ام مروان : بالله عليك ياحاج اعطيهم البنات والله بيقعدو زي خوااتهم راه
،،
ابو مروان : وشيماء وبشرى ؟ مش بياخدو على خاطرهم وخياتهم صغار يتزوجو وهما قاعدات
،،
ام مروان : بالعكس فرحانات وماقالن شي
بو مروان : سكرى عالموضوع
ام مروان: بالله عليك ماتقطع بنصيبهن راهن في رقبتك
وقعدت تقنع فيه وتقنع وتقنع
بو مروان : خلينى نحسبها في راسي واسكتى معاق تلحي عليا
،،،،،،،،،،،،،،،،
تاني يوم ..
مروان طالع مع صحابه يسهر كالعادة ديما سهريات وعشاوات ..
عنده مجموعه من صحابه مش كويسين هوا من قبل يدخن لكن خلط عليهم وبدا ياخد مراااات مراات في واحد حشيش وارقيلة عشان يتكيف زيهم ويبدا جوه امليح على قولتهم
وبدت عنده عااادة الارقيلة في الحوش ؛؛
،،
ويخلى في خواته يغسلوهاله ويستعمل فيها .. عارضوه امه وبوه علاش الارقيلة وشن بتستفيد منها وداروله حاااالة
مروان : بالله فكونى من النكد متاع كل يوم
بو مروان : وين ماشي توا
،
مروان وهوا لابس بيطلع : عندى واحد بنشوفه
بو مروان : راهو الشلة متاع الارقيله والدخاخين والدوة الفاضية معاش تخلط عليهم
مروان : تى باهى يابوى اصلا معاش شفتهم ... هي تبى حاجة امي؟
ام مروان : سلامتك وعافيتك ياوليدى
وطلع مرواااان من الحوش لقى صحابه في السيارة يستنو فيه ركب معاهم ومشى
،،
ام مروان : خف عالولد شويا ياحاج
بو مروان : شن نخف عليه وهوا يدور مع الحشاشين تو يولى زيهم
،،
ام مروان : لا وليدى بعيد السو عليه عاقل ومتربي
بو مروان : اي عاقل عقل العازة تى كلها بدت خراب الشباب ضاعو ترخيلهم الحبل معاش تلحقى عليهم
ام مروان : غير انت مكبرها الله يهديك راهو وقتهم ووقتنا موش سواا
بو مروان : اسكتى شن فهمك انتى
ام مرواان : ااااهو سكتت
،،
بعد خطرها شن صار في موضوع البنات الناس يراجو في الرد
بو مروان : ناديلي على شيماء وبشرى
وجو البنات وقااللهم يابنياتى راهو انى بنعطي وخياتكم ومايوجعكمش خااطركم
شيماء صح وجعها خاطرها بس قبلت بالنصيب ..
لكن بشرى انحررررقت ماتحملتش وناضت من بحداهم معصبة وبتتفجر ..
،،
بو مروان : خيرها بشرى اهوو ريتى بناتك مش راضيات
ام مروان : لالا موافقات غير بشرى مريضة بطنها توجع فيها وآهى شيماء موافقة وفرحانه ولا ياشيماء
شيماء : اكيد يا بوي اعطيهم خواتى وكل واحد وقسمه وبشرى مريضه كيف ماقاتلك امي
،،
بو مروان : على بركة الله
..
فرحت ام مروان وناااضت ردت على الناس وقاتلهم موافقين
أنت تقرأ
بنات العيله
عاطفيةقصه واقعيه ( باللهجه الليبيه ) منقوله تحكي على بنات العيله و نصيبهن للكاتبه: نسرين الهادي
