A ZATO NA...!

Babi na Daya

*⋆☆A ZATO NA...!☆⋆*

        *⋆©Jeedderh Lawals⋆*

                             ☆⋆01⋆☆

              Assalamu Alaikum wa Rahmatullah. Yes, here is the first chapter. Kada ku manta, wannan tsakure ne kawai. Idan kin shirya, let's go...!!

Littafin 'A Zato Na' mallakin wadda ta rubuta ne, ba'a yarda wani/wata su canza kowace irin suffa ta wannan littafi ba.

'Da sunan Allah Mai Rahma Mai jin Kai'

'Kirr! Kirrr!!'...

Karan daya ziyarci kunnena kenan lokacin da na danna lambar wayar kawata Janan. Bata dauka nan take ba, sai da yayi kara kamar sau biyar.
Kafin ta dauka hakurina ya gama karewa, saboda haka tana dagawa, ban bari ko sallama tayi ba na tare ta da; "wai dallah can malama me kika tsaya yi ne kin tsaida mutane?".

Tace "jeez girl, bi a hankali mana. Ina jiran Anty Raheemah ne ta dawo kafin in fita".

Na ja dan siririn tsaki, "kawai ki fito ki bar mata gidan a haka mana. Ba maigadi yana nan ba?". Janan tayi ajiyar zuciya, "kin fa san abinda ya faru last time da nayi haka. Tace an shiga an mata satar kudi da jewelries, kuma dole sai da Yaya Bilal ya biyata sannan aka zauna lafiya, bana son abu makamancin haka ya sake faruwa". Nace "sai kiyi ta zama ai ta mayar da ke maigadinta. Ni dai wallahi idan baki zo nan da mintuna goma ba ko? Sai dai mu hadu da ke acan kawai!". Ban jira ta kara cewa komi ba na kashe wayar na ajiye ta a gefena.

Browsing naci gaba da yi da system dina, sai da nayi kamar minti goma sha biyar kafin na kashe na ajiyeta a mazauninta. Janan na sake dannawa kira, tana dauka tace "gani nan don Allah, sarkin gajen hakuri kawai!". Na tabe baki ba tare da na damu da abinda tace ba, nace "better. Idan kin iso ki kira ni kawai mu hadu a main entrance" tace "toh".

Gadona na dan gyara kafin ta iso. Zuwa lokacin da Janan ta kirani, na gama kimtsawa. Na dauki gyale na nada shi a kaina yadda ya zagaye rabin kirjina da bayana, na dauki wayar hannu, purse da flat din takalmi ruwan goro kalar veil dina da zanen flower da yake jikin doguwar rigar gown ta atamfa da na sa, na zura shi a kafata. Aylah, roommate dina na yiwa sallama na fita.

A bakin hostel din Queen Amina dake cikin campus din ABU Zaria, na tsaya ina karewa wajen kallo cikin neman Janan. Ina kokarin kiranta a waya na hango ta acan inda ake parking motoci a gefen hostel din tana dago min hannu, murmushi na saki cike da murna da dokin ganinta na taka a nutse na tsallaka zuwa inda take. A tsakiyar wajen ta tareni, muka rungume juna cike da doki. Duk duniya, ita kadai ce naki jinta kamar wata yar uwata ta jini, kamar yadda nasan itama haka take a bangarenta.

Na kalli iNext din da naga ta fito daga ciki ina daga mata gira, "Ya Almu ya sake sabuwar mota ne hala?". Ta girgiza kai tana murmushi, "ina Almu na yayi arzikin sayen irin wannan abun? Yaya Bilal ne". Na dan zare ido cikin mamaki, "Holy Wow!! Yaushe rabon da in ga Yaya Bilal? Har na manta wallahi. Yau dai Allah ya nufa zamu hadu kenan!".
Tayi dariya da tasa dimples dinta suka lotsa, abinda yake burgeni da haliitar ta kenan. Tace "sosai ma. Allah ne yasa ban samu abin hawa da wuri ba, shine yace bari ya kaini tunda shima wajen FCE din yayi. Taho muje, muna kara makara". Na bi bayanta zuwa wajen motar.

Janan ta bude gidan gaba, ni kuma na bude baya muka shiga a lokaci guda, bakina dauke da sallama. Sansanyan kamshin freshener na cytrus da mix din strawberry ya doki hancina hade da sansanyan sanyin AC daya dumame motar. Muna tsakiyar watan May ne, saboda haka ba karamin zafi muke sha ba a garin na Zaria.

A nutse na gaishe da Yaya Bilal, ya juyo a kaikaice ya amsa tare da juyawa ya tashi motar muka bar wajen. Babu abinda na iya kararwa game dashi sai cewa faded jeans ne a jikinshi da T-shirt mai zanen zebra a jiki, sai sunglass da ya saka ya sakaya idanunshi.