العيون عندما تتكلم
البارت الثالث
مات احمد بحادث مروري بطريق ديالى بغداد هذا كل العرفناه من عمته ..... ردنا نروح لبيتهم بديالى بس ماجنا نعرف العنوان وحتى عمته من بعد ذيج المخابره مبايلها كله جان مقفول .... +
وئام مرت بكآبة حادة ....منطوية على نفسها
تكضي اغلب وقتها نايمه بغرفتها ...حاضنه قميص احمد وتهمس بأسمه ...فاتتها امتحانات اخير السنة وهي هم جانت لازمة عدة يعني بكل الاحوال السنة خسرتها وخلص
ماجان يطلع من ايدنا شي ....هي حقها هذا زوجها ...احمد رغم الفترة القصيرة العاشها ويانا والي مجاوزت سنة ....بس كدرنا نتعرف عليه وعلى اخلاقه
كل يوم يمر جان يثبتلنا انو هو رجال من ظهر رجال
كد المسوؤلية ...شال البيت وكأنو هو صدك المسوؤل عنا ....يعني هسه عرفت انو الانسان مينقاس بالعمر لكن ينقاس بطريقة التفكير والوعي
يعني اذا كلت عقل احمد احسن بمليون مرة من عقل خطيبي المبجل ؟؟؟ جان عمر اسامه 27 بس والله تصرفاته مراهق ميسويها ....
اليوم قررت اروح احجي ويه اختي ...كافي بعد اربعين احمد طلع وتقريبا فات على موته شهرين ....وهسه هي حامل ولازم تنتبه على طفلها ....خاصة وانو هي هسه تقريبا دخلت بشهرها ....
دخلت للغرفه وشفتها متمددة على الفراش وصافنه بغير عالم ....حاصنه صورة زواجهم بقوة
كعدت بصفها وكتلها بهمس
_ وئومه ...حبيبتي ...كافي الدسويه بنفسج ...ادعيله الله يرحمه ويغفرله
التفتت عليه ووجها اصفر وذبلان
_ مااكدر اصال ...مااكدر موبيدي ...مااكدر اتخيل انو احمد صدك مات وبعد ماشوفه ...يالله ماصارلنا سنة من اتزوجنا ....ليش ياربي ...ليش الا تاخذ احمد هو من دون كل الناس ...ليششش
_ كافي وئام حرام هيج تحجين ...كلشي يتم بهاي الدنيه الله اله بيها حكمة
صرخت بوجع
_ وشنو الحكمة من موت احمد شنووووو ؟!!!
هزيت راسي واني اباوع على حالها بشفقه ...ماادري شلون راح تنتهي هاي المأساة
_ استغفري الله وئام ....رب العالمين عوضج بقطعة منه ...انتبهي وحافظي عليه هذا امانه احمد يمج
حطت ايدها على بطنها وهمست
_ هو شمخليني صابره لحد هسه وممتخبله غير وجودة بداخلي .... من يرفس احسه وكأنو يكلي لاتزعلين ولاتهتمين اني يمج .....
مشت الايام وجسم وئام ثكل حتى حركتها ....
كل ساعة تمر كانو سنه علما دخلت بشهرها
حسيت وكانو مر قرن عليهت .... وحان موعد ولادتها .... حست وئام بالالام الساعة 2 ونص بالليل ....اتصلت على خالي الي اجانا بسرعه ...اخذناها للمستشفى ...وجانت ولادتها صعبه ومتعبه كلش .....
وبعد ساعات طويلة من الانتظار والقلق اجه محمد للدنيا .....وجان نسخة مصغرة من ابوه .
وئام بس شافته نست كل التعب ...حظنته وصارت تبجي بقوة ....وسمته محمد
من بعد ما نور محمد الدنيا بوجودة اتغيرت وئام وصارت متفتحة مثل الوردة ....محمد صار عالمها وكل حياتها ....
مشت الشهور .... ورجعت حياتنا لروتينه الاعتيادي ....بس رغم هذا هم منسته جانت دائما تدعيله وتسويله ثواب .....صح هم تبجي وتنوح عليه لكن مو مثل قبل ...وجود محمد جان هو طوق النجاة الها من المعاناة الجانت عايشته بعد موته ......
_ وئام المفروض اهل احمد يدرون بأبن ابنهم ...حرام عليج ...لازم تخابرين عمته وتبلغيها
جانت وئام تلعب محمد بحضنها وبس سمعت الكالته اختها راستا انطت ابنها لأمها وكالت
_ مااكول ولا اصلا ميستاهلون ....
امها جاوبتها بهدوء وصبر
_ شلون ميستاهلون ؟؟؟ انت هسه صرتي ام واكيد حسيتي بالامومه وشكد الضنه غالي ...يجوز هسه
قاطعتها وئام بحدة
_ يجوز شنو يمه ... يجوز شنو ....يهتمون بيه مثلا ؟؟ جان اهتمو باحمد الله يرحمه الي جان كاضي وكته كله ابغداد ....امه وابوه ميعرفون هو وين وشلون عايش ....
جاوبتها اصال وكالت
_ حتى لو ....محمد لازم يتعرف على عائلة ابوه
_ وليش بلله لازم
هلمرة امها جاوبتها
_ لان اذا عرفو بحفيدهم بدون ما تبلغيهم انتي راح يزعلون وياخذوها نقطه لصالحهم
جاوبتها وئام وهي تشيل ابنها
_خل يزعلون طبهم مرض ....الي سووه لاحمد ماريدهم يسووه لابنه ....
اخذت ابنها وراحت ....تنهدت امها وباوعت لأصال وكالت
_ هاي اختج والله مااعرف شلون تفكر ...
_ ميخالف يمه عذريها ...كلبها بعده ملجوم على زوجها ...والصراحة غير هي حقها ...هذوله مو اهل حشا الجلاب تحن الجهالها احسن منهم
_ حتى لو الاصول اصول ولازم يعرفون بوجود محمد
_ ماادري يوم ....خليها هسه الله كريم ...
...........................
رجعت من الدوام تعبانه وضايجة ....البنات بالمتوسطة صارو ميحترمون مدرساتهم ابد ....طبعا اكو مؤدبات بس هماتين اكو بنات لسانهن طويل ويراددن خاصة من يشوفون المدرسة بعدها صغيرة اكو بنات ضخامات وكانو اكبر مني ....بس عقل وتربيه ماكو ....اليوم لكفت وحده تغش وهي اصلا مستواها مو هلكد طلبت اجيب ولي امرها ...صارت ترادد واجاوب بكلام ممقبول ابد اضطريت اخذها للادارة وهما يتصرفون وحلفت مااقبلها بدرسي ابد لان اذا سكتت الها البقية راح يعتبروه جبن مني ويتشجعن ويسون مثلها ... .
دخلت للمطبخ وشفت امي مخبوصة تسوي جاي وتحضر ضيافه ...مطلعه الصواني الجديدة الي نستعملها للخطار بس .... كالبه الدنيا متعرف شتحضر وشتحط ...متوترة ومرتبكة ...سلمت عليها
_ هلو يوم .... شنو عدنا خطار ؟!!
STORY CONTINUES BELOW
بس شافتني تنفست براحه وكالت
_ اييي اجيتي الحمدلله ...روحي للهول بسرعه
_ خير شكو ؟؟؟
_ ابو احمد اجه كبل شويه هو واخته ام هشام وعاتبنا ليش مخبرناهم بحفيدة
عكدت حواجبي واجبتها
_ لا يالله شكد عيب ...زين وانت شجاوبتي
_ شجاوب متدكوليلي صرت بنص هدومي ...والله كمت امتمت بالحجي بس المهم كتلهم اتصلنا بام هشام ومبايلها كله مغلق ....هسه دروحي عيب كعدي يمهم
_ وئام وينها ؟؟
_ بعدها مراجعه من الكلية ..
هزيت راسي ورحت يم المغسله ....عدلت شعري لان اني مو محجبه ...جنت لابسه قميص كريمي مخصر وتنوره طويله ضيقه ...سحبت نفس واني احضر الكلام الي راح اكوله لابو احمد ...لازم نبين احنا الطرف القوي مو مهمه
دخلت للهول وكلت
_ السلام عليكم 3
.....................
جنت كاعد بالهول واني حاضن ابن ابني ...هذا ابن
يتبع
