الحلقة التاسعة
قل متى ستحبني
سميحه: الحقني يا ابني ياسمينا الحقني بسرعه
احمد: في ايه يا سميحه مالها ياسمينا في ايه؟
سميحه: انا مش عارفه مالها تعال والنبي بسرعه يا ابني تعال بسرعه
احمد قام يجري وراح لبنته اللي لسه في اوضتها
احمد دخل لقاها قاعده في سريرها
احمد: مالها في ايه يا سميحه خضيتيني عليها
سميحه: ما انا قلت زيك الاول ملهاش بس من ساعه الصبح وهيا كده ولا بتتكلم ولا بتتحرك ولا بتاكل ولا بتشرب ومهما حاولت معها ما نطقتش بحرف
احمد: انتي بتقولي ايه؟ لا طبعا
قرب احمد من بنته وقعد قصادها هيا باصه قدامها بس كانها مش شيفاه
احمد: بنبونايه حبيبه بابي الجميله حقك عليا لو زعلانه مني انا اسف
عارف اني زعلتك بس معلش سامحيني
مش هزعلك تاني ابدا
عارفه كلها بكره وبعده وهاخد اجازه كبيره وهنسافر انا وانتي وبس ونروح علي البحر
انا وانتي مش محتاجين حد معانا اتفقنا حبيبتي
ياسمينا :__________
احمد: خلاص بقي يا ياسو الجميله ردي علي بابي
ياسمينا :__________
احمد: ياسمينا خلاص يالا قومي يالا هناكل مع بعض
ياسمينا :__________
احمد: داده في ايه مالها؟؟ هيا ما بتتكلمش ليه؟ ؟
سميحه: معرفش من الصبح كل شويه ادخلها ولا نطقت بحرف وقاعده كده
احمد: طيب ما قولتليش ليه من الصبح؟؟
سميحه: ما انا قلت تلاقيها زعلانه لما انت مخرجتهاش امبارح وشويه وتقوم تلعب
احمد: ياسمين يالا بقي ردي علي بابي ياسمين
احمد مسكها ووقفها والبنت جامده زي ماهيا واول ما سابها اغمي عليها ووقعت فمسكها بين ايديه
احمد صرخ وشالها ونزل يجري بيها علي المستشفي وسميحه نزلت جري معاه وطول الطريق بيحاولو يفوقوها ما بتفوقش
احمد وصل المستشفي ودخلها والدكاتره اتجمعوا عليها وبعد كشف طويل واحد طلع لاحمد
احمد: بنتي مالها فيها ايه؟
الدكتور: انت قولنا بنتك مالها؟؟؟ ايه اللي حصلها؟؟؟
احمد: انت بتسالني انا؟؟ معرفش ايه اللي حصل؟ من الصبح وهيا كده ودلوقتي حاولت اكلمها او افوقها اغمي عليها
الدكتور: بنتك في حاله صدمه عصبيه طيب امها فين؟
احمد: امها متوفيه
الدكتور: اتوفت امتي؟؟؟
احمد: وهيا بتولدها
الدكتور: طيب حد اتوفي قريب؟؟
احمد: مفيش حد اتوفي
الدكتور: ماهو انت لازم تعرف ايه اللي سبب الصدمه دي لبنتك علشان تقدر تعالجها
شوف مين اللي بنتك خسرته او ايه اللي كان مهم وراح منها انت جاوبنا
احمد رجع لامبارح واللي حصل فيه
ممكن تكون بنته كده من امبارح وهو مرحلهاش؟؟
يمكن لو كان حايلها وفهمها براحه كانت فهمت
حاول يفتكر هو قالها ايه بالظبط؟؟ الكلمه رنت في باله
سلمي مش عيزاكي وما بتحبناش
غمض عنيه بهدوء وقعد مكانه وحط راسه بين ايديه
هو السبب في كل حاجه بتحصل
مراته ماتت بسببه ومقلهاش بحبك
سلمي جرحها وكسر قلبها
ودلوقتي بنته كمان بغباؤه هيموتها وهيخليها تروح منه
الدكتور: ايه اللي حصل؟؟
احمد: كانت متعلقه بحد بترتاحله وتروحله والحد ده معدش موجود وللاسف انا قلتلها انه مش بيحبها ومش عايزها؟؟
الدكتور: بس كده اكيد في حاجات تانيه مش لمجرد سبب واحد هتدخل في صدمه كده؟
احمد: لا مش سبب واحد دي حاجات متراكمه
لما مراتي ماتت متقبلتش بنتي وللاسف هيا عرفت ده بس انا قلتلها انا بعشقها وبحبها
المشكله انه الفتره اللي فاتت تقريبا اتخانقت مع كل الناس اللي اعرفها بسببها
امي وحماتي وكلهم وكان الكلام قدامها
وهيا فهمت ان محدش بيحبها منهم وجه امبارح كملتها انا لما قلتلها ان الحد اللي هيا متعلقه بيه ما بيحبهاش
الدكتور: الحد ده واحده صح؟؟ طيب ليه اللي بعدها عنكم
احمد: معلش الموضوع ده مش عايز اتكلم فيه؟؟ بس هيا رفضت تكون معانا ممكن بقي محدش يتكلم في الموضوع ده تاني؟ المهم دلوقتي بنتي تفوق
الدكتور: الاغماء كانت نتيجه انها فضلت كده فتره طويله بس هيا بقي هتتكلم امتي وهتتفاعل امتي دي حاجه بقي في علم الغيب بس احنا وانت هتحاول معاها وربك يسهل
احمد فضل طول اليوم جنب بنته يكلمها وهيا قاعده جامده ولا بتنطق ولا تتكلم وكأنها مش في العالم ده
يوم والتاني عدي وهيا زي ماهيا في المستشفي
سميره وهناء وكلهم عرفوا وجولها كلهم
كلهم: في ايه ياسمينا مالها يا احمد خير؟ ؟
احمد: ادخلولها
دخلوا وكلهم حاولوا يكلموها بس نفس النتيجه ولا بتنطق ولا تتحرك ولا تتكلم
احمد سابهم وخرج وهما خرجوا وراه
هناء: حفيدتي مالها؟
احمد: انتي مش عارفه مالها؟؟ خسرت سلمي عرفتي بقي مالها؟
هناء: انت بتتهمني ليه؟ انا مالي؟
سميرة: مين سلمي دي مالها يا احمد حبيبتي مالها؟؟
احمد باستغراب: بجد حبيبتك؟؟؟
انتو جايين ليه؟ عايزين ايه؟؟؟ سيادتك جينالك البيت كان ناقص تطردينا علشان حفلتك وتقوليلي هتاخد حاجتك امتي؟؟ جايه دلوقتي تقولي حبيبتي؟؟
وسيادتك رفضتي تماما فكره اني اتجوز علشانها ومصدقتينيش لما قلتلك علشانها ولما قلتلك انت اتحملي مسؤليتها معايا رفضتي
يبقي جايين دلوقتي ليه؟ وعاملين نفسكم خاييفين عليها؟؟؟
سابهم ومشي بعيد عنهم
هناء راحت وراه: رفضتك صح؟؟ عرفت بقي وصدقت انها ما بتحبهاش؟؟ بنتك كانت مجرد وسيله ليك لكن لو مش هتوصلك يبقي ما تلزموهاش
علشان بس تصدقني
احمد: ارحميني ارجوكي ارحميني ممكن ولا لأ؟ ارحميني؟؟
اخر النهار كلهم مشيوا واتمنوا انها تخف وسابوها لابوها
سلمي راحت الشغل وعرفت هناك ان ياسمينا محجوزه في المستشفي بقالها 3 ايام فطلعت تجري وراحتلهم
جريت علي احمد اول ما شافته
سلمي: احمد في ايه ياسمينا مالها؟
احمد بصلها باستغراب: انتي لسه فاكراها؟؟؟
سلمي: انا لسه عارفه حالا واول ما عرفت جيت بسرعه طمني عليها
احمد: طمني نفسك اتفضلي روحي بيتك ولا شغلك ولا شوفي انت رايحه فين؟؟؟
سلمي: طمني عليها مالها؟
احمد: ياسمين بنتي ومشكلتي انا وبس يبقي خلاص اتفضلي وسيبيني انا مع مشكلتي
سلمي: ما تحملنيش ذنبها
احمد: الذنب ذنبي انا خلاص اتبسطي
انا ابن كلب اني اتجوزت في يوم من الايام
وابن كلب يوم ما سيبتها تعيش وما قتلتهاش بايدي
وابن كلب يوم ما جيت البلد دي وجبتها معايا
وابن كلب يوم ماخرجتها بره البيت وتتعرف علي الناس وتعيش زي البني ادمين
خلاص كده ارتحتي سيبيني بقي في حالي بقي
عايزه مني ايه؟ ؟ روحي ياستي الله يسهلك طريقك اتفضلي
سلمي دموعها نزلت وهو كمان داري وشه بعيد عنها بس هيا حست بيه واتمنت لو من حقها تضمه وتقوله انها مش هتبعد عنه ابدا بس هو اللي مش عايزها
سلمي: انا اسفه يا احمد لو ده حصل بسببي اسفه
احمد: خلاص ياستي اسفك مقبول اتفضلي بقي
سلمي: طيب خليني اشوفها
احمد: لا معلش هيا مش ناقصه خليها تتخطاكي لو سمحتي اتفضلي من هنا
