم اجه مفزوع كال شكو شبيكم

كتله خويه تعال اكعد واني احجيلك كولشي  اخويه

وجهه شاحب واصفر وبالكوات يحجي سولفتله وهديته

واختي رند مختلسه من الصدمه خطيه بس صافنه

وخايفه وملزمه بإيد امي شعرفها بعدها زغيره

وتشوف الي صار طبعاً تنصدم

اني اباوع على اهلي وضعيه البيت انكلبت

جدو وضعه تدهور الضغط والسكر كول شويه يصعد

وامي ابد ماسكتت الليل كوله مانامت وبس تبجي

ام تماره ...ياربي منين اجتني هاي المصيبه شلون

بيه اذا راح الرجال منو النه بعد منين تجينه هاي المصايب

ربي اخذ عمري ورجعه عاد اذا متت اني هوه يعرف يدبر اموره رجال

منين تجينه المصايب يالهي ارحم بحالنه اللهم

لا نسألك رد القضاء ولكن نسألك اللطف فيه 

....مرت ايام واحنه بهذه الحال ومنتضرين بابا

والوضع بغداد يسوء يوم بعد يوم وحالتنه حاله

وجدو ابد ميصير زين عل طول متخربط

ويوم من الايا كاعدين الصبح نتريك كالت ماما اروح

اروح اجيب كم شغله من البقاله  واجي تماره ديري

بالج على اخوانج

رند....ماما اني اروح وياج

.....لا مترحين تضلين يم اختج

......ايدي بإيدج والله مااعوفج اروح وياج

لزمت رند ايد امي بشكل موطبيعي حجينه وياهه كولنه ابد ميفيد

ياسر كال لماما اني اروح وانتن ثنينجن ضلن بالبيت

بس ماما مقبلت تخاف علينه بس مااعرف شلون

وافقت تاخذ رند وياهه

بعد ماطلعت ماما من البيت بربع ساعه ماحسينا غير صوت انفجار كولش قوي

بحيث تكسرت الشبابيك من قوه الصوت

،،،،،،،،،يتبع

للكاتبه Entethar

حبايبي تصويت للقصه 😘😘

انطوني ارائكم وتوقعاتكم