Strange Things Do Happen

2: EVERY ONE IS QUESTIONABLE

Subah ke 6 baj rahe the. Aur Mayank firse Prof. Gupta ke quarter ke samne ki lawn me baitha tha. Kal ke baad usne ye nahi socha tha ki use fir yaha choro ki tarah aana padega. Jis tarah wo Prof. ke quarter se bhaga tha, uske baad to uske saath sb ajeeb hi ho raha tha. Der raat use senior batch ke kuch students ne pakad liya aur raaf bhar uski ragging chalti rahi. Aur use Prof. Gupta ke quarter me akele jane ka dare diya gaya. Usne bahut mana kiya ki wo kuch or kam ker sakta hai sivay kisi faculty ke room me jane ke per seniors to jaise use hi waha bhejne pe tule hue the. So wo yaha baitha tha ki chupke se mauka dekh ker wo Prof. ke room me ghus sake.

"Sir, ko kya garmi nahi hoti?" Usne dekha ki sari khidkiyaan ander se ekdam band thi. Wo samjh nahi pa raha tha ki wo ander ghuse to kaise ghuse? Ek hi rasta tha ki Prof. khud hi bahar aaye or wo chupke se ander ghus jaye. Bechara esi intejaar me lawn me ek kone me pedo ke bitch chupa hua intejaar ker raha tha ki kbi to Prof. bahar nikalenge.

Lagbhag aadhe ghante ke baad Prof. Gupta apne gown me bahar nikale. Mayank ne unhe bahar jate hue dekha to chupke se wo unke ghar ke ander bhaga. Shayad Prof. Gupta ko bahar jyada der ka kam nahi tha esliye unhone apna darwaja khula chod rakha tha. Ye baat Mayank ne bhi notice ki thi esliye wo apna kam jaldi ker lena chahta tha. Mayank jaldi se unka koi saman leker bhag jana chahta tha taki Prof. ke aane se pehle wo bhag sake aud Seniors ko bhi ye proof de sake ki wo unke room me wakai gaya tha. Usne room charo taraf dekha ki aisa kaun sa saman ho sakta hai jise wo chupa ker le ja sake taki Prof. ko pata bhi na chale. Waise bhi wo unka saman baad me lauta deta. Shayad ragging ki baat wo khud hi samjh jate.

"Kya le jau aakhir?", Mayank ko jaise kuch samjh nahi aa raha tha. Wo room me ek taraf rakhe desk ko gaur se dekh raha tha ki tabhi ander gate se kisi ke aane ki aawaj aayi.

"Lagta hai, Prof. wapas aa gye!", usne jaldbaji desk ke niche ke drawer ko kholker dekha. Usme koi diary rakhi thi. Usne bagair jyada kuch soche use nikal liya aur drawer band kerke kitchen me jaker chup gaya. Use ab tk me ye lagne laga tha ki agar Prof. ne use pakad liya to wo to es university se nikal diya jayega. Seniors to ragging ki baat manenge nahi or wo bechara fas jayega. Kal ke baad se wo khud ko chor jaise hi koi criminal samjhne laga tha. Khair Prof. ander aaye per ander aaker unhone sirf apna gown badla or firse bahar chale gye. Es baar unhone darwaja bahar se band ker diya tha. Shayad wo akele rehne ke karan apna jyada waqt bahar hi bitate the or khana bhi bahar hi khate the.

"Ye kaha mai fas gya?", Mayank apne aap se ho bola. Wo janta tha ki ab to use khidki se kood ker bhagna padega. Use kismat ne bachne ka mauka de diya tha per use dar tha ki kahi aaj uski lecture na chut jaye. Wo kitchen se bahar aaya. Usne kamre ko ab achhi tarah se dekha. Use kamre ki halat dekh ker bilkul aisa lag raha tha ki jaise kuch logo ke bitch yaha hathapai hue ho. Bister pe buri tarah salwate padi thi. Prof. ne almari khuli chod rakhi thi. Unki study table pe kitabe bikhari padi thi aur sari khidkiya band hone se kamre me ajib si badboo bhari padi thi.

"Es kamre me kaun sa ensan jinda reh sakta hai?", khud se baate kerte hue Mayank ne left me bane bathroom ka darwaja khola. Sham se leker abhi tak me use ek bhi bar toilet jane ka mauka nahi mila tha.

Lekin shayad bathroom khol ker usne achha nahi kiya. Basin me charo taraf khoon ke cheete pade the. Bathroom ka farsh bho khoon ke dhabbon se bhara pada tha. Wo jaldi se bahar aaya aur seedhe kitchen ki taraf bhaga. Kitchen me lagi badi si khidki ko wo pehle hi dekh chuka tha. Usne kitchen wali khidki kholi or bahar ki or chalang lagayi. Fir lawn se lagi boundary se chalang laga ker wo bahar aa gya. Uske paas abhi bhi Prof. ki wo diary thi, jise usne apne paas chupa rakha tha. Usne us diary ko apni shirt ke ander chupaya or hostel ki taraf bhaga.

................

At 10 AM:

Criminal psycology ki class chal rahi thi. Aur Prof. Gupta usi tanmayta se pada rahe the. Wo crime se judi theories discuss ker rahe the-

"Class, apne ne Mr. Jeremy Bentham ka naam jarur suna hoga. Yes, unhone hi Utilitarianism ka concept diya tha. Jise hum sab log jante hain ki The Great English thinker Mr. J.S. Mill ne aage badaya. To hum criminal theories ki baat ker rahe the. Mr. Bentham ne Utilitarianism ko criminal psycology se jodte hue ek nayi theory present ki jise hum...."

Mayank ka dhyan es lecture per bilkul bhi nahi tha. Shayad aaj Mayank ko chod ker dusre students jyada attentive hoker class ker rahe the. Use kal se hone wale sabhi incidents ajeeb lag rahe the. Surely Prof. Gupta ke ghar use dono baar jo experience kiya wo puri taraf ajeeb lag raha tha. Lekin sath hi use kuch dusri baate bhi ajeeb lag rahi thi. Wo subah hostel aaya tha to use pura yakeen tha ki seniors use fir pakadenge aur Prof. ke quarter jane ke bare me proof magenge. Lekin un senior group me se kisi ne usse koi sawal nahi kiya. Balki wo khud jab unke pas wo diary leker gaya to un logo ne use dekhte hi bhaga diya aur use dhamki bhi di ki es ragging ke bare me kisi ko kuch na bataye or khud bhi ese bhool jaye. Wo log pata nahi kyu etne pareshan lag rahe the... Aur Prof. se judi her baat etni ajeeb kyu thi? Pehle din kisi ke cheekhne ki aawaj, unke room me bhari kisi laash ke jalne jaisi badboo, bathroom me khoon ke dhabbe jaisi cheeze use bahut pareshan ker rahi thi. Wo biology ka student raha tha. Uske papa medical field se jude the or esiliye wo en bato pe achhe se gaur ker sakta tha ki wo khoon ke dhabbe kisi zinda ensaan ke nahi the aur wo badboo kisi jali laash ki thi. Per wo ye sab baate kisi se nahi keh sakta tha. Abhi jab use khud bhi puri baat nahi pata thi aur usk baato pe yakeen kerta bhi kaun? Wo bhi ek eminent personality ke khilaf..  tabhi uske dimag me kuch dusre khyal bhi ghumne lage.

"Kahi un logo ka mujhe hi Prof. ke quarter bhejna bhi ajeeb to nahi? Ye baat coincidence hai ya fir kuch or?, Mayank shayad ab her baat ko rational hoker sochne laga tha. Wo apne me hi khoya hua tha ki achanak Prof. Gupta ki tej aawaj aayi. Use laga ki wo usse hi bol rahe the.

"Fourth Row, 2nd Bench! Ap edhar aaeye or abhi maine jo theories aapko sabko batayi unse related examples aap puri class ko bataeye!" Prof. Gupta ne Mayank ke bagal me baithi ek student ko bulaya tha. Wo ladki bade dhyan se Prof. ki lecture ke points note ker rahi thi. Apne bare me sunker wo confidently uth ker board ke samne gyi aur kuch examples batane lagi. Mayank ne ab pehli baar jaker class per kuch dhyan de pa raha tha. Pata nahi kyu per use ladki ka chehra kuch jana pechana sa lag raha tha. Jaise usne use kahi dekha tha. Tabhi uska dhyan Gupta Sir ki baato pe gya. Wo kuch case study likhwane lage-

"Man lijiye aap kisi ke ghar usse milne jate hain aur aapko wo ensaan to nahi milta lekin aapko kisi ke cheekhne ki aawaj aati hai to aise me aap kya sochenge? Kya aap ese kisi beemar ki aawaj samjhenge ya fir aisa samjhenge ki usko chot pahuchayi ja rahi ho? Dono hi cases me aap ka reaction kya hoga aur kyu hoga? Ap logo ko aaj ka home work yahi hai ki aap eska detail me answer likh ker laye. Waise ye case study apko out of topic lag sakti hai per mujhe lagta hai ki es subject se jude her pehlu ko samjhne ke liye apka en sawalo ko samjhna bahut jaruri hain. Specialy un students ke liye to or bhi jaruri ho jata hai jo aisi kisi situation me dar ker bhag jate hain!"

Prof. Gupta ne ye baat normally bina kisi expression ke kahi thi per Mayank ko aisa lag raha tha ki jaise ye baat uske liye hi kahi ja rahi thi. Use Prof. se judi her ek baat bahut jyada ajeeb to lag hi rahi thi per sath me use ab or bhi dar lagne laga tha ki ye sab uske sath hi kyu ho raha tha. Usne kisi tarah khud ko control kiya or class ke khatm hone ka wait kerne laga.

.....

AFTER CLASS,,

Prof. ke jate hi Mayank ne socha ki use us ladki ka naam puchna chahiye. Wo uth hi raha tha ki wo ladki khud hi uske paas aayi aur usne kaha-

"Hello Mayank! I'm Purvi. Maine socha ki esse pehle tum mera naam pucho usse pehle mai hi bata deti hu. Aur tumhe lag raha hai ki tumne mujhe pehle bhi kahi dekha hai!..."

To be Continued.....