الثالثة صباحاً 🔞

٩

هل يوجد اسوء من اتهامك بالجنون بينما انت تعاني من متابعة احدهم لك ؟
_____________________________________
حازم كان قاعد في غرفتو لمن تلفونو ضرب ... شال التلفون ورد .... جاهو صوت راكان : إزيك يا حازم معاك دكتور راكان .
_ اهلا يا دكتور .
_ اسف على الازعاج .
_ لا ولا يهمك ماف اي ازعاج .
_ مشغول ؟
_ لا لا م عندي شي
_ طيب انت عرفت انو مها ودوها مصحة ؟
_ نعم ؟ مصحه ؟ كيف يعني ؟
_ كدا ... اخوها جابها لي بي فوق اني حيعالجوها علاج نفسي .... هو حسب فهمو انها مصابه بمرض نفسي .
_ وانت رايك شنو في الموضوع دا ؟
_ من اي ناحيه ؟
_ من ناحية انها مريضة نفسيا ومن ناحية المصحه .
_ من ناحية انها مريضه نفسيا فأنا متأكد انها م مريضه ولا شي .
_ كيف اتأكدت .
_ مها قدرت تقرا افكاري .
_ معليش يا دكتور على جملة كيف يعني البقولها كتير دي بس كيف يعني قرت افكارك ؟
_ يعني عرفت انو انا بفكر في شنو بالضبط وكمان ورتني بيهو عارف دا معناه شنو ؟
_ اها ؟
_ معناه انو مها م براها .... معاها شي مسيطر عليها .... كونها تعرف شخصيه بعينها انا بفكر فيها وكمان تقول الاسم فدا اكد لي شكوكي .
_ يعني كدا افكارنا مكشوفه بالنسبه ليها ؟
_ ايوه ... لكن في طريقه عشان م تخليها تقراها .
_ اللي هي ؟
_ تفكر في كم حاجه في وقت واحد ... يعني مثلا تقرا ايات من سوره وتفكر في دوله ولون واسم شخصيه تانيه وطريقة طبخه او اي شي المهم تجوط الافكار ... فكدا حتتشوش وم  حتقدر تعرف في شنو بالضبط .
_ طيب من ناحية المصحة ؟
_ انت كزول م عندك مشكله لو دخلوك مصحه حيحصل ليك شنو ؟
_ حفقد عقلي
_ دا الحيحصل ليها بعد شوية .
_ طيب حنعمل شنو ؟
_ اخوها مصر على رايو اذن احنا م بيدنا اي شي .
_ طيب م بتقدر تقنعو يا دكتور ؟
_ بصفتي ؟
_ بصفتك زول كبير و واعي وعارف حاجات كتيره .
_ م حقدر ... حاولت بس هو م عايز الا كدا وم من حقي ادخل تاني ... ع العموم انا متأكد حيجيني راجع تاني ويطلب المساعده .
_ طيب احنا هسه نعمل شنو ؟
_ م تخلو مها ... امشو وزوروها .
_ بيسمحو لينا ؟
_ ايوه ... قد تكون عنيفه معاكم لكن برضو م تتخلو عنها ... واتذكرو انو هي م بتعمل كدا عشان هي عايزه كدا .
حازم وهو بيشيل انفاسو : طيب .... طيب شكرا ليك يا راكان ... اقصد دكتور راكان .
_ عادي ناديني من دون دكتور الفي البدايه دي .
_ نوعا ما صعب لكن حاضر .
_ يلا مع السلامه
_ الله يسلمك
________________________________________
الساعه كانت 7 مساء لمن مها فتحت عيونها .... كانت حاسا بخدر وتكسير في جسمها .... عاينت حواليها باستغراب ... كانت في غرفه صغيره ... نضيفه ومرتبه وفيها شباك زجاجي معمول ليه شبك حديدي .
اتفتح الباب وجات داخله منو دكتوره ميسون .
قعدت في الكرسي القريب منها واعتلت وجهها ابتسامه وهي بتقول : ازيك يا مها .
_ إنتو مقعدني هنا  لي ؟
_ دي غرفتك .
_ انا م عايزه اقعد هنا رجعيني .
_ حترجعي ... بس تكون زوله كويسه وبتسمعي الكلام .... اتفقنا ؟
_ ...................
_ مها
_...................
_ اوكي م عايزه تردي علي يعني .
_ عايزاكي تطلعي من هنا .
_ اوكي حطلع ... بس حنتلاقى تاني ... وبالمناسبه جبت ليك حاجه .... هدية ضيافه صغيره .
ختت ليها ف السرير جمبها نوته وقلم .
وبعدها طلعت وقفلت الباب .... رجعت على مكتبها وفتحت اللاب توب حقها البنقل ليها بي كاميرات مراقبه كل الحاصل عند مها .
فضلت ساعه كاملة قاعده على طرف السرير و مدنقره راسها بدون اي حركه ...
____________________________________
احمد كان قاعد في الصاله .... سرحان قدامو وبفكر في موضوع مها .
اما سحر فكانت حارسه اولاد البيقرو في اوضتهم ... وبرضو بالها بعييييد وبتفكر .... انتبهت بصوت جمال : ماما .
_ ايوه حبيبي .
_ وين عمتو مها ؟ مش امبارح كان الخميش ؟ لي م جات ؟
_ آ ... عمتو مها عيانه لكن حتجينا ....حتجينا قريب ان شاء الله ... بس انت قول ربنا يشفيها .
جلال الكان بيكتب اتلفت عليها : عيانه عندها شنو ؟ طيب لي م نمشي ليها ؟
_ م حنقدر نمشي ليها لانها ف المستشفى .... هسه خلاص ارجعو اقرو قرايتكم بطلو الاسئله .
جمال بصوت هامس : دي المره الصريرة .
_ الشريره ؟
هزه راسو ببراءه وهو بيتابع : قلت ليكي يا ماما هي م بتحبها .
_ انت شفتها تاني؟
_ لا .... م سفتها لكن هي كانت بتعاين ليها بي طريقه م حلوه .
_ خلاص يا جيمي خلاص .... تاني م عايزاك تفتح سيرة الموضوع دا تمام ؟
_ طيب .
قامت بي سرعه ومشت لي راجلها بره ... قعدت جمبو ف الكنبه وعاينت ليه : احمد .
_ نعم يا سحر ؟
_ انا عايزه اوريك حاجه .
_ اها خير
مدت ليه رسمت جمال
شالها وهو بيسأل : دا شنو ؟
_ واحده من رسمات جيمي ركز فيها كويس .
شال الرسمه واتأملها .... عاين لي سحر بنظرات استغراب ورجع يعاين للرسم تاني قبل م يسألها : دا شنو الراسمو جمب مها دا ؟
_ لمن سألتو كانت اجابتو بت شريره كانت مع عمتو مها .
_ الولد دا جاب الكلام دا من وين ؟
_ كيف يعني جاب الكلام من وين ؟ هو طفل .... والرسمه دي رسمها اخر مره جاتنا فيها مها .
_ يعني عايزه تقول لي جيمي شاف شي مع مها ؟
_ عندك تحليل غير دا ؟
_ م قادر اصدق .... يعني مها في شي معاها ؟
_ ايوه ... اعتقد كدا .
_ انا م عايز اعتقاد .... عايز شي يأكد لي الكلام دا.
_ يعني انت حتقعد منتظر شي يأكد ليك لحدي م تفقدها ؟ او هي تفقد عقلها وللابد بي سببك ؟
_ انتي عايزه تحسسيني بالذنب يعني ؟ انا عايزها تتعالج .
_ يا احمد م عايزه احسسك بالذنب لكن عايزاك تفكر ف الحاصل ليها مها بوضوح ... م اعتقد قرار تدخل المصحة كان صائب .
_ المصحة م انا القلت لازم تدخلها .... اتكلمت مع دكتورة ميسون وحكيت ليها بي كل شي وطلبت بي وجه السرعه انو اجيبها .... لانو حتكون خطر على اي زول قريب منها .
_ طيب حنشوف هل حتساعدها ولا لا .
_ سحر ؟
_ نعم
_ انا بالجد خايف شديد على مها ..... م عارف احنا البلاوي دي بتجينا من وين
_ استودعناها لله وبس ... بعدين يا احمد المؤمن مصاب .... اصبر واحتسب الاجر عند الله وادعي ليها بالشفاء وبس .
غطا وشو بيدو وهو بقول : يا الله يا الله يا الله ..... يارب اشفي اختي يارب وابعد منها كل شر .
_ م شايف انو مفروض اهلك يعرفو ؟؟؟؟ اقلاها امك ؟
_ لا .... م اعتقد هسه .
_ طيب .
____________________________________
الباب اتفتح وجات داخله منو دكتوره ... قعدت في الكرسي وهي بتعاين لي مها البتكتب في الدفتر بي انفعال .
فضلت مراقباها لوقت طويل .... وبتنا ولا حتى شالت تفسها بس شغاله كتابه بي اهتمام .... ف النهايه قفلت الدفتر وختتو جمبها وعاينت للدكتوره بي جمود .
_ ازيك يا مها .... عايزه اشوف انتي كتبتي شنو ف الدفتر ممكن ؟
_ .................
_ اوكي حعتبر سكوتك موافقه .
جرت الدفتر بهدوء من جمبها وفتحتو .... قلبت الصفحات العشره المكتوب فيها ...... كان مكتوب فيها الارقام التاليه بي نفس الترتيب ومكرراهم .
153198514
قفلت الدفتر ورجعتو مكانو وسألتها : المشكله شنو يا مها ؟ من وجهة نظرك ؟
_انتي ...
_ انا المشكله ؟
_ ايوه حعد لحدي 3 وتطلعي من هنا .
الدكتوره وقفت بي سرعه واتوجهت ناحية الباب .... خصوصا انو م كان معاها ممرض ولا اي زول يحميها .... قفلت الباب واتوجهت على مكتب ميسون ... دخلت وانفاسها قايمه .
ميسون القاعده ورا مكتبها سألتها : في شنو نفسك قايم كدا لي .
_ عارفه يا ميسون .... اول مره احس بي خوف من مريض .
_ مها ؟
_ اي ... نظراتها بتحسسك بالتهديد الشديد .
_ قدرتي تتكلمي معاها .
_ لا .... م قدرت اتكلم معاها كويس .... بس لقيتها كاتبه الارقام دي ف الدفتر الاديتيها ليه .
ادتها النوت الدونت فيها ملاحظاتها .... ميسون شالتها وعاينت للارقام : مممممم .... اكيد الارقام دي هي قاصده بيها شي .... عندها شي عايزه توصل ليه بيها .
ساره ( الدكتوره التانيه ) : الساعه بقت 11 الشفت حقي انتهى حرجع بعد دا .
_ انا برضو راجعه خليني اوصلك معاي .
رجعو وهم الاتنين بيفكرو ف الارقام الكتبتها دي .
ميسون لمن وصلت بيتها اخدت ليها دش وبعدها مشت نامت ..... نومه اتقطعت الساعه 3 .... صحت فجأة ولقت نفسها بتمشي المطبخ تشرب مويه .... فجأة جاها فضول تعرف مها هسه بتعمل في شنو ..... مشت ناحية اللابتوب وفتحتو .... عاينت للساعه ورجعت تعاين ليها ..... كانت واقفه قدام كاميرة المراقبه .... بتعاين ليها وهي بتتحرك .... كانت بتتحرك زي الزول السكران ...... واقفه ف مكانها لكن بتحرك في نفسها يمين وشمال ....ميسون حست كانو مها مراقباها .... مش هي المراقبه مها ... فضلت ع الحالة دي كتير .... وميسون م قادرة تشيل عيونها منها .... لحدي م ف النهاية مها اتراجعت .... اتراجعت ناحية الركن ..... عاينت حواليها كانو في زول معاها .... ثم من بعدها انكمشت على نفسها وغطت في سكون عجيب .
ميسون فضلت مراقباها لوقت طويل ومها حتى راسها تاني م رفعتو .... في النهايه قفلت اللاب ورجعت سريرها ونظرات مها م فارقتها .
__________________________________
احمد صحا الصباح بصوت التلفون .... قعد بي سرعه في سريرو ورد ... جاهو صوت ميسون وهي بتطلب منو يجيها ف المستشفى .... سألها بخوف : مها كويسه ؟
_ م تخاف هي كويسه بس انت لازم تجي.
_ اوكي شوية واصلكم .
سحر قامت بي صوتو : في شنو ؟
_ انا زاتي م عارف في شنو ... قالو اجيهم ف المستشفى .
جهز نفسو بسرعه وطلع ..... وصل المستشفى ومشا لي ميسون ف مكتبها .
سلمت عليه وطلبت منو يقعد .... قعد وعلامات الاستفهام في وشو
قعدت قدامو وسألتو : معليش جبتك على ملا وشك .... بس عايزه اعرف هل عندكم تاريخ مرضي ف عائلتكم ؟
_ من الناحية النفسيه ؟
_ ايوه
_ لا ... ماف شي زي دا .
_ طيب شوف الارقام دي ... عندك فكره عنها .
مدت ليهو الورقه .... عاين ليها باستغراب وهو بيقول ليها : لا
هزت راسها .
احمد : في شنو ؟
_ شوف امبارح دكتوره ساره لاحظت للارقام البتكتبها مها دي .... والليله الصباح .... اول م دخلت عليها هاجمتها ..... هجوم بشع جدا ويدينها الاتنين اتكسرت بسببها .
_ شنو ؟ كسرت يدينها ؟؟؟؟ مها اختي انا كسرت يدين الدكتوره ؟ مها م بتقدر تأذي نمله ..... فمابالك بي انسان .
_ للأسف دا الحصل .... وعشان نهدأها احتجنا لي 4 ممرضين ..... مها كانت قوية شديد .... انا اول مره ف حياتي اقابل حالة بالقوة دي .... بس الغريب صوتها وهي بتقول ف الارقام عايزه اسمعك ليه .... اتسجل ف الفيديو .
ضغطت بيدها واحده من ازرار اللابتوب .... احمد كان ساكت ومركز بي حواسو كلها ..... عيونو اتوسعت بصدمه لمن سمع الصوت ..... كان صوت مؤللللم متحشرج خشن بيقول في الارقام بي سرعه وبيكررها .
احمد : دا م صوت مها .... م صوت مها دا صوت شيطاني .
_ عادي ممكن المريض يغير صوتو كدا لي حاجه في نفسو .
_ حتى ولو حاولت تقلد .... معقول صوت انثى يتحول لي صوت بشع كدا ؟ انا خلاص حجن
وقف على حيلو : لازم اقابل راكان .
طلع بي سرعه من المكتب وهو بيتصل على راكان الكان في مكتبو ف الجامعه ومعاه رنيم و حازم .
قال ليهم : دا احمد
وبعدها رد : الو .... شنو ؟؟؟؟ طيب اهدا اهدا .... حفظت الارقام ؟؟؟ خلاص تمام انا عندي محاضره بعد ساعه لاقيني جمب الجامعه .... مع السلامه .
حازم : في شنو ؟
راكان وهو بخت تلفونو ف المكتب : مها اعتدت على دكتوره وكسرت ليها يدينها الاتنين .... بالاضافه لي انها بتقول ارقام بصوت متحشرج .
رنيم وهي بتخت يدها ف خشمها : واااااي يا مها 💔.
حازم سكت مسافه وبعدها قال : الارقام دي ذكرتني حكاية بنت المانيه .... كانت بتقول ارقام وفي النهايه طلع دا عدد الشياطين الجواها .
رنيم : بسم الله الرحمن الرحيم ..... وقدرو يعالجوها ف النهايه ؟
_ لا اتوفت بعد معاناة طويله .
رنيم : يعني هسه الارقام دي حتكون عدد الشياطين الفي مها .
راكان : انا عن نفسي م اعتقد .... موضوع الارقام البتقولها دا عندو فهم تاني .... عايزه توصل الناس لي حاجه عشان يقدرو يساعدوها .
_ لغز يعني ؟
_ ايوه لغز .... ولو قدرنا نحلو اكيد دا حيساعد مها .
( نختم الحلقة بالصلاة على النبي )
#نهاية التاسعه .