تمنيته رجل بيتي (مكتملة)

سامحيني

#الكاتبةورودالخالدي

#تمنيته_رجل_بيتي

البارت7

طيبة:::

وصلت للبيت حالتي حاله ماما شافتني كالت:

شبيه وجهج اصفر مثل النوميه؟

جان بابا يجاوبها:

طلعتلها حيه بالمحل واخترعت خطيه دخليها اقريلها قرآن  بلكي ترتاح شويه

فماما كالت:

يااااا حيه.. شجابها للمحل؟

هذا البصفنه محله بيه حبوب ومواد غذائية ويسفي فار والحيايه يجن  الفار

جان تباوعلي امي:

وانتي شبيج مخلوسه يحظي هيه حيه قابل شفتي طنطل.!. اشو جنت بالبستان مال بيت جدي عادي الحيايا يفترن جوه رجلينه ولا نخاف ولايهمنا.. اووف بنات هالوكت يخافن من الصفير عشتو.. ديله فوتي بدلي حتى تتغدين

طبعا ماما هيج طبعها  ابد ماعدها عاطفة كلبها جامد من وعيت  الدنيا وهي هيج.. صح تشتريلي واتدللني من جنت زغيرة بس ابد محسيت بحنانها دائما احسها بعيدة عني وجامدة.. وصوتها عالي وحتى بابا شتكوله يكولها صار.. اني علاقتي ابابا احسن واقوى بابا حيل حنين وكلبه واسع من اني زغيرة علمني احجيلة كولشي بحياتي وحسسني اني اغله شي عنده ولهذا اميل لبابا اكثر من ماما.

رحت لغرفتي واول صورة جتي بخيالي هي وجه غسان من شابكني حيل ويبوس بيه جان مغمض عيونه عبالك ديحلم رايح بغير عالم.. كأنه اني فد شي غالي عنده وحيل مشتاقله ومتلهف عليه جانت بوساته حيل ملهوفة وقويه واني من كد الخوف مخليه ايدي ع صدرة وادفعه بهدوء ادية مرتخيه من الرجيف والخوف.. بس كلبي حسيته حيوكف من مد ايده ع اللاستيك مال الستيان ارتعبت كلت هذا شراح يسوي تشجعت دفعته حيل وصحت بيه هو ارتبك فز عافني وطلع من الغرفة بس هو ليش  هيج سوه ما ادري يكول فقدت من شفتج بدون قميص.. يعني معقوله هيج يسوي بهالسرعة وهيج يندفع وهو شمفكرني يعني اني اباله من هذني البنات الي يكدر ياخذ منهن الي يريدة  واني الي جنت متوقعة انه هو مؤدب.. بس لا.. لا عيونه تكول هو  مكدر يسيطر ع نفسه فعلا اتذكر حجاياته يعتذر مني.. اسف.. اسف طيبة ما اعرف شأحجي.. جان حيل مرتبك وندمان ع الي سوا.. بس بكل الاحوال لازم ما اسكتله لازم اعرفه انه هذا الي سوا غلط وملازم يتجاوز حدودة ويايه

تغديت بدون شهيه.. ودخلت لغرفتي الى ان صار الليل اجه بابا جايب العشه بس شكله ضايج سمعته يكول لماما:

كيفت كلت البضاعة راح تمشي بيومين اتلاثة هسه طلعتلي شغلة صفح

ماما كالت :

خير ياستار شكو؟

هذا العامل غسان انطاني المفاتيح وكال امي متخربطه ولازم اروح لكربلا