جواز مع سبق الإصرار

P. 1

كان السيد جيون وابنه " جونكوك" يجلسون على العشاء في صمت فقطع هذا الصمت السيد جيون قائلا
جيون : جونكوك كنت عايز افاتحك في موضوع كده
جونكوك : ايه يا بابا انت مش كبرت عالجواز خلاص
جيون :!!!! انت عبيط يابني يعني انا لسه مقولتش حاجه وانت بتفتي من عندك
جونكوك : ماهم في الأفلام بيبدأوها كده وبيطلع جواز
جيون : الله يخربيت الأفلام الي بوظت سمعتنا.. اسمعني
جونكوك : اتفضل يا والدي
جيون : ايه يابني انت من ايام رد قلبي
جونكوك : يعني كده مش عاجب ولا كده عاجب اديني اتكتمت اتفضل ارغي.. اقصد اتكلم
جيون : بناء على قلة أدبك ودلعي الزايد فيك انا قررت اجوزك
جونكوك : انت مش قولت الجملة الجايه مفيهاش جواز !
جيون : الكلام ده ليا إنما أنت لا فيه
جونكوك : وانا وانت ايه يا بابا مش واحد
جيون : لا اتنين واخرص بقى عشان مقتلكش.. المهم.. هي واحده جميلة وقموره وعسوله و..
جونكوك : ولما هي عاجباك اوي كده وقربت تكتب فيها قصيدة شعر ما تتجوزها انت وتخلصني
جيون : يابني انا قد ابوها بقي متشلنيش
جونكوك : طب ما انت قد ابويا انا كمان اشمعني انا
جيون : آه أعراض الشلل بدأت تظهر عليا اهي اهي
جونكوك : خلاص يا بابا مالك قفوش ليه كده
جيون : ما علينا.. هي بنت واحد صاحبي بعمل معاه استثمارات ف..
جونكوك : صلاة النبي يعني عايز تبيعني انا والبنت المسكينه عشان خاطر استثماراتك.. انا مش مصدق ياللصاعقة.. انا اسف يا فندم المقابلة انتهت اتفضل اخرج من بيتي
جيون : يابني بطل الخره الي بتقوله ده بقى يخربيت الأفلام الي سهران عليها ولحست مخك ديه
جونكوك : اسف يا بابا
جيون : على العموم انا مش بستشيرك انا بقولك
جونكوك : خلاص خلصت.. انا لا أقبل ولن أقبل أن اتزوج الا بمن يختارها....
يقوم الأب برمي شبب علي وجه جونكوك
جونكوك : هو ده الي كنت بحكي فيه.. بابا انا موافق
جيون : علي بركة الله
في بيت السيد كال وليزا كانوا يجلسون على العشاء في صمت
ليزا : شبعت تسلم ايدك يا بابا تصبح على خير
كال : استني
ليزا : ايوا عايز حاجه يا بابا
كال : انا.. اه... هممم... هو
ليزا : لا يا بابا انا بنام بدري وعندي جامعه الصبح
كال : انا هجوزك
ليزا : يا شيخ خضتني تصبح على خير
وتكاد تذهب ثم تتوقف وتفتح عيناها علي مصرعيهما
ليزا : نعمممم؟!
كال : ايوا هجوزك بصي هو واحد طيب وابن حلال وابوه صاحبي وهو قريب من سنك وقمور والله
ليزا : ايوا عايز ايه يعني!؟ ادورله علي عروسه مثلا
كال : وينفع بردو وبنتي موجوده
ليزا : هو غسيل صحون يا بابا متشلنيش
كال : استهدي بالله يابنتي واقعدي
ليوا : بابا جواز مش هتجوز.. اشطه
كال : في واحده محترمه تقول لابوها اشطه؟
ليزا : وفيه واحد عاقل يقول لبنته هتتجوزي واحد مشوفتيهوش في حياتك بس عشان ابوه صاحبي يبقي لا يكلف الله نفسا إلا وسعها!
كال : انتي كده مؤدبه يعنى.. طب ايه رأيك انك هتتجوزيه ورجلك فوق رقبتك
تصعد ليزا لغرفتها وتبدأ بالبكاء حتى تنام
في الصباح يستيقظ جونكوك على صوت ابيه الذي يزعجه دائما
جيون : اصحي بقي غلبتني
جونكوك : غلبتك ليه هو احنا كنا بنلعب كوره ارحمني بقي يا بابا
جيون : وكمان بتهزر قوم يالااا
جونكوك : ايوا عايز ايه؟
جيون : اسمها نعم يا محترم
جونكوك : نعم يا محترم
جيون بعد تنهيده : قوم ألبس هنروح نزور عروستك
جونكوك يشهق : ايه داااا انت جوزتني وانا نايم
جيون : مخلف غبي انا مخلف غبي ديه بنت صاحبي الي حكتلك عنها امبارح
جونكوك : اااه معلش يا بابا العتب على التذكر بقي
جيون : هو العتب عالنظر مش عالتذكر بس ما علينا يلا قوم
ينهض جونكوك وهو يتأفف ويتمتم بعبارات سب في كل شئ حوله
جيون : مين ده الي مستفز يلا؟؟
جونكوك : ده انا يا بابا انا
عند ليزا
ليزا ببرود : انا راحة الجامعه
كال : مفيش جامعه النهارده جايلنا ناس
ليزا : ايوا ازغرط يعني ولا اتحزم وارقص؟
كال : احترمي نفسك.. جايلنا صاحبي وابنه.. عريسك
ليزا : ما شاء الله وكمان جوزتني
كال : يلا بلاش غلبه وروحي جهزي نفسك
ليزا بملل : طيب
تصعد لغرفتها وهي تقسم أن تقوم بتطفيش هذا العريس
يصل جونكوك والسيد جيون ويضغطون الجرس
جيون : مش كنت تلبس بدله يابني بدل الكاجوال الي انت لابسه ده احنا رايحين نخطب مش رايحين نلعب تنس
جونكوك : لو سمحت يابابا خليك في بدلك وخليني انا في كاجولي
جيون : بس يابني ده لبس صايص
جونكوك : يابابا ده لبسي وعاجبني.. يا بابا ايام فانكي
يفتح الباب ويستقبل السيد كال صديقة بحضن وابنه كذلك ويدعي جونكوك الابتسام أمامه
كال : والله نورتونا يا جماعه.. بس انا زعلان منك اوي يا جيون ليه مبتزورناش يا أخي
جيون : الأشغال بقي انت عارف
كال : بس ابنك ما شاء الله احلي من الصور بكتير
جونكوك بهمس : هو انا جاي اتقدم ليه ولا لبنته؟
قام جيون بقرص جونكوك مما أدى إلى صرخة مدويه خرجت من فم هذا المسكين
كال : مالك يا بني
جونوك : اا لا ده من الفرحه بس ياعمي
جيون : امال فين العروسه اصل ابني مش قاعد علي بعضه
نزلت ليزا وهي ترتدي بيجامه عليها ميكي وتضع بعض المكياج الخفيف و شعرها متناثر قليلا
وقف كال بدهشه وغضب من تصرف ابنته ودهش جونكوك وجيون من تصرفها كذلك
ليزا بابتسامه : ازيكوا.. ازيك يا عمو.. ازيك يا.. يا كان اسمك ايه؟
جونكوك وهو يبتلع ريقه حتي لا يغضب : جونكوك.. جيون جونكوك
ليزا : اااه جونكوك جونكوك صح
كال : بعد ازنكم دقيقه
قام بسحبها من يديها واخذها الي المطبخ
كال : ايه الي انتي بتعمليه ده انتي اتهبشتي في عقلك
ليزا : اهو ده الي عندي أذا كان عاجبهم
كال : يابنتي عيب الناس هتاكل وشي انا بتهان
ليزا : ما عاش الي يهينك يا بابا بس بردو لا مش هتجوز
كال : ماشي...
ويرجع مره اخرى الى حيث يجلس السيد جيون وجونكوك الذي لا يعرف ما يحدث
كال : اسف عالتأخير
دخلت ليزا بكل فخر وسعاده لان والدها وافق على قرارها
كال : احنا موافقين عالجواز
وكانت هذه الجمله كالصاعقة على أذن جونكوك ولكن ليس مثل ليزا التي تصنمت في مكانها من هول الصاعقة
جيون : طب جميل نسيبهم بقي سوا ونقوم احنا
قام كل من جيون و كال وهمس كال لليزا : عشان تتربي
وليزا لا تصدق ما حدث للتو
جونكوك : انتي..وافقتي ليه؟
ليزا : انت الي وافقت ليه؟
جونكوك : عايزه الصراحه.. انا ولا موافق ولا نيله ده كله من عمايل بابا
ليزا : وانا بردو ده انا كنت لسه بقوله اني مش موافقه هو ليه عمل كده؟!!
جونكوك : احنا لازم نفكر في حل عشان نطلع من الورطه ديه ولو اني مش عارف هتفكري ازاي بميكي الي انتي لابساه ده
ليزا : لو سمحت متغلطش في ميكي
جونكوك : يعني غلطنا في الإمام البحتري ياختي
استغرقوا حوالي خمس دقايق في التفكير
جونكوك وهو يضغط على رأسه : فكر فكر فكر
ليزا : ايه ياعم جيمي نيوترون انت!
قبل أن يبتسم جونكوك
جونكوك : وجدتها
ليزا :!!!!
جونكوك : سوري بس الهيافه مسيطره عليا... ايه رأيك نطاوعهم ونتجوز عادي عشان هما يرتاحوا و...
ليزا : واو عالعبقريه انت ازاي كده.. متتكلمش تاني
جونكوك : انا كملت كلامي؟
ليزا : الباقي متوقع
جونكوك : يارب هتشل.. هو ده احساس بابا لما بقاطعه كتير! يا حبيبي يا بابا
ليزا : اخلص يابني
جونكوك : هنتجوز قدامهم بس.. بمعنى اننا قدامهم زوجين حبيبه قمرات حلوات عسلات.. لكن كل واحد هينام في اوضه.. كل واحد يخرج ويدخل براحته ومن غير ما يسأل التاني ولا كأننا متجوزين ها ايه رأيك؟
ابتسمت ليزا بسعاده : لا يابا ده انت دماغك متكلفه بجد حلوه الفكره
جونكوك : مبحبش اتكلم عن نفسي كتير
ليزا : اشطا كدا احنا في السليم يلا نطلع نقولهم اننا خلاص استبينا
يقاطعهما الرجلان
كال : ها خلاص استبيتو
جونكوك ينظر له ثم لها : صحيح هذا الشبل من ذاك الأسد.. قال استبينا قال
ليزا : ايوا خلاص انا موافقه وهو موافق
جيون : الف مبروك يا حبايبي الفرح الخميس الجاي
نظر الاثنان لبعضهما بصدمه وتحدثا سويا : بالسرعه ديه!!؟؟
كال : ايون
جونكوك في نفسه : احيه انتوا ليه سراع كده اللهي تخشوا النار بنفس السرعه
ليزا في نفسها : حلوه الورطه إلى بقيت فيها ديه لا وجديدة