اكتفيت بي إني اعاين لزين بإستغراب منتظروا يتم كلامو ! قال لي انا عايز اتزوجها .. قلت ليهو زين ؟ واعي للبتقولوا؟ قال لي اي يارياض وماتفهمني غلط ، سندس دي بت ناس و نضيفه من جوه و اي زول بتمناها شخصيتها حلوة و قويه .. قلت ليهو زين ! بديت اغضب قال لي رياض انت هسي متزوج البمنع شنو اني اعرسها ؟ قلت ليهو زين ما قادر استوعب البتقول فيهو زين كلامك ده بعني لي حاجه واحده انو انت عينك على سندس من يوم عرفتها ! زين انت اخوي ؟ كيف قادر تعاين للبت الدايرها اخوك! قال لي رياض انت كنت دايرها و زيها زي اي بت عرفتها فتره وعلاقتكم انتهت .. بحلف ليك انو ما عندي علاقة بيها ولا حصل اتكلمتا معاها حتى او لاقيتها ولا لما كانت حبيبتك انا كان عيني عليها ، رياض انا عايز اعرسها عشان استرها واحافظ عليها من الناس .. ضربتا ليهو التربيزه و كان بإمكاني اقلبها اللحظه ديك بس مسكتا اعصابي بالعافيه قلت ليهو تسترها ! تسترها كيف ؟ قال لي انت ما كنت هناك ايام العزاء ما شفتا ناس الحله كانوا بتهامسوا كيف و بتكلموا فيها رياض عاملين ليها سمعه انها بت ماكويسة و انها بتركب العربات و بتطلع وتنزل و لبسها كعب .. انا و انت عارفين سندس بت ناس بس لانها كم مره طلعت معاك وشافوها معاك فخلاص بدوا يتكلموا فيها ! قلت ليهو عايز تثبت لي شنو ؟ اني خليتها وهي في عز حوجتها لي ! اني مشيت عرست غيرها ؟ اني لعبت بيها ؟ طيب اي انا معاك انا ما كنت راجل معاها و اتخليت عنها في اكعب الظروف انت عايز تصل لشنو ؟ قال لي رياض سندس محتاجه لعريس يسكت عنها الف لسان في الحله ، محتاجه لزول يسندها و يقيف معاها هي و اهلها ، قلت ليهو ومن بتين انت حنين كده ؟ زين ما داير اكتر كلام معاك كلمتين و حاقولهم شيل سندس من راسك والا انسى انك بتعرفني قمتا على حيلي عايز امشي قال لي و اذا ما شلتها ! عاينت ليهو وقلتا يبقى تاني سلام الله ما بينا ، قال لي رياض استهدى بي الله و اقعد ، انت وسندس علاقتكم انتهت و تاني مافي رجعه ليكم رياض انت متزوج ما تخليك اناني و تحكم على حياة البت .. خليها تعيش حياتها زي ما انت شفتا غيرها ، قلت ليهو انت منتظر مني شنو ؟ افرح ليك ؟ قال لي انا قلتا اكلمك ، قلت ليهو زين اسكت انت ما شايف منظرك كيف وانت بتتكلم قال لي طيب ، سألتو قبل ما امشي سندس عارفه ؟ قال لي لا لسه .. قلت ليهو ومستحيل توافق بيك انت خسرت صحبك و ما حتكسبها اساسا ، قال لي و اذا سندس بقت مرتي ! قلت ليهو لو حصل انا الحاطلبها معاك اليوم داك لأني متأكد تماما انها انضف من ضميرك ، ماعارف كيف سقتا العربيه بالقوه الكانت في يديني الوقت داك حسيت اني مشتهي اكسر حاجه ! عايز اتفشى ! عايز اضرب زول .. ليه ماضربتو ؟ ليه ما طلعت غضبي فيهو ! ليه ما خنقتو في مكانوا ؟ زين ؟ ما قادر استوعب لحدي الآن البحصل معاي ده ! دي حياة منو دي ؟ كيف الناس الحوليني يطلعوا كلهم انانين و انا ما كنت شايفهم ! .. كنت متأكد انو سندس ح ترفض زين ايماني بيها اقوى حتى من علاقتي بصاحبي ، كنت متأكد انها ما ح ترضى تختني في موقف زي ده ، ما اتناقشت مع زين تاني و لا حتى سألتوا ح يعمل شنو .. جاني اشعار من البنك انو في قروش اتسحبت اتصلت على امي هي الكانت ساحباها ، سألتها من السبب و قالت لي عايزاها لوكالة الزمرد قالت لي عايزاك كمان في موضوع لمن تجي البيت .. لحدي المساء ما مشيت شقتي فوق و نزلت ليها قعدتا معاها و سألتها الحاصل شنو ! قالت لي انو الشغل الأيام دي واقف في وكالة زمرد و انو الاصطاف الشغال فيعا تعبان شويات قالت لي انا بقترح انو نمسك الاداره لزين و ندخل معاهو في شراكه كإيجار مثلا .. ح نحدد ليهو مبلغ معين يدفعوا بداية كل شهر لأنو الوكاله واقعه في الارض ضحكتا و قلت ليها زين عايز يشاركني حياتي و شغلي ! قالت لي رياض ؟ قلت ليها امي زين عايز يعرس سندس ! قالت لي و احنا مالنا ؟ قلت ليها امي دي سندس ؟؟ جات ياسمينه نازله بدون مقدمات بتسأل فيني رياض ! زين عايز يعرس ؟ امي قالت ليها تعالي حبيبتي اقعدي هنا ❤ قعدت جنبها و سألتها امي زين عايز يعرس ولا انا سمعتا غلط ؟ قالت ليها سمعتي صاح والله ناوي بعد ده للعرس شكلوا بغر من صاحبو .. عاينت لي امي و سكتا سألتني اها وافقتا ؟ ياسمينه قالت ليها على شنو ؟ قالت ليها قلنا ننقل ادارة وكالة زمرد لزين احسن لينا زول بنعرفوا و بنثق فيهو يمسك الاداره و في الاخر المبنى حقنا .. قالت ليها فكره حلوة والله يا امي لانو الوكاله واقعه الايام دي و رياض طبعا وافق صح ؟ عاينت لي امي و ياسمينه و قمتا و انا ساكت هو انا راي مهم ؟ ... مرت الايام و في يوم متعب ومرهق من ايام الشغل جات الوكاله ❤ سندس ! بعد المده دي كلها ؟ بنفس الجمال و السمار و الأناقه 🌷 بنفس اي حاجه جميله خاالص 😍 .. الا انو روحها متغيره تماما .. ردودها متغيره و كأنوا قلبها مات مع موت ساجد ! فاقده طعم الدنيا و ما مهتمه لي حاجه ! سلمت علي بكل برود و باركت لي ، بعاين لعيونها و هي بتعاين بعيد ما عايزه عيونها تلاقي عيوني ؟ كأنها هربانه من حاجة .. عايزة تظهر انها قوية قدامي و انا عارف انها مكسورة شديييد من جواها ، حاولتا ارد برسميه زيها لأني انا برضو ماعندي الحق في إني أسأل من برودها و تغير مشاعرها بعد كده .. سألتني اذا في طريقه للشغل قلت ليها ما في مكان هنا عندي .. عاينت لسندس ولأول مره اشوف الحوجه في عيونها .. سندس البعرفها لو ما محتاجه ما كانت إتجرأت وقفت وقالت لي عايزة اشتغل ، غرورها وعنادها الإتكسر ده وراهو موت ساجد الدخل فيها خلعه وخوف غريبين شديد ما بشبهوها ، قلت ليها بس وكالة الزمرد تحت اشراف زين و تقريبا بكون عندو مكان لأنو ما كان مرا كتير على ادارة زين للوكاله ! اتصلت ليهو تلفون و سألتو في مكان ؟ كنت متأكد انو ردو ح يكون اي في .. لأنو منتظر الفرصه البتلموا بي سندس .. كلمتها و ما إتأخرت بالطلوع ! مشت طوالي ركبت للوكاله .. كان بإمكاني ما اوصلها لزين بس كنت عايز أتأكد ممكن سندس توافق بي زين ! ممكن تعمل زي امي واخواتي وصحبي ! اشتغلت عند زين لآيام و أسابيع و جا اليوم الإتفاجأت فيهو بتلفون من زين ، بكلمني انو ح نمشي نتقدم لي سندس يوم الخميس ! كأنوا بمكالمتو بحاول يثبت لي انو دي البت الكنت خاتي املك فيها ! باعتك زيها زي بقية اهلك .. حاولتا اكذب زين لأنو لو صحبي غدر بي عادي ف سندس ماحتعمل كده لأني بعرفها ياخ ..مسكت التلفون وضربت ليها من بداية رفعتها كوركت فيها و من طريقة كلامها ورتني انها موافقه و بشده على زين ! مصدوم منها ؟ كيف تعمل كده ؟ بدا الشك يدخلني انها من الاول عرفتني عشان وضعي ؟ بديت اشك انو كلام امي من البدايه صح ! بديت اشك فيها و في اي زول حوليني .. الخميس جا و أنا جاهز عشان اطلب يدها لصحبي ! ما لأني اتحديتو لأني عايز اشوف وشها كيف و هي لاقياني داخل مع زين .. عايز اعرف جرئتها ح تصل وين لمن تشوفني بعاين ليها .. كل القوه المشيت بيها بيتهم اختفت لمن سندس جات طالعه بفستانها ❤ بإكسسوارها اللابساه😢 بجمال طلتها ، لساني اتربط اللحظه ديك بقدر ما كنت شايف نفسي قوي بقدر ما ضعفتا لمن قعدت قدامي و واجهتها ؛ انانيه انتي للدرجه دي ! اناني صحبي شديد بس انتي طلعتي اكعب منو ، اللحظه الكنت متمنياها معاك انتي وريتيني ليها مع زول تاني ؟ عارفه اني ماقدرتا اقرب من مرتي ؟ عشانك ! عشان انا ما قدرتا اشوف غيرك حتى بعد الزواج ! كان ممكن تعرسي اي زول و ما كنت ح اتضايق منك .. كيف قدرتي تعملي كده مع اقرب صاحب لي ، مستغرب منك و منو ماخدين الموضوع عادي ! هو قايل انك كنتي زيك زي بقية البنات وطيب انتي ماعارفه نفسك كنتي بالنسبه لي شنو ! انتي مريودتي😢 أنا ما ح اغفر ليك العملتيهو ده طول ما انا عايش و فيني نفس لسه ، انتهى اليوم و انا ماقدرت بعد اليوم داك اكون شديد .. ياسمينه كانت ملاحظه تعبي و ارهاقي الملازمني طوالي ، اصرت نمشي للدكتور و انا عارف انو الجواي ما محتاج دكتور .. جا يوم العرس و قبل عرسها انا مرضتا شديييد كنت ماري بحالة خمول و جسم مكسر و حمى شديده حاره ، راقد في السرير تلاته ايام قبل العرس و لحدي ما جا العرس خليت ياسمينه تمشي تحضروا عشان اقعد براي بحمتي .. مافي زول من اهلي اليوم داك جاني عارفين انا مالي و كيف ماحيعرفوا سبب المرض و هم الكانوا سبب ، متخيله اني بكيت ! بكيت ياسندس ؛ رجعتيني اكون طفل من اول ، خليتيني ابكي اليوم داك زي الاطفال ، صغرتيني قدام نفسي وحسستيني اني عاجز شدييد ! انا ما ح انسى ولا ح اغفر ليك العملتيهو فيني ده ، كل الناس في كفة و انتي كنتي براك في كفه ، خنتيني زيك زي بقية اهلي وانا ما حاغفر ليك
في كومنتات كده ❤ اي انا سندس الفي الصوره ، بس ما انا سندس زاتها الفي القصه ، ولا سندس الجميله البوصف فيها دي 😂😂 انا بوصف في بطلة القصه انها جميله شديد وسمراء ❣ ما بوصف في نفسي ياجماعه 😂😂💔
#تابعوني
